JAN 20
20
Jesu wi nyɛmanyinimi
(Mat 28:1-8; Mar 16:1-8; Luk 24:1-12)
1Katiwlɛʔɛ jɛfantutuʔu na, Mari ŋa Magidala kàʔà woo we wɔ̀ɔ kɛri wa fanʔa deʔe na ge. Deʔe àʔa po ki ìn jé jeʔele kpɛn. Wɔ̀ɔ yáʔà nya pé ma ŋglɛnʔɛ laʔa ge wa fanʔa ki nò na ge. 2Ki nyiŋi na, wɔ̀ɔ fɛ mà kɛri ticaʔa ga Simo Pyɛri krugu we, ní ploʔofɔlɔ wà nì nɛ ŋa wi dáa Jesu glanʔa we. Wɔ̀ɔ yáʔà yo pé ma mà yo: «Pé ma wò Fɔlɔ fara we wa fanʔa ni ge. Pé moo tyɛʔɛ deʔe ga na, wo ìn ki cɛn.» 3Ki kruʔu ma, Pyɛri nì, wi ploʔofɔlɔ wi tɔ nì à pe kɛri wa fanʔa deʔe na ge. 4Pè syɛnmu à pe plɛn na fe. Di ploʔofɔlɔ wi tɔ wɔ̀ɔ fɛ gbanʔa mà toro Pyɛri na we mà yâ glu mà no wa fanʔa na ge. 5Wɔ̀ɔ kpɔbu mà wele wa ma kpasyoro nya de wa. Di wi ìn je wa. 6Simo Pyɛri, ŋa wi da ba wí na ge, wi gâ no wa, wɔ̀ɔ taʔa mà je wa fanʔa ni ge mà yâ kpasyoro nya de wa kpo. 7Kpasyoʔo ga pe dá gbe mâ wi yugu pwɔ ge, wɔ̀ɔ kí nya klolojɛʔɛgɛ wa deʔe kà na. Ki ìn dà bo wa kpasyoro ti tɔ nì de. 8Ki nyiŋi na, ploʔofɔlɔ ŋa wi da glú mâ no wa fanʔa na ge, wɔ̀ɔ je wa kpo mà kpasyoro nya de ma paʔa na mà yo Jesu wi nyɛ́ mà nyini. 9Di ploʔofɛɛ pe ìn dà bo pé ma Nyɛʔɛlɛ li kayoro ti kɔ̀rɔ́ cɛn we kpɛn, da tí naʔa nyu mâ yo kí ma yala Jesu wi nyɛ́ wí nyini kuu ni be ge.
10Ki kruʔu ma, ki ploʔofɛɛ syɛn à pe hru mà kɛri pe goro ni de.
Jesu wí ma wì tyɛʔɛ Mari na ŋa Magidala kàʔà woo we
(Mat 28:9-10; Mar 16:9-11)
11Di Mari wi da yeré be finmi na fanʔa tanla mà na kpele. Pɔɔ da gáa gbele ge, wɔ̀ɔ gâ gbɔbu mà wele wa fanʔa ni ge, 12mà mlɛŋɛyee syɛn nya wa klɛnhaʔa drefiri nì, be deʔe ga na pe dá Jesu wi wre sinŋi de. À wà ma po yugu kɔ̀lɔ́ ma, wi tɔ wɔ̀ɔ po cyeʔe kɔlɔ́ ma. 13À poo yugu mà yo: «Cɛlɛ, nyaʔa ma kan má na kpele ge?» Wɔ̀ɔ pé po: «Pé ma na fɔlɔ kpe we. Deʔe ga na pé moo tyɛʔɛ ge, mi ìn ki cɛn.» 14Wi gáʔà yo kɔ ge, wɔ̀ɔ wa mà krɛʔɛ mà Jesu nya we be yerehaʔa, di wi ìn ki cɛn bì yo Jesu wiì wi. 15Jesu wɔ̀ɔ wí po: «Cɛlɛ, nyaʔa ma kan má na kpele ge? Má na han ca?» Mɛjɛn Mari wi dáa ki honri mà yo kí bi bo nagɔ welefɔlɔ wi. Wɔ̀ɔ wí po: «Kundiʔi, nàʔa po má moo kpe mà yɔ́ɔ̀ tyɛʔɛ deʔe kà na, ma ki deʔe tyɛʔɛ ge na na bì yɔ̀ɔ kpe.» 16Jesu wɔ̀ɔ wí po: «Mari.» Wɔ̀ɔ wa mà krɛʔɛ nɛ mà yo wí ni Ebruyee hɛnrɛ ni mà yo: «Hrabuni,» ki na po pé yo, “krɛʔɛfɔlɔ”. 17Jesu wɔ̀ɔ wí po: «Mò gáa na cun bì da na yrìgí, mɛjɛn mi ìn je gɛri kpɛn wa namuru ni na To krugu we. Di maa sye, ma yaʔa yo na ploʔofɛɛ kan be, ma pe po: Mí bi gɛri wa namuru na To krugu ŋa wí nyɛ yè To we. Mí bi gɛri na Nyɛʔɛlɛ krugu la lí nyɛ yè Nyɛʔɛlɛ le.» 18Mari ŋa Magidala kàʔà woo we wɔ̀ɔ pan mà báʔà yo ploʔofɛɛ ma be mà yo: «Mí ma wò fɔlɔ nya we.» Wi dá kaʔa gee yo wí ma ge, wɔ̀ɔ kè bɛfu yo pé kan.
