Lucas ilisant'iyijpe
ilisant'iyijpe
Lucas i'winkints'e'm pet ti Jesús je napokata napo jika kia'lis siunapo ti 'yaka ti tijna'yi ka jijwajietiye. 'Yina wikie'eyi siunapo i'nio' yi' ape'e 'ni ajnat ti kia'iyo jijwajietiyis. Siu'neje ti 'yakajanit ti siuti 'nes ajnat'e naka jla'am siunie jikap'ijliuskiye iyo ti yi'ne napo i'nio' p'ijliusis siu'neje ti iniuyeje napoka ti istie pet ni ji'niayi (4.18-19). 'Yina a'wena ti ijiate ti Jesús ti ip'ilisijne'n, iniuyeje tempi it'imina ti kia'iyo ti i'winkina siuniwa ilisane ti yisi'lietk'i.
Po'neje siunie Lucas i'winkints'e'm naka siunie inkanitieye. Siupuwa jlomas ti Jesús k'iejli yiyeje'n, siupapo i'nio', siupapo injlojwajnas poli jlele, siu'neje papo sontas jiwos wuj ti inkase'n (capítulo 1 siu'neje jana 2), naka 'neje siunie ti yapilie poliyi t'eyasajnas je jlase' siupi iyo ti inkase'n jla'yi ti iyunitis.
Lucas inkakiewo wuj t'ipi, jla'yi ti je Judío. Ini'wene pa injlojwanik Pablo yi' japa ajnat Troas, pakat'iyijpe ti taka'neyasanayi pi iyot'iyipi pa Jesús, kajeyepa je itiant'ieje. Lucas ijwi'il siuniwa je ijwi'il pa Mateo, jla'yi pa Marcos, siu'neje pa Juan. Siupa ti injlojwanik poli jlele inikajanitia'm papok sontas jiwos, nak lajak'ipa ka ine'yi, siu'neje ti iyoyi jika'niyejayi ti sek jane'yiji'n yi'i japa ajnat Belén. 'Yina je kat'aja ka inamtiyi siupi ti iyo jwemikie' pa Jesús nakata wek jla'am siupa ti jiniewot iyoyisijyi'n, pakayi ti i'winis ts'e yi'i japa 'najla'wet yi' Jerusalenne, ti its'iuye'ni siupapo i'nio t'ipi Moisés jika'neyasajnayewos (2.41-52).
Pakat'ipi jla'am Lucas ti 'yotat siupuwa jlamtis pa Jesús ti i'yejnap jiwek siupa Samaria jlele t'ipi ti jlosik po' (10.25-37), siu'neje pa i'nio' ti isiwaliyi'i pa jitis iyo pa jlas (15.11-32).
Siuniwa ti ijiate ti 'yakajets'iyi ti ti'yenaja yi'i siuniwa Lucas jilisajna', siunie 'najlaye, siojona Sinia' jikimet ti 'es jikijmaye iyo, papo asejnia ti iniuyeje pa Jesús, siu'neje ni ti Sinia' initiajnat ni inke'. Ts'ijiye ti Lucas poye'eje ni jip'esinik naka Siupuwa Iyot'iyipi Papo Injlojwajnas (Hechos).
လက္ရွိေရြးခ်ယ္ထားမွု
Lucas ilisant'iyijpe: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.