मत्ती 10
10
बारा प्रेरित
(मरकुस 3.13-19; 6.7-13; लूका 6.12-16; 9.1-6)
1ताहा येशु आपाआ बारा चेलाहा हादीत तियाहा अशुद्ध आत्मा पोओ अधिकार आप्यू का तियाहा काडे अने आखे भातिई बिमारीही अने आखे भातिई कोमजुरीही सेटे कोए. 2ओमे बारा प्रेषितो नाव ओ होय पेल्लु शिमोन जो पेत्र कोवात्लु अने तिया पाही आंद्रिया, जब्दिई सूऊ याकोब अने तिया पाही योहान, 3फिलीप्प अने बरतुल्मै, थोमा, अने मतय जकातदार, अल्फीई सूऊ याकोब अने तद्दै, 4शिमोन कनानी अने यहुदा इस्कर्योत जोओ तियाहा तोईत आप्लु.
चेलाहा सेवा कोअता मुकलिलोओ
5या बारा जोआहा येशु ए आज्ञा आपित मुकल्यू अन्यजाति वोगे जाऊ नाहा अने शमरोनआ कोडनीबि नगरामे प्रवेश कोहू नाहा, 6याआ उद्देश इस्राएल घरानाआ जे टाकावल्यो मेंढे होय त्याजागे जायलो. 7अने सालता-सालता तुमु ओ संदेश कोजा स्वर्गाचे राज्य आरी आवयोहो. 8बिमारोहो हाजो कोआ मोल्याहा जिवंत कोआ कुष्ठ रोगीही शुद्ध कोआ. दुष्टात्माहा काडा तुमामे फुकट्यो आप्लु होय फुकट्यो आपा. 9आपाआ बटवा मेहे सोनो, चांदी किंवा तांबो लेऊ नाहा. 10अने प्रवासाकोता थेय्ली, दिहरो कापड़ो अने चप्पल किंवा काठी लेऊ नाहा काहाके मोजरया आपाआ अन्नाचे हक्कदार होय. 11ज्या गावून किंवा शहरामे तुमु प्रवेश कोअहा ताहा विसारपूस को का योग्य माहुहू कोडू होय, अने जो पर्यंत आविलो तोपोरोत तिहीज रो. 12जांहा तुमु तिया कोअमे प्रवेश कोअनारू ताहा शांतीचा आशीर्वाद आपा. 13जर ते को आशीर्वादाचे योग्य होय ताहा तुमाआ शांती तीइही बोणीत रोही पण योग्य नेशेय ताहा तुमाआ शांती फासी फिरीत आवे. 14जो तुमाहा ग्रहण कोअनारू नाहा अने तुमाआ गोठीपो लक्ष्य आपी नाहा ताहा तियाअ कोअमे रोत अने तिया शहरामरोत जाआत्लू आपाआ पायावाले धूळ फोकडीत टाका. 15आय तुमाहा खोरोज कोत्लू का येशु तेदीही तियाअ शहराआ किंवा गावोओ स्थिती सदोम अने गमोरा देशाआ स्थिती प्रमाणोओ उवे.
आवनारु कठिन टाईम
16पाला आय तुमाहा मेंढरा प्रमाणोओ लांडगामध्ये मोकलित होय. त्यापोत हापाहोस चतुर अने कबुतरा होसे साफ निरुपद्रवी व्हा. 17पण माहामोरोत सावधान रो काहाके ते तुमामे न्यायसभाम आधीन कोआ, आपाआ सभास्थानात तुमाहा फटके देय. 18तुमु माआ वोजोसे देशधिकाराहा अने राजाहा आगाडी उपस्थित कोअनारू ज्यायाकोलो अन्यजाति तुमु साक्ष बोनाळीलो. 19जाहा ते तुमाहा तोअणारू ताहा कालजी कोहू नाहा, का आमाहा की अने केहलो कोहू काहाके जे किबी तुमाहा कोओलो होय ते तियाआ टायमोमें तुमाहा कोयु जाइअलो. 20काहाके गोगनारे तुमु नाहा पण तुमाआ होर्गा बाह्हाआ आत्मा होय जो तुमाआरी होय बुले. 21पाही आपाआ पायहोहो अने बाह्हू आपाआ सुआहा माईत टाकिला कोअता अने सोऐ आपाआ याह्ही बाह्हाआ विरूध उभे रोत तियाहा माईत टाकीदेय. 22माआ नावोवाही आखे तुमामे तुच्छ मानणारु पण जो शेवटपोरोत धीर तोही तियाच तारण उवे. 23जांहा तुमामे आव शहरामे तुमाआ छळ कोअनारू ताहा दिहरा शहरामे नाहीत जायलो, काहाके आय तुमामे खोरोज कोत्लू का या आगाडी तुमु इस्राएलो आखे शहरामे गावून फिरुहू संपाही नाहा, तोपोरोत माअहा पोऱ्या आविलो जानारू.
