Maatiyoos 21
21
Mɛlɛ Yeese Yorsaleema
(Mar. 11:1-11; Luk. 19:28-40; Yow. 12:12-19)
1Saaɓa Yeese a nomtaanak gɛɛŋk woontukuɗ Yorsaleemak, nɛɓa mɛlɛr mɛndɛra Beetɛ paagek sinaana ar kurkum Dɛbirɛ Jɛytik, nɛɓa Yeese wosɛyɛ nomtaanak gɛɛŋk a pɛɛy, 2atonu sɛɛga kɛ, "In ɗeykuunɛɛ mɛndɛra sinɔɔna ar kɔne ɔɗɔɔkɛk. Nɛ saakɔɔ mɛlɛrɗɔ saanak, nɛkɔɔ laŋirkɔɔ kuroy om sɛɛn a tɔɔn nɛɛk a ar tuseeɗ, nɛ in woorkɛɛ nɔ ɗɔkɛɛ sɛɛg son lak eetik. 3Nɛ ɔkɔn lakɛ iɗit sinɔ kɔna tonu any omoŋɔŋkuŋ, nɛ tonguɗɛɛ kɛ, 'Ɗɛyɛ sɛɛg Suumii. Wosɛyɛkikɔɔ sɛɛg sise.'"
4Nɔ ɓɛɛlɛɛɗ sinik dusanɛɛ sinɛɓa tonɛɛ ete pɛrkaakoŋk Isaayase kɛ,
5"In tonɛɛ joopa Yorsaleemuk,
'In dɛnɛɛko, Suumi noŋk kus son lak iinakik.
Sɛɛn mentanŋ, beeɗi kuroy raŋk,
aasi toomoy kuroyoŋk raŋk.'"
6Nɛɓa nomtaanak gɛɛnɛ kaar, nɛ ijaagir oko sinɛkɔ sɛɛga toniiɗ Yeeseek. 7Ɗɔkarkiɓa kuroy nɛɛk a tɔɔn nɛɛk, nɛ epatar abiyak gɛŋk toomoy sinaanɛ kuroyoŋk raŋk, nɛɓa beeɗiɗ Yeese.
8Epatarɓa joop a ɓɔɔkaaŋ abiyak gɛŋk gopan takan, ma ɔgɔɔk kɛtɛrki rɛkɛnak kɛɛnoŋk nɛ epatar sɛɛg gopan takan. 9Ooyɛrɓa joop sigɛɓa ɗeyir sɛɛne ɔɗɔɔkɛk a sigɛɓa nomɛrɗi baŋik kɛ,
"Hosaaina#21:9 Ad Giriikik "Hosaaina" sini kɛ, "Ebɔdu tink." Tɔɔna Daawitik!
Iɗit sinɔ kus tiriyaakɛ Suumiyoŋkuk geetitan!
In dakɛr pɔɔsiyɛɛk Waakoyota sinaana ar darik!"
10Saaɓa Yeese mɛlɛɗ Yorsaleemak, nɛɓa ŋaatir joop katamɛ nɛɛkik baŋɛ, nɛ tonur kɛ, "Wooɗ sini?"
11Nɛɓa joop sigɛ ɓɔɔkaak tonur kɛ, "Ege sini iɗit pɛrkaakoŋk Yeesee sinɛkɔ kus ɗook Gɛlilaak katamɛɛ Naajireetik."
Ɔɔyɛ Yeese Joop Sigɔ Nagadɗi Godeey Sinaanɛ Geetitank
(Mar. 11:27-33; Luk. 20:1-8)
12Saadi baŋiya guugunyɓa Yeese Godeya sinaana Geetitank, nɛɓa ɔɔyku joop sigɔ ɓaɓalar ɓolaatuuruwɛ ɛ ɓalɗi ɓolaatuuruwɛɛkɛk baŋɛ kɛɛtɛɓa tarbesɛyɛ joop sigɔ wonooyar komoyeer woriyoŋkuk a ola beeɗitoŋk joop sigɔ ɓalɗi kulɓeerakɛk. 13Tonuɓa sɛɛga kɛ, "Taapɛɛɓa Wargatɛɛ Waakoyotoŋk kɛ, 'Riyɛ gode naak kɛ gode ɗanɗamɔɔnoŋk.' Yakana, sɔɔk ariir a nyon dugeeɗoŋk agaltiiroŋk."
