Lukase 21
21
Eshúm pwɔ́’ ngàŋ ngɔ́’ mpfɔ̌g manzwě
(Malékuse 12.41-44)
1Yěsô nyé ńgwɔ́ pɔ́ *jʉ’ʉ Ssé, ésele nnɛ́ ńně ńnáŋte jʉ’, ńgyá pá’ megàŋa mmó ne ńnéŋe shúm pwɔ́’ tsɛ̀ɛ jʉ’ gie mé ńnéŋe shúm pwɔ́’ wó. 2Ńgyá tsɔ̌ mpfɔ́g manzwě, ńgwɔ́ mbóŋ tó yé, ńnéŋ pà tà’ ndólà mépʉ́a pie é té tsɔ́ mmó ku’. 3Yěsô gɔɔn ngie: Tà mèŋ shwóŋó gẅí, kwà’ nénʉ́, àmpfɔ̌g manzwě wɔɔn, ńgwɔ́ mbóŋ, něŋ nkáb, ńcʉa pʉ̀a metsèm. 4Epʉ̀a gwaa néŋ nkáb lɔg gÿo sɔ́b shúm pwɔ́’ é gwɔ́ metwó nkáb mɔ́b. Tá ńgʉa ná ye, à tsɛ ńgwɔ́ pɔ́ mbóŋ tá’, à něŋ wé ndà’a mmó gẅie á ke ńgẅiin lélɔg ńjú sé shúm.
Yěsô gɔ̌ɔn ngie mé ge táa tága jʉ’ʉ Ssé
(Matio 24.1-8; Malékuse 13.1-8)
5Tsɔ́ *ngàŋa kwò yé ńnéŋe tà ńdíe *jʉ’ʉ Ssé, ńne ńgɔ’te ńgɔɔn ngie: Á té poŋ lá, gyá tsɔ̌ ntí metóon mbòŋo mie mé la lɔg ńkwɛ́, mbɔɔ tsɔ́ ntí shúm mbòŋo sie mé la ná mé lɔg ńkẅiŋ! Yěsô gɔɔn mbwo pɔ́b ngie: 6Tà pi gyá pɔ́ pá’ á poŋo lɛ, atsɔ́ lyɛ̌’ ge gÿo gwɔ́, mé pú ńtág, tà tóon le gíŋe ńzébe nà wetsɔ̌ wɔ́. 7Pɔ́ zɛ́te yé ngie: Tsítsà, yɔɔn nò ge lá’ gÿo síŋe? Mé lɔgɔ kɔ́ tá ńzsé ngie yɛ̌ fʉ̀’ ne ńku’u? 8Á tsɔ́’ ngie: Pi laga twó gí, ḿbɔ́ɔn nyìŋ léfʉʉ gẅí. Á nue pʉ̀a tà ńgyɔ́ɔn ge gÿo tÿɔ́g lezíŋ sɔ́ɔn mvfò, wɔ̌wɔ́ɔ ná pɔ́b wɔ́ gɔɔn ngie aa *Nzà’nkÿo, afʉ̀’ ku’ú. Pɔ́ lɔɔn ńgɔɔn pú’u, tà pi mɔ́ɔn tà ńcʉ́me nzèm pɔ́b. 9Pi lá’ ńgwɔ́ tà ńjú’ mé ne ńgɔɔn nò nà mencù mie é kẅɛɛ, kà pɔ́ ná và’ gie á selé ńgwe tsɛ̀ɛ melá’ gwɔ́, tà pi cÿɔ’. Á ne ńzɛ́te ngie sɛ̌ shúm vɔg ńcʉate, tá á lě ńdɔgɔ ńgwɔ́ pɔ́ ngie njÿó gwǒon ḿmag wɔ́. 10Yěsô gíŋe ńgɔɔn né pɔ́b ngie: Alá’ ge lá’ lu ssé lÿɔ́’ɔ yetsɔ́, afùɔ túm lu ssé ńdÿɔ́’ɔ wetsɔ̌. 11Tsetsá’ ge lá’ pú cʉ’ʉ nà mejʉ’ tà ńgyɔ́ɔn, gwá’a pɔ́ gwáŋa gwe tsɛ̀ɛ mepàg ngwòŋ tà ńgyɔ́ɔn. Mentʉ̀ menò gÿo, éshúm sie mé ge gyá cÿɔ’ cÿɔ’ kẅɛɛ lefaŋ.
12Mɔɔn menò ge zɔɔn lá’ gwaa tó, pi vɔg ńgyá mé gwoon gẅí, ńnyɛɛ gẅi ngɔ́’, ésẅiŋe gẅí, mé ŋaga gẅi *mendá cú’tè pà Yuda, ńnéŋe gẅi tsǎŋ. Mé ge lá’ ŋaga gẅi á mvfò mefùɔ pâ pàngúmnɔ́ɔn, mélà’mie pi jǔ’ ncwò wɔ̀ɔn. 13Tá à leen ńké ńcʉa pú’u, ńdɔg náa gẅi shÿó léshwóŋó nyìŋ gẅie mèŋ n gee wɛ̌. 14Tà pi tʉ́ njÿó ḿmÿɔg ngie pi ge lá’ kúu jʉ’ʉ ntsàŋ é zoŋo twó gí lêkɔ́ wɔ́? 15Mèŋ n zɔ ge zɔɔn lá’ náa zsé nò gie pi ge lɔg tsɔ́’ɔ nò. Pi tsɔ́’ɔ nò tà megàŋ mbù pí le zoŋ, é ké le gíŋe tsɔ́ nò ńgɔɔn wɔ́. 16Kwà’ pʉ̀a pí ge lá’ zába nò ná pi, mbɔɔ kwà’ metá pí pâ memá pí, tà mbɔɔ mefɛ́ pí, pâ pʉ̀a pie é tswé’e gẅí, mbɔɔ meshǔ pí. Pɔ́ lɔgɔ gẅi ńgʉa, mé ŋaga gẅí, ńzẅéte pʉ̀a tà ńgyɔ́ɔn tsetsɛ̀ɛ pi. 17Pʉ̀a metsèm ge lá’ pú pʉ̀a gẅi mélà’ mɔ́ɔn. 18Tá’, tsɔ̌ tà’ noŋ ké letsɔ́’ɔ twó pi tà ḿbyé wɔ́. 19Pi shÿɔg shÿɔg, ńgÿo ńgẅiin légwɔ́ tèmì.
Ammó gie á ge gÿo gÿo Yerósalem
(Matio 24.15-21; Malékuse 13.14-19)
20Pi gÿo ńgwɔ́ tà ńgyá pà lÿɔ́’ ncù tó ńzéme Yerósalem tà ḿbume, pi zsé ngie fʉ̀’ gie mé ge tágte tÿǒsoŋ ne ńku’u. 21Afʉ̀’ó la, á poŋ ngie pʉ̀a pie ée Jẅidea kÿo ńdɔg ye mekwɔ’ɔ́ ńgʉa ńdyeen, pʉ̀a pie ée tsɛ̀ɛ tÿǒsoŋo Yerósalem fó wó ńkẅɛ, epʉ̀a pie ée tsẅɛ pɔ́ɔn légíŋ ḿbiŋ nzèm lê tÿǒsoŋ. 22À lɔgɔ pú’u, ńgwɔ́ lyɛ̌’ gie Ssé ńnéŋe ngʉ̀ngʉ̀ twó pʉ̀a Yerósalem. Menò mie mé la ŋwe’e tsɛ̀ɛ ŋwà’ne Ssé lɔgɔ ḿbumte. 23Yee ngɔ́’ le! Tà pànzwě pie é ge lá’ gwɔ́ shwoŋ, mbɔɔ pie é ge lá’ ne nóŋe púɔ mepÿɛ́ nà mɛ̌ melyɛ̌’ ge lá’ gwá’a lá? E Ssé ge lá’ gyáŋa lóŋ ná pʉ̀a lá’ yɔɔn. Pʉ̀a metsèm gyá kwà’ máamáa ngʉ̀ngʉ̀. 24Mé lɔg menně ncù ńgwa pʉ̀a, ńgwoon petsɔ́, ésaa melá’ melá’ pɔ́ cʉ́’ menkwɔ̀ɔn. Yɔɔn ee ntí gie pʉ̀a melá’ mie é té Ssé zsé ge lá’ pú tágte Yerósalem pú’u, é nẅé’e pʉ̀a wó tà yɔ́b fʉ̀’ lá’ ḿmag.
Míŋ Nyìŋ ge gÿo tó
(Matio 24.29-35; Malékuse 13.24-31)
25Á ge lá’ gwɔ́ fʉ̀’ó, mé gyá meliŋé kẅɛɛ ná nèm, ńkẅɛɛ ná saŋ mbɔɔ nà mecÿɔ́’saŋ. Ntse té pàa pʉe, ḿbú ńcu’ tà pʉ̀a metsèm pie pɔ́ ée ndùmo ssé tsetsá’ vege ḿbú ḿbɔ́g tɛ’. 26Epʉ̀a mesoŋ tó pɔ́ ḿbɔ́gɔ mmó gie á ge tóo ndùmo ssé tsetsá’, éshʉ́ŋ. Akɔ́ɔkɔ́ɔ gie áa lefaŋ, à pú ńtága. 27Mé leen ńké ńgyá *Míŋ Nyìŋ gwɔ́ tsɛ̀ɛ melɔ́ɔn ńne ńtóo, ńgẅiin shʉ́shÿɔ́g mbɔɔ máamáa metʉ̀. 28Mɔɔn menò lɔɔn ńdá’ ńgwɔ́ tà ńzye létó, pi zẅí’te gí pɔ́ tè pɔ́g, mélà’mie afʉ̀’ gie Ssé gee kẅile gẅi ndá nkwɔ̀ɔn ne ńku’u.
29Ńgɔɔn pu’u, ésag ngie: Pi líe tÿǒ tsɔ̀ɔn nzsó pâ metsɔ́ metÿǒ tá ńgyá, 30é gwɔ́ tà ńzye létáb, pi zsé ngie afʉ̀’e lùm ne ńtóo. 31Ndʉŋ ndʉŋ pú’u, pi la’ ńgwɔ́ tà ńgyá mɔɔn menò zye lécʉate, pi zsé ngie afʉ̀’ gie Ssé ge nyɛ *lefùɔ sé tsɛ̀ɛ njÿó ne ńku’u. 32Mèŋ shwóŋó gẅi, kwà’ nénʉ́, pʉ̀a pie ée tsɛ̀ɛ njÿó fʉ̀’ɔɔn té nge lá’ kwéte tà mag té gwɔ́ gie mɔɔn menò tsèm tǒ wɔ́. 33Lefaŋ pɔ́ tsetsá’ ge gÿo mag, tá shwóŋó yɔ́ɔn lá’ le pyé. 34Pi laga twó gí nà lecʉ’ʉ́ ńzɔ́gɔ ḿpfɛ́ɛ pɔ́ shúm, ńnúu melù’ tà ḿbʉ́a, ḿmÿɔgɔ menò nzsè nzsè, ḿbɔ́g legyè sí lépyé, lyɛ̌’ɛ́ lá’ *Míŋ Nyìŋ gwaa tó, pi le ne ḿbyɛ́bɛ yé wɔ́, 35á gwɔ́ mbwo pi pá’ lejÿɔ’ la. Pi zsé ngie menò yɛ̌ lyɛ̌’ ge lá’ vege vege gwoon pʉ̀a metsèm ndùmo ssé tsetsá’ ntsèm. 36Pi pɔ́ɔn lélyé, ńně sẅíŋte Ssé fʉ̀’ ntsèm, à náa gẅi tʉ̀ lélɔg ńtsẅɛ́#21.36 kà pɔ́ le ye: lélɔg shÿɔg menò ŋwɛ́ mie é ne ńtóo, mbɔɔ lélɔg ńtyé mvfò Míŋ Nyìŋ.
37Wɔɔn aa pá’ Yěsô lɔ̌ɔn ńzí’i pʉ̀a mmó tsɛ̀ɛ *jʉ’ʉ Ssé lyɛ̌’ ntsèm, ńgwɔ́ ncwò nzém, ńgee ndùm lekwɔ’ɔ́ sie mé tóŋo le lekwɔ’ɔ́ metÿǒ mèvɛ olive, éfa’a jʉ’, ńdá’a wó. 38Njÿó gwaa ye e lʉa lʉ̌a, alá’ ntsèm mʉ́ mbà’a mbà’, ńtóo tsɛ̀ɛ *jʉ’ʉ Ssé, á lejʉ̌ŋ Yěsô lé jú’u shwóŋò yé.
လက္ရွိေရြးခ်ယ္ထားမွု
Lukase 21: NGBM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouveau Testament en Ngienboum © Alliance Biblique du Cameroun, 2007.