Juɛl a pwɔdɛn tɛ Mak 6
6
1YECU kacɛn burɛ tɛ wɛni; ɔci Eke bɛnɛ banɛ ti; ɔci makɛ botɛn bɛnɛ i Eke. 2Tɛ ɣoŋ a wuwɛn bɛnɛ, Eke atɛ cinagog ji lotɛ ma: ɔci makɛ coŋɛn tiŋɛn Eke, punɛn, gɔkjɛn: Minɛ juɛl a nɛnɛ oowɛn ta aŋ? Minɛ nyingɛ tɛn a tɛn, juɛl a tolɛn nhijɛn Eke a ɔki? Ɔci wakɛ tolɛn naŋɛ tɛ biŋkɛ Eke, juɛl a nɛnɛ aginɛ? 3Nɛnɛ a minɛ gɔɔcɛ jangɛ, kacɛ Mari? ɔci modgɛ eken a Jakob ɔci Jocɛ ɔci Judat ɔci Caimon? ɔci kowɛ eken ballɛ ikin ti? Ma pɛdɛ tɛ Yecu. 4Ɔci Yecu gɔkjɛ: Ma ballɛ ɔntɔ yumgɛn a nyɔnkɛ tɛ minɛ a nebi. Ma ban ji ɔci ma eke yumgɛn aŋɛ nyɔn bɛ. 5Ɔci Yecu yakɛn ti tɛ naŋtɛ wakɛ tolɛn wɛni bɛ, dalɛ ma tabdɛ Eke tɛ biŋkɛ a diɛkɛn, aŋkɛ pɔŋnɛ eken tɛ wajɛ. 6Ɔci Yecu punɛn tɛ ma jithɛn bɛ.
Ɔci Yecu atɛ bote bunkɛ, ma laltɛn tɛ juɛl.
7Ɔci Eke bortɛ makɛ inyaken witkɛn ayo a nɛnɛ, ɔci noŋdɛ cwondɛ eken, otɛn ayo yakɛn; ɔci Eke noŋdɛ ma aŋkɛ yakɛn ti ɣitɛ jɔkɛn yayɛn; 8Eke gɔkjɛ ma ti, aŋkɛ eken wakɛ edɛ bɛ, kɔmnyɛ parɛ; am bawɛ, gijlan bawɛ, bilkɛ bawɛ tɛ jiɛb; 9ɔci Eke gɔkjɛ, wɛy yhaŋdɛ; buruŋ yhaŋdɛ ayo bɛ, yhɛŋdɛ a ciɛlɔ. 10Ɔci Eke gɔkjɛn: Kan ɣɛke kacɛn ɣora, cocɛ tɛ ɣon a nɛnɛ tɛ wun agdɛ bɛdɛn. 11Ɔci kan minɛ ballɛ jithɛ ɣɛke ti bɛ, ɔci tiŋdɛ bɛ, tɛ wun atɛn tɛra yɛptɛ ɔntɔ ta wɛy aŋkɛ ma gɔrcɛn ma yumgɛn bawɛ tɛ juɛl. 12Ɔci ma atɛ, ɔci ma myitkɛ tɛ juɛl a wiagɛ tha nɔjɛ. 13Ɔci jɔkɛn yayɛn yɛptɛn ɔntɔ a coŋɛn, ɔci makɛ wakɛn yɛyɛn liptɛ tɛ nyɔn, ɔci wakɛn pwɔnɛ dokɛ.
