मत्ती 22
22
वेहवालो जेवनोओ दृष्टांत
(लूका 14.15-24)
1येशु फाशु तियाहा दृष्टांतमेहे कोहू लाग्यु 2स्वर्गाचे राज्य तिया राजा होस होय, जोओ तिया सुआआ वेहवाल कोल्यु. 3अने राजा आपाआ दासाहा मोकल्ये का निमंत्रीत माहुंहु वेहवाल खाअलाकाजे हादाडा, परंतु ते आवीत निमिले. 4फासाडी तिये पावरोहो ओ कोत मोकल्ये, निमंत्रीत माहुंहु कोआ पाला आय रोटू तीयार कोल्यु होय, माआ बैल अने पालीलो जनावरे माअये गोये होय, अने आखोज तीयार होय; वेहवाल खाअलाकाजे आव. 5परंतु ते मनापो न घेता निहित गोये कोडु आपाआ खेतुम, कोडु आपाआ व्यापाऱ्याहा. 6दिहरा माहुंमे जे उरलो ओते तियाआ पावरोहो तोईत तियाहा अनादर कोल्यु अने माईत टाक्ये. 7तेहलाम राजाहा खोत आवयू, अने तिये आपाआ सेना मोकलित हत्याररोहो माईत टाक्ये, अने तियाआ नगराहा पेटाडीत टाक्ये. 8तोये तो तियाआ पावरोहो कोयु, वेहेवला रोटू तीयार होय परंतु निमंत्रीत मांहे योग्य नाहा ठरव्येहे. 9याआ याकोअता चवाठ्या उपो जा अने जेवडे मांहे तुमामे जोडीत, तेताहाज वेहवाल खाअलाकाजे हादीत लावा. 10फासाडी तियाअ पावरोवही सडकावर जात कोडू हाजो, कोडू वाईट, आपारी जोडयेहे, आखाहा एकठे कोल्यु; अने वेहेवला को पावूना पोईत गोये. 11फासाडी राजा पावणांहा पाल्यू विसमे आवयू, तेहलाम तिये होमला मांहाहा पालील्यो जो वेहेवला कापडे नि पेअयु ओतु. 12राजा तियाहा फ़ुस्ल्याआ ओ दोस्ता तू वेहवालो कापडे न पोवल्यो इंही काहा आवयू? तियाआ सोब बंद होतगोयो. 13तेहलाम राजा लेतजा सेवकांआ कोयु, याआ आथे गुडू बांधीत तियाहा बारथे आंदाराम टाकीत आपा, तीइही रोडीलो अने दात खायलो ओते. 14काहाके हादल्ये जाअखो होय परंतु निवड्येहे थोडेज होय.
कैसरोहो फालू आपलो ओ
(मरकुस 12.13-17; लूका 20.20-26)
15तेहलाम परुश्यांहि जात आपसामेहे विचार कोअयु तियाहा कोडला प्रकारे गोठीमे ढोगुहू. 16फासाडी तिये आपाआ शिष्याआ हेरोदाहा आरी तियाआ जागे ओ कोहू मोक्ल्यीत ओ गुरु, आमाहा जानिलो होये का तू खोरो होय, अने परमेश्वरोओ मार्ग खोरो हिकाडत्लू, अने कोडाआज फिकीर की, काहाके तू मांहाआ सोब पालीत गोठी नाहाकोईत. 17याकोअता तू आमाहा कोअलो तू कि विचार कोईत होय? कैसराहा कर आपलो हाजो होय का नाहा. 18येशु तियाआ दुष्टता होमजीत कोयु, ऐ कपटी, माहु काहा पारखिता? 19कराराआ हिकिलो माहु देखाव तेहलाम ते तियाआ जागे एक पोशाआ लेत आव्ये. 20तिये तियाहा फुसिअलो, ओ छापे अने नाव कोडाआ होय? 21तिये तियाहा कोयु, कैसराचा तेहलाम तिये तियाहा कोयु, जे कैसराआ होय ते कैसराहा आप; अने जे परमेश्वरोओ होय, ते परमेश्वरोओ आप. 22ते होम्लाडित ते थक उवे, अने तियाहा सोडीत निहित गोये.
