APAN AQAO: 14
14
Lod Re Abram Yekhyad' Yu: Ra" Khyo
1Ai: ayo, kho:kham byid yaug ngad ko" ra" Babelon kho:kham Amraphe- Elasara kho:kham- Ariog- Elam kho:kham Khedolaome- Goin kho:kham Thida bam wa- 2Sodom kho:kham Bera- Gomora kho:kham Birsha- Adma kho:kham Shinab- Zeboiim kho:kham Shemebe (Zoa) ga" ra" Baal kho:kham bam gye kad' ako". 3Ce: kho:kham ngo" yaug wa kad' yu mung: ana" tham: shid ga: mhang" ra" Sidim lao: geim: mae gyephung: li" ham: na: ako". 4Yao: bam wa kho:kham Khedolaome eib: ra" qao: mae daxe: shid' zin na: lo: ako". Ngadqere: daxe: sam zin mae yao: bam wa yao: re gye kad' tau: lhan" ako". 5Daxe: byid zin mae kho:kham Khedolaome wa yao" myid vang" ba nam kho:kham gyezo: qe we' joe" li" mung:- Ashterod Karnaim mae Rephaim byumyu" qere Ham mae Zuzim byumyu" qere Kiriathaim jao: dae mae Emim byumyu" qere- 6Edom bam mae Horid byumyu" qe re khe' aung: pye' mung: din"pyad' yo nhae mae" Elparan joe" sho' yao: bam re khe' tao" ke' ako". 7Ai: thao re yao: bam wa dam: tug' lo mung: Enmishpad ga" ra" Kade khyo joe" lo: ako". Yao: bam wa Amaleg mung" alhab' re aung: pye' mung: Hazazon- Thama mae na ko" ra" Amori byu qere re: khe' aung: pye' ako".
8Ailao" Sodom kho:kham- Gomora kho:kham- Adma kho:kham- Zeboiim kho:kham- we' Baal kho:kham qe ngo yaug wa yao: bam: gyezo: qe we' Sidim lao: geim: mae- joe" li" mung:- 9Elam kho:kham- Goim kho:kham Babelon kho:kham- Elasara kho:kham qe byid yaug re gye li" khe' ako". 10Ailao: geim: wa zhonhai: dungkhung: jham myo: sho' jo, mung:- Sodom we' Gomora kho:kham shid' yaug wa gyekhe' poe mae" phao nae" qam: ke' yang: yao: shid' yaug wa ai: zhonhai: dungkhung: khyo byid: gyo" vao lo" ako". Ngadqere: gatau: kho:kham sam yaug wa bam khyo phao: loe; lo" ako". 11Kho:kham byid yaug wa Sodom we' Gomora vogaung: mae" zo:ve bobo yang: ja: khao: ngo" re yu: ci mung: phao: lo" ako". 12Abram nho: yao: zonhaung: Lod wa Sodom vogaung: mae na: ra". Airumung: yao: bam wa yao: re we' yao" jo,nho" zai yo alhab' re sham" lo" ako".
13Ngadqere: yauggai dayaug phao: loe; lo mung:- Amori byu Mamre re sang: ra" Gyang" Lho" sag' gae jham: nhae mae na: ra" Hebre byu Abram re ce: khyo alhab' lau dao: lota" kyo" ra". Mamre we' yao: nhaung: tao Eshko we' Ana bam wa Abram nho: myid qhan: ba nam qe ngad: ako". 14Abram wa yao" yao: zonhaung: taung" lo" qhug' va" ga" ra" thoe re the' gyo: lao"- yao: wa gyekhe' sulhe: 318 yaug re khai: zhang" yu mung: ai: kho:kham byid yaug: thao khyo Dan: vogaung: joe" sho' cao" khe' ra". 15Aitau joe" lao" yao" byu qere aphung: phung:kho' yang: gyevo qere myi" re yezin: mung: yao: bam re khe' aung: pye' ra". Yao: wa yao: bam re Damasku vogaung: mug: am: shad' Hoba joe" sho' cao" khe' mung:- 16sham" yu: lo" qhug' ra" lanyab alhab' re dam: qhug' tug' yu: ako". Yao: wa yao" yao: zonhaung: Lod re we' yao" jo,nho" lanyab myiqe: we' gatau: kyam: byu qere re: dam: qo" jhui" phao: lo: ra".
Abram Re Melkhizedeg shaman" Byid' Ra" Khyo
17Abram wa kho:kham Khedolaome we' gatau: kho:kham qere khe' aung: pye' yang: dam: tug' phao: lo: ra" au: Sodom kho:kham wa yao: re yetug: yu nae" qhid' mae" (kho:kham nho: lao: geim: ga: re: mhang" ra") Shave lao: geim: khyo thug' ye" lo" ra". 18Salem kho:kham ngad mung: Myhao: thao" ra" Mao"So: khinjaung re: ngad: ra" Melkhizedeg wa Abram jhao" mug we' sabyi qang: ci: li" byid: mung:- 19Yao: re shaman" byid: yang: mug:gaung we' myid gaung re phan" to: yaug ngad: ra" myhao: thao" ra" Mao"So wa Abram re shaman" byid: vashao: wo". 20Ni" gyevo qere aung doe, nhao: ra" myhao: thao" ra" Mao"So wa ngaui lho" vashao: wo"- ga: ta" ra". Ailao" Abram wa yao: qo" yu: ra" lanyab daxe bam mae" dabam re Melkhizedeg re byid' ra".
21Sodom kho:kham wa Abram re- Lanyab re nao sang wa, nga" byu qe alhab' re kam" wa dam: byid: la,- ga: ta" ra".
22Abram wa Sodom kho:kham re- ngo wa ni" zai daja: rere: masang nae"- khyang dakhe'- mangad: lao"- khyid zhaung: taui: dakhe' lhao" re: ngo masang: yu: nae" ein:- 23Mug:gaung we' myid gaung re phan" to: yaug ngad: ra" myhao: thao" ra" Mao"So Asang: qhid' kheim: mae ngo jham tang" ra". Ailao" Abram re qo" nhao yaug wa ngo ngad: ga: nao khonhae" re: maqo" ta" nae" ngad: ra". 24Ngo wa ngo yao" qhid' mae" pe" re: mayu nae"- nga" byu qe ci: pye' vako" ra" gu: re za: ngo khae: yu nae". Ngadqere: nga" nho: myid vang" ba nam qe ngad ko" ra" Ana- Eshko we' Mamre bam wa yao: bam gae bam re yu vageshao: ga: phaug' tau" ra".
လက္ရွိေရြးခ်ယ္ထားမွု
APAN AQAO: 14: LHCL
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Bible Society of Myanmar 2009