LUKE 7
7
Jesu wí ma sorasiyee lagwɔ wi tungɔɔ pwɔʔɔ
(Mat 8:8-13)
1Nyiŋi ga na Jesu wi da gâ wi kayoro tì bɛfu yo hɛɛn ma be kɔ ge, wɔ̀ɔ je wa Kapɛrinamu kàʔà ni ge. 2Sorasiyee lagwɔ wi tungɔɔ wà dà bo wa ŋa wi dáa wi lagwɔ glanʔa we ceŋge. Ki tungɔɔ wɔ̀ɔ bâ do yaŋa mà na cɛn wí bi gu. 3Ki sorasiyee lagwɔ pɔɔ gâ Jesu wi kayoʔo loʔo ge, wɔ̀ɔ Juwifiyee pe lagwɔ pèè troʔo pe yɔɔ nyɛ̀rí wi pan wi ba wi tungɔɔ pwɔʔɔ we. 4Pe gâ no wa Jesu na we, à pe noo nyɛri ceŋge mà yo: «Ki naŋa wí ma yala moo haʔa, 5mɛjɛn wò klo hɛɛn pé noo glanʔa. Wiì wi wí ma wò sɛrigo fan ge.» 6Jesu wɔ̀ɔ plɛn pé ni na sye. Wi gáa nori wa sorasiyee lagwɔ kasyɛn na ge, ki woo wɔ̀ɔ wi nagroboo pèè tun Jesu ma we mà yo: «Na fɔlɔ, mò gáa mà teʔe. Mi ìn yala ma je naʔa na go nî ge, 7ná kiì ban, bì no wa ma na. Ɛɛn di, ma kayoʔo nigbe yo dron, na tungɔɔ pɔɔ bwɔʔɔ. 8Mɛjɛn pèè nyɛ wa bee pé nyɛ na lagwɔɔ. Mì fanna, mí nyɛ sorasiyee pèè lagwɔ. Nà mi ŋa po: ‹Ta sye,› wi na na sye, bì wà po: ‹Ta ban,› wi na na pan. Nà mi na tungɔɔ po we: ‹Ga ki hanri,› wi naʔa hanri.» 9Jesu wi gâ ki kayoro da loʔo de, àʔa wí fo. Wɔ̀ɔ wa mà krɛʔɛ janma ma krugu mi dáa ba wí na mà mi po: «Mi ìn jé ki pama ma mi nyoʔo kà nya deʔe kà na, ali naʔa Israyɛli klo ni le.»
10Sorasiyee lagwɔ wi pitunbee à pe hru mà kɛri. Pe yâ no wa wi kasyɛn ma ge, à pe wi tungɔɔ nya wí ma pwɔʔɔ kɔ.
Jesu wí ma kucɔ pyɔ nyɛ̀
11Ki kruʔu ma, Jesu wɔ̀ɔ bâ gɛri kàʔà kà ni. Pé naʔa yeri Nanyɛ. Wi ploʔofɛɛ ní, ní hɛɛn fafaʔa nì pe da blɛ́n wí ni na sye. 12Wi yáa nori wa kàʔà goyɛʔɛ na ge, à hɛɛn pèè na nyini waʔa nî kpó ní. Ki woo wi dá bo najɛpii mà po wi no ma pyɔ nigbe. Ali wi no wi dá bo kucɔ. À kàʔà hɛɛn fafaʔabaa ma plɛn wí ni. 13Jesu wi gâ kpó wi no nya nyiŋi ga na ge, wi nyugara à ti wa wi na. Wɔ̀ɔ wí po: «Mò gáa gbele,» 14mà flo wa mà màʔà nagbɛʔɛ na ge. Kpó wi tugufɛɛ à pe yere. Wɔ̀ɔ yo: «Najɛpii, mí yo ma jɛ̀.» 15Kpó wɔ̀ɔ taʔa mà jɛ mà klɛn kpo màʔa hli na nyu. Jesu wɔ̀ɔ wí kan wi no ma we. 16Fyara à ti pè bɛfu co. À pe na Nyɛʔɛlɛ kpɔʔɔ le mà yo: «Wó ma Nyɛʔɛlɛ leyoo kpangbanŋa wà nya,» mà yo nɛ: «Nyɛʔɛlɛ lí ma pan mà bâ li hɛɛn haʔa be.» 17À pe wi jase wa we deʔe kì bɛfu na wa Jude klo ni, ní klòʔo klɛnmɛ mì bɛfu ni, ma mí nyɛ lì tanla ge.
Jan wí ma pitunbee troʔo Jesu krugu we
(Mat 11:2-19)
18Jan wi ploʔofɛɛ pe dá ki kaʔa kè bɛfu yo wí kan. Jan wɔ̀ɔ wi ploʔofɛɛ syɛn yeri 19mà pe tun wa wò fɔlɔ ma we mà yo pe yɔɔ po: «Ŋa pé yo wí na pan wa ge wiì wi mo ní we yo, dee di, kí ma yala wo da wà hanni wì yɛ?» 20Ki hɛɛn pe gaâ no wa Jesu na we, à poo po: «Jan Batise wí ma wo tun má ma mà yo wo ba ma po: ‹Ŋa pé yo wí na pan wa ge, wiì wi ŋa mo ní we yo, dee di, kí ma yala wo da wà hanni wì yɛ?› » 21Ki nyidege na, Jesu wɔ̀ɔ po wí na hɛɛn fafaʔabaa yara lari pé na ní pe cɔlɔrɔ ní de na gbosuu prɔ hɛɛn fafaʔabaa ni na fyoon fafaʔabaa nyɛʔɛ nyɛri. 22Wɔ̀ɔ Jan wi pitunbee po be: «Ga yé ma nya ní ga nì yé ma loʔo ge, yee sye ye yaʔa yo Jan ma we yoo po: Fyoon pé na nyaʔa. Lemloʔomoo à pe na tanri. Yanyɛʔɛ fɛɛ à pe na pori. Gloonlo à pe na nuru. Kuu à pe na nyɛni. Fyomo fɛɛ à pe na kayotanʔa nuru ge.#7:22 ma wèle wa Esa 35:5-6; 61:1 ni wè.
23Frɛmɛ bi bo hɛn ŋa ma wi ìn bi lama gban na kala na bi laʔá ná na ge.»
24Jan wi pitunbee pe gâ hru mâ kɛri kɔ ge, Jesu wɔ̀ɔ ki hli na Jan wi kayoʔo nyu janma ma me mà yo: «Ye da gɛrí bì yà nyaʔa wele wa sinbriʔi ni ge? Kpraglanʔa ga tiflɛʔɛ kí na kpoʔoro kiì gi yo? Ayo. 25Dee di, nyaʔa gi ye da gɛrí bì yà wele ge? Naŋa wà wi yo, ŋa wi dá drekmaʔa le ge? Welé, bee pé na pɛgbanra drere ni de ná hɛnkpandoo hro li de pé na kori wa hɛnkpandoo goro ni. 26Dee di, nyaʔa gi ye da gɛrí bi ya welé ge? Nyɛʔɛlɛ leyoo wà wi yo? Ee, mí biʔi yo ye ma bì yo wí ma kpɔʔɔ Nyɛʔɛlɛ leyoo na we. 27Jan wiì wi Nyɛʔɛlɛ li sɛbɛ wí na pin ge mâ yo:
‹Welé, mì Nyɛʔɛlɛ
mí bi na pitunŋu troʔo we
ma yɛʔɛ̀ ma,
ŋa wí yàá ma kloʔò yɛli
ma kân ge.›#7:27 ma wèle wa Mal 3:1 ni wè.
28Mí biʔi yo ye ma bì yo: Jan wí ma kpɔʔɔ hɛnwyee pè bɛfu na. Ɛɛn di, ŋa wí nyɛ tatunŋu pè bɛfu na wa Nyɛʔɛlɛ li masaʔa ni ge, ki woo wí ma kpɔʔɔ Jan na we.
29Hɛɛn pè bɛfu pe dáa nuru Jan ma we ali misari syɔfɛɛ ní be. À pe tanʔa kan Nyɛʔɛlɛ ma le mà pè kân Jan wɔ̀ɔ pé batise.#7:29-30 ma wèle wa Mat 21:32; Luk 3:12 ni wè. 30Di Farisiyee ní, ní Mowisi kayoro cɛnfɛɛ ní pé ma ce Nyɛʔɛlɛ li nadanma ma me. Pe ìn ki ta bì pè kân wi pe batise.»
31Jesu wɔ̀ɔ kà haʔa wa nɛ mà yo: «Mí bi ki nyiŋi ga hɛɛn tonli be nyaʔa ni si? Dee di, pé ma nyaʔa lɛ́? 32Pé nyɛ nɛ pa pii bee nyɛ pe klɛ́n wa caan dala na le, ná taʔara ná wa pè ma mâ yo: ‹Wo dáa maʔa wyeri ge ye kan, ye ìn da yo. À wo na kuu konŋoo wa ye kan, ye ìn da gbele kpo.› 33Mɛjɛn Jan Batise wi dá ban mà báa su cun we, wi ìn da dufɛn jo we kpo. À ye yo: ‹Gbosyo nyɛ wí ni.› 34Hɛn Pyɔ wí ma pan mà báa lí na jo. À ye yo: ‹Wí nyɛ fungbɔʔɔ fɔlɔ mà po hunjɔɔ mà ni mà po misari syɔfɛɛ ní kapere hanrifɛɛ nagoro.› 35Ɛɛn di, Nyɛʔɛlɛ li ticlimi mí ma tanʔa ta bee ma pé ma pa mí na ge.»
