Maatiyoos 26
26
Giiman Sinɛɓa Giimɗɛ Yeeseek
(Mar. 14:1-2; Luk. 22:1-2; Yow. 11:45-53)
1Saaɓa Yeese toniiɗ ola sigi baŋɛ nɔ ruumek baŋiya, nɛɓa tonu nomtaanaka gɛɛna kɛ, 2"Ɗegerari kɛ ɗoŋikɛ sigɔɔgɛ pɛɛy baŋiya Ba'aalkɔɔ Ɗoyiɗoŋk, gaɓɛɛkɔɔ Tɔɔn Etoŋk kɛnɔ laalawɛɛ."#26:2 See kɛ Ba'aal Ɗoyiɗoŋk ba'aal sinɛɓa boŋkuɗ Waakoyot joop Israeelik laaŋoy ɗook Gibsik.
3Saadi baŋiya tolɗiiɓa ɔɗɔweer tapa ŋaadiyɛɛkoŋk a gutarɛyɛ ɗookoŋk woy ɔɗɔwen tapa ŋaadiyɛɛkoŋk sinɛ obiik riyɛ kɛ Kɛyaapaak. 4Waasiɗiiɓa kɛnɔ gaamɛɛ Yeese ɗegeej kɛnɔ ɓokotɛɛ. 5Tonurɓa kɛ, "Kii ijaagɛ waawuy Ba'aalik kɛnɔ mokɔɔ joop boŋurku ooyan."
Buke Jarti Omaay Yeesee Reyaaye
(Mar. 14:3-9; Yow. 12:1-8)
6Saaɓa Yeese arkiɗ Bitaniyaake, woy Simion sinɛɓa lak dɔɔɓɔyk. 7Nɛɓa widik ɛɛk jarti om son lak sɛɛnik a ɗɔku reyaay sinɔ obi gati nɛɛkɛŋɔŋk a ar belkaatii sinɔɔnɛ riyɛ kɛ albastirosuk a enyaaŋ. Nɛɓa gupatɛrgeeɗ ɔɗɔwa ma Yeese beeber nyon ɗamatoŋk. 8Nɛɓa nomtaanak gɛɛnɛ dɛnɛr sinɛ nɛ ŋadir nɛ tonur kɛ, "Sɔɔkɛɛ any sini agut jikon? 9Reyaay sini gunkɔ ɓalɗiiɗɛɛ gati sinɔɔnɛ obiiŋɔŋk nɛ wori nɛɛk gaɓɛɛ sankaanaka."
10Ɗegerɓa Yeese sini nɛ tonu sɛɛga kɛ, "Ooɗɛɛr jarti sini agut jikon? Ijaag kɔta any sinɔ mentanŋɔŋk. 11Sankaanak sɛɛg a iinak agut omoŋ ɓɛɛnyɔwɛ gɛɛŋk baŋɛ, makɔɔ kɛɛ eet a iinak agut omoŋ ɓɛɛnyɔwɛ gɛɛŋk baŋɛ. 12Sinɛkɔta gupatkiɗ reyaay sini ɛɛkak ragadikɔ eet tɔkɔwa. 13Eekeer tona kɔnaaŋ, ɗoo tookɛɛta baŋɛ sinɛkoy waasɛɛɗɛ Pɛɛni sini Ɓɛlkɛɛstank kɛygun nyon sinɔɔnɛ eetik, any sinɛkɔ ijaagik waawasɛɛkoy a kokoɓkuɗɛɛ sɛɛn."
Doomɛ Yuuda Gaɓɛ Yeeseek
(Mar. 14:10-11; Luk. 22:3-6)
14Saaɓak nomtaanakɛ sigaagɛ aarin a pɛɛyk om sinɛɓa riyɛ kɛ Askorotu Yuudaak kɛɛɓa son lak ɔɗɔweer tapa ŋaadiyɛɛkoŋk. 15Nɛɓa tonu sɛɛga kɛ, "Ɔkɔn kɔna gaɓa Yeese nɛɛkiŋ nɛkɔɔta gaɓɛɛr jikon?" Nɛɓa sɛɛk ikomur biriyatɔk a ruumer iɗit a aarin nɛ gaɓɛrgeeɗiŋ. 16A tukiɗi saaɓak, warɛɓa Yuuda ɔɔtɛ sinɔ yaageeɗ kɛnɔ gaɓɛ Yeeseek.
