Mattayo 16
16
1Na waFarisayo na waSadukayo wakachiti, na pakangesiti yombe wakankotiti kulasa kwa wombe kiwalalilo kuhumila kunani. 2Nayombe pa kuwahigila akawajowili, Pa kutama kimihi mujowa, Lilino kuliliwiki: pakuya mafundi gayii makele. 3Nu lukela, Lilino kiguwi: pakuya mafundi gayii makele totolo. Mumanya kuwalalila kyene kya mafundi: koma fiwalalilo fya ngumbi muhotola lepa. 4Kihogosi kiwifu ni kya ukeme kilonda kiwalalilo; ni kiwalalilo yakipelekeke lepa kwa wombe lema kya Yona. Na akawalekiti, akawukiti baha.
5Na wanafunsi pawakachiti ku lisi lingi wakayiwiti kutuwula mikate. 6Leka Yesu akawatawalili, Mulole ni mwigohe pa kimela kya waFarisayo na waSadukayo. 7Leka wakajowini yungi ni njini, Tikapinditi lepa mikate. 8Leka Yesu pakawalalili, akajowiti, Mwenga wakukepa kiyitakiso, ndawa kiki mujowana yungi ni njini, ndawa mikate muyii nayo lepa? 9Ati mukona wangawalalila, ni mukumbukila lepa mikate mhano ya maelfu mhano wala, na masenjele galinga mukatondwili? 10Pangi mikate mhano ni yiwili ya wala maelfu ncheche, na fipalo filinga mkatondwili? 11Wuli muwalalila lepa kukita nukuya ya mikate nikatawili? Leka mwilolalele pa kimela kya waFarisayo na waSadukayo. 12Bahalapala wakawalalili kukita akatawili lepa kwigoha pa kimela kya mikate, koma pa mayigaliso ga waFarisayo na waSadukayo.
13Leka pakachiti Yesu pa malundu ga Kaisaria Filipi, akawakotiti wanafunsi wake, kujowa, Wandu wajowa kukita Mwana wa adam ayii nani? 14Leka wakajowiti, Wangi Yohana Wakubatisa; leka wangi, Eliya: leka wangi, Yeremia, pangi yumonga wa wakulweta. 15Awajowela wombe, Koma mwenga mujowa kukita nenga niyii nani? 16Leka Simon Petro pakahigiti akajowiti, Wenga uyii Kristo, Mwana wa Mulungu wa kulama. 17Leka Yesu pakahigiti akanjowili yombe, Uyii wa nyakihomo, wenga Simon Bar‐Yona: pakuya nyama nu mwasi nukukufunukulila lepa, koma Dadi wangu uyu ayii kunani. 18Leka nenga kawili nikujowela kukita, wenga uyii Petro, na pa liganga ili yanijenge kanisa lyangu; na milyango ya pandu pa mahoka yayilihotole lepa. 19Yanikupele funguo sya utwa wa kunani: na kiyi kyoha yaukikunge pa ndima yakikungike kunani: na kiyi kyoha yaukiwopole pa ndima yakiwopoleke kunani. 20Bahalapala akawakiliti wanafunsi kukita wasintawalila mundu kukita yombe ayii Kristo.
21Kitumbulile bahalapala Yesu akatumbwili kuwalasa wanafunsi wake, ngaakabiti ku Yerusalem, ni kuyufwana mahumbuso mingi kuhuma pa wakulu‐wakulu na makasisi makulungu na wakulembela, na kukomeka, ni ligono lya kadatu kusyukika. 22Nu Petro akantoliti, na akatumbwili kundakalila, kujowa, Lipyana kwako, Bambo: ngakitemi lepa wila kwako. 23Leka yombe pa akang’anamwiki akanjowili Petro, Bita kunyuma kwangu, Shetani: uyii kya kunikuwasa: ndawa uholalela lepa fya Mulungu, koma fya wandu. 24Bahalapala Yesu akawajowili wanafunsi wake, Mundu wona alonda kuhicha munyuma mwa nenga, ayikane mwene, na ayitwike msalaba wake, na anikise nenga. 25Pakuya ayi yoha uyu alonda kuyokola wumi wake yautage: na ayi yoha uyu yautage wumi wake ndawa ya nenga yaukolele. 26Pakuya mundu yakunogele wuli, wona apate ndima wa mfilimila, leka ayananga wumi wake? pangi kiki mundu yakipeleke kya kuyandungana nu wumi wake? 27Pakuya Mwana wa adam yahiche pa kukwisika kwa Dadi mundu pamonga na wamalaika wake; na bahalapala yankitile mundu ayi yoha kwa ndingo wa makitiko gake. 28Chakaka niwajowela kukita, Wayii wangi wa awa wayimi apa, yawalose lepa kufwa, mpaka pala yawambone Mwana wa adam ni ayicha pa utwa wake.
လက္ရွိေရြးခ်ယ္ထားမွု
Mattayo 16: MGS1937
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First published by the British and Foreign Bible Society in 1937.