Jesu wí ma li wa Simo go nî
36Farisiyee naŋa wà dà Jesu yeri mà yo wi ya lì wi ní. Wɔ̀ɔ yâ je wa ki Farisiyee naŋa wi go nî ge mà klɛn na li. 37Cɛlɛ wà dà bo wa ki kàʔà ni ge mà po kapere hanrifɔlɔ. Wi gáʔà cɛn mâ yo Jesu wí nyɛ wa ki Farisiyee naŋa ŋa wi go nî ge, wɔ̀ɔ pan hùnmù kungbople ní, pe da lí hanri ŋglɛnfiʔi nì ga pé na yeri alabatire ge. À li po nyìlì nudanʔa hùnmù nì.#7:37-38 ma wèle wa Mat 26:7; Mar 14:3; Jan 12:3 ni wè. 38Wɔ̀ɔ bâ yere Jesu wi kruʔu ma wi cyeʔe tanla ge na kpele mà nyɛtunmu yaʔa à mi na ŋu wi cyeʔe na ge. Ki kruʔu ma, wɔ̀ɔ na ké tuʔu wi yujoro ní de mà na ké fyon mà ki nudanʔa hùnmù wo me ke na. 39Farisiyee naŋa ŋa wi dá Jesu yeri we, wi gâ ki woʔo ga nya ge, wɔ̀ɔ naʔa honri wa wi lama ni me mà yo: Ki naŋa ŋa, nòo dí bo Nyɛʔɛlɛ leyoo ge, wi dí bi cɛlɛ wi kala cɛn le ŋa wí ma màʔà wi na ge, bì wi tanʔama cɛn me kpo bì yo wí nyɛ kapere hanrifɔlɔ. 40Jesu wɔ̀ɔ wí po: «Simo, mí bi kayoʔo kà yo má ma.» Wɔ̀ɔ yo: «Krɛʔɛfɔlɔ, ki yo kɛ.» 41Jesu wɔ̀ɔ wí po: «Fwɔrɔ lefɔlɔ wà fwɔrɔ dá bo hɛɛn syɛn na. Wi saamo pii syɛn mà kɛ kɛ̂ fwɔʔɔ dá bo wà na, à wi saa kɔgunnu fwɔʔɔ ma po wà na. 42Pa yraʔa kɛ̀ ìn dà bo pé ma pe gbàn pe ki fwɔrɔ ton de, ki fwɔrɔ lefɔlɔ wɔ̀ɔ tí yaʔa pè syɛnmu na. Ŋa wi dá ki fwɔrɔ yaʔa de pe na, pɔɔ dá wiwii glanʔa bì doro pee syɛn ni we?»
43Simo wɔ̀ɔ wí po: «Mí naʔa honri mà yo wi dá fafaʔa yaʔa ŋa kan ge wiì wi.» Jesu wɔ̀ɔ wí po: «Ma tanʔa gi.» 44Wɔ̀ɔ wa mà krɛʔɛ mà yɛʔɛ̀ kan cɛlɛ ma we mà Simo po we: «Má ma ki cɔ ŋa nya we yo? Mí ma je naʔa ma go nî ge, mɛ ìn nyumu kan ná ma bì na cyeʔe jeʔe ge. Ki cɔ ŋa wɔ̀ɔ hín ke jeʔe ná na wi nyɛtunmu nì mà ke tuʔu wi yujoro ní de. 45Mɛ ìn na fyon. Di mà jâ gbe mi jé naʔa ma go nî ge, ki cɔ ŋa wí na na cyeʔe fyon ge. 46Mɛ ìn dì hùnmù mà wo wa na yugu na ge. Di ki cɔ ŋa wí ma nudanʔa hùnmù wo wa na cyeʔe na ge. 47Ki kala na, mí biʔi yo má kan bì yo ki woo wi glanʔama mí ma kpɔʔɔ pomo ma na ge, à mi naʔa teri wo na woʔo cɛn wo yo wi kapefafaʔa kí ma yaʔa wí kan. Di ŋa ma pé ma kapere cɛnri yaʔa, ki woo wi glanʔama mi na cɛrɛ kpo.» 48Ki kruʔu ma, wɔ̀ɔ cɛlɛ po we: «Ma kapere tí ma yaʔa má kan.» 49Ki nyiŋi na, bee pe dáa li Jesu ní we teme na ge, à peʔe hli naʔa honri wa pe lama ni me mà yo: «Han wi wí ni fɔ wɔ̀ɔ na kapere yari de.» 50Jesu wɔ̀ɔ cɛlɛ po we: «Ma pama mí ma ma syɔ. Ta sye nyimi na.»
လက္ရွိေရြးခ်ယ္ထားမွု
LUKE 7: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire