Mattayo 12
12
1Pa lukumbi lula Yesu akapititi mwanja ligono lya sabato pagati pa migunda ya trigo; leka wanafunsi wake wakaweni njala, na wakatumbwili kudumula mahojo ni kulya. 2Leka waFarisayo, pawakaweni, wakajowiti kwa yombe, Lola, wanafunsi wako wakita kila kyangayitikalika kukikita pa ligono lya sabato. 3Koma akajowiti kwa wombe, Mukasomiti lepa ati kila akakiti Daudi, pala akaweni njala, na wala wakayili pamonga nako; 4umu akayingili mu nyumba ya Mulungu, na akalili mikate ya kuwika ku miho, yila nakuyitikalika kulya, haka kwa yombe mwene, haka kwa wala wakayili nako, lema kwa makasisi wakape? 5Pangi mukasomiti lepa ati pa torah, umu makasisi pa ligono lya sabato mu hekalu walikitila ligono lila lya waka, na wayilepe nu mhalo? 6Leka niwajowela kukita ayii apa nkulungu kulutila hekalu. 7Koma wona ngamumanyiti kiki iki, Nilonda lipyana, nukuya nyambiko, ngamuwapili lepa mihalo wala wangali kuhoka. 8Pakuya Mwana wa adam ayii bambo wa sabato.
9Leka yombe akawukiti bahalapala, na akayingili mu sunagoge yawe: 10na lola, mundu ni kiwoko kya kuyuma. Na wakankotiti kujowa, Kuyitikalika ati kulamisa pa ligono lya sabato? nausi wandungamakile yombe. 11Leka akajowiti kwa wombe, Nani yaaye wa mwenga, uyu yaaye ni limbelele limonga, na wona ili ligwili mu liwumba pa ligono lya sabato, yakamule lepa ni kuliwusa mu liwumba? 12Mumu mundu alutila wuli ni limbelele pa uhemesi! Ndawa iyi yiyitikalika kukita kinofu ligono lya sabato. 13Bahalapala anjowela mundu yula, Tambalisa kiwoko kyako. Na akatambalisi; ni kikakilawusiki kya kulama, ngati kingi. 14Leka waFarisayo apa wakapititi kunja wakapangiti malango pamonga kumpindika yombe, umu ngawanjanangili. 15Leka pakawalalili Yesu akawukiti kukulakula: na wingi wakankisiti; 16na akawalwasiti woha, na akawataukili wasinkita yombe wakuwoneka: 17nausi limemesike lila likajowiki na Isaya wakulweta, kujowa,
18Lola, mpalo wangu yula namhagwili;
Wakuganika wangu pa yombe wumi wangu uganisiki:
Yaniwike Roho wangu pa yombe,
Na yawakokosele Mihuku utenga wa mapawulo.
19Yatumbulane lepa, yakuwe lepa;
Haka yumonga yayufwane lepa njwawila yake mu ndila.
20Lidete lya kufujuka yalidumule lepa,
Ni litonji lya kututuma liyosi yalisimise lepa,
Mpaka pala yapise lipawulo kwa kuhotola.
21Na pa lihina lyake wa Mihuku yawahuwalile.
