GÉNESIS CALLARI YUYAI
CALLARI YUYAI
Génesis nishpaca, “Callarimi” nijunmi. Bibliapaj callari quilcashcacunapica, cai pachata imashna churashcata, tucui cai pachapi causajcunata churashcata, gentecuna imatalla rurachun yachachishcatami villajun.
Shinallata, Abrahamhuan, Taita Dioshuan pactachingapa ari nishcatapash, Israel gentecuna imashna callarishcatapashmi villajun. Rurashcalla dioscunata crishpa causanajushca huatacunapimi, Israelcunataca chashna callarichishca. Cai Génesis quilcashcacunaca, causaita causaicaman causajuj, shujlla Taita Dios cai pachapi tucui ima tiyashcata churashcatami villajun. Cai quilcashcapica Taita Diosca, Paillata churashca runacunahuan, callarimandapacha imatalla churashcatami villajun. Chai runacunamanmi Taita Diosca, cai pachapi mandanataca curca.
Shinallata cushilla ali causaita charingapa munashpaca, Paita cazushpa ali catichun mandashcatapashmi villajun.
Shinallata jucha imashna callarishcata, runacuna Taita Diospaj munaita rurangapa na munashpa, paicunapaj munaitalla rurashcamanda imashna llaquita apashcatapashmi villajun. Runacuna, Taita Diosta na cazushpa, juchatalla ruranajujpi Diosca, paicunata quishpichina yuyaihuan imatalla rurashcatapashmi villajun.
GENESISPI IMALLA TIYASHCAMANDA
Cai Génesis quilcashcacunaca, ishcaipi jatunda shicanyachishcami. Callari capitulomanda 11caman ricujpica, tucui ima tiyajtapash, runatapash Taita Dios churashcata, jucha callarishcata, gentecuna llaquichi tucushcatapashmi villajun. Israelcunapaj ñaupa taitacunamandaca, Adanmanda Noecaman imashna causashcata, shinallata ninan tamiahuan cai pachata tucuchishcatapash, Babel shuti torreta ruranajushcatapashmi villajun.
Chaipaj catipica, capítulo 12manda 50caman ricujpica, Abrahambaj, Isaacpaj, Jacobpaj mirai Israelcuna imashna callarishcatami villajun. Israel shuti, taita Jacobpaj churi Josemanda, caishuj churicunamandapashmi villajun.
Taita Jacobca, paipaj tucui ayllucunandi, Egipto llactapi causagrishcata, Israelcuna chai llactapi mirashcata, chai llactapi causajcunata Israelcunata gañanda charishcatapashmi villajun. Caipi tucui villashcacunataca, Taita Diosllatami chashna rurashca. Paimi, na alita rurajcunataca ricushpa llaquichishca. Ashtahuangarin, Paita juyashpa, cazujcunataca huacaichishpa, tucuita yachachishpa, imapipash yanapashpami charishca. Shinami cai Génesis quilcashcacunaca, tucui ima tiyajta Taita Dios churashcata villashpa callarin.
Shinallata Pai agllashcacunata: “Na saquishpa, huacaichishami” nishpa, Paipaj shimihuan ari nishcata villashpami tucuchin.
လက္ရွိေရြးခ်ယ္ထားမွု
GÉNESIS CALLARI YUYAI: QVI16
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.