लुका 6
6
युङ्माना लेम्बा बारेङि सिलाप्मा
(मात्ति १२:१-८; मारकुस २:२३-२८)
1ठिक् खेप् युङ्माना लेम्बा येसु हिट्नुङ् ओचेलाचि गाहुँ बारि लिसाउङ् ओखाडागेट्टागा डागा, हिट्नुङ् ओचेलाचिङा गाहुँङाना ओबाला उफिगुङ् उन्चि मुक्ङि योप्सा चामा ठालाँ ओचोगुए॥#धारमाबिधि २३:२५ 2टरो कोइ-कोइ फारिसि याप्मिचिङा हिट्नागा ओलोडुचे, “युङ्माना लेम्बा धारमाबिधिङा चोक्मा नुनिना नुङ् माट्टुना टोॽवा पोङ् खानिङा आचोगुएट्टुम्ना?”
3येसुङा हिट्नागा लोडुचे, “दाउद हिट्नुङ् ओसाइबाचिगा उन्चि साॽवासानाँ दाउदङा पाक् चोगुएना? पाक् खानिङा धारमाछाप्ला पोढाँ आचोग्निम्गेट्निम्गै? 4उन् माङ्हाङ् माङ्ध्यान् चोक्माना ठोङ्ङि लिगाउङ् माङ्हाङ्ङि ठाङ्बालाक् चालेपा चोए हिट्नुङ् ओसाइबाचि चा पिडुचे॥ हिट्नाम्बाक् धारमाबिधि आन्सार पुजारिचि माले आरु साङा चा चामा लिनिना डाना॥”#१ सामुएल २१:१-६; लेबि २४:९ 5हिट्नुङ् उन्ङा हिट्नागा लोडुचे, “याप्मि छा युङ्माना लेम्बाङाना चा टाङ्बा डोक्॥”
येसुङा उमुक् चोबाना याप्मि नुमानिङ् चोगुटु
(मात्ति १२:९-१४; मारकुस ३:१-६)
6आरको एक् खेप् युङ्माना लेम्बा येसु याहुदि छुम्मापाङ् भिट्रा खाडाउङ् हिसिक्टुएट्टुचिगा॥ हिट्नि छुप्टाङ् उमुक् चोबाना ठिबाङ् याप्मि डाना॥ 7येसुङा युङ्माना लेम्बा हिट्ना याप्मिङाना उमुक् नुलोक् चोगुटुनि नुङ् उन् छोक्माउङ्सा धारमाबिधि काहिसिक्बाचि हिट्नुङ् फारिसि याप्मिचिङा हिट्नि उन् उसुक्टुएट्टुना॥
8टरो येसुङा हिट्नागाँगा निङ्ग्वाइना रिङ् ठाहा टोगुए, हिट्नुङ् उमुक् चोबाना याप्मि लोडुए, “नाहि आबा हिट्नुङ् सोब्बेङागा टोकानाङि येबा॥” हिट्नुङ् हिट्ना याप्मि आबे हिट्नुङ् येबे॥ 9हिट्नुङ्ना येसुङा हिट्नागा लोडुचे, “आङा खानि सिलाप्नानि, युङ्माना लेम्बा धारमाबिधि गाड्डे खोना टोॽवा चोक्मा नुयुक्ना? ओचेट्नु चोक्मा आथाबा ओचाफेन्लोक् चोक्मा, उहिङ्ग्वाट् चोक्मा आथाबा जाखाम् चोक्मा?”
10हिट्नुङ् उन्ङा याम्बा-नायाम्बा सोब्बेचि पुयुङ् हिट्ना याप्मि लोडुए, “कामुक् सोट् चोगु॥” हिट्नाङा हिड्डे डोक् चोगुए, हिट्नुङ् हिट्ना उमुक् नुलोक् लिसाडे॥ 11टरो हिट्नि ओवासागा फारिसिचि हिट्नुङ् धारमाबिधि काहिसिक्बाचिगा आड्डिक् टुक्लोक् उन्चि याग्लेडे, हिट्नुङ् येसु पाक् मेप्माना पिक्सा उन्चि उन्चि मुन्डुप्मा ठालाँ ओचोगुए॥
येसुङा बारो जाना मुलिचेलाचि सेगुचिगा
(मात्ति १०:१-४; मारकुस ३:१३-१९)
12ठिक् लेम्बा येसु झोन्झोबाङि बिन्टि चोक्सिङा खाडे, हिट्नुङ् माङ्हाङ्ङि युसाटेप् बिन्टि चोगे॥ 13हिट्नुङ् भ्यानिक् लिसाउङ् येसुङा ओचेलाचि छेम्डुचिउङ् हिट्नागा माड्डे बारो जाना सेगुचे, हिट्नुङ् उन्ङा हिट्नागा मुलिचेलाचि नुङ् निङ् मेट्टुचे॥ 14नाड्डे पारिक् सेग्बालाक्चि बारो जाना नागा डोक्– सिमोन (उन् पाटरुस चा ओलोडुए), हिट्नुङ् उन्झा आन्दरियास, याकुब, युहान्ना, फिलिप, बारथोलोमाइ, 15मात्ति, थोमा, आल्फायासङाना उइछा याकुब, देस भाक्ता सिमोन, 16याकुबङा उइछा याहुदा हिट्नुङ् याहुदा इस्कारियोत नाङा हान्डेङ् येसु धोका पिडुए॥
येसुङा जोम् उटुगागा याप्मिचि नुमानिङ् चोगुचिगा
(मात्ति ४:२३-२५)
17हिट्नुङ् येसु मुलिचेलाचिलोक् झोन्झोबालाम्मा यो उङ्साउङ् ठिक् हेन्साना स्वाँराङि येबे॥ हिट्नि आरु जोम् ओचेलाचि हिट्नुङ् याप्मिचिगा खिमेयाङ्मे हिट्नि डाना हिट्नुङ् ख्वाप्पा याहुदिया, यरुसलेम, सामुन्दराङाना ओधारङिना टुरोस हिट्नुङ् सिदोन छेट्रालाम्मा जोम् याप्मिचि ओटाइसागा॥ 18हिट्नागा येसु उरिङ् खेम्सिङा हिट्नुङ् आप्पे-आप्पे रोगालाम्मा नुसिङा ओटाइसागा॥ हिट्नि ओचाफेन्ना रिमेट्ङा लाबुचिगा याप्मिचि चा उनुये॥ 19हिट्नुङ् हिट्नागा सोब्बेङा येसु खोप्मा ओकोलुए, पोङ्भोने नुमानिङ् चोक्माना साक्ति उन्लाम् होन्डागेट्टाना, हिट्नुङ् हिट्नागा सोब्बे नुमानिङ् उलिसेट्टागा॥
येसुङाना हिसिक्मा
(मात्ति ५:१-१२)
20हिट्नुङ् येसुङा ओचेलाचि पुयुचिउङ् लोडुचे,
“पाक्चा वानिगा खानि माङ्हाङ्ङा आसिक् मापिडिटि,
पोङ्भोने माङ्हाङ् उमुलुक् खानिगा डोक्॥
21ना बेला साॽवामाङा आसिइगा,
खानि माङ्हाङ्ङा आसिक् मापिडिटि,
पोङ्भोने खानिङा चामा आटोगुम्टुम्॥
ना बेला आहाबिगा माङ्हाङ्ङा खानि आसिक् मापिडिटि,
पोङ्भोने खानिङा रेट्मा आटोगुम्टुम्॥
22“याप्मि छाङि बिस्वास आचोगुम्नाँ याप्मिचिङा खानि चिम्मा माफुट्टिटि, हिट्नुङ् पाङ्ठाङ्लाम्मा माहोट्टिटि, हिट्नुङ् मोम्मासिमा आलिसिलोक् माचोगिटि, हिट्नुङ् ओचाफेम्मा चाट्ला माचोगिटि, टब माङ्हाङ्ङा खानि आसिक् मापिडिटि॥#१ पाटरुस ४:१४ 23हिट्नापाका खानि चाप् टामाङा लाॽवासानि, पोङ्भोने टोनालोग्ङि खानिलोङ्सा ठेना इनाम् युङ्ग्वा॥ आच्छोगा माङ्काटाचि चा खानि ओचाफेन्लोक् चाट्ला माचाट्टिगा टुबाठेबाचिङा नाड्डेना डोक् ओचाफेन्ना चाट्ला ओमेट्टुचे॥#२ इतिहास ३६:१६; मुलिचेला टोॽवा ७:५२
24टरो इनामा, हाउ खानि माक्फेन्सुबेन् जोम् आकाप्टुम्गा!
पोङ्भोने खानिङा चाप्टामा हिट्नुङ् आनान्दाङाना चोला आटोग्मैडुम्मे॥
25इनाबा, ना बेला खानि फोक् आलिसिगा!
पोङ्भोने खानि साक्वायुक्॥
इनामा, ना बेला आरेट्टिगोन्डिगा!
पोङ्भोने खानि याङ्आछाडिटि हिट्नुङ् आहाबिटि॥
26इनाबा, ना बेला याप्मिचिङा ओचेट्नु चाट्ला मामेट्टिगा डागा!
पोङ्भोने उन्चि टुबाठेबाचिङा चा माङ्काटा ए उपिक्गा माङ्जोगा याप्मिचि चा नाड्डेडोक् ओमेट्टुचे॥
साट्टुरचि चा लुक्मा टुक्टानुम्चिम्
(मात्ति ५:३८-४८; ७:१२)
27“टरो आरिङ् आखेम्सुम्गा खानि लाउङ्सा आङा लोनाँनि, खानि साट्टुरचि माया चोगानुम्चिम् हिट्नुङ् चिम्मा माफुट्टिगा लोङ्सा नुलोक् चाट्ला मेट्टानुम्चिम्॥ 28खानि साराप ओयाङुगालोङ्सा आसिक् पिडानुम्चिम्॥ खानि ओचाफेम्मा चाट्ला मामेट्टिगा लोङ्सा बिन्टि चोगाबिडानुम्चिम्॥ 29कोइङा खान्ङाना ठिक् काकालाङि मालेम्से भोने आरको काकाला चा टाक्टुबिडु, हिट्नुङ् काटाखुम्बि मानाप्टे भोने लोट्लिङ् चा उन् पिडुडिसु॥ 30हिट्नुङ् ओनाग्गा सोब्बेलोङ्सा पिडुचि, हिट्नुङ् काचिजाबिजा ओखाटुगालोक् फेरि नाक्टुन्चिन्॥ 31हिट्नुङ् याप्मिचिङा खानि खोड्डे पारिक्ना चाट्ला मामेट्टि नुङ् चाहाब् आलिसिटिना, खानिङा चा हिट्नागा हिड्डे डोक् मेट्टानुम्चिम्॥#मात्ति ७:१२
32“खानिलाउङ्सा माया काचोक्चि एडोक् माया आचोगुचिम्गा भोने, खानिङा पाक् ओचेट्नुना टोॽवा आचोगुमेना टे? नाड्डेनाम् टे पापि याप्मिचिङा चा ओचोगुटु॥ 33हिट्नुङ् खानि ओचेट्नुलोक् माचोगिगा लोङ्सा एडोक् नुलोक् चाट्ला आचोगुम्चिम्गा भोने, खानिङा पाक् नुलोक् आचोगुमेना टे? पोङ्भोने पापि याप्मिचि चा हिड्डे डोक् ओचोग्गा॥ 34हिड्डे डोक् खानिङा ओफाबा हुङ्मा उहिडुगालोङ्सा एडोक् नाॽवा आपिडुम्चिम्गा भोने, खानिङा पाक् ओचेट्नु टोॽवा आचोगुम्मेना टे? पोङ्भोने पापि याप्मिचिङा चा टे हुङ्मा उहिडुगा पापि याप्मिचिलोङ्सा एडोक् नाॽवा उपिडुचिचि॥
35“टरो खानिङा खानि साट्टुरचि चा माया चोगानुम्चिम्, हिट्नुङ् हिट्नागा नुलोक् चाट्ला मेट्टानुम्चिम्॥ हिट्नुङ् फेरि टोक्माना निङ्ग्वा युङ्सा नाॽवा पिनेनुम्चिम्, हिट्नुङ् खानिङा ठेना इनाम् आटोगोम्टुम् हिट्नुङ् खानि सोब्बे नुङ्ना ठेना माङ्हाङ्ङाना ओछालेट्चि आलिसिटि, पोङ्भोने उन्ङा निङ्ग्वा एकेलेङ् ओचोग्गा हिट्नुङ् दुस्टाचि चा लुक्मा टुक्टुचिचि॥ 36खानि माङ्हाङ् पाबा लुक्मा काटुक् लिसा गाड्डे डोक्, खानि चा लुक्मा काटुक् लिसानि॥
आरु फाट्टुर लाब्नेनुम्चिम्
(मात्ति ७:१-५)
37“याप्मिचि न्याए चोक्नेनुम्चिम्, हिट्नुङ् माङ्हाङ्ङा चा खानि न्याए माचोगिन्गा॥ आरु फाट्टुर लाब्नेनुम्चिम्, हिट्नुङ् खानि चा फाट्टुर मालाबिन्गा॥ याप्मिचि छेमा पिडानुम्चिम्, हिड्डेउङ् खानिङा चा छेमा आटोगुम्टुम्॥ 38याप्मिचिलोङ्सा पिडानुम्चिम् हिट्नुङ् माङ्हाङ्ङा चा खानिलोङ्सा मापिडिटि॥ उन्ङा चिट्सा चिट्सा, वान्सा वान्सा पेरेरे वेलोक् मापिडिटि॥ पोङ्भोने खानिङा जेङा आछिक्टुमुङ् याप्मिचि आपिडुम्चिम्चिम् हिट्ना छिक्मानालाम्मा डोक् खानिङा चा आटोगोम्टुम्॥#मात्ति ७:२; मारकुस ४:२४ ”
