Omochakano 2
2
1Naboigo igoro na ense bigaikeranigwa. 2#Okong’ 20:11#Abaibr 4:4,10Ase rituko ria gatano na kabere Nyasae agaikerania emeremo yaye yonsi; erio agatimoka. 3Nyasae agasesenia rituko ria gatano na kabere, akariatanana, akarikora richenu, ekiagera erio nario rituko atimogete korwa ase emeremo yaye yonsi y’obotongi, eyio konya akorire.
4Oyo noro omogano igoro y’ense, na bionsi ebire imeo buna biatongetwe.
Omogondo o Eden
5Ase engaki eria’Omonene atongete igoro na ense, kemeri kende tikiarenge komera korwa ase riroba, gose nyeni chinde, ekiagera Omonene Nyasae konya taratoma embura etwe ase ense, nonya ’monto onde tarengeo ore korema riroba. 6Korende obotooru nigo bware gotiira korwa inse na konyiyia riroba ri’ense yonsi.
7 #
1 Abakr 15:45
Eri’Omonene Nyasae akaimokia amaroba korwa inse akabomba na koroisia omonto korwa ase orotu rwe riroba, akamoutera omoika bw’obogima ase chimioro chiaye, erio omonto akaba n’obomooyo.
8Eri’Omonene Nyasae agasimeka ebimeri ase omogondo aaria Edeni, ensemo ya moocha, erio akabeeka omonto aroro, oria abombete na koroisia. 9#Okom 2:7; 22:2,14Akameria emete korwa ase riroba, emete yonsi ekororwa yasanerwa kegima, eyio yarenge endagera engiya. Nyasae akabeeka omote bw’obogima gati‐gati y’omogondo oria, naende omote onde oyo bw’okomanyera amaya na amabe.
10Orooche rogatuboka korwa ase omogondo o Edeni na rokayobekera amaache. Korwa agwo rokagabekana, rokaba chindooche inye. 11Orooche rwe ritang’ani rokarokwa Pisoni, orwo narwo roetanaine ense yonsi ya Havila. 12Aa noo Etaabu engiya kegima egotoka boigo namagena ande ye rigori rinene. 13Na orooche rwa kabere rokarokwa Gihoni, orwo narwo roetanaine ense yonsi ya Kusi. 14Na orooche rwa gatato rokarokwa Tigirisi, orwo rogoeta moocha y’Asuri. Na orooche rwa kane narororwo rokarokwa Eufarati.
15Erio Omonene Nyasae akaira omonto oria, akamobeka ase omogondo o Edeni, ayoroiserie na koyorenda. 16Akamoteebia omonto oria, “Amatunda a kera omote ore ase omogondo oyo nonyare koyaria, 17gotatiga amatunda y’omote bw’okomanyera amaya na amabe toyaria, ekiagera rituko riria orayarie goika okwe.”
18Eri’Omonene Nyasae agateeba: “Tai buya omonto oyo abe bweka, nimokorere omokonyi oramokoonye.” 19Erio akaimokia amaroba korwa inse akaroisia kera eng’iti, ne chinyoni chionsi. Erio agachirenta ase omonto oria, arore buna agochiroka; naboigo kera egetongwa kianyorete erieta riaye. 20Ase igo omonto oyio akaroka chinyoni chionsi n’echingiti chionsi; korende ase ebio bionsi ebiatongetwe, tarorekana mokonyi onde oye. 21Eri’Omonene Nyasae akabeekera omonto oria chitoro chindito mono kegima, ekero araire akamorusia orobaru rwaye oromo, na akairaneria chinyama aase aria. 22Akaroisia omokungu korwa ase orobaru akamoirera omonto oria. 23Erio omonto oria agateeba,
“Omoerio oyombwekaine oyo aa Oyo neriuga korwa ase amauga aane,
ne chinyama korwa ase chinyama chiane.
Oyo nigo ararokwe omokungu,
ekiagera oyo nigo arusigwe ase omosacha.”
24 #
Mat 19:5; Mar 10:7,8; 1 Abakr 6:16; Abaef 5:31 Ekio nakio gekogera omonto agotiga ise na ng’ina obwatana na mokaye, na abwo babere baba omobere oyomo.
25Omosacha na omokungu nigo baarenge getirianda, na tibaare kororerana obosooku.
လက္ရွိေရြးခ်ယ္ထားမွု
Omochakano 2: EKGE
အေရာင္မွတ္ခ်က္
မၽွေဝရန္
ကူးယူ
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmy-MM.png&w=128&q=75)
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2021