OMOCHANKO 20
20
Ibrahimu na Sara bakomenya Gerari
1Erio Ibrahimu akaimoka korwa agwo, akagenda gochia ense ya Negebu, akamenya buna omomenyi aria Gerari, egati ya Kadeshi na Suri. 2Ibrahimu agakwana igoro ya Sara mokaye, “Oyo mosubati ominto.” Abimeleki, omoruoti o Gerari agatoma abanto kwoyia Sara. 3Korende Nyasae akaorokera Abimeleki botuko ase okorota, akamotebia, “Aye goika okwe, ekiagera omokungu oyo kwarentire nomokungu bw’omonto onde.”
4Abimeleki konya taraba nere, akabora, “Aye Omonene, Inee, nigo oraite nonya nabanto abanyene oboronge? 5Inee! Omonto oyio tantebetie ere omonyene ng’a oyo mosubati omwabo? Na omokungu nere agantebia ng’a oyo momura omwabo? Ase enkoro etari na komocha, na ase amaboko amarabu nakorire ayio.”
6Erio Nyasae akamotebia ase okorota, “Inche namanyire ng’a ase enkoro etari na komocha gwakorire aya, na inche nkagotanga tigwankorera ebibe. Ase ayio, tinakoa ribaga omokune. 7Bono moiranerie omonto oria mokaye, ekiagera ere nomobani, nagosabere onyare koba moyo. Korende otamoiranereti, manya amaene, goika okwe, aye amo na abanto bao bonsi ore nabarabwo.”
8Abimeleki akaimoka mambia chuni akarangeria abasomba baye bonsi, akabatebia amang’ana aya onsi, na abanto abwo bakaondoka mono. 9Erio Abimeleki akarangeria Ibrahimu, akamoboria, “Inki eke gwatokoreire iga? Inki nakomocheire goika kwarentire igoro yane na igoro y’oboruoti bwane ebibe ebinene buna ebi? Gwankoreire amang’ana atagwenerete gokorwa.” 10Naende Abimeleki akaboria Ibrahimu, “Inki kwarengereretie goika ogakora ring’ana eri?”
11Ibrahimu akamoiraneria, “Nabo nakorete igo, ekiagera naroche ng’a abamoirogete Nyasae tibari aase aa, na barabwo nigo barang’ite ase engencho ya mokane. 12Ere amaene nomoiseke ominto, tata noyomo, korende ng’ina nomoao, na inche nkamonyuoma. 13Ekero Nyasae andusetie korwa ase omochie o tata kogenda gochia aaria na aaria ngatebia mokane: Aya naro amaya orankorere: kera aase toragende otebe igoro yane ng’a inche momura omino.”
14Erio Abimeleki akaimokia ching’ondi ne chiombe, amo nabasomba, abamura na abaiseke, akaa Ibrahimu, akamoiraneria na Sara mokaye. 15Abimeleki akamotebia, “Rora, ense yane nigo ere ase obosio bwao; menya aande onsi ase oranche komenya.” 16Ere agatebia Sara, “Rora naeire momura omino chisekeli chie chifeta elifu eyemo, chibe entorobi yao ase amaiso ’abanto bonsi abare amo naye, erio omanyekane ng’a nomonto omoronge ore.”
17Erio Ibrahimu agasaba Nyasae; na Nyasae akagwenia Abimeleki amo na mokaye, na abasomba baye abakungu, na barabwo bakaibora abana. 18Naki Omonene konya ogombairie chinda chi’abanto bonsi b’enka y’Abimeleki, tibaibora, ase engencho ya Sara moka Ibrahimu.
လက္ရွိေရြးခ်ယ္ထားမွု
OMOCHANKO 20: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020