22Bahalapala akatoliki kwake wakukamulika ni daimon, wakukoyoka miho na mbuwuta: na akandwasiti, mpaka mbuwuta akalongili ni kulola miho. 23Na mapuga goha gakakangichi nyahope, na wakajowiti, Uyu si mwana wa Daudi ati? 24Leka waFarisayo apa wakayufwini wakajowiti, Mundu uyu ataga lepa kunja madaimon, lema ni Beelzebub nkulungu wa madaimon. 25Na pakamanyi maholo gawe akawajowili, Utwa uyi woha wona ugawike ni kwipindika wene uyanangika; ni likaya liyi lyoha pangi nyumba wona igawikana kwipindika yene yayiyimasike lepa: 26na wona Shetani ataga kunja Shetani, agawikana kwipindika mwene; yauyimakike wuli utwa wake? 27Na nenga wona nitaga kunja madaimon nu Beelzebub, nu nani wana winu wagataga kunja? ndawa iyi awa yawaye wapawusi winu. 28Leka wona nu Roho wa Mulungu nitaga kunja madaimon, bahapa utwa wa Mulungu uwafikili mwenga. 29Pangi ahotola wuli mundu kuyingila pa nyumba ya mwene mbafu, ni kunyaka misewenje yake, wona alemiti pakutumbula kukunga mwene mbafu? na bahalapala yanyake ngani nyumba yake. 30Yula nukuya pamonga nu nenga ayii wakunipindika nenga; na yula nakwiwunga nu nenga ayambanisa. 31Ndawa iyi niwajowela, Sambi iyi yoha ni blasfemia yayilekeleseke kwa wandu; koma blasfemia yakupindika Roho yayilekeleseke lepa. 32Na ayi yoha uyu yajowe lilowe kumpindika Mwana wa adam yayilekeleseke kwake; koma ayi yoha uyu yajowe lilowe kumpindika Roho Mbalafu, yayilekeleseke kwake lepa, haka pa miaka iyi, haka pa yila yayiyiche. 33Pangi mukite nkongo unofu, ni fipambiko fyake finofu; pangi mukite nkongo wa waka, ni fipambiko fyake fya waka: ndawa nkongo umanyika pa fipambiko fyake. 34Mwenga wakuhogoleka ni mamoma, muhotola wuli kujowa finofu, pakuya mwenga wawifu? ndawa kuhuma pa fyakufuluka fya mwoyo ndomo ulongela. 35Mundu nnofu pa kikokoli kyake kinofu awanja finofu: ni mundu mbifu pa kikokoli kyake kiwifu awanja fiwifu. 36Leka niwajowela mwenga, kukita lilowe liyi lyoha lya waka lili yawalongele wandu, yawawalange pa lila pa ligono lya kupawula. 37Pakuya pa malowe gako yaupisike ngolofu, na pa malowe gako yaupisike mbifu.
38Bahalapala wakamhigiti yombe wangi wakulembela na waFarisayo, kujowa, Mwalimu, tilonda kukiwona kiwalalilo kuhumila kwako. 39Leka yombe akahigiti, kuwajowela, Kihogosi kiwifu na kya ukeme kilondalonda kiwalalilo; na yakipelewe wombe lepa lema kiwalalilo kya Yona wakulweta: 40pakuya umu Yona akayili mu lileme mwa linkulu magono gadatu musi ni kilo; wiwi Mwana wa adam yaaye mu mwoyo mwa ndima magono gadatu musi ni kilo. 41Wagosi wa Nineve yawayime pa lipawulo pamonga na kihogosi iki, na yawakipise kiwifu: ndawa wakapeliti pa kukila kwake Yona; na lola, wakundutila Yona ayii apa. 42Mutwa ndala wa ku nkachi yaayime pa lipawulo pamonga na kihogosi iki, na yaakipise kiwifu: ndawa akachiti kuhuma pa songo sya ndima kuyufwanila malango ga Solomon; na lola, wakundutila Solomon ayii apa. 43Koma roho yiwifu, wona yipititi pa mundu, yigenda pangali machi, kilondile pa kupumulila, na yipakolela lepa. 44Bahalapala yijowa, Yanikilawukile pa nyumba yangu pala nikapititi; na pa kufika, yiyikolela ya waka, yipyagaliki, na yitendekesiki. 45Bahalapala yibita mwanja, ni yitola pamonga na yene roho singi mhano ni siwili siwifu kulutila yene, na siyingila, na sihwela mumulamula: na matamilo ga kumalakisa ga mundu yula gapata kuya mawifu kulutila gala ga kutumbula. Wiwila yakiye kawili ni kihogosi iki kiwifu.
46Akona kilongalile yombe na mapuga, lola, nyina na walongo mundu wakayimi kunja, walondaga kulongela nako. 47Leka nunuyu akajowiti kwa yombe, Lola, nyoko na walongowo wayima kunja, kilondile kulongela nawe. 48Leka akahigiti, akajowiti kwa uyu akantawalili, Mao nani? na walongo wangu wa nani? 49Na akatambalisi kiwoko kyake kwa wanafunsi wake, nakajowiti, Lola, mao wa nenga na walongo wangu! 50Pakuya ayi yoha uyu yakite kila akilonda Dadi wangu uyu ayii kunani, yuyu ayii ndongo wangu nu ndumbu wangu nu mao wangu.
လက္ရွိေရြးခ်ယ္ထားမွု
Mattayo 12: MGS1937
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First published by the British and Foreign Bible Society in 1937.