Matiə 11
11
1Ɔbɔɔkɛ Jeju kɔɔ dɩɩrnɩ ɔɔ kpãkpãadara yʋɔr yenyɔ thɩ̃ɛɛkɛ pɩ, a ther le a jal da‐n dɩɩr tɩbɩla da‐n mɩɩna wɩ Thãgbaa thɩmɩɩ awɩ dɩsɔra.
Tɩbɩlaakɛ Jã Batɩsɩtɩ thɔnɩ Jejura
(Lu 7:18–35)
2Jãakɛ wɩ kɔɔ fʋnɩ a to khaɩra, a nɩɛrɛ thɔmaakɛ Kirisiti n cʋʋnɩ, dɩ a thʋɔn ɔɔ kpãkpãadara wɩ jala bulenee ayɛwɔɔ: 3Fɛr dɔ ʋrɛɛkɛra na ɩnanɩ yaa, agɩbo dɔ sa‐n pɩɛr tɩɩ kpɩɩ? 4Dɩ Jeju birse wi: Nɩ kɛra birə a sɔ Jana gɩrɛɛkɛ nɩ‐n nɩɛnɩ na gɩrɛɛkɛ nɩ‐n yɩnɩ: 5Yarasɔ n yɩrɛ, nɛ kʋɛdarasɔ n sar bɔɔbɔɔ, gbulosɔɔ gbuul pɩrɛ, dɩ nʋrasɔ khɛrrɛ, dɩ khesɔ n ɩɩrɛ dɩ wɩ the khirera, dɩ bɔdara nɩɛrɛ Thãgbaa tutugo bʋɔɔ thɩmɩɩ.#Eja 35:5–6; 61:1 6Sɩ gɩ da ʋrɛraakɛ ma doronɩ nɛ baradaa ga.
7Ɔbɔɔkɛ tɩbɩlaakɛ kɔnɩ na pɩ, Jeju mar da‐n mɩɩ tibil jɔɔle Jãadara aa: Anye nɩ kɔɔ ka jal bəənnə a hɩɩn? Poo balãsɩɩkɛ jɩɛ n khəəfəni gɩ ya? 8Dɩ anye nɩ kɔɔ jal yɩ? Kuunikɛ n tɔnɩ kẽkẽ ɓʋ̃ɔ gɩ ya? Nɩ hɩnɛ wo wɩrɛɛkɛ n tɔnɩ kẽkẽ ɓɔna fãgadaraa cɔ wɩ‐n ha. 9Dɩ anye nɩ kɔɔ jal yɩ? Thãgbaa bobon gɩ ya? Mɩ so narɛ, sobɔr gɩ, bɩɛlɩkɛ jɔnɩ Thãgbaa bobon gɩ. 10Jãada dɔ gɩrɛ kheranɩ kɩɛr Thãgbaa sɛbɛraakɛ ayɩ: “Hɩnɛ, mɛr Thãgba thɔna ɩ̃ thɔ̃thɔ̃, dɩ na kʋʋl fɩ ƴɩɛ, a gbɛbɩrɩ fɩ hʋɛ afɩ ƴɛ kʋʋlɔ.”#Mal 3:1 11Sobɔr mɩ so nar, wɩrɛ fɛʋraakɛ khɛra n kɔnɩɩ thɩ̃thɩɩn, bɩɛl na hale a ɩɩr a kɔ̃tɩ̃ a jɔ Jã Batɩsɩtɩ kpɩɩrakaˈ. Sɩ ʋrɛ kanɩ do dabuu fɩɩʋ ƴũ fãgadaarɩ dɩra, a kɔ̃tɩnɛ a jɔ Jã. 12A fʋna Jã Batɩsɩtɩɩ bɔɔ a dana nɛnɛ̃kɛ, wɩ‐n pɛrɛ fãga dɩ wa‐n lõ ƴũ fãgadaarɩ dɩra, dɩ wɩrɛ n pɩɛrnɩ fãga, wɛr hɩna.#Lu 16:16 13Gɩdonɩ Thãgbaa bobonasɔ fɛʋ na jɔfʋ, gɩ kɔɔ mɩɩrɛ Thãgbaa so a dana Jãa bɔɔ. 14Dɩ ado nɩ ƴaalɛ nɩ tu gi, ɔr dɔ Elɩra teananɩ a ɩna.#Mal 4:5; Mat 17:10–13; Mar 9:11–13 15Ntɛɛkɛ hananɩ nũu dɩ nɩna, dɔ a na‐n pɛ nũu.
Jã Batɩsɩtɩɩ nɔ li thɩmɩɩ na Jejuu dɩko khoda
16Ana ma cʋna nĩdaraakɛ dɩphã ya fɛ? Wɩ hʋrɛ bɩsanasɔɔkɛ n tɔɔnɩ ƴatɔɔ, dɩ wa‐n we awɩ ˈwalãkhasɔ dɩ wa‐n so: 17Sɩ kɔɔ ʋnɛ bɩɩl nɛrɛra, sɩ na kɔɔ sa ga, sɩ kɔɔ khɩɩrɛ nɛrɛra, sɩ na kɔɔ baˈ. 18Gɩdonɩ Jã kɔɔ ɩnɛ, aa‐n kɔɔ kho dɩkoraˈ, aa‐n kɔɔ yɔ thɩ̃aˈ, dɩ wɩ jɩɩl sa yɩ: Kɔ̃tɛɛbuu hanaanɛ. 19Dɩ mɛr tibili Bikuun ɩ̃ wo, a thɩ̃ɛ mɩ‐n kho, a thɩ̃ɛ mɩ‐n yɔ, dɩ wɩ jɩɩl wo sa yɩ: Hɩnɛ, kũu kɛ̃kɛbɩ gɩ, a dona ta yɔn, war gbadara na sopugodaraa kuun gɩ. Sɩ gɩrɛɛkɛ Thãgbaa kpɛsɛ n cʋʋnɩ n nɩnanɛ dɩ sobɔr har kpɛsɛrɛɛlee pa.