Jesu wí ma wì tyɛʔɛ wi ploʔofɛɛ na be
(Mat 28:16-20; Mar 16:14-18; Luk 24:36-49)
19Canwyele li wlɛgblɛʔɛ na, yaa ki da gá bâ je nyiŋi ga na ge, ploʔofɛɛ à pe ko wa go ni ge mà goyɛrɛ ton de mà ti pari pe na, mɛjɛn pe dáa fyaʔa Juwifiyee na be. Jesu wɔ̀ɔ pan mà bâ yere be pe nulala ni le mà pe po: «Nyimi bí bo ye ma.» 20Pɔɔ gáʔà yo kɔ ge, wɔ̀ɔ wi kyɛrɛ̀ nì, ní wi namyɛlɛ tyɛʔɛ le pe na. Ki kala na, ploʔofɛɛ à pe po lafiʔimi nì ceŋge, mɛjɛn pé ma wò fɔlɔ nya we. 21Jesu wɔ̀ɔ ní mà pe po nɛ: «Nyimi bí bo ye ma. To wi da ná tun pomo ma na ge, mì fanna, mí bi ye tun ki podeme miì na.» 22Wi gâ ki kayoro da yo de kɔ ge, wɔ̀ɔ pé fɛn mà yo: «Ye Nyɛʔɛlɛ li Nyìli syɔ le. 23Nà ye hɛn o hɛn ŋa kapere yaʔa wí kan, pa ti yaʔa wí kan. Nà ye ìn ŋa kapere yaʔa wí kan, tòo yaʔa wí kan.»
Jesu wí ma wì tyɛʔɛ Toma na we
24Di Toma ŋa ploʔofɛɛ kɛ̂ mà kɛ syɛn wà wi mâ po pé noo yeri Piŋaa we, ki woo wi ìn dà bo wa nyiŋi ga na Jesu wi dá ban ge. 25Ki kala na, wi ploʔofɛnyɛɛ pe báa ki nyu wí kan mâ yo: «Wó ma wò fɔlɔ nya we.» Wɔ̀ɔ pé po: «Mì na mi ìn bo mí ma timoganʔa ke noʔo nya ge wa wi kyɛrɛ̀ na de bì na kabɛlɛ le wa timoganʔa ke noʔo ni ge bì na kyɛʔɛ le wa nɛ wi namyɛlɛ na le, mi ìn bi baʔa na fyeu.»
26Àʔa ta wlɛrɛ natanri, wi ploʔofɛɛ à pe bâ nì mà pè kpoʔolo nɛ wa go ni ge, Toma wɔ̀ɔ po wa pe ní kpo. À pe goyɛrɛ tón de mà ti pari. Di Jesu wɔ̀ɔ bâ je wa pè krugu mà yere be pe nulala ni le mà pe po: «Nyimi bí bo ye ma,» 27mà nàʔá yo Toma kan we mà yo: «Ma ma kabɛlɛ krɛʔɛ le naʔa, ma na kyɛʔɛ wele ge. Ma ma kyɛʔɛ le wa na namyɛlɛ na le. Mò gá go wa ma babama ni me. Ma pà ná na.» 28Toma wɔ̀ɔ wí po: «Na fɔlɔ, na Nyɛʔɛlɛ.» 29Jesu wɔ̀ɔ wí po: «Pa ma gâ na nya ge, kiì ma kan á ma pa ná na ge yo? Bee pé bi ba ná na bí bo pe ìn na nya ge pé nyɛ frɛmɛ ní.»
Ki sɛbɛ wi yugu
30Jesu wi dá kafonŋoo fafaʔagaa hanri wi ploʔofɛɛ pe yɛʔɛ̀ na, di kè bɛfu wò nyɛ nyoŋoʔo naʔa ki sɛbɛ ŋa ni we. 31Ɛɛn di, ki woʔo gee ké ma nyoŋo jango ye pàʔá na, yeʔe cɛn ye yo Jesu wí nyɛ Nyɛʔɛlɛ li wofràa mà po Nyɛʔɛlɛ Pyɔ. Nàʔa po ban, ye nì ye nyuwyeʔe ta pama mi fanŋa ni wi yele na le.
လက္ရွိေရြးခ်ယ္ထားမွု
JAN 20: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire