TĨĨGI WERE 6
6
Baa hay ɗig go ga se caa wer jar téebeere wo go
1De maga jar téebeere tĩĩ wo dusgi wo go ciŋ ti sir lam no, day kal wo biŋ mayre lay, 2weere mani Baan#6.2 Weere mani Baan : Ɗúu sen mo taʼ wãã diŋ ti wose wo la ama wer ɓe bay nen jar celel wa. Jar po yaŋ ɗig wo ga á wãã diŋ ti jar peele Baa wo. kal wo koge ga mayre mani jar téebeeren hay wo de woore, day diŋ yoo ɓaara so ga saara kal far naare ɓaara wo lay.
3Doo kay nono Manwur day ga : Nenterse ɓin joŋ ge ɓil je táabay ma tum gà werga á diŋ hõõgese, day naw ɓen ɓuy taw ge kiŋgi kis ti ɓe doo ɓoge. 4Sen hay diŋ ti wur maga jar ma ngrim ngrim hay wo gesiŋ lam no, blam maga weere mani Baan nduu wo da mayre mani jar téebeeren wo, day kal wo biŋ weere de ɓaara lay mono. Mono diŋ jar se ga hay joŋ wo blumri le ti wur ma ɓaan mo so no. 5Manwur kal koge ga debaycõõre je táabay hay joŋ kluu gesiŋ la debaŋ. Day tum ti naw, jiili ɓe wo go de kaŋge diŋ ti ɗiggi ma de ɓlagge wora. 6Manwur kal ferge lawge ti maga se joŋ je táabay go gesiŋ lam no, jiili ɓe kal caage go. 7Manwur day ga : Ndi caa ge wer je táabay maga ndi joŋn ciŋ ti sir la go. Tĩĩ wer de je táabay kaʼ hãã leʼ go ti horog wo, de fẽẽre ma seɗge de ɓil wo, de weere dweere ma ciŋ wo. Ndi fer lawge ti maga ndi joŋ ra go mono. 8Ama Manwur kal joŋ ɓil de el ɓen see Nowe.
WÃÃRE NOWE
Maŋge bii no
9Mokay diŋ wer ma ni Nowe no. Nowe hay diŋ je ma de deele, day keɗed yoo jar ma ti kal ɓen wo no. Nowe hay seege ti jag Baa.
10Nowe biŋ weere swaʼa, Sem, Kam wo de Jafede. 11Tamsir hay go de glubgi pel Baa, hay go de baage de girgiri. 12Baa kal koge ga tamsir hay go de glubgi, werga jar fẽd ɓuy tuu seele ɓaara hay go de glubgi gesiŋ la. 13Doo kay nono, Baa kal wii Nowe gano : Ndi go de wããge ga ndi caa wer fẽẽre ma tenen wo go ɓuy, werga tamsir go de baage de girgir wer ɓaara, ndi ɓlag ra ge go de tamsir ɓuy. 14Ma ɓon ceɗ daage ma kluu de koo gofer, ni ndo car nen ɓil ɓe puri, blam ɓe ni ndo neɗ nen ɓe nen ɓil lay, nen faale lay de bitumi. 15Ndo joŋn ge doo kay nono : Depããge ɓe joŋ ge nen ngaɓ meeder kis ti ɓe doo dwee, diy ɓe nen ngaɓ meeder doo ɓog ti dwee, gẽẽre ɓe ciŋ nen ngaɓ meeder hwal ti dwee. 16Ndo law ge ti ɓe go. Ndo men ge tuu go ti holaŋ ti ɓe ma de lawgen wo de jeŋ ɓen wo nen ngaɓ nus meedere. Ndo caa ge jag faagen diŋ ti jeŋ ɓe po boŋ. Blam ɓe ni ndo joŋ ge daagen de jage ciŋ ti kẽẽ swaʼa. 17Ma ɓin ndi joŋ ge nen maŋ bii go ti tamsiri, ma taw fẽẽre ma de hõõgese ma wer ngel ma ciŋ maga wo de tenen ɓil mo ɓuy go. Fẽẽre maga wo gesiŋ lam ɓuy taw ge wo go. 18Ama ma ɓon, ndi joŋ ge tayge jag ɓin yaŋ de ɓo. Ndo kal ge yaŋ ɓi daagen de weere ɓo wo, wãy ɓo de naare weere ɓon wo no. 19Ndo laa ge này ma tenen wo yaŋ wer ɓo ɓi daagen ni wer sarsar jag jag ɓuy nen maga á mo gwaʼ wo tenen de ɓo. Ndo baa ge ma twar boŋ lay ma twãy boŋ lay. 20Ndo horge wer ɓaara jag jag ɓuy, wedwee, horoge, fẽẽre ma seɗge de ɓil ti sir wo. Á nduu gi yaŋ ɓiŋ ɓo maga se mo gwaʼ tenen caw. 21Day ma ɓon, ndo horge wer fẽẽre maga à re ra ɓuy doo ɓo ciŋ, ni ndo laan ciŋ ɓiŋ ɓo lage, nen maga á mo joŋ ge diŋ rege ɓo, de ɓaara lay.
22Sen diŋ fen maga Nowe joŋ ne ge mono. Á joŋ ra go ti faage ɓe keɗed ɓuy doo maga Baa hay wããn ne hẽn no tawtaw no.
လက္ရွိေရြးခ်ယ္ထားမွု
TĨĨGI WERE 6: TUP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Tupuri Bible © Bible Society of Cameroon, 2016. All rights reserved.