Marko 11
11
Dahmuú Yerusalemu
(Mt 21:1-11; Lk 19:28-40; Yn 12:12-19)
1Tawa tseewúy Yerusalemú i alé, inslaawoó gixsoó Betfage nee Betania, bihhaá tloomár xaaikaari ta babay Miseituni, eeharuuseerós ar tsár gay ya/aáw, 2gina báy, “Tlawsé' ay amór gixsarqá' geraahúng i dirii'. Bara hardaté', gwarendmoó daqway uqo aandá', kwaa tseék, oo hee aa baloó daanda i tsa/aniká. Ngu gwedá' ngu hubá'. 3Hee burna yaahaás gídaabá, mas adoosíng /imisá', ta oa', ‘Aako gwarendmo gun slaa', ngu gaanslár ki/is aluuwo.’”
4Tari tláy, gwarendmoó daqway kuri afkuú doó i áy, kwaa tseék dír afkuú do' tsee/aá wa ale, afaá loohír ur. Kuri gweér. 5Mukko taa didí áy, tari oó', “A milá, gwarendmo mus gweditá'?”
6Adoodá' Yesu ngaa báy kari dir'ín i oó'. Inooín tari ya/án, gwarendmo kway haniís. 7Gwarendmoodá' kuri huúw amór Yesu, inqwaruuín kuri hhaáf gawaá daanduuwós, Yesu iri gawaadí iwiít. 8Múk yaariír inqwaruuín guri hhaafín baraá loohír i alé, nee bahh'alé loo/o ngina tlaaqiyé' baraá sla/atá wa ale, ngiri hhaafiné'. 9Nee mukdaádá' geerá wa hi'iít no aluuwo ta tseeamín, ta kaahi,
“Hosana, i xirfuuti kudá' hardáh ar umuú Aako.
10I xirfut waawuti'iimadá' hardah
ar baabuúrén Daudi.
I xurfuuti Mungú gawaá doori.”
11Yesu iri dáh Yerusalemú i alé ay baraá Doó Mungú. Nee umuúqo gaaro arto ngiwa hhe'eés, naxés looa sleeme aa dát, iri ti'iít, tari tláy Betania nee eeharuuseedá' mibá nee tsár.
/Aantsír taa lu'ús
(Mt 21:18-19)
12Looaytleér niwa Betaniár wa kií/, qwari guri loohír i áy. 13/Aantsír loo/ór koom gari amorqí ár, iri amoodá' káy asma ngiwa ari wane i na/'aá koón. Iwa didí hardáh, naxés gár aa ár i káhh, aqo har loo/o kilós. Asma qoomár hamnoó /aantsí aa xeeriiká. 14/Aantsídá' gari báy, “Iimír laarí hee na/'iiwók mingiwa baloó /aáy.”
Eeharuuseerós i axamís.
Gusisíngw múk baraá Doó Mungú wa weerimiís
(Mt 21:12-17; Lk 19:45-48; Yn 2:13-22)
15Tari Yerusalemú i hardáh. Yesu iri dáh baraá Doó Mungú i alé, mukdá' muruú weerimiís nee kudá' tlaxuúm baraá Doó Mungú wa ale guri iimu/ún gusisiingo. Meesadaá mukdá' peésár gaamiís, nee kiteeraá mukdaáduú hhookár weerimiís, giri warqeemiís. 16Tam heé gár koóm gwaa mayká iwa baraá Doó Mungúr waaraahhi. 17Giri intsaahhatimís iri oó', “Kaa gooinkáhe ar gídaabá, ‘Dooeé' ku babay a doó saaliingw dír xordu sleémeerowo.’ Hám daxta kuungá' ugwa mar'ír malguuse#11:17 Malguuse Gídaabá qwaatluuse. tlehhé'.”
18Geeraharuusér uren ar saalíngw múk Yahudi nee intsaahhatuusér hara'ayár Musa iidíguudá' kuri axaás, loohi kari leelehhiít ar Yesu kur gaasi. Asma kuna da'ayuút as adoodá' boo/aay sleémeero intsaahhatimisuuwós nguwa waa/oo/amór wa ár.
19Looa iwa dát iri quútl baraá gixsaro.
Kahmú /aantsí gár aa intsaahhatís
(Mt 21:20-22)
20Nee matlatleero tawa waaraahhi, /aantsídá' kawa ár, naxés aa kát iimír baraá gamnángw wa ale. 21Petro iidíguudá' guri insláy, Yesu guri báy, “Ga/aaweegáy intsaahhatusúmo, /aantsídá' taa lu'ús aa kát.”
22Yesu guri báy, “Mungú haratlintieek. 23Án a kah, heé baraá muunaáwose xurér koomaaká, tloomarí ga aleesláy ngiwa bay, ‘Quútl, ti kwahh baraá tlawi’. Birnga haratlintií' gídaabá tidá' i kaahi i tleehharút, i tsuwá tleehharút. 24Gawaá adoorihe nun baw, umuúqo gaaro ar ta firiiriinda' baraá saalingwhunge, haratlintiaak ar gídaabá aga sleeré', nee a toohúng. 25Kuungá' umuúqo bara sihhité' tawa saaliinda', barnaxes gár hee nuwa sadakuús bir deer, gurtlawaak, as Baabuúhúng oo gawaá doori tlakweemaahúng ngiwa gurtlay. [ 26Barnaxes kuungá' tlakweemaá muu i gurtleera'aaká, tam Baabuúhúng oo gawaá doori tlakweemaahúng sleeme gi gurtlayká.]”
Múk aleesleemuú Yesu gu yaahamiís
(Mt 21:23-27; Lk 20:1-8)
27Tari Yerusalemú i hardáh malé ale. Qoomár iwa hi'iimiiti baraá Doó Mungú wa ale, geeraharuusér uren ar saalíngw múk Yahudi nee intsaahhatuusér hara'ayár Musa nee bariisee guna i daqeér, 28guri beér, “Muruuwí aleesleemuú kur tlehhit a gaalá, nee heé aleesleemu ngwa kuúng i haniis oo muruuwí kur tlehhit a heemá?”
29Yesu giri báy, “Gár wák ngi dirhúng i yaahaás, kuungá' nga oá'. Daqaní aníng ngi dirhúng i oó' aleesleemuú muruuwí ngur tlehhiit. 30Baatiísmoó Yohana amór naa daáhh a amór Mungúhe laqaá a amór muu? Amór naa daáhh ooare'.”
31Tiri kilooín i warqayé' tari káh, “Ma ooaán? Bara ooaán, ‘Amór naa daáhh a amór Mungú’, ti bay, ‘Ahaá ala, musa haratlinti'ii'iiká?’ 32An ooána, ‘Amór naa daáhh a amór muu’?” Ala tay da'ayuút adoodá' ooaro asma múk yaariír Yohana gwaa tsaáhh adór tar aarusmoó ló'. 33Yesu kuri báy, “A xuanaaká.”
Yesu giri báy, “Tam án sleeme aleesleemuú muruuwí ngur tlehhiit ngu dirhúng i ooaaká.”
လက္ရွိေရြးခ်ယ္ထားမွု
Marko 11: IQWNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iraqw New Testament © Bible Society of Tanzania, 1977.