Matiə 18
18
Amɛ dɔ kɔ̃tɩn
(Mar 9:33–37; Lu 9:46–48)
1Ga bɔɔlera kpãkpãadara tɔ pɔ Jejura, a bulee ayɩ: Amɛ dɔ kɔ̃tɩn a jɔrakɛ fɛʋ ƴũ fãgadaarɩ dɩra?#Lu 22:24 2Le Jeju we bɩsã buu dɩ pɔ dɩ thɩɩnʋʋ awɩ thɩ̃thɩɩn sa so: 3Sobɔr mɩ so nar, ado na debi a ho bɩsã biəˈ, na lõ ƴũ fãgadaarɩ dɩra yuurakaˈ.#Mar 10:15; Lu 18:17 4Gɛr gɩ tibil wo tibilikɛ na debanɩ na wur na ho bɩsã buukɛ, ɔr na dɔ kɔ̃tɩn na jɔ fɛʋ ƴũ fãgadaarɩ dɩra; 5dɩ tibil wo tibilikɛ na teanɩ bɩsã buu ʋrɛɛ khaa kɛ, dɩɩ do ɩ̃ i dɔ nɔɔ, mɛrɛɛ thɛthɛ a tee.
Mɔ̃ ga puuni ʋrɛraakɛ na cʋɛnɩ tibil dɩ na lɛ̃ hʋɛra
(Mar 9:42–48; Lu 17:1–2)
6Nã kɔ̃tɩ̃ tə̃ə juur tibillə fʋɔrɔ wɩ dʋnanaa wɩ faa lanyɔ̃ hulõ paar, baar gɩrɛɛkɛ a na kanɩ na cʋʋ dɩ bɩsã biikɛ pɛ mɩnɩ haar dɩ bɩɛl na bara. 7Ga puure tɩbɩlala thɩɩra gɩrɛraakɛra nɛ baradaa hanɩkɛ. Nɛ baradaa werrakɛ dɔ ga‐n hale, sɩ ga puure tibilləəkɛ n cʋɛnɩ dɩ ga‐n hale.
8Ado afɩ nyɔ̃ agɩbo afɩ nɔ do far baradaa, kuro dɔna faa ƴɔɔ. Gɩdonɩ a fɩ ˈlɛ yire khorr na nyɔ̃ bɩɛl agɩbo na nɔ bɩɛl, gɩ baar nyɛ̃ɛ yenyɔ agɩbo nɛɛ yenyɔɔkɛ fa hananɩ, sɩ wɩ dʋna fɩ wɩ faa khorr dɔɔra.#Mat 5:30 9Dɩ ado afɩ yi dɔ far baradaa, te dɔna faa ƴɔɔ. A fɩ ˈlɛ yire khorr na yi khoroo, gɩ baar yinə yenyɔɔkɛ fa hananɩ sɩ wɩ dʋna fɩ bu paar dɔɔra.#Mat 5:29
10Na‐n jɩɛ dʋ bʋrɛ na‐n beesi bɩsã biisɔɔkɛ bɩɛllakaˈ. Gɩdonɩ mɩ so narɛ, awɩ thɔ̃thɔ̃daar thusɔ hale Thãgbaa dʋɔ ɩ̃ Thɩɩkɛ hanɩle ƴũu ƴɛ thɩ̃thɩɩn bɔɔ fɛʋ. [ 11Gɩdonɩ mɛr tibili Bikuun ɩnɛ ɩ̃ taa wɩrɛɛkɛ bureni.]#Lu 19:10
Sokpaa banaanaakɛ bonɩ
(Lu 15:3–7)
12Mɔ̃ nɩ‐n kpɩɛr? Ado tibil hana banaa tamaa dɩ bɩɛl bu, a na sɩ tamaa phe birera gɔ̃gʋɔna sɩ a jal a ƴaal ʋrɛ bonəə? 13Sobɔr mɩ so nar ado a yɩɩ, ga dʋʋraarɛ daʋ a na jɔ tamaa phe bireekɛ na burenəˈ; 14mɛ̃ gɩ, anɩ Thɩɩkɛ hanɩle ƴũ, aa‐n tu dɩ bɩsã biikɛ bɩɛllakɛ n buəˈ.
Sopugo faarɛ
15Ado afɩ omi cʋʋ sopugo, jala dɩbara a nɩɛraa ɔɔ sopugo. Ado a pɛ fɛr nũu, ga dor fɩ cʋʋrɛ afɩ omi dɩ kɛr bir.#Lu 17:3 16Sɩ ado aa pɛ fɩ nũəˈ, kpa tibil bɩɛl agɩbo yenyɔ a jalana, dɩ mɛ̃ “sɔɔle ɓibi na gʋʋr mɔ̃ sobɔ so jɩdara yenyɔ agɩbo yẽther yɩɛnɩ dɩɩ ha.”#Dət 19:15 17Dɩ ado a bor wele nũ pɛrɛ, gba gɩ dɩphã a sɔ we gbɛbɩdarara. Dɩ ado a bor we gbɛbɩdara nũ pɛrɛ, dɔ dɩphã a ho far thɩldaar na war gbadaar. 18Sobɔr mɩ so nar, thɩ̃ɛ wo thɩ̃ɛɛkɛ na lini kɛ thɩɩra, ɔmɛ̃ ga li Thãgbaa dʋɔ. Sɩ thɩ̃ɛ wo thɩ̃ɛɛkɛ na thʋbɩnɩ kɛ thɩɩra, ɔmɛ̃ ga thʋbɩ Thãgbaa dʋɔ.#Mat 16:19; Jã 20:23
19Sobɔr mɩ so nar wo, ado tɩbɩla yenyɔ nɛrɛra na tu kha nɔ bɩɛl kɛ thɩɩra, thɩ̃ɛ wo thɩɛnaakɛ wa bɩɛlnɩ ɩ̃ Thɩraakɛ hanɩle ƴũ, a na ha wɛr. 20Gɩdonɩ kãkɛ tɩbɩla yenyɔ yẽthersɔ gbɛbɩnɩ kha na ɩ̃ i, le mɩ‐n ha awɩ thɩ̃thɩɩn.