Mɔ̃ Jeju phaannɩ dɩɩsɔɔkɛ bɔnɩ ha pɛrɛ
(Lu 10:13–15)
20Le Jeju ma da‐n phaan dɩɩsɔɔkɛ a kɔɔ cʋʋrɔnɩ ɔɔ nɔ kpaa thɩ̃sɔ jɔɔ, gɩdonɩ ha debire na kɔɔ halaˈ, ayɩ: 21Ga puu farɛ Korajɛ̃ dɩɩ, ga puu farɛ Bɛcaɩda dɩɩ, gɩdonɩ ado nɔ kpaa thɩ̃ɛɛkɛ cʋɛnɩ anɩ thɩ̃thɩɩn kɔɔ cʋʋrɛ mɛ̃ Tɩɩr na Sɩdɔ̃ dɩɩra, wa kɔɔ mãa debire haar kɛkɛkɛ, sɩ na to bɔrɔ na bʋlna thoo.#Eja 23:1–18; Eje 26:1—28:26; Jow 3:4–8; Amɔ 1:9–10; Jak 9:2–4 22Gɛr gɩ dɩ ɩ̃ so nar: Wireekɛ Thãgba na kɩɩlnanɩ tɩbɩla, Tɩɩrdara na Sɩdɔ̃daraa kɩɩlɩkɛ wa ˈlɛnɩ na khɩɩr mɔ̃ anɩ kɩɩl na khɩɩrnaˈ. 23Sɩ fɛrɛ Kapɛrnayʋm dɩɩ, Thãgba na khəi fer na jʋʋnna ƴũ ya? Ə̃ˈə̃, Thãgba na gbumo fer dɩ fa thʋ khĩdi dɩɩ. Gɩdonɩ ado nɔ kpaa thɩ̃ɛɛkɛ kɔɔ cʋɛnɩ afɩ pa Sɔdɔm gɩ kɔɔ cʋʋ, ga dor a na kɔɔ hale na dana nĩ.#Eja 14:13–15; Jən 19:24–28 24Gɛr gɩ dɩ ɩ̃ so nar: Wireekɛ Thãgba na kɩɩlnanɩ tɩbɩla, Sɔdɔmdaraa kɩɩlɩkɛ wa ˈlɛnɩ na khɩɩr mɔ̃ anɩ kɩɩl na khɩɩrnaˈ.#Mat 10:15; Lu 10:12
Jejuu kãka
(Lu 10:21–22)
25Ga bɔɔlera Jeju gba thɩmɩa da‐n mɩɩ ayɩ: Thɩrɛ, mɩ‐n fʋɔr fɛr, fɛrkɛ dɔnɩ Kɔ̃tɩn thãgbara ƴũ na thɩɩra, gɩrɛraakɛ fɩ kɔɔ kernɩ thɩ̃ɛsɔɔkɛra kpɛsɛdarara na thɩ̃ jɩnana, sa gba gɩ a nɩna bɩsã bii. 26Ɔɔ Thɩrɛ, fɛr gɩ kɔɔ da haar dɩ fɩ cʋʋ mɛ̃. 27Ɩ̃ Thɩ gbaar thɩ̃ɛ fɛʋ a dʋ mɩ nyɔ̃kɔɔ, sɩ tibil na jɩ Bikuun saagado Thɩrɛ gaaga, dɩ tibil na jɩ Thɩrɛ dakha saagado Bikuun gaaga, saagado wo Bikuunna ɔr ƴaalɛ a nɩrɔ n taa ga.#Jã 3:35; 1:18; 10:15
Mɔ̃ na ˈlɛnɩ hɩɩrɛ
28Nɩ ɩna mɛrɛra, nɛrɛ fɛʋʋkɛ n vɔɔnɩ kɛ n heenenɩ dakha heendaakɛ dɩbarɔnɩ, dɩ ma ha nɛr hɩɩrɛ. 29Nɩ tɔ kpeleleekɛ dɔnɩ ɩ̃da, dɩ nɩ to ɩ̃ dɩɩrsɔ, gɩdonɩ hɛlɛlɛ fɩldaar na ha jodaar ha mɩ, dɩ na ˈlɛr hɩɩrɛ anɩ hara.#Jer 6:16 30Gɩdonɩ ɩ̃ kpeleekɛ ma to nɩnɩ, gɩ habarɛ; dɩ ɩ̃ heendaakɛ ma heen nɩnɩ, ga dɩbɩrɔaˈ.
လက္ရွိေရြးခ်ယ္ထားမွု
Matiə 11: LOBIRI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Burkino Faso 1985.