Ɗama Ba'aal Ɗoyiɗoŋk
(Mar. 14:12-21; Luk. 22:7-14,21-23; Yow. 13:21-30)
17Ɓeny sinaanɛɓa tuktank Ba'aale nasiyoŋk wideetarɓa ɛɛk nomtaanak gɛɛnɛ son lak Yeeseek nɛ tonurgeeɗ kɛ, "Ɗɛyin ana ragadi ɗama Ba'aal Ɗoyiɗoŋk eet?"
18Nɛɓa sɛŋk tonu sɛɛga kɛ, "In kɛɛɗɛɛ katamɛya waa aniinik nɔ kɛɛɗɛɛ tonguɗɛɛ kɛ, 'Tonu rɔɔriytaan kɛ wɔɔŋku ɔɔtɛ naakɛŋ eet a nomtaanak gaaŋk ɗamiikɔɔ ɗama Ba'aal Ɗoyiɗoŋk nyaki nookɛk.' " 19Nɛɓa nomtaanak gɛɛnɛ ijaagir oko sinɛɓa toniiɗ sɛɛga Yeeseek ragadirɓa ɗama Ba'aal Ɗoyiɗoŋkuŋ.
20Saaɓa kɔjururkuɗuk mɛlɛrkiɓa Yeese a nomtaanak gɛɛŋk sigɛ aarin a pɛɛyk agut omoŋ nyon ɗamatoŋk. 21Saaɓa atukuɗ ɗamatik nɛɓa Yeese tonu sɛɛga kɛ, "Eekeer tona kɔnaaŋ, gaɓɛkɔɔtu iinakɛ iɗit omaayiŋ."
22Nɛɓa sɛɛk sanɗi jɛt nɛ tonur a omoŋ omoŋ kɛ, "Suumi naŋk anɛ eet yoo?"
23Nɛɓa sɛŋk tonu sɛɛga kɛ, "Iɗit sinɛkɔɔtu gaɓɛk sɛɛn sinɛ gaɓii ari lɔkɔya a eet agut omoŋɔŋk. 24Rɛrkɔɔ Tɔn Etoŋk oko sinɛɓa taapɛɛɗɛ Wargatɛɛ Waakoyotoŋk agut sɛɛnik. Mayakana durikɔɔ eta sinaanakɔɔ gaɓɛ Tɔɔn Etoŋkuk, iɗit sinɛ dɔɔs a gunɓa kɛɛ ɓartɛɛt."
25Nɛɓa Yuuda sinɛkɔɔ gaɓɛ sɛɛnik tongeeɗ kɛ, "Suumi naakɛ, anɛ eet yoo?" Nɛɓa sɛŋk tongeeɗ kɛ, "Oko sinɛ toniiɗink."
Kiiwu A Tuu Sinɔ Geetitank
(Mar. 14:22-26; Luk. 22:15-20; 1 Kor 11:23-25)
26Saaɓa ɗamiiɗik nɛɓa Yeese ɓɔŋgɔɔrɛ kiiwu nɛɛk nɛ geetiŋ, nɛ ŋapati nɛ gaɓɛ nomtaanaka gɛɛnaak nɛ tonu sɛɛga kɛ, "Iyook, in ɗamɛɛ, ege sini buusɛ naak."
27Nɛ ɓɔŋgɔɔrɛ tuu nɛɛk nɛ pɔɔsɛ Waakoyo, nɛ gaɓɛ nomtaanaka gɛɛnaak, nɛ uter tuu nɛɛk sɛɛg baŋɛ, nɛ tonu sɛɛga kɛ, "Iyook, in utɛɛ any sini iinak baŋɛ, 28agut sini ege sini yɛrom naak kuumeetoŋk sinɔ tɔɔnuk, sinɛkɔɔ gupatɗik agut tɔŋɔɗ tikiyɛ joop sigɔ ɓɔɔkaaŋɔŋk. 29Tona kɔnaaŋ, kaakoy tuu soortan taamɛ sigi wɛynik mɛlɛɛɗa nɔkoy uteeɗa sinɔ tɔɔnuk eet a iinak burɛɛ Baabɛkik."
30Nɛɓa iiliyar iiliya nɛ kɔtɔɔŋɛr kurkuma Dɛbirɛ Jɛytik.
Tonkun Yeese Ɔɗɔɔkɛ Kɛ Kaadɛkɔɔ Sɛɛn Petrosuŋ
(Mar. 14:27-31; Luk. 22:31-34; Yow. 13:36-38)
31Saaɓak tonuɓa Yeese nomtaanaka gɛɛna kɛ, "Ŋɔɗari kɔɔtu iinak baŋɛ kaalt sineene ɓenysek. Agut sinɔ taapɛɛɓa Wargatɛɛ Waakoyotoŋk kɛ,
'Malaakoy irtan nɛɛkiŋ,
kɛɛtiɗiikoy pony jiŋkuyɛ gɛɛŋkiŋ.'
