Halloo 24
24
Yisaaqi Mecheen Shaago
1Doono Yeeriyoo Abrahamin bulli mooyona diiritone. Biyoo oogeton geenaa baayetone. 2-4Ikke areddoon Abrahami bi kexonaa bi gijjoo bullinochi ukkiroo tuneti, bi kexooch maddee yagiti bi gaddiretoon ceeggii ishichiye: “Hini and boonoshi daggooch ta beeti Kanaaneenaꞌochi maache bushiishoo daggoochee ta bushoyich mecheen shaakkiyaahine. Tunebaani ta showooch, ta xibeenaꞌo waan hamiree, ta bushoo Yisaaqich mecheen deebe. Ebin ne tuniyemmoyich, eke ne kishoon deebi ta doshee dechiich gediree,#24:2-4 Kishoon doshee dechiich gedo wogoon manjiyee malletoone. showoonaa shimaayoonochi Nuggishoo, Doono Yeerina wogebe” iye.
5Gaddiretoo “Diqqich bushee taanna tookkaa hini showooch waataache bi getigaata, ne bushoon wonna ne kechaꞌa waati showooch wochi daambote?” iye.
6Abrahamiyoo ishichiye: “Neen ariibe! Amolla tunetaa ta bushoon arooch wochi daammaahine. 7Ta nihoo kexoochee, ta shiijjee showoochee taan kichiti, ‘Hini showoon ne shiijjereenaꞌoyich immemmo taane’ ii wogee gibenikkiti shimaajji Nuggishoo Doono Yeeri, bi maraakoon ne aaf daachiyemmone; ta bushoyichoo mecheen aroochee deebemmo neene. 8Busheyoo ‘Neenna tookki hamaache’ bi getigaata, ebi neen ta wogiiti wogoochee shiweyemmo neene; tunebaani amolla tunetaa, ta bushoon are showooch wochi daammaahine” iye. 9Ebina gaddiretoo bi doono Abrahami doshee dechiich bi kishoon geddiꞌi ebi mooyoyich wogehe.
10Aroochee gaddiretoo bi doono Abrahami gaaleenaꞌoochee aashireenaꞌon kichiye; gaawi gaawe qiiceenaꞌo bullin xaaniꞌi, Mesopotaamee showooch beeti, Nakoori katemooch qaxiriye. 11Wohi gommon shaꞌee ebi showooch hammii shaggiꞌi, gaaleenaꞌon katemoyee maach beeti, aachi oppee gaꞌooch guteniihe; ebi saato showoo womikkeꞌi aabo aqqetaa, gennoo aacon kitoyich katemoochee boonoshi kechiibeeti saatoone.
12Aroochee uro ishichii corootiye: “Ta doono Abrahami Nuggishoo, Doono Yeero, hanaach ta gommon kaachibe. Ta doono Abrahamich ne shoodoon bekkiibe. 13And ta, hini aachi oppee gaꞌooch neexaabeeto taane. Katemeexi maache bushiisheenaꞌo aacon kitta hiniich waa beetinaꞌone. 14Illa ‘Ne qondoon kindiiree ebi aacoochee taach ne imaa uyona’ ta getaa, ‘Uye; ne gaaleenaꞌoyichoo wotta kiti uchemmi taane’ immi bushee, aree ne guuno Yisaaqich ne kaacceti tunebuye. Ebina ta doonoyich ne shoodoon ne bekkiyoon ariyemmo taane” iye.
15Uro batt ishin gettii ciichaan bi beetaa, Ribiqi qondoon bi gogooch shaaggaꞌa bekkech xepheriihan. Ribiqi Abrahami manoo Nakoori bi mechee Milik waanee bi shiyiti bi bushoo Batuꞌeeli busheene. 16Busheyoo oogeton mallet gaaweenaa batt shaakkeyaani gidiideenane. Aachi oppo beetooch kindiyan; aaconoo bi qondoona ceechaꞌa shaaggaa kechahan.
17Uro biinna daneya woccii hammiꞌi, “Ne qondoochee giisheche aacon taach ne imaa uyona” iye.
18Biyoo “Ta doonocho, uye” iyan. Afaafinoona aachi qondoon gaꞌiyaa aacoochee uchiyan.
19Uroo uchitoyee gubb, “Ne gaaleenaꞌoyich wotta boonoshi bulli michimmi wottoon, kiti uchemmi taane” iyan. 20Bekkech qondeexi aacon goonooch woniihan. Aroochee wochinnoon kitta aachi oppooch woccahan; ebina gaaleenaꞌo bulli uchii michimmi wottoon, aacon kittahan. 21Aacon bi kittaa beetaa, uro Doono Yeeri bi gommon kaachito bi tunoonaa tunee qayonon ariyoyich, minnakanna getaanoon, cikkii busheen manjii ciinnii beehe.
22Gaaleenaꞌo aacon uchii michitoyee gubb, uro sheqeelee qachi muddee aachoonaa gutte kishooch bi geddemmi aashire sheqeelee gutte ogooge aachee shagaamoonon bi deebiti qiicee daggoochee kichii biich immiye. 23Busheyichoo ishichiye: “Eke taach gete; koni bushee neene? Ne nihoo kexooch no qeyemmi xaaꞌoo danehe?” iye.
24Busheyoo wochaꞌa, “Nakoorichi bushoo Batuꞌeeli bushee taane; ta nihondeyoo Milikine. 25No kexooch gaaleenaꞌo maayemmi gaferoo#24:25 Gaferoo, gijjeenaꞌo maabeeti maayoone. beetone; wotta ittoshi qeyemmi xaaꞌoo beetone” iyan.
26Uro yittii Doono Yeerich goyinnehe; 27ishichiinoo iye: “Gibeneeto tuneꞌi bi shoodoon ta doono waanee wokkiyaani, ta doono Abrahami Nuggishoo, Doono Yeeri, galleteebe; taanoo ta doonochi xibeenaꞌo kexooch yaabiye” iye.
28Busheyoo kexooch woccaa shaggaꞌa, bi indeenaa arooch beetinaꞌonoyich ebi tuneti mooyo bullin gettahan. 29-30Ribiqich Labaani getteebeeti manoo beetone; biyoo bi manee geddeti muddeexi aachoonaa kisheexi aachee shagaamoonon bi beeggitoyich, wotta bi manee Ribiqi uro gettiton bi getaa bi waayetoyich, uro beetooch afaafinoona woccii hammiye. Uro aachi oppee gaꞌooch gaaleenaꞌona tookkii neexeꞌi bi beetaa danehe. 31Labaaniyoo uroyich ishichiye: “Haano, Doono Yeerina diireetocho, hach kexooch wobe. Amoyichiye hini maaxooch ne neexaabeeto? Tawoo ittoshi kashemmi xaaꞌoonaa gaaleenaꞌo qeyemmi xaaꞌoonon qanniito taane” iye.
32Ebich uro kexooch hammiꞌi giyiye. Gaaleenaꞌochi xaanoo biichehe; boonoshi maayemmi gaferoo ichehe. Uroonaa biinna tookkii beeti asheenaꞌonoyich baatee aaco giddehe. 33Aroochee maayo giddehe. Tunebaani uro “Ta waati mooyon getaanoon maataache” iye.
Labaaniyoo “Amo gaata gete” iye.
34Uroo ishichiye: “Ta, Abrahamichi gaddiretoo taane. 35Doono Yeeriyoo ta doonon oogeton diiritone; oogeti gaannoon biich immitone. Meeti bagoonaa emmishoonon, miimon, gaaleenaa kuroonon, birewoonaa aachoonon, guunonaa gonneenonoo immitone. 36Ta doonochi mechee, Saariyoo geenoochaa anaami bushoon ta doonoyich shiyetine. Ta doono biich beeto bullin ebi bi bushoyich immitone. 37Ta doonoo ishichii taan wogiihe: ‘Hini and boonoshi showooch ta beeti Kanaaneenaꞌochi maache bushiishoo daggoochee ta bushoyich mecheen shaakkiyaahine. 38Tunebaani ta nihoo kechi asheenaꞌo waan, ta xibeenaꞌo waan hamiree, ta bushoyich aroochee mecheen deebe’ iye.
39“Tawoo ta doonoyich ‘Diqqich bushee “Neenna tookki hamaache” bi getigaatoche?’ iyaa echeho.
40“Ta doono taach wochii ishichiye: ‘Bulli aaboon bi getoyich deꞌa ta iti Doono Yeeri bi maraakoon neenna tookki daachiyemmone; ne gommonoo neech kaachemmone; ta bushoyichoo ta xibeenaꞌo waanee, ta nihoo kexoochee mecheen deebemmo neene. 41Ta wogiiti wogoochee ne shiweyemmo, ta xibeenaꞌo waan hammaꞌa busheen ne qolletaa, imaachone ii boonoshi bayigaata baachiye’ iye.
42“Tawoo waa aachi oppo beetooch hanaach shaggaꞌa, ishichaa Doono Yeer waan corootiyo: ‘Ta doono Abrahamichi Nuggishoo, Doono Yeero, hanaach ta gommon kaachibe. 43And ta hini aachi oppee gaꞌooch neexaabeeto taane. Aacon kitta waabeeti gidiide busheen “Ne qondoochee giisheche aacon taach ne imaa uyona” ta getaa, 44areyoo “Uye; ne gaaleenaꞌoyichoo wotta kiti uchemmi taane” immi bushee, Doono Yeeri ne, ta doonochi bushoyich ne kaacceti tunebuye’ iyoye.
45“Tawoo ebin ta mulloona corootaabee ciichaan ta beetaa, Ribiqi qondoon bi gogooch shaaggaꞌa, waa aachi oppooch kindaa kittahane. Tawoo ‘Aacon taach ne imaa uyona’ iyoye.
46“Biyoo bekkech qondoon bi gogoochee kindiihane; ‘Uye; ne gaaleenaꞌoyichoo wotta kiti uchemmi taane’ iyane. Tawoo ucho; ta gaaleenaꞌoyichoo wotta kittaa uchiyan.
47“Aroochee ‘Koni bushee neene?’ iyaa echeho.
“Biyoo ‘Nakoorichi bushoo Batuꞌeeli bushee taane; ta nihondeyoo Milikine’ iyane.
“Ebich ta, bi muddooch aachoon, bi kishoochoo aachee shagaamoon geddoye. 48Aroochee yittaꞌa, Doono Yeerich goyinneho; ta doonochi xiboo busheen bi bushoyich ta daammemmoyich kaame gommon taach bekkiiꞌi, taan yaabiti Abrahamichi Nuggishoo, Doono Yeerin galletoye. 49Illa ta doonoyich gibeneeto tuneree, deꞌittinoon bekkiyemmo ittoshi tunegaata, ittoshi gaboon taach getote. Ebi tuno qayigaata, taach ittoshi getaa, ikke mooyon maacona” iye.
50Arooba Labaaninaa Batuꞌeelina ishichiyeete: “Hini mooyo Doono Yeer waanee bi tunetoyich, okk hach no gettemmi amolla aalloone. 51Ribiqi ebiyoche, yeshiree hambe. Doono Yeeri gettitoommon, ne doonochi bushoyich mechee tunebuye” iyeete.
52Abrahamichi gaddiretoo ishin bi waayehooba, yittii Doono Yeerich goyinnehe. 53Aroochee birewoonaa aachoonoochee shuuneeti shasheenaꞌon, tahoonoo kichii Ribiqich immiye; wotta aaxxe gatiyechi qiiceenaꞌon bi manoonaa bi indeenoyich immiye. 54Ebiyee gubb, uroonaa biinna tookkii beetinaꞌona maa uchiyeete; aroochee qeyiyeete.
Maaddoona boonoshi tiyitoyee gubb, uroo boonoshich, “Ta doono waan ta wottemmoyich, taan daaggi deenote” iye.
55Busheechi manoonaa indeena tiyiꞌi, “Bushee ikke aashire qeyi bedoonona noonna tookki beebuye; aroyee gubb hambuye” iyeete.
56Tunebaani uro “Doono Yeeri ta gommon kaachitone. Ebich taan yagiiyaahote. Ta doono waan ta hammemmoyich, daaggi deenote” iye.
57Boonoshiyoo “Busheen ceegiree bi noonoochee eche waayebone” iyeete. 58Ribiqin ceeggii deebiꞌi, “Hini uroona tookki and hammenne?” iyeete.
Biyoo “Eeha, and tookki hammemmi taane” iyan.
59Ebich boonoshi manee Ribiqin, bi dichindeen, wotta Abrahamichi gaddiretoonaa biinna tookkii beeti asheenaꞌonon boonoshi hammemmoyich deennii daachiiheete. 60Deenniibee Ribiqin ishichii diiriyeete:
“Haane no maneene,
humaa xumeenaꞌochi indeen tunebe.
Ne shiyemmi bushiishoochi shiijjereenaꞌo
boonoshi etteenaꞌochi katemeenaꞌon koyi yeshiree hajjibeete” iyeete.
61Ribiqinaa bi naayinaꞌona gaaleenaꞌon yebbeꞌi, uroon dabbii qaxiriyeete. Uroo Ribiqin yechii hammiye.
62Ebiyooba Yisaaqi, Lahayi Rooꞌi getteebeeti aachi oppo beetoochee waaꞌi, Negeebiye koteꞌi bi beeto. 63Biyoo showoo womikkee xumemmona, mooyon yexiibee gaddooch kechiye. Kaama ciinniꞌi, wohoochaa waabeeti gaaleenaꞌon beeggiye. 64Ribiqiyoo ebiyoommon kaama ciinnaꞌa, Yisaaqin beeggahan; gaalee toommoocheenoo kindiyan. 65Biyoo Abrahamichi gaddiretoon, “Noonna daneya okk ebi gaddoona waabeeto, konine?” iyan.
Uro “Ta doono Yisaaqine” iye. Ebich Ribiqi qoreddoon kichaa bi aafoon kaappahan.
66Aroochee uro bi tuniiti mooyo bullin Yisaaqich gettiye. 67Arooba Yisaaqi Ribiqin yechii bi indee Saari duukkaanooch giijjiye; biichoo mecheen tunehan; biinoo oogichii shunniye. Yisaaqiyoo bi indee qitaa bi muusheneti muushenoochee goggehe.
လက္ရွိေရြးခ်ယ္ထားမွု
Halloo 24: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.