Dibandu 1
1
Nsambi amasunda julu na tsi na biotsu abivu muna
1Ava Nsambi amasundila julu na tsi, 2tsi jimaba tindi vumbila; pisama jimagumba mubu agumabanganga yiari na yiari tumba Yinyunyi ayiruyili ombu Nsambi amafundulanga mamba. 3Nsambi amavosa rie: Yijalala yibi! Na yijalala yimaba. 4Nsambi amalaba yiri yijalala yivu yiboti na amakakasana yijalala na pisama. 5Nsambi amaluga yijalala nyangu na amaluga pisama mukolu. Vamaba tsisiga mbana vamaba kedi: la yilumbu yitega.
6Nsambi amavosa rie: Vabi yima yigala ayiugaga mamba, ayiukakasana mamba na mamba. 7Nsambi amayivaga ukakasana mamba amavu o tsi yionyi na mamba amavu o julu yionyi. Anana dionyi dimabila. 8Nsambi amayiluga julu. Vamaba tsisiga mbana vamaba kedi: la yilumbu yimubeji. 9Nsambi amavosa rie: Mamba amavu o tsi julu magukimi va mosi na ukamuga ulabini. Anana dionyi dimabila. 10Nsambi amaluga ukamuga ueni butamba, amaluga diguki dieni dimamba mubu. Nsambi amalaba yiri adina dimaba diboti. 11Mbana Nsambi amavosa rie: Butamba bubendisi bivaru abiburi biguji biminongu na minongu na miri amiburi milunda miminongu na minongu. Anana dionyi dimabila. 12Butamba bumabendisa bivaru abimabura biguji biminongu na minongu na miri amimabura milunda miminongu na minongu. Nsambi amalaba dionyi dimaba diboti. 13Vamaba tsisiga mbana vamaba kedi: la yilumbu yimurieru. 14Nsambi amavosa rie: Bijalala bibangingi o julu ukakasana nyangu na mukolu, dionyi diuba bilimba abiutabula temu tsibafeta nesi bilumbu nesi bilima; 15na bionyi biuba bijalala bijulu abiumonitsa tsi. Anana dionyi dimabila. 16Nsambi amavaga bijalala bibeji bineni: yijalala ayiviolila uroga la wisi uruma nyangu na yijalala ayigeyi la tsungi uruma mukolu na amavaga bambuelili wandi. 17Nsambi amabinamiga o julu umonitsa tsi, 18uruma nyangu na mukolu, na ukakasana yijalala na pisama. Amalaba dionyi dimaba diboti. 19Vamaba tsisiga mbana vamaba kedi: la yilumbu yimuina.
20Nsambi amavosa rie: Mamba mafunisingi nyama tsimamba tsiminongu na minongu na batsoli babasi julu jiotsu. 21Nsambi amasunda tindi mikuimbi mimubu, na nyama tsimamba tsiminongu na minongu Amalaba dionyi dimaba diboti. 22Nsambi amagabila nyama tsimamba na batsoli miula novosa rie: Biotsu abivu mu mamba bifuni ne te na miubu miubasa; na batsoli bafuni vava tsi. 23Vamaba tsisiga mbana vamaba kedi: la yilumbu yimuranu.
24Nsambi amavosa rie: Bibulu biminongu na minongu biburisini vana tsi: nesi biruitsi nesi bilandila nesi bibulu bimusiru biminongu na minongu. Anana dionyi dimabila. 25Nsambi amavaga bibulu biminongu na minongu: nesi biruitsi nesi bibulu bimusiru nesi bilandila biminongu na minongu. Amalaba dionyi dimaba diboti. 26Mbana Nsambi amavosa rie: Tuvayianu dibaala mu yikebutsu yietu nesi yibagunu yietu na akelisingi nyama tsimamba, nesi batsoli nesi bibulu nesi bilandila bitsi jiotsu.
27Nsambi amasunda mutu mu yikebutsu yiandi,
amamusunda mu yikebutsu yiNsambi,
amasunda dibaala na mugetu.
28Nsambi amabagabila miula na amabatsingula rie: Funanu na burasananu, basanu butamba de na barumianu, banu bafumu banyama tsimamba nesi batsoli nesi bibulu biminongu na minongu. 29Nsambi amamuevosa rie: Nyiduveyi bivaru biotsu abiburi biguji biminongu na minongu; abina biuba biguji bienu. 30Ombu bibulu biotsu bimusiru na batsoli botsu na biotsu abilingi va butamba, diwendi rie: biotsu abivu monyu nyubivega biriri abiuba biguji biogu. Adina amavaga. 31Nsambi amagengila motsu ama amavaga. Amalaba mamaba tindi maboti. Vamaba tsisiga mbana vamaba kedi: la yilumbu yimusiamunu.
လက္ရွိေရြးခ်ယ္ထားမွု
Dibandu 1: PUU1992
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
La sainte Bible en langue Yipunu © Alliance Biblique du Cameroun, 1992.