21Le Pɩɛr tɔ dã a bulee ayɩ: Kɔ̃tɩn, ado ɩ̃ omi cʋʋ mɩ puure, balamɔ̃ ma faa na haa? Nyɛ̃be makonyɔ ga dã ya?#Lu 17:3–4 #Jən 4:24 22Dɩ Jeju birsee: Ga do nyɛ̃be makonyɔ mɩ so faraˈ, sɩ nyɛ̃be makonyɔ der paar kpalãther yʋɔr mɩ so.
Sokpaa thɔ̃daarraakɛ na faanɩ ɔɔ heldaarɩ hel a haa ga
23Gɛr gɩ ƴũ fãgadaarɩ dɩ, gɩ hʋrɛ fãgadaarɩkɛ ƴaalɛnɩ a ther war ɔɔ thɔ̃daarsɔɔ pa a hɩɩn. 24Ɔbɔɔkɛ a manɩ da‐n ther, wɩ kpar tibil bɩɛlɩkɛ hanaanɩ helu gbɩlanɩ kɔ̃tɩ̃ der paar gbɩlanɩ a pɔnanaa. 25Dɩ mɔ̃ aa hananɩ thɩ̃ɛ a na lɩmaˈ, ɔɔ kɔ̃tɩ̃ yɩ dɩ wɩ dolonee, ɔr na ɔɔ khɛr, na ɔɔ bɩsãsɔ, na thɩ̃ɛ fɛʋʋkɛ a hananɩ a lɩma heluulera. 26Dɩ thɔ̃daarɩle jire a gburõku ɔɔ ƴɛ thɩ̃thɩɩn sa sʋʋraa: Fɔ haar sɩ ma lɩmɩ fɛr fɛʋ. 27Dɩ bʋɔ fʋrɛ thɔ̃daarɩlee kɔ̃tɩna, dɩ faa helula a haa, sa sɩɩraa dɩ jal. 28Mɔ̃ thɔ̃daarɩlera gbanɩ da‐n jal, a caananɛ ɔɔ ˈwalãkha bɩɛlɩkɛ wɩ‐n donanɩ kha thɔ̃ bɩɛl, kɛ hanaanɩ dakha helu war be yenãsɔ. Dɩ a fʋʋrɛ a khɩmɩ ulebire sa so: Lɩma mɩ heluukɛ fɩ hana mɩnɩ. 29Dɩ ɔɔ ˈwalãkhaale jire ɔɔ ƴɛra da‐n phʋʋrʋʋ ayɩ: Fɔ haar sɩ ma lɩmɩ fɛr. 30Sɩ a bor sa jalnaa a to khaɩra phaphapha dɩ lɩmʋʋ ɔɔ hella. 31Ɔbɔɔkɛ ɔɔ ˈwalãkhasɔ yɩnɩ mɔ̃ thɩ̃ɛɛle danɩ thale, bʋɔ fʋlɛ wɛr jɔɔ ka. Dɩ wɩ gbaar gɩrɛɛkɛ dananɩ fɛʋ a jalna a mɩɛ awɩ kɔ̃tɩ̃. 32Le kɔ̃tɩn wɩɩ dɩ pɔ dɩ sʋʋraa: Fɛr thɔ̃daar puu, mɩ kɔɔ faarɛ afɩ hel fɛʋ a ha fɩ, gɩdonɩ fɩ kɔɔ phʋʋr mɛr. 33Dɩ fɛrɛ dakha ga teena fɩ jɛ ʋrɛ nɩ donanɩ kha ˈwalãkha tibil thɔmana bʋɔra, mɔ̃ mɩ kɔɔ jɩ fɩnɩ bʋɔra gaa? 34Dɩ nĩkhii fʋrɛ ɔɔ kɔ̃tɩ̃ɩle, dɩ gbaa ˈlaa gardɩ hɔ̃hɔlala wɩ hʋɔlaa phaphapha a bir a lɩmɩ dakha ɔɔ hella fɛʋ. 35Thale ɩ̃ Thɩɩkɛ hanɩ ƴũ na cʋʋ na nɛrɛ, ado nɛrɛ fɛʋ bɩɛlbɩɛl yɩ, na‐n faa anɩ omii dɩ pa na haar fɛʋ a na haa ga.
လက္ရွိေရြးခ်ယ္ထားမွု
Matiə 18: LOBIRI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Burkino Faso 1985.