39हिट्नुङ् येसुङा ना मुन्डुम् हिट्नागा लोडुचे, “पाक् याङ्निनिना याप्मिङा याङ्निनिना लोङ्सा लाम्टिमामेप्मा हिडुटुनि टे? हिट्नागाचि इप्पाङ् डोक् खोपिल्टाङि ठाचिन्गै टे?#मात्ति १५:१४ 40खोना चा चेला काहिसिक्बा नुङ्ना ठेना लिमा लिनिना॥ टरो ओचेट्नुलोक् सिकाँ लिसे भोने उन् चा काहिसिक्बा गाड्डे डोक् लियुक्॥#मात्ति १०:२४-२५; युहान्ना १३:१६; १५:२०
41“हिट्नुङ् पोङ् कान्झाङाना उमिक्ङिना खाप्सिॽवाम्बाक् आनिसुटुना, टरो आप्पे कामिक्ङि लिसाना सिङ् ओकोङ्रोबोम्बाक् आनिसुन्ना? 42आप्पे कामिक्ङिना सिङ् ओफेङ्गेलेक् आनिसुन्ना भोने, खोड्डे पाराउङ् कासाइबाङाना उमिक्ङिना खासिप्पा होट्नाबिना आलोडुटुना? हाउ निङ्ग्वा ओमाक्पाचि, पाइला खानि मिक्ङि लिसाना सिङ् ओकोङ्रोबो होट्टानुम्, हिट्नुङ् एडोक् खानि साइबाङाना उमिक्ङिना खासिप्पा होप्मा पारचिन्दा आनिसुम्टुम्॥
सिङ् उघुङ्मा हिट्नुङ् टुल्फुल
(मात्ति ७:१६-२०; १२:३३-३५)
43“ओचेट्नुना सिङ् उघुङ्माङा ओचाफेम्मा टुल्फुल केङुन्ना, हिट्नुङ् ओचाफेम्मा सिङ् उघुङ्माङि ओचेट्नुना टुल्फुल केङ्निना॥ 44सोब्बे सिङ् उभुङ्माचि हिट्ना उटुल्फुल पुयुम्नाँ डोक् मिसेन् निसुम्टुम्॥ हिट्नुङ् उटिउँबा घारिलाम्मा खोना याप्मिचिङा वामाखोक्पोङा उसा उफिगुन्ना, हिट्नुङ् आङ्गुर चा उछुम्सुन्ना॥#मात्ति १२:३३ 45हिट्नुङ् नुना याप्मिङा उनिङ्ग्वाङि लिसाना नुना रिङ्लाम्मा ओचेट्नुना रिङ् डोक् माट्टुटु॥ हिड्डे डोक् भेन्ना याप्मिङा उनिङ्ग्वाङि लिसाना ओचाफेन्ना रिङ्लाम्मा ओचाफेन्ना रिङ् डोक् माट्टुटु॥ पोङ्भोने याप्मिङा उनिङ्ग्वाङि पाक् युङ्ग्वाना हिट्ना रिङ् डोक् ओयासिलाम्मा माट्टुटु॥#मात्ति १२:३४
इप्पोक् पाङ्ङाना ओजाग् बारे
(मात्ति ७:२४-२७)
46“आङा लोनाँनि गाड्डे आचोगिन्गा भोने, आङा पोङ् खानिङा ‘आटाङ्बा, आटाङ्बा,’ याङ्आलोडिटिगा? 47जुन् याप्मि आङि आब्युङ्, आरिङ् खेम्सुङ् हिट्ना गाड्डे चोग्ना याप्मि खोड्डे पाराना लियुग्ना हाट्ले आङा खानि लोनाँनि: 48हिट्ना याप्मि, घाइरो ठेना लिङ्गेॽवा मिहोन्ने सोम्मा जाग् टोयुङ् पाङ् काचोग्बा याप्मि गाड्डेना ए॥ हिट्नुङ् जब माकुन्धेरेक् वेहेट् टायाउङ् ओभोल उङ्से हिट्नुङ् हिट्ना भोलङा पाङ् वान्डुए टरो पाक्चा लिनेएट्नि, पोङ्भोने हिट्ना पाङ् ओजाग् दोरो ओचोगुएसुना॥ 49टरो आरिङ् खेम्सुङ् चा हिड्डे चोक्निनाम्बाक् जाग् मिटोङे पाङ् काचोक्बा याप्मि गाड्डेना ए॥ हिट्नाङा पाङ् खाम्ङि चोगुए हिट्नुङ् ठेना व्हेट् टाए हिट्नुङ् हिट्ना पाङ् चुवा ओभोलङा लेम्सुङ् हिट्ना पाङ् होडाउङ् ठेना जाखाम् लिसे॥”
လက္ရွိေရြးခ်ယ္ထားမွု
लुका 6: APH
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Wycliffe Bible Translators, Inc. and Nepal Bible Society