OMOCHANKO 27
27
Yakobo okonyora ogosesenigwa korwa ase ise ase okong’ainereria
1Ekero Isaka konya abeire omogotu, na amaiso aye konya abeire orotutu, atari korora buya, akarangeria Esau, omwana oye omotangi, akamotebia, “Omwana one!”
Ere akamoitabera, “Nao inde aa”
2Akamotebia, “Rora bono inche nagotire, gose timanyeti engaki y’ogokwa kwane. 3Bono bogoria ebitwarero biao, nabio egochi yao ere ne chinsara amo nobota bwao, ogende borabu otware ching’iti, ondetere chinyama. 4Erio ondoiserie endagera engiya, eria nyanchete, oyendetere indie, erinde ngosesenie konde moyo, ntarakwa.”
5Bono Rebeka nigo arenge otegererete ekero Isaka are gokwana nomwana oye Esau. Ase igo, ekero Esau agendete borabu gotwara ching’iti amorentere ise, 6Rebeka agatebia Yakobo, omwana oye, “Naigure iso ogotebia momura omino Esau: 7Ndetere chinyama chia borabu, ondoiserie endagera engiya indie, erio inyare kogosesenia ase obosio bw’Omonene, konde moyo, ntarakwa. 8Ase igo, omwana one, ntegerera bono aya nkogotebia. 9Genda getii ase riicho, ondetere chimanwa chie chimbori ibere chingiya, na inche nimoroiserie iso endagera engiya, eria anchete. 10Erio oirere iso arie, erinde anyare kogosesenia ritang’ani atarakwa.”
11Korende Yakobo agatebia Rebeka ng’ina, “Noroche Esau ominto nomonto obwate amarionya ase omobere oye, korende inche omobere one nomoterere. 12Aande, tata nigo arantaba‐tabe, na inche imbe ase amaiso aye buna omong’ainereria, inyerentere okoragererigwa ribaga ri’ogosesenigwa.”
13Ng’ina akamotebia, “Okoragererigwa kwao tiga kobe igoro yane; igwa aya nkogotebia rioka, genda ondetere chimanwa echio chie chimbori.” 14Erio agwo akagenda, agachirentera ng’ina, na ere akaroisia endagera engiya, eria ise anchete. 15Erio Rebeka akabogoria eanga eria engiya mono ya Esau, omwana oye omotangi; eye nigo yagachire nyomba mwaye, akayebekera Yakobo, omwana oye omoke. 16Na amasankwa aria e chimanwa chie chimbori akamoboyia ase amaboko aye ne rigoti. 17Erio akabeka ase amaboko ’omwana oye Yakobo endagera eria engiya aroisetie, amo nomogati.
18Yakobo akagenda ase ise, akamotebia, “Tata!”
Nere agaitaba, “Nao inde aa. Naye ng’o, mwana one?”
19Yakobo akairaneria ise, “Ninche Esau, omwana oo omotangi. Nakorire buna gwantebetie; boka, oikaranse orie enyama y’obotwari bwane, erio onsesenie.”
20Isaka akamoboria, “Omwana one, naki gwakora kwanyora ching’iti iga bwango?”
Akamoiraneria, “Omonene, Nyasae oo, nere ochindetera.”
21Erio Isaka agatebia Yakobo, “Inchuo aiga ang’e asende, ngotabatabe, erinde imanye gose naye omwana one Esau, gose tari aye.” 22Yakobo akagenda akamoika ise ang’e, na ere akamotaba‐taba, akabora, “Eriogi rirorio neria Yakobo, korende amaboko naya Esau.” 23Na ise tamomanya, ekiagera amaboko aye nigo arenge namarionya buna aya Esau omwabo. Ase igo akamosesenia. 24Akamoboria, “Amaene, naye omwana one Esau?”
Yakobo akamoiraneria, “Ee, ninche.”
25Naende Isaka akamotebia, “Yendetere aiga ang’e, omwana one, indie enyama y’obotwari bwao, erio ngosesenie.” Ase igo akamoyeirera na ere akaria, akamoa na edivai, akanywa. 26Isaka ise akamotebia, “Omwana one, inchuo aiga ang’e asende, onyunyunte.” 27Erio akamoika ang’e, akamonyunyunta. Isaka agatiokerera rimisu rie chianga chiaye, akamosesenia, akabora,
“Naama! Rimisu ri’omwana one
nigo rigotioka buna rimisu ri’omogondo omuya,
osesenirie n’Omonene!
28Nyasae akoe ebie riime rikorwa igoro
na obonoru bwe riroba,
ne rigesa riao ribe eringe,
na edivai boigo.
29Abanto bagokorere,
na ebisaku bigotung’amere.
Obe omonene ase abamino,
abana ba nyoko bagotung’amere;
oyorakoragererie, nere naragererigwe,
na oyoragosesenie,
nere nasesenigwe!”
30Ekero Isaka akoorire gosesenia Yakobo, na Yakobo karure ase obosio bwa Isaka ise, Esau omwabo agacha korwa ase obotwari bwaye. 31Nere boigo akaroisia endagera engiya, akarentera ise, akamotebia, “Tata, inchuo orie endagera y’obotwari bwane, inche omwana oo, erinde onsesenie.”
32Isaka ise akamoboria, “Naye ng’o?”
Ere akamoiraneria, “Ninche Esau omwana oo omotangi.”
33Erio Isaka agakumia mono na koiguswa, akabora, “Ning’o oria ocha ondetera endagera engiya, na inche naria yonsi ekero otaracha, namosesenia?—Ee, nere nabe osesenirie.”
34Ekero Esau achia koigwa amang’ana a ise, akarera ekerero ekenene mono ki’obororo, akamotebia, “Nsesenie nainche boigo, tata!”
35Korende Isaka akamoiraneria, “Oyomino nigo achicha nobong’ainereria, na ere oirire ogosesenigwa kwao.”
36Esau akabora, “Inee! Tari korokwa Yakobo ase oboronge? Naki eye nengaki ya kabere ang’ainereirie. Ritang’ani akaira omwando one bw’okoiborwa kw’obotangi, naende bono oirire ogosesenigwa kwane.” Naende akamoboria, “Tontigereti inche gosesenigwa konde?”
37Isaka akamoiraneria, “Rora, namokorire abe omonene oo, na abamwabo bonsi babe abasomba baye, naende namoeire endagera y’omogondo na edivai. Inki rende ndanyare kogokorera aye, omwana one?”
38Esau akaboria ise, “Ogosesenia nokomo gwoka kwabwate, tata? Nsesenia inche nainche boigo, tata ominto.” Esau agaaka eriogi, akarera nobororo.
39Erio Isaka ise akamoiraneria, akamotebia,
“Rora, obomenyo bwao inabobe aare korwa ase obonoru bwe riroba,
na aare korwa ase riime rikorwa igoro.
40Omoro oo bw’esegi nogere obe moyo,
aye nomokorere oyomino;
korende engaki neche orekong’ie,
nobune rikorogoto erio akobekeire ase rigoti riao.”
41Esau akagecha Yakobo ase engencho y’ogosesenigwa okwo ise amosesenetie, agateba ase omoyo oye ime, “Amatuko ay’okomoreera tata ng’ang’e are; erio nario ndaite Yakobo.”
42Korende ekero Rebeka atebigwa aya Esau, omwana oye omonene, agoteba, agatoma omonto korangeria Yakobo, omwana oye omoke, akamotebia, “Rora, momura omino Esau ogotianeire ng’a agoite. 43Na bono, omwana one, igwa amang’ana aane, imoka otame gochia o Labani, momura ominto aaria Harani. 44Omenye aroro ase engaki enke, goika ekeririanda kia momura omino gekende. 45Ekero endamwamu yaye erakee, na ere ebire aya kwamokorerete, erio nintome abanto bache gokorangeria oirane korwa aroro. Nase ki ndakwerwe nainwe mwensi babere ase rituko erimo.”
46Erio Rebeka agakwana na Isaka, akamotebia, “Nigo ngechirie mono ase obogima bwane ase engencho y’abaiseke b’Abahiti. Onye Yakobo ogochia konyuoma oyomo bw’abaiseke b’Abahiti, koreng’ana buna aba bamenyete ase ensemo eye, rirorio obogima bwane, inki borangwenere?”
လက္ရွိေရြးခ်ယ္ထားမွု
OMOCHANKO 27: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020