14Ɔci Melek Kerod tiŋɛn; yintɛ Minɛ nhijɛn ma dokɛ: ɔci eke gɔkjɛ: Jɔn minɛ noŋɛ baptaijɛ jɔŋɛn dɔkɛn ta wakɛn tunɛn, aŋkɛ eke yakɛn ti tɛ naŋkɛ wakɛ ɔŋ. 15Makɛ pokɛn gɔkjɛn: Eke a Ilaja. Ɔci makɛ pokɛn gɔkjɛn: Eke a nebi, ballɛ ba nebin wakɛnda. 16Ɔci tɛ Kerod tiŋɛn, gɔkjɛn: Eke a Jɔn, minɛ winyu taljɛn ya burɛ; eke dɔkɛn a ɣodɛ, jɔŋɛn dokɛ. 17Kerod eke da cwonɛ minɛ muŋɛ Jɔn, ɔci wiɛnɛ eke tɛ cigɛn ji. Kerodiat, eŋ mod eke Pilip, bwɔgɛ ɔŋ; Kerod dɛnɛ eke. 18Jɔn gɔkjɛn Kerod ti: I na dɛdɛ eŋ mod ɣɛke bɛ; ma na noŋkɛ ɔŋ bɛ. 19Aŋkɛ Kerodiat lonyɛ Jɔn ti, ɔci bwɔgɛ nhogdɛ eke; ɔci eke yakɛn ti nhogdɛ bɛ. 20Kerod bwɔyɛ Jɔn. Jɔn a minɛ yum bɔn a bɔn, ɔci nɔjɛ eke bawɛ, nhijɛn Kerod, aŋkɛ minɛ dulɛn ciyɛn. Tɛ Kerod tiŋɛn juɛl Jɔn, eke tokɛ juɛl, ɔci yum milkɛ tɛ juɛl. 21Ɔci tɛ ɣoŋ Kerod jienɛ megen, eke noŋɛ makɛ cigɔn eke wakɛ amtɛn, ɔci makɛ bimbaci atkan, ɔci makɛ cigɔn ban Galili ballɛ. 22Ɔci kacɛ Kerodiat a tɔla bɛnɛ ɔci wɛlɛ, aŋkɛ Kerod yum milkɛ tɛ wɛlɛ ɔci makɛ cocɛ eke ti yumgɛn milkɛ; 23Kerod gɔkjɛn tɔla ti: Tocɛ yɛ ti tɛ wakɛ tagdɛ i, ɔci ɣonnɛn tɛ i. Ɔci Kerod gɔkjɛn: Kan i bwɔgɛ noc ban ya, ɣonnɛn ya a warɛ. 24Ɔci tɔla atɛ megen ti, tocɛn: Ya tocɛ eke ti a ɔki? Ɔci megen gɔkjɛ: Tocɛ tɛ winyu Jɔn minɛ baptaijɛ. 25Ɔci eke dɔkɛn bɛnɛ Melek Kerod ti nɛ peny, ɔci tocɛ eke ti, gɔkjɛ: Ya bwɔgɛ winyu Jɔn minɛ baptaijɛ; ɣondɛ i tɛ cakan. 26Ɔci Melek Kerod yum yayɛn tɛ juɛl a nɛnɛ; dalɛ tɛ juɛl gwɔŋɛ eke a warɛ, ɔci tɛ makɛ tolɛn tiŋɛn, eke kɛkɛ tɔla bɛ. 27Aŋkɛ aca nɛntɛ Melek cwonɛn atkan, gɔkjɛ: Ɔgdɛ, winyu minɛ oowɛ: aŋkɛ eke atɛ cigɛn ji, minɛ winyu talɛn dokɛ, 28ɔci bɛnɛ ɛcɛn winyu tɛ cakan, ɣonnɛn tɛ minɛ tɔla; aŋkɛ ɣonnɛn tɛ megen. 29Tɛ makɛ botɛn Jɔn tiŋɛn, eken bɛnɛ, warɛ lulɛ, ɔci juŋnɛ kol ji.
30Ɔci makɛ mwuŋɛ Yecu ɔcɛn Eke ti; ɔci Eke myinɛn juɛl wakɛnda, tɛ wakɛ naŋdɛ eken, ɔci tɛ juɛl a laldɛ eken. 31Ɔci Yecu gɔkjɛn eken ti: Bɛdɛ ɣɛke pokɛn; ikin otin non a wuwɛ, aŋkɛ wutin parɛ. Ɣoŋkɛnda ma bɛnɛ a coŋɛn eken ti ɔci dɔkɛn, aŋkɛ non a cotɛn nɛ pwɔdɛn tɛ omɛn am ballɛ bɛ. 32Ɔci eken atɛn tɛ bum, atɛn ɔntɔ tɛ non a wuwɛ. 33Ma gɔrcɛn eken atɛn, ɔci eken yowɛrcɛ ma a coŋɛn, aŋkɛ ma kwɔnɛ yuŋɛn ta bunkɛ warɛda, ɔci dɛnjɛn tɛ nyamɔ. 34Yecu bɛnɛ ɔci gɔrcɛn ma ballɛ a coŋɛn a coŋɛn, ɔci yum pɔkɛ ma ti, ma ballɛ ba kulen dɔkɛn pokɛn, minɛ yuucɛ bawɛ; ɔci Yecu jɔcɛn tɛ laldɛn ma tɛ juɛl nɛ tolɛn. 