OMOCHANKO 17
17
Aburamu okorokwa Ibrahimu, na okobwatana kwa Nyasae nere
1Ekero Aburamu abeire nemiaka emerongo kianda, na kianda (99). Omonene akamoorokera, akamotebia, “Inche ninche Nyasae Omobui; genderera ase obosio bwane, na obe omoikeranu. 2Inche ninkore okobwatana kw’ogotianania egati yane naye, ninkomentekanie mono.” 3Erio Aburamu agatung’ama inse akaumama, na Nyasae akamotebia, 4“Rora, okobwatana kwane nabwatanire naye nakwo oko: Aye nobe sokoro bw’ebisaku ebinge. 5Bono erieta riao tirikoba naende Aburamu, korende nigo orarokwe Ibrahimu#17:5 Ibrahimu, engencho yaye: ise bw’abange, ekiagera nagokorire obe sokoro bw’ebisaku ebinge. 6Ninkomente obe nororeria oronge mono, ninkore ebisaku ebinge birue asore, na abaruoti nabarue asore boigo.
7“Ning’ikeranie okobwatana kw’ogotianania egati yane naye, na ororeria rwao korwa nyuma yao, kogenderere ekiaare ase ekiaare, kobe okobwatana gwa kare na kare; imbe Nyasae oo, na oyo bw’ororeria rwao korwa nyuma yao. 8Inche ninkoe aye, na ororeria rwao rorache korwa nyuma yao, ense eye omenyete bono buna omomenyi, ense yonsi ya Kanani, ebe eyaino kare na kare, na inche nimbe Nyasae obo.”
Okobwatana gw’okwarokigwa, na eira y’okoiborwa gwa Isaka
9Nyasae agatebia Ibrahimu, “Aye goika obwate okobwatana kwane kw’ogotianania, aye na ororeria rwao rorache korwa nyuma yao, ekiaare ase ekiaare. 10Oko nakwo okobwatana kwane, orabwate egati yane naye, na ororeria rwao rorache korwa nyuma yao: Kera omosacha ore asemore arokigwe. 11Goika mokebwe risankwa ria isiko ri’ekiimo kiaino ki’obosacha, na ayio nabe ekemanyererio gi’okobwatana egati yane nainwe. 12Ekiaare ase ekiaare kera omwana omoisia ore ase egati yaino goika arokigwe ekero akoorire amatuko atano na atato, omobiare o inka amo nomogorwa chibesa korwa ase abanto ba isiko, otari bw’ororeria rwao. 13Omobiare o inka na omogorwa chibesa, bonsi goika barokigwe. Ase igo ekemanyererio gi’okobwatana kwane inakebe ase emebere yaino goika kare na kare. 14Omosacha onde bwensi otakebiri risankwa ria isiko ri’ekiimo kiaye ki’obosacha, omonto oyio nigo araatananwe korwa ase abanto bamwabo, aserigwe gochia isiko, ekiagera osaririe okobwatana kwane.”
15Naende Nyasae agatebia Ibrahimu, “Sarai mokao, tobaisa komoroka naende Sarai, korende erieta riaye nigo rirabe Sara.#17:15 Sara, engencho yaye: eting’ana 16Nimosesenie, nkonyorere omwana omomura korwa asare, nimosesenie, abe ng’ina bw’ebisaku; na abaruoti b’abanto inabaiborwe korwa asare.”
17Erio Ibrahimu agatung’ama inse, agaseka, akabora ase omoyo oye ime, “Inee! Omonto ore nemiaka rigana nanyare koibora omwana?” Sara nere oyo ore nemiaka emerongo kianda aibore omwana? 18Ibrahimu agatebia Nyasae, “Koranche, Isumaeli abe moyo ase obosio bwao!”
19Nyasae akamokania, akamotebia, “Taibo, Sara mokao nakoiborere omwana omomura, na aye nomoroke Isaka. Inche ning’ikeranie nere okobwatana kwane kw’ogotianania, kobe okobwatana gwa kare na kare ase ororeria rwaye rorache korwa nyuma yaye. 20Ase amang’ana igoro ya Isumaeli nakoigure, rora, nimosesenie nimomentekanie mono, naibore abagambi ikomi na babere; ninkore egesaku ekenene kerue asare. 21Korende ning’ikeranie okobwatana kwane na Isaka, oyo Sara araibore ase engaki buna eye iga, ase omwaka ogocha.” 22Nyasae ekero akoorire gokwana na Ibrahimu, akairana korwa asare, akagenda.
23Erio Ibrahimu akabwata Isumaeli omwana oye, na abasomba aba baiboire ase enka yaye, na abagorwa chibesa, kera omonto omosacha ore ase abanto b’enka ya Ibrahimu, akabakeba risankwa ria isiko ri’ekiimo kiabo ki’obosacha, ase rituko riria riria, buna Nyasae amotebetie. 24Ibrahimu konya obeire nemiaka emerongo kianda, na kianda (99), ekero akebetwe, risankwa ria isiko ri’ekiimo kiaye ki’obosacha. 25Na Isumaeli, omwana oye, nigo konya abeire nemiaka ikomi, na etato, ekero akebetwe risankwa ria isiko ri’ekiimo kiaye ki’obosacha. 26Ase rituko erio erio Ibrahimu agasarwa amo na Isumaeli, omwana oye, 27na abanto bonsi baiboire ase enka yaye, na abagorwa chibesa korwa ase abanto ba isiko, bagasarwa amo nere.
လက္ရွိေရြးခ်ယ္ထားမွု
OMOCHANKO 17: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020