Matiu 8
8
Yesu mopakaoha hadua tauna au ketangga
(Mrk. 1:40-45; Luk. 5:12-16)
1Pendauluna Yesu hangko i tongku-tongkuna, bosa tauna meula Iria. 2I tempo iti, maimi hadua tauna au ketangga#8:2 ketangga: Iami haki au melangaki. Moula atura agama Yahudi, tauna au kehaki ide barahe peisa menomba i Pue Ala i sou penombaa. molingkudu motumpa i lindona Yesu, nauli, “Pue, kuisa kaNubukuna mopakaohana. Ane Nupokana, pakaoha wongkoia!”
3Napetobomi Yesu tauna iti, Nauliangaa, “Kupokana. Maohamoko!” Tempo iti pea womi, maoha. 4Roo indo, nauli mbuli Yesu iria, “Inee nupopololita i hema pea apa au mewali inona. Laomoko hampai nupetudungia watamu i tadulako mpenomba bona naita kamaohamumi, hai nuantimi popenombamu moula parenta au teuki i lalu Aturana Musa bona tongawa i ope-ope tauna kamaohamumi.”
Yesu mopakaoha hadua hawina tadulakonda surodado to Roma
(Luk. 7:1-10; Yoh. 4:46-53)
5Pesuana Yesu i boea Kapernaum, hawemi hadua tadulakonda surodado to Roma mampohidupaa Yesu hai merapi tulungi, 6nauli, “Tua, hawingku rumihi kamahaina i sou. Maturu liliu pearai anti pantodihana.”
7Nauli Yesu, “Ina lao Kupakaoha.”
8Nahanai tadulako surodado iti, “Barana hintoto Nusondaki. Kehapiri hantepo pea lolitaMu Nuuli, hangangaa maoha hawingku. 9Kuisa Oio au makuasa mobabehi iti, lawi ide iko, ara wori au i wongkoku, hai ara worihe au kupohawaa. Ane rapana kupohawaa hadua surodado, kuuliangaa, ‘Laoko!’ hangangaa lao. Ane kukakio surodado au ntanina, ‘Maiko!’ hangangaa mai. Ane kuuliangaa hawingku, ‘Babehi iti!’ hangangaa nababehi. Nodo wori Oio Tua, apa au Nuuli inde, itimi au ina mewali i soungku.”
10Tingkarami Yesu mohadi lolitana tadulako surodado iti. Ido hai Napembalilingihe au meula Iria, Nauli, “Mahile mpuu pepoinalaina tauna ide! Kehapiri i to Isaraeli, bara mani ara hadua Kuhumba au mahile pepoinalaina nodo tauna ide au bara to Yahudi. 11Mewali bona niisa, i lalu poparentaNa Pue Ala, bosa tauna au barahe to Yahudi ina mewali taunaNa. Ina maihe hangko i humalele dunia, mohudahe hai maandehe matana-tana i lalu suruga hihimbela hai Burahima, Isaki hai Yako, toiorunda to Yahudi. 12Katouana, ketoYahudirihe au hintoto mewali taunana Pue Ala i lalu poparentaNa. Agaiana bosahe ina ratende i lalu kakaindiana au karao hangko i Pue Ala. Inditi, ina moteria hai mantodiha liliuhe.” 13Roo indo, nauli Yesu i tadulako surodado iti, “Mesulemoko, lawi apa au nupoinalai ina mewali.” Tempo iti, maoha mpuumi hawina au mahai i souna.
Yesu mopakaoha pengantina Peturu
(Mrk. 1:29-34; Luk. 4:38-41)
14Hambela tempo, Yesu lao i souna Peturu. Inditi, Ia moita pengantina Peturu au towawine maturu i paturuana lawi napawembe. 15Nakingkimi Yesu taiena towawine iti, liliu maoha. Hangko inditi, ia mearomi hai morora Yesu.