32Mayakana saakɔɔ ŋaarkiɗa ret walasak baŋiya, ɗeykuunakɔɔ kɔne ɔɗɔɔkɛ Gɛlilaaka."
33Tonuɓa Petros Yeeseya kɛ "Kɛygunkɔɔ aasi kaadɛrni joop baŋɛŋ, makɔɔn saak kaa kaadɛt adaktan."
34Nɛɓa Yeese tongeeɗ kɛ, "Eekeer tona naaŋ, kaadin kɔɔtu agut jiit kaalt sineene ɓenysek a inkɔɔ ki ɗooran koogelees."
35Nɛɓa Petros tongeeɗ kɛ, "Ɔkɔnkɔɔ ɗɛyɛ a rɛɛrɛŋ nɛkɔɔ rɛɛrii eet a iin agut omoŋ, ma kɔɔnu ka kaadɛɛt adaktan." Nɛɓa ɓɔrɛ tonur nomtaanak sigɛ ɔgɔɔk baŋɛ oko sinɛk.
Ɗanɗama Yeese Geetɛsɛmanii
(Mar. 14:32-42; Luk. 22:39-46)
36Saadi baŋiya kaarɓa Yeese a nomtaanak gɛɛŋk soona riyɛ kɛ Geetɛsɛmaniik. Saaɓa mɛlɛrɗi saanak, nɛɓa Yeese tonu nomtaanaka gɛɛna kɛ, "In beeɗkuunɛ seedi saa kɛɛɗa ɗanɗamaaɗa soodik." 37Kaarɓa Yeese a Petros a tɔɔmɔk Jɛbdiyoosuk a pɛɛy nɛɓa tuke san a ɓakɛy. 38Tonuɓa sɛɛga kɛ, "Sanɗi wɛɛŋa gaanɛ jɛt mɛlɛɛɗa nɔkɔɔ rɛrɗaak, in ɓɛlkuunɛ seedi, a ɓeɗɛɛŋ a eet agut omoŋ."
39Wideɓa ɛɛk sɛɛge a yowɛɛɗ a balaaŋ, nɛ supke tepeen nɛɛkɛ ɗoo nɛ ɗanɗama kɛ, "Iin Baabɛɛ naak, ɔkɔn gayɛŋ inte ɗeyi tuu sini rakatɛyoŋk, mayakana kat ɓɛɛlɛ oko ɗɛyan naak, ma in ɓɛɛlɛ oko ɗɛyan nook."
40Saadi baŋiya saaɓa weeriikiɗ son lak nomtaanak gɛɛŋkik, nɛɓa laŋki sɛɛg ma ɗeegararŋ, nɛɓa tonu Petrosa kɛ, "Kiir oolɛ a ɓeɗiir a eet agut omoŋ aasi sayitiya sinɔɔna omoŋɔŋkuŋ? 41In ɓeɗɛɛ, in ɗanɗamaakɛɛ kɛnɔ mokɔɔ guugunyari paariita, wɛɛŋa etoŋk ɓɛɛlɛr tɛkɛɛrɛ ma bɔɔla buusɛ etoŋkuŋ."
42Kɛɛɓa kɛkar gut pɛɛyeen nɛɛk nɛ kɛɛ ɗanɗama kɛ, "Iin Baabɛɛ naak, ɔkɔn ki gayɛ a ɗeyi a kaa uteeɗ tuu sini rakatɛyoŋkuŋ, nɛ in ɓɛɛlɛ oko ɗɛyan nook."
43Saaɓa weeriikiɗ kɛkar son lak nomtaanak gɛɛŋkik latuɓa ɗoŋ taamɛkɛ nɛɓa laŋki sɛɛg ma ɗeegararŋ.
44Nɛɓa ŋɔr sɛɛg kɛkar nɛ ŋaar nɛ kɛɛ ɗanɗama jiiteen nɛɛk a tonu pɛɛni sinɛkɔ tukik.
45Saadi baŋiya weeriikɓa son lak nomtaanak gɛɛŋkik nɛ mɛlki nɛ tonu sɛɛga kɛ, "In ɗegagarari a imiminyari kɛkar? Wɔɔŋku ɔɔtɛ nɛɛkɛkiŋ gaɓɛɛkɔɔ Tɔɔn Etoŋk ariita tikitaanakoŋk. 46In ŋaarɛɛ raŋana koy ŋaari ɔsɔ iɗit sinɛkɔɔtu gaɓɛk wɔɔŋkuŋ."