चेला ओवलोओ अर्थ
24शिष्य आपाआ गुरुपोरोत वोडू रोतू नाहा अने सेवक आपाआ मालकापेक्षा वोडू रोतू नाहा. 25शिष्यामे आपाआ गुरु अने नोकराहा आपाआ मालकाहा आरी रोहिलो एवडोज तियाहा जाअखो होय जर तिये कोओओ मालकोहू शैतान कोयु, ताहा कोओओ मांह्हू केतो तेबी जाखा कोय.
कोडाआ बिहुहू जुवे?
(लूका 12.2-7)
26त्यापोत तियाहा भिईलो नाहा काहाके किबी टापित मेकल्ये नाहा जे उघडीन्या जानारू नाहा अने नाहा किबी लीकाल्यो होय जे होमजे नाहा. 27जे आय तुमामे आंदाराम कोत्लू ते तुमु उजालाम कोआ, अने जे तुमु मनेज कानाकी होम्लाडित तियाहा कोअलापो सोडवीत संदेश दया. 28तियाहा भिईलो नाहा जे डीलाआ नाश कोअता पण आत्माहा नाश कोहू शकत नाहा पण तिया बिक माना जो आत्माआ अने डील बेनुहू नरकाआ नाश कोहू शकतो. 29होमला रुप्यामे बेन सीडे वासत्ले का नाहा तेबी पण तुमाआ बाह्हू इच्छेवही तियाआ मायरोत एकपण धरतीपो पोडहू शकत नाहा. 30तुमाआ मुंडकामेऱ्ये सिंज्ये पण गीणीत मेकल्यु होय 31त्यापोत भिईलो नाहा तुमु जास्तीज सिडाप रोत पण किमती होय.
येशुहु ग्रहण कोअलो के इन्कार कोअलोओ
(लूका 12.8-9; 12.51-53; 14.26-27)
32जो कोडु मांहो आगाडी माहु ग्रहण कोए आय पण तियाहा मा बाह्हा आगाडी जो होर्गाम होय ग्रहण कोअनारू. 33पोन मांहो आगाडी माहु जो ग्रहण कोअनारू नाहा तियाहा आय पोन आपाआ ओबापोरोत जो होर्गाम होय ग्रहण कोअनारू नाहा. 34एहलो सोमजीतलो नाहा का आय धोरतीपो एकठे कोइला कोअता आवयू होय आय ओ कोइला कोअता नाहा पण तलवार चालविलाकोता आवयू होय. 35आयताहा याकोअता आवयू होय का मांहोहो तियाआ बाह्हाआ अने पोरीही आपाआ याह्ही अने वोवड़ीह्ही हावेहेहए विरूध कोअला आवयू होय. 36अने माअहा दुश्मन तियाआ कोओज माहुहू रोही. 37जो मारोत जाखो आपाआ याह्ही किंवा बाहापो प्रेम कोअत्लू तो माआ लायकी नाहा. जो मांपोरोत जाखो आपाआ पोऱ्यापो किंवा पोरी पो प्रेम कोअत्लू तो माआ लायकी नाहा, 38अने जो आपाआ क्रूस विसित माआ फासाडी चालते नाहा तो माआ लायकी नाहा. 39जो आपाआ जीव वासाडे तोओ तियाहा गोमावीत आपी अने जो कोडु माआ वोजोसे आपाआ जीव आपे तो तियाहा वोसाड़े.
प्रतिफल
(मरकुस 9.41)
40जो तुमाहा ग्रहण कोअत्लू तो माहु ग्रहण कोअत्लू अने जो माहु ग्रहण कोअत्लू तो माहु मोकलीनाराहा ग्रहण कोअत्लू 41जो संदेष्टाहा संदेष्टा कोईत ग्रहण कोअत्लू, तो संदेष्टाआ फोल मिलवे जो नितीमानाहा नीतिमान मांहु कोईत ग्रहण कोअत्लू तो सन्मानो प्रतिफोल मिलवे. 42जो कोडु या हाणाम एकाहा शिष्य माजित एक गिलास हेलो पाई आपही ताहा आय तुमामे खोरोज कोत्लू, ताहा तो आपाआ फोल गमविणारच नाहा.
လက္ရွိေရြးခ်ယ္ထားမွု
मत्ती 10: NOINT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.