Halloo 31
31
Yaaqobi Labaan Waanee Maxxo
1Aroyee gubb Labaanichi anaami bushiisheenaꞌo “Yaaqobi no nihoo gijjoo bullin biich tuniitone. Ebi bi kiciti gaanno bulli no nihoochone” ii boonoshi yibbaatoon Yaaqobi waayehe. 2Wotta Labaani biin aafichoommon gaawe aafoona ciinni bi qayon digenehe.
3Arooba Doono Yeeri Yaaqobin “Ne nihoo showooch, ne xibeenaꞌo waan wotteree hambe. Ta neenna tookki tunemmo taane” iye.
4Ebich Yaaqobi bagoon bi quyeebeeti gaddooch boonoshi woyemmoyich, Raaheelinaa Liyinon ceekkiihe. 5Boonoshichoo ishichiye: “Ittoshi nihoo taan aafichoommon gaawe aafoona ciinni bi qayon ariito taane. Tunetaa ta nihoo Nuggishoo tayee baraanoone. 6Ta giidoon qoophaanoon, ittoshi nihoyich ta maddoon ariibeeto ittoshine. 7Tunebaani ta shumaayoyich aashire wottoon bi heciyoon shaddiibee taan dawushiye; tunetaa ta toommooch gonde mooyon bi deebemmoyich Yeeri daaggaanoone. 8Biyoo ‘Ne shumaayoo ta qoccemmo bureenaꞌoniye’ bi iyaa, bageenaꞌonaa emmisheenaꞌona bulloshi buroon shiyiheete. Biyoo wochiꞌi, ‘Ne shumaayoo ta qoccemmo koorechinaꞌoniye’ bi iyaa, bageenaꞌonaa emmisheenaꞌona bulloshi koorechon shiyiheete. 9Ebina Yeeri ittoshi nihoo gijjeenaꞌon tiijjii taach immiye.
10“Emmisheenaꞌo helliibeeti goorooch, shuggeebeeti emmishee baaddeenaꞌochi qeddo koorecho, buroonaa kushaakushoona bi tunoon gumona beeggeho. 11Yeerichi maraakoo gumona ‘Yaaqobo’ iye. Tawoo eekkeho. 12Taachoo ishichiye: ‘Emmisheenaꞌon shuggeebeeti emmishee baaddeenaꞌo bulli koorechinaꞌo, kushaakusheenaꞌonaa bureenaꞌona boonoshi tunoon ne aafoon kaachiree ciine. Ebi tuneto, Labaani ne toommooch bi tuniibeeto bullin ta beeggetoyichiye. 13Ne qoyaa qeyeti xaqqoon tiijjaa giimboochoommon neechaa, zayitoon huuttaꞌa ne mookketi, Beeteelaa neech bekketi Yeeri taane. And tiyi hini showoon gawukkiree, ne shiijjeti showooch wotte hambe’ itone” iye.#Hal. 28:18-22
14Raaheelinaa Liyina ishichii wochiyeete: “No nihoo gijjoochee nooch qoodoo woyee iristo amolla aalloone. 15Bi noon shiqqoon tuniiꞌiniye bi ciinniibeeto. Noon kemmii maatone. 16Yeeri no nihoo waanee tiijjii neech bi immiti gijjoo bulli noochonaa no bushiishoochonane. Ebich Yeeri neech gettito bullin tuniibe” iyeete.
17-18Ebich Yaaqobi Kanaanee showooch beeti bi nihoo Yisaaq waan hamma, bi bushiishoonaa bi mecheenaꞌonon gaaleenaꞌooch yebbiiꞌi, Mesopotaamee bi daneti qiico bullin yechii, wotta bi hajjiti miimonaa gijjoo bullinon aaf gashiiꞌi kichiye.
19Bi bageenaꞌo eexon cagga Labaani hammiichaa, Raaheeli bi nihoo terafimeenaꞌon#31:19 Ebi terafimo Labaaninaa bi kechi asheenaꞌona goyinneebeeti, ashoon shaahiitaa shuuneeti, shahalloone. gaajjahan. 20Yaaqobi bi abboo Araamee asho Labaanich getaanoon dawushiꞌi kechii maxxehe. 21Biicho tuneto bullin yechii hammiꞌi, Efiraaxisi aacon kimmii, Gilaadi geppe showoo waan qaxiriye.
Labaani Yaaqobin Yookkii Dabboo
22Yaaqobi kechii maxxoon Labaani keejjinnee qemooba waayehe. 23Ebich bi xibeenaꞌon yechiꞌi, shabaatte qemi gommon yookkii dabbiꞌi, geppe showoo Gilaad, bi beetooch shaggiye. 24Aroobee xum Yeeri Araamee asho Labaanina gumona daneꞌi ishichiye: “Ne qelloon ariibe! Yaaqobich deꞌoon tuneba gondoon, ikke mooyonona wochiyaahine” iye.
25Yaaqobi geppe showoo Gilaad bi duukkaanoon xogiꞌi bi beetaa, Labaani shaggiye. Labaaninaa bi xibeenaꞌona wotta arooch boonoshi duukkaanoon xogiyeete. 26Labaani Yaaqob waan hammii ishichiye: “Amoyich ebin tuniinne? Taan dawushihine. Ta maache bushiishoon ginoona keccetinaꞌoommon tuniyaꞌa gashehine. 27Amoyich aashaa kechaa maxxenne? Amoyich taan dawushinne? Taach ne getteto gaata, kamboonaa ximboonon gediree emiroonaa duubona neen deennesho toon taane? 28Ta maache bushiishoonaa boonoshi bushiishoonon shumi diggiiree ta deennemmoyich, amoyich bajjenne? Ebi ne shuuneti shuunoo tate shuunoo toonoone. 29Gonde mooyon ittoshi toommooch tuniyoon hakkesho ta ahaana, yiichi xum ne nihoo Nuggishoo gumona taanna daneꞌi, ‘Ne qelloon ariibe! Yaaqobich deꞌoon tuneba gondoon, ikke mooyonona wochiyaahine’ iye. 30Ebin ne tuniito, ne nihoo kexon ne sharaatetoyich bi tunoon ariibeeto taane. Tunebaani ta goyinnaabeeti, ta shahalleenaꞌon amoyich gaajjenne?” iye.
31Yaaqobiyoo Labaanich wochii ishichiye: “Ebin ta tuniito, ne maache bushiishoon bogiree echiyemmo taach ne shaahaa, shattaꞌaniye. 32Tunebaani no daggoochee ne shahalleenaꞌon gaajjito bi beegaata, qitibe. Neecho tuneti mooyo amolla ta waan bi danegaata, ebi no xibeenaꞌo aafoochaa qaawaa ne danegaata, daambe” iye. Ishin bi gettito, Raaheeli ebi shahalleenaꞌon gaajjaa bi deebon ariyaano bi tunetoyichiye.
33Labaaniyoo Yaaqobichi duukkaanooch, Liyichi duukkaanooch, ebiyoommon gutte gonneenaꞌochi duukkaanooch giyiye; tunebaani qaawii muccehe. Liyichi duukkaanoochee kechiꞌi, Raaheeli duukkaanooch giyiye. 34Raaheeliyoo ebi shahalleenaꞌon gaalee koree dechiich aachaachaa, aree toommooch kotahan. Labaani duukkaanoo bullin bosheꞌi amoonolla muccehe.
35Raaheeliyoo bi nihoon “Ta doonocho, neech tiyaa neexoon ta qajjetoyich, kaareyaahine. Dupphechi ta tunetoyichiye” iyan. Biyoo boshee qaawiye; tunebaani bi qaawitaanona, bi kechi asheenaꞌochi shahalleenaꞌon daneyaanoone.
36Arooba Yaaqobi oogeton ippee kaarehe; Labaaninoo ishichii ittibatehe: “Neen ta xuqqeto amoonane? Ebi shaahoon taan yookkaa ne dabbaabeeto, ta shuuneti axaaxoo amoone? 37Ta qiico bullin boshehine. Ishigaata, ne daneti, neecho tuneti mooyo aabine? Eke neennaa taannochi xibeenaꞌo aafooch ne giddiitaa nallibeete.
38“Hiye naton neenna tookkaa koteto taane. Ebichi daggooch ne bageenaꞌonaa ne emmisheenaꞌona shooraaneenaꞌone; ikke bagee baaddoonona bashaa maataano taane. 39Cooxo yechitonona qoccoani, bekkiyoyich meeshoon ne waan deebaa ariyaano taane. Areddoon tuneba xumoona gaacheto bullich qocoo maahine. 40Areddoon aabee sheelloona, xumoon aqqee googgoona yexxoye; tokketee shininnolla ta aafooch aalloone. 41Hiye naton ne kexooch ta koteto ebiyoommi beemonane. Aaraa awudde naton ne gutte bushiishoyicha iyaa neech maddeho; shiritte naton ne gijjeenaꞌoyicha iyaa neech maddeho. Ebichi toommooch ta shumaayoyich aashire wottoon ne heciyoon shaddihine. 42Ta nihinihoo Abrahaminaa ta nihoo Yisaaqina goyinneti Nuggishoo taanna tookkii toono bi gaata, shokke kishooniye taan ne deejjesho. Tunebaani Yeeri ta iriteyoonaa ta aayonon ciinniꞌi, yiichi xum neen kaarehe” iye.
Yaaqobinaa Labaanina Wogoon Gimo
43Labaaniyoo ishichiꞌi Yaaqobich wochiye: “Hinoshi ta maache bushiisheenaꞌone; hini nallefeenaꞌo ta nallefeenaꞌone; ebi gijjeenaꞌoo ta gijjeenaꞌone; ebi bekkeebeeto bulli taachone. Ishigaata, ebi ta maache bushiishoonaa boonoshi bushiishoonochi toommooch hanaach amoon halloon hakkehote? 44Eke ne waataa wogoon gibone. Ebi wogo neennaa taanna daggooch miixoo tunebe” iye.
45Ebich Yaaqobi xaqqoon tiijjiꞌi giimboochoommon neechiye. 46Aroochee bi xibeenaꞌon “Xaqqoon macibote” iye. Boonoshiyoo xaqqoon macii keciyeete. Ebi xaqqee kecee gaꞌooch koteꞌi maayoon maaheete. 47Labaaniyoo ebi xaqqoon, Yegaar Sahaduuti#31:47 Araamee noonoona “Yegaar Sahaduuti” geto, “Miixee gutoo” getone. ii shigiihe. Yaaqobiyoo wotta, Galeedi#31:47 Hibiree noonoona Galeedi geto, “Miixee gutoo” getone. ii shigiihe.
48Labaaniyoo “Ebi xaqqee keco neennaa taanna daggooch hanaach miixoone” iye. Ebichiye ebi xaaꞌoo Galeedi bi getteeto. 49Labaani daakkiꞌi ishichiye: “Barbaraꞌa no beehooba, Doono Yeeri neennaa taanna daggooch mooyo tiyaachemmoyich quyebe” iꞌi ebi are xaaꞌoon, “Mitsiphi” ii ceeggiye. 50Andoo daakkiꞌi ishichiye: “Ta maache bushiishoon ne xuꞌigaata woyee bare mecheen boonoshi toommooch ne shaagigaata, koniyoona no daggooch beemo qayigaatoona, Yeeri neenna taanna daggooch miixoo bi tunoon batteyaahine” iye.
51Aroochee Labaani Yaaqobich ishichiye: “Neennaa taanna daggooch beeti, ta keciti xaqqoonaa neexeti xaqqee giimboona ebeege! 52Ebi xaqqee kecoon besheree ne toommooch gondoon ta hallaachemmoyich, newoo wotta hini xaqqee kecoonaa xaqqee giimboonon besheree ta toommooch gondoon ne hallaachemmoyich, hini xaqqee kecoonaa hini xaqqee giimboona miixoone. 53Ne nihinihoo Abrahamichi Nuggishoonaa ta nihinihoo Nakoorichi Nuggishoona no gutti daggooch nallibe” iye.
Yaaqobiyoo bi nihoo Yisaaqi goyinneebeeti Nuggishoona wogehe. 54Guudi toommoochaa Yeerich deejjoon michii deejjiye. Bi xibeenaꞌo ebi meenonaa koshonon boonoshi maayemmoyich ataalliye. Boonoshiyoo boonoshi maatoyee gubb, are guudi toommooch qeyiyeete.
55Labaaniyoo maaddoona tiyiꞌi, bi maache bushiishoonaa boonoshi bushiishoonon shummii diiriye. Aroochee bi showooch wottee hammiye.
လက္ရွိေရြးခ်ယ္ထားမွု
Halloo 31: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.