Gaamur Yeesee Gumaaker Gɛɛnɛk
(Mar. 14:43-50; Luk. 22:47-53; Yow. 18:3-12)
47Saaɓa Yeese arkiɗ waasiyɛɛkɛk, mɛlkiɓa nomtaanakɛ gɛɛnɛ sigaagɛ aarin a pɛɛy a omoŋ, Yuudaa sɛɛnɓa a joop a ɓɔɔkaaŋ sigɔ latu gumboyik a aarɛɛk sigɔɓa sɛɛg wosɛykɛɛ sooy lak ɔɗɔweer tapa ŋaadiyɛɛkoŋk a gutarɛyɛ ɗookoŋk. 48Gaɓɛɓa sɛɛga Yuudaa sinɛkɔɔ gaɓɛ Yeeseek yaaŋtan sinɔ kɛ, "Iɗit sinɛ ɗɛyɛɛrik sɛɛn sinɛkɔɔ samɓoyaak, nɛ in gaamɛɛ sɛɛn." 49Sisa kɛɛɓa son lak Yeeseek nɛ samɓoy nɛ tongeeɗ kɛ, "Rɔɔriytaano, digoyna."
50Nɛɓa Yeese tongeeɗ kɛ, "Tekaan naakɛ ijaag any sinɛkɔ kusaagiɗink."
Nɛɓa wideetar ɛɛk joop gɛɛnɛk nɛ gaamur nɛ korkoɗarŋ. 51Saaɓak joop sigɛɓa sɛɛg a Yeeseek koyowukuɓa omaay aarɛ nɛɛk, nɛ yawuku weena ijaagen sinɛ ɔɗɔwen tapa ŋaadiyɛɛkoŋkuk.
52Nɛɓa Yeese tongeeɗ kɛ, "Jumuru aarɛ nook kokɛya nɛɛkaak, joop sigɔ koyowɛrk aarɛk baŋɛ, rɛrarkoy aarɛ. 53Koɓun kɛ ɔkɔn ɗɛyɛŋ ɛ kalɛya Baabɛɛ naakiŋ kɛ kiikita wosɛyɛɛt wosɛytaanak sigɔ kumɛɛ ɓɔɔkaaŋɔŋk? 54Nɛ ɔkɔn ɓɛɛlɛ oko sinikiŋ, nɛ dusanɛɛ pɛɛni sinɛɓa taapɛɛ Wargatɛɛ Waakoyotoŋk kɛ laŋkikoy rakatɛk ɛk?"
55Saaɓak tonuɓa Yeese joopa sigaaga kɛ, "Kurakɔ a aarɛɛ a gumboyik kɛnɔtu gaamiir a ito gaamɛɛ iɗit sinɔ sɔɔkɛ ɓɛɛlɛtik? Ma kanti kiir gaamit saakan rɔririyiɗa ɓɛɛnyɔwɛ gɛɛŋk baŋɛ Godeey sinaanɛ Geetitank. 56Mayakana nɔ ɓɛɛlɛɛɗ sini baŋɛk kɛnɔ dusanɛɛ sinɛɓa waasɛr joop pɛrkaakoŋk Wargatɛɛ Waakoyotoŋk." Saaɓak ŋɔɗarɓa nomtaanak gɛɛnɛ baŋɛ nɛ gonarŋ.
Wideerɛɛ Yeesee Joopa Sigɔɔga Gaɓɛr Woorank
(Mar. 14:53-65; Luk. 22:54-55,63-70; Yow. 18:13-14,19-24)
57Saadi baŋiya, diilerɓa Yeesee joop sigɛɓa gaamur sɛɛnik son lak Kɛyaapaa sinɛ ɔɗɔwen tapa ŋaadiyɛɛkoŋkuk sinɛ obiik, tolɗiiɓa saadi rɔɔriytaanak higi Muuseek a gutarɛyɛ. 58Nonomɗuɓa Petros a yowɛɛɗiŋ mɛlɛɛɗa keera sinaana ɔɗɔwen tapa ŋaadiyɛɛkoŋkuk, nɛɓa guuguny takana nɛ beebeɗar a koortaanak kɛnɔ dɛnɛ ɔɔtɛ pedtan nɛɛkik.