Yesu mopakaoha bosa tauna
16Kalumbami, bosa tauna mai i Yesu moanti ranganda hai halalunda au mahai hai au napesuangi seta. Yesu mampopeloho seta iti hai lolitaNa pea, hai tauna ntanina au mahai Napakaoha worihe. 17Ope-ope au nababehi Yesu ide mopabukeimi lolitana nabi Yesaya hangkoia au manguli,
“Iami au mohalea pantodihanta
hai mopakaoha hakinta.”#Yes. 53:4
Tauna au mampeinao meula i Yesu
(Luk. 9:57-62)
18Hambela tempo, bosa mpuu tauna motoleliki Yesu. KaNaitanda, Ia motudu topeguruNa mowetahe lao ntanda i orupena rano. 19I tempo iti, ara hadua guru agama to Yahudi au mai i Yesu, hai mololita nauli, “Guru, iumba pea kalaoaMu, kupeinao meula Irio!”
20Nahanai Yesu, Nauli, “Serigala ara kalolunda, hai tadasi ara haranda, agaiana Iko, Ana Manusia, bara ara sou au Kupaturui.”#8:20 Basa Yunani: ‘Serigala ara kalolunda, hai tadasi ara haranda, agaiana Ana Manusia bara ara sou au Napaturui’.
21Roo indo, ara wori hadua tauna au meula Iria au mouliangaa, “Pue, Nupaliuna hampai lao motawu umangku.”
22Agaiana nauli Yesu iria, “Meulako Iriko! Pogiangaahe tomate motawu hangka tomatenda!”#8:22 Pogiangaamide tomate motawu hangka tomatenda: Lempona, pogiangaamide tauna au mate pepoinalainda mokadipura urusianda i dunia ide.
Yesu mampopengkaroo angi mata
(Mrk. 4:35-41; Luk. 8:22-25)
23Hangko inditi, mesawimi Yesu i lalu duanga hihimbela hai topeguruNa, pane meangkamohe. 24Unga pea keangi mata au rumihi i rano, alana balumba morumpa duanganda. I tempo iti, Yesu tangana leta. 25Laohe topeguruNa morua Yesu, rauliangaa, “Pue! Tulungingkai! Ina marugike!”
26Nauliangaahe Yesu, “Moapari hai langakau? Ikamu ide makura gaga pepoinalaimi.” Mearomi Yesu, liliu mokambaroa himburu hai balumba i rano. Unga pea lene rano.
27Tingkara mpuuhe topeguruNa, rauli, “Hemari tauna ide! Mogalo himburu hai balumba moula hawaNa!”
Yesu mopakaoha rodua tauna au napesuangi seta
(Mrk. 5:1-20; Luk. 8:26-39)
28Kahawenda i tampo Gadara i hambali rano, teduumohe rodua tauna au napesuangi seta mampohidupaa Yesu. Ihira hangko i talumba lawi maida-idahe inditi. Tauna au rodua iti rumihi kakadakenda, ido hai barapi ara tauna au bai moliu inditi. 29Monganga-ngangahe seta au mampesuangi tauna iti, rauli, “Anana Pue Ala! Moapari hai maiKo? Ineengkai Nuhuku! Bara mani hawe tempona Nupakaparingkai.”
30Bara karao hangko inditi, arahe boe hambanguna tanganda masui. 31Seta au mampesuangihe tauna iti merapi i Yesu, rauli, “Ane hangangaa Nupopelohongkai hangko inde, Nutudungkai mesua i boe olouhe.”
32Nauli Yesu:, “Laomokau!” Meloho mpuumohe seta iti liliu mesua i boe. Melangkahe boe iti lao mengkanawo i rano pane matehe maliso.
33Karaitana tauna au mokampai boe iti apa au mewali i boenda hai apa au mewali i tauna au napesuangi seta iti, melangkamohe lao i boea mopahawe apa au mewali. 34Ido hai mokoloromohe mai ampu boea mampeinao mampohidupaa Yesu. Kamoitanda Yesu, merapihe bona Ia padu hangko i boeanda.
လက္ရွိေရြးခ်ယ္ထားမွု
Matiu 8: NPY
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