35Ɔci tɛ ɣoŋ ɣocɛn, makɛ botɛn bɛnɛ Yecu ti, ɔci gɔkjɛn: Non a nɛnɛ a wuwɛ, ɔci ɣoŋ atɛ inyu; 36dalɛ ma odɛn ban ji, aŋkɛ eken odɛn lirtɛ wakɛ amtɛn. 37Yecu gɔkjɛn: Wakɛ amtɛn ɣonnɛn tɛ eken. Ɔci makɛ botɛn gɔkjɛn Yecu ti: Ɔn odɔn wɛrtɔn am tɛ gircɛ mir a intu mokɛ? aŋkɛ am ɣonnɔn tɛ eken. 38Yecu gɔkjɛn eken ti: Am kicra ballɛ aŋɛ yitɛn? ɔgdɛ gɔrtɛ. Ɔci tɛ eken bɛdɛn, gɔkjɛn: Am kicra ballɛ a dɔy ɔci yak ayo. 39Yecu gɔkjɛn: Dalɛ ma cocɛ inyu luɔm ti. 40Ɔci ma cocɛn; ma kɛptɛn jitɛn, maban a intu cocɛn a ciɛlɔ ɔci maban ayo cocɛn a ciɛlɔ, wakɛnda ɔŋ. 41Am luldɛn Yecu a intu, ɔci yak ayo; ɔci gɔrcɛn nyalɔ jitɛn, muortɛ Juɔŋ a Tolɛn ti, ɔci am wɛtɛn; ɔci ɣonnɛn tɛ makɛ botɛn aŋkɛ ɣonnɛn tɛ ma wakɛnda; ɔci yak ayo wɛnɛn tɛ ma wakɛnda. 42Ɔci ma omɛ wakɛnda ɔci munɛn. 43Ɔci ma limmɛ am dulɛn ma ɔci ɔden kwumjɛ inyakɛn witkɛn ayo; ɔci yoŋ yak wutɛ ballɛ. 44Ma omdɛ am a nɛnɛ a coŋɛn, wɔy ballɛ elp a dɔy.
45Ɔci aca nɛntɛ makɛ botɛn cwunɛn Yecu, kacɛn bumɛ ji ɔci atɛn kwɔca ban Betcaida Yecu nyamɔ ti. 46Yecu dulɛn ŋwoyɛ ti aŋkɛ ma odɛn Eke banɛ ti. Ɔci Yecu dulɛn ma, ma atɛn dokɛ. Eke atɛn pom ti muortɛ Juɔŋ a Tolɛn ti. 47Ɔci tɛ ɣoŋ lucɛn inyu bum ballɛ yicu thul ji, ɔci Yecu ballɛ burɛ tɛra ji parɛ. 48Ɔci Yecu gɔrcɛn ma bilɛn tɛ gɔpɛ piak, bum kɛkɛn jwɔm. Tɛ kɔkɛ lilkɔ Yecu bɛnɛ eken ti, atɛn nyalɔ piak witkɛn ti thul ji. 49Ɔci atɛ gutɛn eken ti, akɛ eken gɔrcɛn Yecu atɛn a wun thul ti, pukɛ Eke a juɔŋ, yaadɛn: Yecu gwɔlɛn wakɛnda ɔci ma yumgɛn yayɛn. 50Dalɛ Yecu nɛ peny gɔŋɛn eken ti, gɔkjɛn: Na bwɔidɛ bɛ, aginɛ Ya. Aŋkɛ ma yumgɛn aŋɛ nyɔnkɛ. 51Ɔci Eke atɛn kacɛn bumɛ ti ɔci jwɔm bawɛn dokɛ. Aŋkɛ ma punɛn nɛ tolɛn. 52Ma juɛl am yowɛrcɛn bɛ, yumgɛn dil dil.
53Tɛ eken atɛn kwɔca dokɛ, eken ballɛ Genejaret, tɛ thul dwɔŋɛ ti. 54Tɛ eken kacɛn ta bum Yecu yowɛrnɛn ma aca nɛntɛ; ɔci juɛl piyɛn non warɛda. 55Aŋkɛ ma tiŋɛn, ɔci kɛrcɛn makɛ wakɛn yɛyɛn tɛ aŋgen tɛ non a Yecu ballɛ. 56Ɔci tɛ ban a Yecu bɛdɛn ɔci tɛ non a burɛ Eke bɛdɛn, ma ɛktɛn makɛ wakɛ yɛyɛn tɛ non a dukan ji; akɛ nyiwɛ Yecu ti ɔci tupcɛn buruŋ Eke. Makɛ aŋkɛ tupcɛn Eke wakɛn pwɔnɛ wakɛnda dokɛ.
လက္ရွိေရြးခ်ယ္ထားမွု
Juɛl a pwɔdɛn tɛ Mak 6: MFZ1947
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First published by British and Foreign Bible Society in 1947.