59Ɔɗɔweer tapa ŋaadiyɛɛkoŋk a joop sigɔ gaɓɛr woorank baŋɛ, warɛrɓa Yeeseya pɛɛni nyonoŋk sinɔ arirɗi kɛnɔ ɓokotɛɛk. 60Kɛygunɓa widakaayɛ pɛɛniyɛ nyonoŋk a ɓɔɔkaaŋ, nɛɓa kiikiɗɛ laŋiiɗ pɛɛni sinɔ ɗegeera a rɛrgiɗɛɛŋɔŋk. Pediya widerkiɓa ɛɛk joop a pɛɛy,
61nɛ tonur kɛ, "Tonukɔ iɗit sini kɛ, 'Aalakɔɔ Gode sini Geetitank Waakoyotoŋk nɛkɔɔ kɛnya ɗoŋikɛ sigɔɔgɛ jiitik.' "
62Nɛɓa ɔɗɔwen sinɛ tapa ŋaadiyɛɛkoŋk ŋaar raŋana nɛ tongeeɗ kɛ, "Kɛɛ any sinɔ jumurun anta sinaana waasɛr joop sigik baŋɛk? Tonur joop sigi eekeer?" 63Yakanaɓa Yeese dakɛ kɛ many, nɛɓa ɔɗɔwen sinɛ tapa ŋaadiyɛɛkoŋk tongeeɗ kɛ, "Toniina tiriyaakɛ Waakoyo sinɛ Wɛɛŋak. Ɔkɔn iin Keresee Tɔɔn Waakoyotoŋk, ton tina."
64Nɛɓa Yeese jumurgeeɗ kɛ, ɓɛɛlɛ oko sinɛ toniiɗink. Dɛnɛɛrkoy Tɔɔn Etoŋk a beeɗ ɗiɗikakɛ Waakoyo sinɛ lak ɓaŋkawukaak ɛkoy dɛnɛɛr saakoy mɛlkiɗ dari a ar gumoyk."
65Nɛɓa ɔɗɔwen sinɛ tapa ŋaadiyɛɛkoŋk ŋadiŋ. Nɛ pɔɔpɔk abii nɛɛk, nɛ tonu sɛɛga kɛ, "Nyɔɔnkɔ Waakoyo! ɗɛyɛ tina sisɔ waasiyɛ ɔgɔ jikoŋk? Tiyɛɛrkɔ saa nyɔɔnɗu Waakoyokuŋ. 66Gayi kɔna a jikon?"
Nɛɓa sɛɛk jumurar kɛ, "Tikiɗiikɔŋ, nɛ dɔɔs a rɛrŋ."
67Saaɓak topɛpɛyarɓa Yeeseya taamɛka ɛ bibitar ɛ joop ɔgɔɔk papaŋar. 68Nɛ tonurgeeɗ kɛ, "Iin Keresee paaŋini wooɗ? Tontɔ tina pɛrka.
Kaadɛ Petros Yeesee
(Mar. 14:66-72; Luk. 22:56-62; Yow. 18:15-18,25-27)
69Saadi baŋiya beeberɓa Petros keer sinaanɛ ɔɗɔwen tapa ŋaadiyɛɛkoŋk sinɛ obiik tak, nɛɓa widik ɛɛk peet om sinɔ ijaagenk son lak sɛɛnik nɛ tongeeɗ kɛ, "Iinkɔ ɓɔrɛ a iɗit Gɛlilaak Yeesee agut omoŋ."
70Nɛɓa sɛŋk kaadɛ sɛɛge baŋɛ taamɛkɛ kɛ, "Kaa ɗegerɔɔn any sinɛ tonunk."
71Nɛɓa kɔru tugaata sinaana keer nɛɛkik nɛ dɛnɛ sɛɛn peet om kɛkar sinɔ ijaagenk, nɛ tonu joopa sigaaga atu saadik kɛ, "Sɛɛnkɔ iɗit sini a Yeesee kɔ Naajireetik agut omoŋ."
72Nɛɓa sɛŋk kaadɛ kɛkar a wogoygeeɗ kɛ, "Kaa ɗegerɔɔn iɗit sinɛ."
73Ɔɔtɛ sinɔɔnɛ dinyŋɔŋk baŋiya wideetarɓa ɛɛk joop sigɛɓa ɛtɛtɛɗar saadik nɛ tonur Petrosa kɛ, "Ɗegerɛɛni waasiyɛɛkɛ goonɛk joope sigaagɛ ege omaay iin eekeerɛ."
74Nɛɓa sɛŋk tonu sɛɛga a wogoygeeɗ a lamɛ ɛɛk nɛɛk kɛ, "Kaa ɗegerɔɔn iɗit sinɛ."
Nɛ sisa ɗooru koogele. 75Nɛɓa koɓuku Petros any sinɛɓa tongeeɗ Yeese kɛ, "Kaadin kɔɔtu agut jiit a in ki ɗooran koogeleesik." Nɛɓa ŋaariri walasa nɛ kuɗe jɛt.
လက္ရွိေရြးခ်ယ္ထားမွု
Maatiyoos 26: KSTM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