LUKE 5
5
Jesu wí ma wi ploʔofɛkplɛɛ fara be
(Mat 4:18-22; Mar 1:16-20)
1Wlɛʔɛ kà na, Jesu wi dá bo yerehaʔa lɔkpɔʔɔ ga tanla pé na yeri Jenesarɛti ge. Hɛɛn fafaʔabaa à pe báa gboʔolo wì tanla mòo gban jango bì da Nyɛʔɛlɛ kayoro nuru de.#5:1-3 ma wèle wa Mat 13:1-2; Mar 3:9-10; 4:1 ni wè. 2Wɔ̀ɔ nyumu kɔrɔ syɛn nya be ki lɔkpɔʔɔ lɔgogo na ge. Fyɔcaa dá nyini wa ti nî mà yáa pe faʔa jeri ge. 3Wɔ̀ɔ je wa nyumu kɔrɔ ga ni ki dá bo Simo woʔo ge mòo nyɛri mà yo wiʔi flo naʔa kanla na le cɛnri mà klɛn mà na hɛɛn krɛʔɛ be.
4Wi gâ yo mâ kɔ kɔ ge, wɔ̀ɔ Simo po we: «Ye nyumu kɔrɔ flo ge wa ticuʔumu deʔe na, ye ya yè faʔa wa ge wa, ye fyɔɔ co be.» 5Simo wɔ̀ɔ wí po: «Kundiʔi, wó ma ki tunŋu ga kɔ ge mà kpɛnmɛ to me. Wo ìn yraʔa kà ta bìʔi co. Di pa má maʔa yo banmɛ ge, wó bi wò faʔa wa ge nɛ.» 6Pe gáʔà hanri ban ge, à pe fyɔɔ fafaʔabaa co, fɔ pe faʔa à ke na cɛn bì da hlugu. 7À pe kyɛʔɛ wa pe nibyee ma be bee pe dá bo wa nyumu kɔrɔ ki tɔ ni ge mà yo pe pan pe ba pe haʔa. À pe pan mà bâ nyumu kɔrɔ ti syɛnmu nyi fɔ à ti na cɛn bì bunŋu wa nyumu ni me. 8Simo Pyɛri wi gâ ki woʔo ga nya ge, wɔ̀ɔ kunbiʔi kán Jesu tanla we mà yo: «Na fɔlɔ, ma jɛ̀ nɛ nà tanla mɛjɛn mí nyɛ kapere hanrifɔlɔ.» 9Fyɔɔ fafaʔabaa pe como à mi Pyɛri fo we ní bee pè bɛfu ní pe dá bo wí ni ge. 10Ki dá Jake nì Janyee fo be kpo Sebede pii be. Mɛjɛn pe dá gboʔolo na tunŋu ko Simo nì we. Jesu wɔ̀ɔ Simo po we: «Mò gáa fyaʔa. Ki tɔ na ge, má bi da hɛɛn cun nɛ pa fyɔɔ nyɛ be.»
11À pe nyumu kɔrɔ kle mà ti yrígi wa nyumu ni me mà yrɛbɛ pì bɛfu yaʔa be mà pa wí na.
Jesu wí ma yanyɛʔɛ fɔlɔ pwɔʔɔ
(Mat 8:1-4; Mar 1:40-45)
12Wlɛʔɛ kà na, Jesu wi dá bo kàʔà kà ni. À naŋa wà ma po wa yanyɛʔɛ fɔlɔ. Wi yara à ti pe wí na ceŋge. Wi gâ Jesu nya we, wɔ̀ɔ to mà wi yɛʔɛ̀ culu ge mòo nyɛri mà yo: «Na fɔlɔ, nà maʔa ta ge, pa ma gban bì na pwɔʔɔ.» 13Wɔ̀ɔ wi kyɛʔɛ haʔala mà màʔà wi na mà yo: «Mí maʔa ta, ma pwɔʔɔ. Yara à ti laʔa wí na kpo.» 14Jesu wɔ̀ɔ kí yo wí ma gbanʔa mà yo: «Mò gá kà yo hɛn wà ma, di maa sye ma ya mà tyɛʔɛ sraʔá farafɔlɔ na we ma sraʔá fara ma pwɔʔɔmo kala na le nɛ pa Mowisi wi daʔá yo ge, jango peʔe cɛn pé yo má pwɔʔɔ.»#5:14 ma wèle wa Sraʔa 14:1-32 ni wè.
15Kiì nì kì bɛfu ní, à pe na wi yele jari le deʔe kì bɛfu na. À hɛɛn fafaʔabaa na pan wì krugu jango bì baa wi kayoro nuru de bì da bori pe yara ma de. 16Di Jesu wi dáa sye sinbriʔi dere na wì yɛ nigbe mà yáa Nyɛʔɛlɛ nyɛri le.
