Maatiyoos 2
2
Kurak Joop Sigɔ Ɗegerar Ɛɛkik Kɛnɔ Ugumer Yeeseya
1Eme saaɓa ege Herodis suumik, nɛɓa ɓartɛɛ Yeesee ɗook Yuudaak katamɛɛ Beeteleheemuk. Nɛɓa saadi baŋiya kurak joop sigɔ ɗegerar ɛɛkik goyse mɛlkiɗ waawuyk Yorsaleema. 2Nɛɓa kɔɔniya kɛ, "Suumi Ayuuduk sinɛkɔ ɓartɛɛk ar eet? Dɛniikɔ maryɔn nɛɛk goyse mɛlkiɗ waawuyk nɛ kusii kɛnɔ ugumii sɛɛna."
3Nɛɓa ŋaati Herodis sinɛ suumik saaɓa tiyɛɛɗ any sinikiŋ, ɛɓa ɓɔrɛ ŋaatir joop Yorsaleemuk baŋɛ a sɛɛn agut omoŋ. 4Nɛ agut sini riyɓa Herodis ɔɗɔweer tapa ŋaadiyɛɛkoŋk a rɔɔriytaanak higi Muuseek baŋɛ, nɛ kɔɔniy sɛɛg kɛ, "Ɓartɛɛkɔɔ Keresee eet?"
5Nɛɓa sɛɛk jumurargeeɗ kɛ, "Ɓartɛɛkɔɔ Keresee ɗook Yuudaak, katamɛɛ Beeteleheemuk agut sinɔ, taapɛɛɓa ete pɛrkaakoŋk pɛrka kɛ,
6'Iin katamɛ Beeteleheemuk sinɛ laŋɛɛ ɗook Yuudaak,
kin tɛmka katamɛɛkɛ Yuudaak,
ŋaarkikoy iine ɔɗɔwen,
sinɔkoy koorɛ joop gaaŋk Israeelik.'"
7Saadi baŋiya riyɓa Herodis joop sigɛ ɗegerar ɛɛkik dugeeɗ nɛ kɔɔniy ɔɔtɛ sinɛkɔ dɛnɛɛɗɛ maryɔn nɛɛkik kɛnɔ ɗeger. 8Nɛɓa wosɛyɛ sɛɛg Beeteleheema kɛ, "In kɛɛɗɛɛ mermenɛɛ ɔɔtɛ sasalɛ nɛɛkik kɛ ɗɔm, nɛ saa laŋirɗɔɔk nɛ inta kusɛɛ tonɛɛ nɔɓɔra kɛɛɗa ugumguɗa."
9Saaɓa sɛɛk tiyɛrɗi pɛɛni suumi sinɛk baŋiya, nɛ ŋaararŋ, nɛɓa diile sɛɛg maryɔn sinɛɓa dɛnɛrk goyse mɛlkiɗ waawuyk nɔ mɛlɛɛɗa saanaɓa ɛtɛɛɗ saadi lak sasalɛ nɛɛkik. 10Saaɓa dɛnɛrɗi maryɔn nɛɛkik, nɛɓa sɛɛga yaaŋ jɛt. 11Nɛɓa guugunytar godeya, nɛ dɛnɛr sasalɛ nɛɛk sɛɛn a ɛmɛs Maariyam agut omoŋ. Nɛ ɛtɛr korontunɛ nɛ ugumergeeɗiŋ. Nɛ ɓuuker sandukak gɛŋk, nɛ boŋurku tigi worke, a any sinɔ uduŋɛɛŋɔŋk, a any sinɔ ŋaa yaagɛrk riyɛ kɛ kɛrbeek.
12Saadi baŋiya tonuɓa sɛɛga wosɛytan Waakoyotoŋk pɛrkiyɛɛkɛ kɛnɔ kat weeri son lak Herodisik, nɛɓa weeri ɗooka nɛŋk gopɛ omalte.
Gonar Yoosep A Maariyam A Yeesee Gibsa
13Ŋaararɓa joop sigɛ ɗegerar ɛɛkik, nɛɓa yaaŋɛ ɛɛk wosɛytan Waakoyotoŋk Yoosepa pɛrkiyɛɛkɛ nɛ tongeeɗ kɛ, "Dɛyɛ Herodis sasalɛ nɛɛk ɓokotiita, nɛ ŋaari nɔ boŋun sasalɛ nɛɛk a ɛmɛs nɔ gonun ɗooka Gibsik, nɔ kɛɛɗin beeɗin saadi nɔkoyna toniiɗaak."
14Nɛɓa ŋaar Yoosep kaalt, nɛ boŋu sasalɛ nɛɛk a ɛmɛs nɛ gon Gibsa. 15Nɛ kɛ beeɗ saadi ɔɔtɛya sinaanaɓa rɛrɗi Herodisik, nɔ ɓɛɛlɛɛɗ sinik dusanɛɛ sinɛɓa tonu Waakoyot ete pɛrkaakoŋk kɛ, "Riyra koy tɔɔn naak Gibsak."
Ari Herodis Sasalɛɛ A Ɓokootɛɛ Sɛɛgiŋ
16Saaɓa Herodis ɗegerɗi kɛ raamɛrkɔ sɛɛn joop sigɛ ɗegerar ɛɛkŋɔŋk, nɛɓa ŋadiŋ jɛt. Nɛɓa wosɛyɛ amaasiniyɛ gɛɛŋk Beeteleheema a mɛndɛraka sigaaga atukuɗ tookɛɛtak kɛnɔ ɓokootɛɛ sasalɛɛ sigɛ moojakik sigɛ emeyi gɛŋk pɛɛyk a sigɛ saadi ɗɛɛgaak. Nɔɓa ijaagiɗ sinik oko sinɛɓa kɔɔnɛɛɗi joope sigaagɛ ɗegerar ɛɛkik ɔɔtɛ sinɛɓa dɛnɛɛɗɛ maryɔn nɛɛkik nɔɓa ɗegerɗik. 17Oko sinik dusanɛɛ sinɛɓa tonɛɛ ete pɛrkaakoŋk Ermiyaase kɛ,
18"Tiyɛɛ koŋgoy wuɗa,
a duri sinɔ obiiŋɔŋkuk katamɛɛ Raamaak.
Wuɗaa Raheel agut tɔɔmɔk gɛɛŋk,
agut sinɔkɔ rɛrarɗi tɔɔmɔk gɛɛnɛŋɔŋk garapkaayɛ nɛ ki nyɛyɛ."
Weeriik Yoosep A Maariyam A Yeesee Gibse
19Saaɓa rɛrɗi Herodisik baŋiya, nɛɓa yaaŋɛ ɛɛk wosɛytan Waakoyotoŋk pɛrkiyɛɛkɛ Yoosepa Gibse nɛ tongeeɗ kɛ, 20"Agut sinɔkɔ rɛrarɗ joop sigɛkan ɗɛyɛr sasalɛ nɛɛk ɓokotiitakiŋ, nɛ ŋaari nɔ boŋun sasalɛ nɛɛk a ɛmɛs nɔ kɛɛɗin ɗooka Israeelik."
21Nɛɓa Yoosep ŋaar raŋana nɛ boŋu sasalɛ nɛɛk a ɛmɛs nɛ weeriik ɗooka Israeelik. 22Yakana saaɓa tiyɛɛɗ Yoosep kɛ dakɛkɔɔnɔ ɗook Yuudaak a suumi Arkelawoos ɔɔtɛ ɛpɛnaak Herodisik, nɛɓa ɓure ɛnyɛ saanakiŋ. Nɛɓa topugeeɗ wosɛytan Waakoyotoŋk pɛrkiyɛɛkɛ, nɛ ŋaar ɗooka Gɛlilaak. 23Nɛ saaɓa mɛlɛɛɗ saanak, nɛɓa tuke beeɗit katamɛɛ Naajireetik. Nɔ ɓɛɛlɛɛɗ sinik dusanɛɛ sinɛɓa tonɛɛ pɛrkaakɛ kɛ, "Riyɛɛkoy kɛ iɗit Naajireetik."
လက္ရွိေရြးခ်ယ္ထားမွု
Maatiyoos 2: KSTM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