पुनरुस्थान अने वेहवाल
(मरकुस 12.18-27; लूका 20.27-40)
23तियाअ तेदीही सदुकी जे कोयु ओते का माआ मोल्याआ पुनरुत्थान होय का नाहा, तियाआ जागे आव्ये अने तियाहा फ़ुस्ल्याआ, 24ओ गुरु, मोशेवाही कोयु ओते केदीही एगदू मांहु एकभी पोऱ्ये आयना ओतु मोईत जाय, ताहा तिया पाही तियाआ लाडीआरी वेहवाल कोइत आपाआ पाहि कोअता वंश आप्यू. 25ओमे आमा इंही सात पाही ओते; पेल्लु वेहवाल कोइत मोईत गोल्यो, अने पोऱ्ये नेओते कारणावाही आपाआ लाडीही आपाआ पाहि कोअता सोडीत गोल्यो. 26आव प्रकारे दिहराआ अने तिसरु पण कोल्यु, अने सात पर्यत ओच उवे 27आखाम फासाडी ती बुई पोन मोईत गोयी. 28फासाडी ती मोईलामरोत उठेताहा कोडाआ लाडी उवे? कोईत ती आखाआ लाडी उवी ओती. 29येशु तियाहा उत्तर आप्लु, तुमु पवित्रशास्त्र अने परमेश्वरोओ सामर्थ नाहा जानिलो; आव कारनो कोईत विचारामेहे पोडये होय. 30काहाके मोईलामरोत उठेताहा ती वेहवाल कोअनारू नाहा अने नाहा राखाय परंतु होर्गाम परमेश्वरोओ दूताआ एकहरको रोही. 31पोन मोल्य उठलो विषयी नाहाकोत तुमु ओ वचन नाहा वाचले जे परमेश्वराने तुमामे कोयु. 32आय अब्राहमो परमेश्वरआ, अने इसहाकआ परमेश्वर; अने याकोबाआ परमेश्वर होय? तो मोल्याआ नाहा, परंतु जिवंताआ परमेश्वर होय. 33ओ होमलित मांहे तियाआ संदेशा त्यापोरत संचलीत उवे.
आखाप रोत वोडी आज्ञा
(मरकुस 12.28-34; लूका 10.25-28)
34तेहलाम परुशीनी होमल्या का येशु सदुकीयांआ सोब बंद कोईत आप्लु, तेहलाम ते एकठे उवे. 35तियामेहे एक व्यवस्थापकाने तियाहा पारखिलो याकोअता फ़ुस्ल्याआ, 36ओ गुरु व्यवस्थापनेत कोडली आज्ञा वोडी होय? 37तिये तियाहा कोयु, तू परमेश्वर आपाआ प्रभूपोरोत आपाआ पुरो मोन अने आपाआ पुरो जीव अने आपाआ आरी ओक्कल प्रेम को. 38वोडी अने मुख्य आज्ञा ती एज होय. 39अने तियाआ सारखो ए दिहरे पण होय का तू आपाआ आरी कोरयापो आपाआ सारखो प्रेम को. 40एज बेन आज्ञा आखी व्यवस्था अने भविष्यवक्ताआ आधार होय.
मसीह दवुदो सुउ के दावुदो प्रभु होय?
(मरकुस 12.35-37; लूका 20.41-44)
41जोयों परुशी एकठे ओते, तेहलाम येशु तियाहा फ़ुस्ल्याआ, 42मसीह विषयी तुमु कि विचार कोअता? तो कोडाआ पुत्र होय? तिये तियाहा कोयु, दाविदाआ. 43तिये तियाहा फ़ुस्ल्याआ, ताहा दाविद आत्माम आवीत तियाहा प्रभू काहा कोत्लू? 44प्रभू, माआ प्रभू ला कोयु, माआ हुदीवोल बोह, तेहलाम फासी का आयताआ वैऱ्यी ताआ गुडाआ निसे कोईत आपे. 45फासाडी, जांहा दाविद तियाहा प्रभू कोत्लू, ताहा तो तिया पुत्र केहलु कि बोनल्यो? 46तियाआ उत्तरात कोडूच एक गोठी न गोगू शकला तियाअ दिहे पोरोत कोडोबी ओ फुसिलो हिमत उवी नाहा.
လက္ရွိေရြးခ်ယ္ထားမွု
मत्ती 22: NOINT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.