14Nɛɓa widikɛɛ motak a joop sigɔ kamarŋɔŋk son lak Yeeseek Godeey sinaanɛ Geetitank tak, nɛɓa ebɔdɛ sɛɛgiŋ. 15Ŋadirɓa ɔɗɔweer tapa ŋaadiyɛɛkoŋk a rɔɔriytaanak higi Muuseek saaɓa dɛnɛrɗi sɔɔriyɛ sigɛɓa ijaag sɛɛg Yeeseek, a saaɓa tiyɛrɗi tɔɔmɔk sigɛ ooyɛr kɛ, "In dakɛr Pɔɔsiyɛɛk Tɔɔna Daawitik!"
16Nɛɓa sɛɛk tonurgeeɗ kɛ, "Tiyin any sini tonur tɔɔmɔk sigikiŋ?"
Nɛɓa Yeese tonu sɛɛga kɛ, "Ii, tiyaaŋ. Kiirɓa ambabɛɛt sinɛɓa taapɛɛ Wargatɛɛ Waakoyotoŋk kɛ,
'Ragadinɓa pɔɔsiyɛ ad tɔɔmɔkoŋk,
a sasalɛyɛ sigɔ aapokaŋɔŋkuk?'"
17Nɛɓa ŋɔr sɛɛg saadi nɛ ŋaar katamɛya Bitaniyaak, nɛ kɛ ɗeegar sooy.
Kɛɛt Bɛlɛɛsik Sinɔ Kiiɗɛ Taamɛk
(Mar. 11:12-14,20-24)
18Saaɓa Yeese mumurkuɗ katamɛya nɛɛkaak romiɗik, nɛɓa lak ŋaawu. 19Nɛɓa dɛnɛɛr kɛɛt bɛlɛɛsik gopana kɛntɛya, nɛ kɔrurgeeɗiŋ, nɛɓa kɛɛ any sinɔ laŋiɗik ɓɛɛlɛrɓa peeŋɔk gɛɛŋk dakɛɗa. Nɛɓa tongeeɗ kɛ, "Katkoy lakin taamɛ kɛkar adaktan." Nɛɓa paalor kɛɛt sinɛ bɛlɛɛsik sisa.
20Nɛɓa dɛnɛr nomtaanak gɛɛnɛ any sinɛɓa ɓɛɛlɛk, nɛ reemɗi ɓayɛtun gɛŋk a tonur kɛ, "Paalor kɛɛt sini bɛlɛɛsik a gorgorŋ ɛk?"
21Nɛɓa Yeese tonu sɛɛga kɛ, "Eekeer tona kɔnaaŋ, ɔkɔn latukari ŋaadiyɛ ɛ kɔne kɛɛ koɓiɗak a pɛɛyiŋ, nɛ moko any sinɛkɔ ijaagiɗɛ kɛɛt sini bɛlɛɛsik dakɛɗa, ɔkɔn toniir kurkuma sineena kɛ, 'Ŋaari seedi nɔ orun ɛɛk gɔrɔwa sinɔɔna obiiŋɔŋk,' nɛ aasi kɔna gayɛŋ. 22Any sinɛ kalɛyiir ɗanɗamɔɔn ma ŋaadiiriŋɔŋk laŋiir kɔɔŋ."
Laŋkiɓa Yeese Ɓaŋkawuka Eet?
(Mar. 12:1-12; Luk. 20:9-19)
23Nɛɓa Yeese guuguny Godeya sinaana Geetitank, nɛ saaɓa arkiɗ rɔɔriyɔɔnuk widerkiɓa ɛɛk ɔɗɔweer tapa ŋaadiyɛɛkoŋk a gutarɛyɛ ɗookoŋk nɛ kɔɔniyar kɛ, "Ijaagin ola sigi baŋɛ ɓaŋkawukaat jikoŋk? Makanna gaɓi ɓaŋkawuka nɛɛk wooɗ?"
24Nɛɓa Yeese jumur sɛɛga kɛ, "Kɔɔniya ɓɔra kɔnu kɔɔniyɔɔn sinɔɔnɛ omoŋɔŋk. Nɛ ɔkɔn kɔɔta jumurariŋ, nɛ kɔɔɓɔra kɔna tona kɛ ijaaga ola sigi ɓaŋkawukaat jikoŋkuŋ. 25Aadi sinɛɓa aadiɗiiɗ Yowanisik kusɓa eet? Dari maŋk joope?"
Nɛɓa sɛɛk tonɗi ɛkanɛɛkɛ gɛŋk kɛ, "Ɔkɔnkɔɔ tonii kɛ, 'Dariŋ,' nɛkɔɔtina tonu kɛ, 'Nɛ kiir ŋaadit agut jikon?' 26Ma ɓɔrɛ ɔkɔnkɔɔ tonii kɛ, 'Joopeŋ,' nɛ ɓurii joop sigɛ ɓɔɔkaak, agut sinɔ ŋaadirɗi joop baŋɛ Yowanis kɛ iɗit pɛrkaakoŋkuk."
27Agut sini jumurarɓa Yeeseya kɛ, "Kii ɗegerɔɔn."
Nɛɓa sɛŋk tonu sɛɛga kɛ, "Kaa ɓɔra kɔna toniiɗ kɛ ijaaga ola sigi ɓaŋkawukaat jikoŋk."
Rɔmɛ Tɔɔmɔk Sigɔ Pɛɛyk
28Tonuɓa sɛɛga Yeese kɛ, "Gayi kɔna a jikon? Lakɛɓa iɗit om sinɔ lak tɔɔmɔk sigɔ moojakik a pɛɛyk. Nɛ kɛɛ son lak tɔɔn nɛɛk sinɛ tukik, nɛ tongeeɗ kɛ, 'Iin tɔɔn naak, mak ɓenyse taawa wɛynik nɔ kɛɛɗin ijaagɗikin.'
29Nɛ tongeeɗ tɔn nɛɛkɛ kɛ, 'Kaa deran,' nɛ saadi baŋiya kɛ weeriki koɓiiɗ nɛɛkɛɛk nɛ kɛɛŋ.
30Nɛ kɛɛ son lak tɔɔn nɛɛk sinɛ pɛɛyeen nɛɛkik, nɛ tongeeɗ oko sinɛkɔŋk. Nɛ tongeeɗ tɔn nɛɛkɛ kɛ, 'Dɔɔs, baabɛ, kɛɛɗaaŋ.' Mayakana dakɛ a ki deran.
31Nɛɓa ijaagɗi ɗɛyan ɛpɛnaak won sigaagɛ pɛɛyk?"
Nɛɓa sɛɛk tonurgeeɗ kɛ, "Tɔɔn sinɛ tukik."
Tonuɓa sɛɛga Yeese kɛ, "Eekeer tona kɔnaaŋ, guugunyarkoy kɔne ɔɗɔɔkɛ burɛya Waakoyotoŋk joop sigɔ yayawar worik a ruunykaanak. 32Kusɓa Yowanis son lak iinakik kɛnɔ kɔna yaaŋɛ gopan mentanka taamɛkɛ Waakoyotoŋkuk, nɛɓa kiir ŋaadit sinɛɓa tonu sɛŋkik mayakanaɓa sɛɛk ŋaadir joop sigɔ yayawar worik a ruunykaanaŋ. Saa aasi dɛnɛrɗɔ sinik baŋiya, nɛ sɔɔk kirkɔ weeriit tikiyɛɛkɛ Waakoyota ɛ kiir ɗɛyɛ boŋiiɗa a ŋaadiita sɛɛn.
Rɔmɛ Ijaageer Taawa Wɛynik
(Mar. 12:1-12; Luk. 2:9-19)
33"In tiyɛɛ rɔmɛ om kɛkar. Lakɛɓa ɗumaat taawa wɛynik a omoŋ, nɛɓa ijaag isɛ taawoy nɛɛkɛ tookɛɛta, nɛ kɔwu utul tayakoŋ wɛynik, nɛ ijaag peem koorɛtoŋk. Nɛɓa gaɓɛ taawa nɛɛk ijaageera kɛnɔkoy kaasiɗi, ma ŋaar ɗooka omalta. 34Saaɓa gayɛɗ ɔɔtɛ ɗootaanoŋkuk, nɛ wosɛyɛ ijaageer gɛɛŋk son lak ijaageer gɛɛŋkik taawak kɛnɔ kaar boŋur taamɛ sigɛ wɛynik.
35"Nɛɓa ijaageer gɛɛnɛ sigɛ taawak gaamur ijaageer gɛɛŋk, nɛ ɗiŋer omoŋ, ma ɓokotur om, ma om bibitar giɗeekɛ. 36Nɛɓa sɛŋk wosɛyɛ ijaageer gɛɛŋk ɔgɔ sigɔ kaalɛr sigɛkan jeemɛkik, nɛ ijaageer sigɛ ijaagir sɛɛge any sinɔ ito sinɛkan jeemɛk. 37Wosɛyɛɓa tɔɔn nɛɛk pediya nɛɛka a koɓu kɛ, 'Eemɛyarkɔɔ tɔɔn naakiŋ.'
38"Yakana saaɓa ijaager gɛɛnɛ sigɛ taawak dɛnɛrɗi tɔɔn nɛɛkik, nɛɓa tonur ɛkanɛɛkɛ gɛŋk kɛ, 'Ege sini sinɛkɔɔ boŋu ɗoo nɛɛkik. In kusɛɛ nɔ kusii ɓokotii nɔkɔɔ boŋii ɗoo nɛɛk.' 39Nɛ gaamur, nɛ boŋitar taawoy nɛɛkɛk walasa, nɛ ɓokoturŋ."
40"Anɛ gayi kɔna a saaɓa mɛlkiɗi ɗuma sinɛ taawak, ijaagɓa ijaageer sigɛ taawak ɛk?
41Nɛɓa sɛɛk tonurgeeɗ kɛ, "Joop sigɛ ŋɛɛwɛŋɔŋk ɓokor sɛɛg a ooɗi ɔɔtɛ nɛɛkɛŋ, nɛ gaɓɛ taawa nɛɛk ijaageera ɔgɔɔka kɛnɔkoy kaasiɗi sigɔɔgakoy gaɓɛrgeeɗ taamɛ sigɛ wɛynik ɔɔtɛ nɛɛkɛ a ɓɛɛlɛ kɛ ɗɔmk."
42Tonuɓa sɛɛga Yeese kɛ, "Kiirɓa ambabɛɛt sinɛɓa taapɛɛ Wargatɛɛ Waakoyotoŋk kɛ,
'Giɗee sinɛɓa daraayɛr joop sigɛ kɛnyar godeyik giɗeekɛk,
dakɛ a giɗee sinɛ obi giɗeekɛ baŋɛk.
Ege sini ijaag Suumiyoŋk,
ege ijaag nɛɛkɛ sɔɔriyɛ taamɛka gaŋk.'
43"Tona kɔnaaŋ, boŋɛɛkoy iinakɛ burɛ Waakoyotoŋk, nɛkoy gaɓɛɛ joopa sigaaga ijaagir any sinɛ tonu Waakoyotuk. 44Iɗit sinɔ ɗiiri giɗeeta sineena raŋanaak ŋuuŋuliiŋ, iɗit sinɔ ɗiirageeɗ giɗe sini raŋanaak kataki sɛɛniŋ."
45Saaɓa ɔɗɔweer tapa ŋaadiyɛɛkoŋk a joop Paarisik tiyɛrɗi rɔmɛɛɗa gɛɛŋkik, nɛɓa ɗegerar kɛ tonɗi agut sɛɛg. 46Nɛɓa ɗɛyɛrkɛ gaamita nɔ korkoɗar, nɛ ɓurer joop gɛɛŋk, agut sinɔɓa dɛnɛrɗi Yeesee a ito iɗit pɛrkaakoŋkuk.
လက္ရွိေရြးခ်ယ္ထားမွု
Maatiyoos 21: KSTM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