Jesu wí ma lemloʔoŋo pwɔʔɔ
(Mat 9:1-8; Mar 2:1-12)
17Wlɛʔɛ kà na, Jesu wi dáa hɛɛn krɛʔɛ be. Juwifiyee bee pé na yeri Farisiyee be pee ní Nyɛʔɛlɛ furu kayoro krɛʔɛfɛɛ pèè dá bo wa klɛnhaʔa. Di ki woo pe dá jɛ Galile klo ni, ní Jude klo kyɛ̀rɛ̀ tì bɛfu ní, ní Jerusalɛmu kàʔà nì ge. Wò fɔlɔ wi fanŋa ki dá bo Jesu ma we mòo kân wɔ̀ɔ na yabaa pori be. 18À nabii pèè ma pan lemloʔoŋo ní asyɛnʔɛ na mà báa ki ca bùu sinŋi wa Jesu wi yɛʔɛ̀ ma ge. 19Di pa pe ìn dà gâ pomo mà ta bì je wa wi ní hɛɛn pe fafaʔama na me, à pe luʔu wa go yugu na ge mà yâ deʔe kà fru mòo trigi wi asyɛnʔɛ ní wa ki wyeʔe ni ge hɛɛn pe nulala ni Jesu wi yɛʔɛ̀ ma ge. 20Jesu wi gâ pe pama nya me, wɔ̀ɔ yo: «Na nagoro, ma kapere tí ma yaʔa má kan.» 21Furu sɛbɛ cɛnfɛɛ ní Farisiyee ní à pe taʔa naʔa honri mà yo: «Han wi ki woo ŋa nì we wɔ́ɔ na Nyɛʔɛlɛ li yele cɔʔɔ le? Han bi gban bì kapere yaʔa, nà ki ìn bo Nyɛʔɛlɛ liì nigbe li ge?» 22Jesu wɔ̀ɔ pe honriʔi cɛn ge mà pe po: «Nyaʔa ma po yé na honri wa yè lama ni me banmɛ ge? 23Kigii nyɛ hanridanʔa, bùu po: ‹Ma kapere tí ma yaʔa má kan,› dee di, bùu po: ‹Jɛ̀, ma yèré, maa danrí?› 24Di mí ma cori yeʔe cɛn ye yo sye nyɛ Hɛn Pyɔ ni we naʔa tra na de wi gbàn wi da kapere yari de.» Wɔ̀ɔ lemloʔoŋo po we: «Mí maʔa yo má ma, jɛ̀, ma yèré, ma ma asyɛnʔɛ kpe ge, maa sye ma kasyɛn ma ge.»
25Wɔ̀ɔ taʔa mà jɛ pe yɛʔɛ̀ na mà wi asyɛnʔɛ kpe ga na wi dáa syɛn ge mà kɛri wi kasyɛn ma ge na Nyɛʔɛlɛ kpɔʔɔ le. 26Pè bɛfu à pe na kafonlo waʔa na na Nyɛʔɛlɛ sonni le. À pe fya ceŋge mà yo: «Wó ma kafonŋoo nya alaʔa nî ge.»
Jesu wí ma Lefi fara we
(Mat 9:9-13; Mar 2:13-17)
27Ki kaʔa kruʔu ma ge, Jesu wɔ̀ɔ yâ misari syɔfɔlɔ wà nya à pe noo yeri Lefi. Wi dá bo wa klɛnhaʔa misari syɔfɛɛ go ni ge. Wɔ̀ɔ wí po: «Pa ná na.» 28Wɔ̀ɔ yrɛbɛ pì bɛfu yaʔa wa mà jɛ mà pa wí na.
29Lefi wɔ̀ɔ yâ fɛti kpangbanŋa hanri wa wi go nî Jesu wi kala na le. Misari syɔfɛɛ fafaʔa dà bo wa klɛnhaʔa ní hɛɛn pèè ní. À pe na li pé ni. 30Farisiyee ní, ní pe Furu sɛbɛ cɛnfɛɛ ní à pe báa nyu wi ploʔofɛɛ ní be lagbanma ní mà yo: «Nyaʔa ma kan yé na plɛn na li ná jo misari syɔfɛɛ ní, ní kapere hanrifɛɛ ní be ge?»#5:30 ma wèle wa Luk 15:1-2 ni wè. 31Jesu wɔ̀ɔ pé po: «Gbanma fɛɛ ban pé na dɔʔɔtrɔ ca pè na ge, di yabaa bɛ. 32Mi ìn dà ban bì ba hɛnsinbee yeri pe kruʔu wa pe kapere ma de, di kapere hanrifɛɛ bɛ.»
Pé ma Jesu yugu we su como kayoʔo ní
(Mat 9:14-17; Mar 2:18-22)
33À hɛɛn pèè moo po: «Jan wi ploʔofɛɛ pé na su cun we nyiŋi fafaʔa na na Nyɛʔɛlɛ nyɛri le. Farisiyee pe woo à pe naʔa hanri ban kpo. Di ma woo pé na li na jo.» 34Jesu wɔ̀ɔ pé po: «Pa ye gban bìʔi yo fonŋo fɔlɔ wi nagroboo kan bì yo pe su co nyiŋi ga na fonŋo fɔlɔ wí nyɛ wa pe ní ge yo? Ayo dɛ. 35Nyiŋi kà na pan wa, pé bi ba fonŋo fɔlɔ yrigi we wa pe ni. À pe nà da bì baa su cun we ki wlɛrɛ da ni de.»
36Wɔ̀ɔ ní mà yomɛlɛ là kmo pé kan nɛ mà yo: «Hɛn wà ná jé drefonŋo hlugu bì drelɛʔɛ ton. Ná kiì ban, wi na po wí ma drefonŋo hlugu ge waʔafe na. Ki kpasyofonble lòo gban bì yala wa drelɛʔɛ na ge. 37Hɛn na jé hunbunmu kpe bì mi le frogolɛrɛ ni, ná kiì ban, hunbunmu pa mi frogolɛrɛ frugu de, hunmù pa mi wo, frogoro pa ti jɔʔɔ kpo. 38Di kí ma yala pe da hunbunmu ni me frogofonro ni. 39Mɛjɛn hɛn ŋa wí ma hunlɛmɛ jɔ mâ tara kɔ ge, hunbunmu mi laa ki ín jé dɔɔ cun adi. Wi naa ki nyu mà yo: ‹Hunlɛmɛ mí ma ponro.› »
လက္ရွိေရြးခ်ယ္ထားမွု
LUKE 5: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire