Luke 24
24
Jisü ye Xüchilethuvae
1Apine tsalà atüghiu lo, inaqhe itheno totimiqo ye panongu no axokütsüngü kutò pe püakeu pesü akumoki lo wue. 2Panongu no akumoki lo atu tukulove aghí keu ithulu, 3ikemu kughou panongu no alou iloghi keno, panongu ye Ampeu Jisü sükumo ithumlae. 4Panongu no hipau ghenguno avehu izüqhiyi akelo paikhavi lono timi kini tsütsüpha toi yevüqai keu phimini pepu püzü panongu phivilo puthugho aghíe. 5Totimi pama ye msà kelau no pama gi ayeghi lo pishiqho pe ngove, ikemu timi hu no pama vilo pi, “Nongu ye kushiye kithimi gholo küxümi phu cheni kea? 6Pa ye hile kühae; pa ye xüchilethuvae! Pa no Galilee lo nongu gholo aphi lono kíshi nongu vilo pi keno kümsülulo: 7‘Timi Nu ye axinemiqo u lo phesüve tsü moayesae, pa ye yeda pìthíve no aküthüni ye xüchileputhuve nani.’ ” 8Tile no panongu no pa tsaqo kümsüchilelu.
9Kughou panongu no akumoki lono idechile ighi keno panongu no hipaqo kümtsü pesü akhopemi chighiqhaqhi eno kütamiqo kümtsü vilo pive. 10Tiye Mary Magdalene, Joanna, James pazá Mary eno kütami panongu gholo akemiqo no hipaqo pesü apostolmiqo vilo pike. 11Ikemu panongu ye totimiqo pülübemoe, kughengu totimiqo tsa ye panongu ghenguno akiqi küha ketoi kümsüve. 12Tishi akelo Peter ye ilheithu akumoki lo posü wuve. Pa no itsaqi no ju kelo phephei keu phì kushuwa likhi tile aghí, ike pa ye idewove eno kiu shive keno pa vehu izüqhiyi auve.
Emmaus Là lo che kelo
13Tipau tsalà lo mikini ye Emmaus ipikeu aphu lakhi lo wuche, tiye Jerusalem lono kilometer chighiqhaqhi qhalo ke. 14Pama ye lakhi no lakhi vilo kiu shive keno tipau ghili kümtsü pikile ghi che. 15Ike pama no hipaqo vehu pama dolo küptsa eno küsajekile ghi che kelo Jisü ampi no ighino pama gholo alà cheche wuve, 16ikemu pama pelo pa michilu pemo no cheke.
17Jisü no pama vilo iniju, “Nokujo ye alà che ghi kiu küptsa chenia?”
Pama ye agi khümüyi inaqhoi puthugho pe ngove. 18Pama dolo Cleopas ipikeu no Jisü vilo iniju, “Jerusalem xuju wu kemi dolo O likhi no ishi dolo tilau kiu shivea keno mtha no ani keo?
19“Kiu shivea kea?” ipi Jisü no iniju.
Pama no khochile, “Nazareth nó ghami Jisü ghili. Pa ye tungkupumi lakhi eno pa ye Alhou eno timi kümtsü zülo atsa eno akümlà lo akümzapu küká akemi ke. 20Achinetomi eno ninguw ayekipemiqo no pa pìthíve penike ikhiphe pe tsüve, eno panongu no pa yeda pìthíve; 21ikemu ningu ye Israelmi xaphe niye akeu ye pa ke ipi laju ake. Tinguno alau, tipaqo kümtsü shive keu hi atsala aküthüu shi anie. 22Hipau gholo niqomi totimi khami no ningu shikümsa püani. Panongu no isüna inaqhe itheno akumoki lo wu, 23ikemu panongu ye pa sükumo phumlave. Tisheno panongu no ideighi no ningu vilo pikeu ye panongu ye kungunhetsü lono kungumiqo ithulu püzü kungumi no pikeu ye, pa ye xü aphi ipi ke. 24Ike ni küsàmiqo khami no akumoki lo wuju kelo totimiqo no pikeu toi tishi aghíe, ikemu panongu ye Jisü ithumlae.”
25Jisü no panongu vilo pi, “Nongu ye kiutoi nikhanigha kea, eno tungkupumiqo no pikeu kümtsü lo pülübe nikeu lo nongu ye kiutoi akuchhoma shi kea! 26Messiah ye hipaqo kümtsü ime no pa juküvü lo ilo nikeu shike kumo keshea?” 27Tisheno pa no Moses lono huthu no tungkupumiqo no Kuchoyesü lo pa ghili kiu pipüani keno pesü chixechilei pama vilo pitsü.
28Pama no wuche keu aphu kupunúve kelo Jisü ye tinguno alau izüwu niye ake toi wuve. 29Ikemu pama no tsümomo pa lakha ghi pi, “Ningu gholo ngove lo kughengu itehi ye avelau shivea eno tsüzüveni chea ke.” Ikehu Jisü no pama gholo ngove nikeu shive.
30Kughou pama gholo alibe chu niye iqa keno Jisü no asho ikhilu eno shikimthi Alhou tsü no asho süpho püzü pesü pama tsüe. 31Tile no pama nhethi xukhove eno pama ye Jisü michiluve, ikelo Jisü ye pama nhekithe lono hauve. 32Pama no lakhi no lakhi vilo pi, “Kughou pa no alà lo nikujo pütsa eno Kuchoyesü lhepe nikujo pìye keno nikujo mlo lo lüvüi ighike kumo keshea?”
33Pama ye ilheithu no paikhavi Jerusalem lo idechile ighive. Ikelo tile panongu Chighiqhaqhi no panongu gholo akemi sasü kumqo no ishi pi aghí keu ithulu, 34“Hiye kuchoue! Ampeu ye xüithuvae eno Simon lau ipeghi pìyevae.” 35Ikehu pama no alà lo che kelo kiu shive eno Jisü no asho süpho ke lono pama ye kíshi Jisü michilu keno lhepe pìye.
Jisü no Akhopemiqo lau Ipeghi
36Pama no hipau ghili piaphi lono Jisü ampi no panongu gholo puthughove no panongu vilo pi, “Aloino keu nongu gholo apeniu.”
37Panongu ye aghawu ithulu ani küghashi kümsüve no kutuxoxo eno kichi-mamaive. 38Jisü no panongu vilo pi, “Nongu ye kushiye amlo küpüna ani kea, eno kushiye nongu kükümsü lo lipi ani kea? 39I u eno I pukhu julo. Hiye ni ke! I bu no julo; aghawu lakhi ye ashi eno aghì puchemoe, eno nongu no ithulu ake toi ni ye ashi eno aghì pù anie.”
40Pa no hi pive kethiu, pa u eno apukhu panongu pìye. 41Eno tishimu panongu no alokivi eno akümza kelau no pülübe müla no auve kelo pa no panongu vilo iniju, “Nongu ye hile kiuala chu kepu anima?” 42Panongu no ami no püghave keu akha aleqhi lakhi pa tsü, 43ike pa no tipau ikhilu no panongu nhekithe lono chuve.
44Pa no panoqo vilo pi, “I no nongu gholo aphi lono hipau nongu vilo pivae: Moses Yeza, Tungkupumi eno Lesheleqo lo I ghili yèpüa keu kümtsü shikupu moayesae.”
45Tisheno pa no panoqo pelo Kuchoyesü ithikuthulu penike panongu kükümsü khaqhi tsü. 46Pa no panoqo vilo pi, “Kiu yèpüani keno tiye hike: Messiah ye ime nani eno aküthüni ye akithí lono xüchilethuve nani, 47eno Jerusalem lono huthu no shiye kümtsü lau pa je lono amlo pebide eno axiné qhivetsü keu sütsa pesü asheshu nani. 48Nongu ye thime hipaqow thopimiqo ke. 49I pù no kiu piqhipüani keno I no nongu lau puwu nani. Ikemu nongu ye kunguu no aküka nongu shou ikughi moke kutólo mishighüna lo ngo aghílo.”
Jisü Kunguu Saikuve keu
50Kughou Jisü no panongu sasü Bethany kupunú lo wu keno, pa no pa u peqhe püzü panongu kümgha tsü. 51Pa no panongu kümgha tsü ghi panoqo qhive, eno pa ye kunguu saikuve. 52Tisheno panongu no pa müláe eno alokivi kijè lono Jerusalem lo idechile wove. 53Eno panongu ye tamo no Alhou sheqhe ghi achineki lo ngove.
လက္ရွိေရြးခ်ယ္ထားမွု
Luke 24: STB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.