1 Samuel 2
2
Ga'me lalac jañe'me Ana
1Qama'le Ana eetac da'me netamen:
«Jaliaĝanec, yataqata am 'ñonaĝachigui,
qa'a auadalaĝat joda'me 'yañaĝac.
Male jetapegalo gaa'me yaute'upi,
qa'a jayem alecochiya:
¡yataqata jayem matac!
2¡Qaya'te ta'le ja 'nalegue ta'le am ena'am, am Jaliaĝanec!
¡Qaya'te qo'mi nequepaĝatetelo'te ta'le am ena'am, am jo'ne am Qanedios!
¡Qaya'te ga'me etapega am napacalegue!
3'Noota ta'le qaya'te 'nonaĝatapela't,
'noota ta'le qaya'te etapega p'ajaye,
qa'a ñe'me Jaliaĝanec nach'eñe ñe'me Dios jo'ne yayaten ena'uac,
nataq'aen ñe'me naloqoten ga'me 'lonatac ga'me jiyaĝaua.
4Ñe'me qa'a yolaĝachiguilo gaa'me lechiquenal gaa'me p'ajodaye,
nataq'aen yanayelo da'me lañoqotaĝanaĝa'j gaa'me qaya'te 'lañaĝa'j.
5Gaa'me jo'ne 'uo ca'li ga'me ladeta'j,
nayi qama'te yiyaĝatedaque 'lonata'j.
Gaa'me jo'ne nach'e eta't da'me yoqoua't,
nayi qama'te ja yitaĝa yoqoua't.
Jaga'me yauo jo'ne ja yauana ta'le 'uo ga'me c'oĝot,
'viyelaqatalegue da'me nach'e eta't da'me c'oe.
Qalaĝaja jaga'me jalcote gaa'me c'oqo'tepi
male to'tejop.
6Ñe'me Jaliaĝanec qo'mi yanema da'me qanejiyaĝauayaĝac
nataq'aen da'me qo'mi yapalaĝa't;
qama'le en jaĝa'añgui jaga'me napa'l lae't
nataq'aen da'me en qa'niyelaĝajeguem.
7Ñe'me Jaliaĝanec en qo'mi choĝodache uotaĝa neuoyaĝadi;
en jouaqata'ñdi nataq'aen qo'mi yañidijeguem.
8Ñe'me Dios yañijeguem joga'me choĝodac,
yachiyoĝotaue joga'me lajoyiñe,
nataq'aen male navijeguem
joga'me jelaĝanaĝaic,
qaedi male yanauelo jogaa'me jiyaĝa'u jo'ne p'ajodaye.
»Qa'a ñe'me Jaliaĝanec loĝot ena'uac joga'me chiyoqochi'ña jena'me aleua,
qama'le joga'me yachalegue ena'uaque jogaa'me aleua laje'pi.
9Ñe'me Dios qa'a netela ga'me ladiquiyaĝa'j jogaa'me yataqatelo'te,
qalaĝaja jogaa'me qaleuaĝayaqa yeleudaue joga'me 'lalaĝa,
qa'a qaya'te ta'le domataĝan q'aen da'me mach'e 'lañaĝac.
10Ñe'me Jaliaĝanec yolaĝachiguilo jogaa'me laute'upi:
chiyoĝogue di'me piyem joda'me ne'uaĝa'ñalo jogaa'me.
Ñe'me Jaliaĝanec naloqoten yema joga'me aleua laje'pi;
yanem da'me lañoqotaĝanaĝac joga'me jaliaĝanec jo'ne mach'e liquiyac
nataq'aen en nichiquetaye da'me lañoqotaĝanaĝac.»
11Yem qama'le Elcaná 'viyelaĝague di'me 'lachaqa' jo'ne Ramá, qalaĝaja ñe'me notolec Samuel ue'tedi qa'a male t'onataĝaneuo'o ñe'me Jaliaĝanec, qaedi ñe'me tamenaĝaiqui lo'o Elí yapaĝaguen.
Gaa'me loeco jogaa'me c'oqo'te ñe'me Elí
12Gaa'me c'oqo'te ñe'me Elí yataqata qaleuaĝayaqa nataq'aen ja t'oidapega ñe'me Jaliaĝanec, 13uotaĝa gaa'me 'lonataĝanaĝaco nale gaa'me tamenaĝaiqui lo'ol. Qa'a nale 'uo ga'me ya'uo lajaqajec, qama'le paja'a yovi' ga'me lamaĝajec ga'me tamenaĝaiqui lo'o, lajoqot'a jaga'me jogaĝanaqate, qom maliaĝa qo'yetetac ga'me lapat, 14qama'le yejichiñigue jaga'me jogaĝanaqate jaga'me taĝaiqui. Ga'me naqachijeguem yanem nale ga'me tamenaĝaiqui lo'o: yema da'me naq'aeteque jogaa'me Israel laje'pi nale yovideta di'me Siló. 15Qom jona'li qoyegoue ga'me cheta ga'me najaqajec nale qoyeda'a ga'me nec'atonaĝala', paja'a yovidi't ga'me lamaĝajec ga'me tamenaĝaiqui lo'o qama'le enapega ga'me jo'ne ya'uo lajaqajec: «Jayem auanem ga'me lapat qaedi je'et ga'me lauoc ñe'me tamenaĝaiqui lo'o, qa'a ja yaconeguet ga'me lapat jo'ne joote dato, maq joga'me jona'li dato.» 16Qom ga'me jiyaĝaua 'yateguet: «'Uaeñe da'me qoyegoue ga'me cheta, yem qama'le yemta auacona joga'me,» qama'le ga'me namaĝajec 'yateguet joga'me: «¡Aja'y! Jayem auanem nayi: qom ja jayem 'te auanem, qama'le ch'e joĝotaĝanec qomle.» 17Qama'le naq'aeta ga'me loe'j jogaa'me nejo' da'me yauote yataqata ja no'en da'me yaloĝota ñe'me Jaliaĝanec, jouaĝat da'me ja yiyamaĝatetedac joga'me najaqajec jo'ne loĝot ñe'me Jaliaĝanec.
18Qalaĝaja ñe'me nejoqolec Samuel, jo'ne yatañe ga'me efod jo'ne degueja da'me 'lonaĝa,#2:18 Efod jo'ne degueja da'me 'lonaĝa: Louo jo'ne yatañe ca'li ga'me tamenaĝaiqui lo'o nale dajo'tot ñe'me Dios. qamqa'me queta da'me t'onataĝaneuo'o ñe'me Jaliaĝanec. 19Yemeda gaa'me 'uoidi nale jañe'me lat'e dajoyi ga'me Dios 'lemec, equegue ñe'me loua qaedi ya'uo joga'me lajaqajec jo'ne jalchi'ena ya'uo nale ga'me uo'e, yedo'ogue nale ga'me lapoto jo'ne en nalo'taguet jo'ne mach'e 'loĝonec. 20Qama'le ñe'me Elí netamelo'te ñe'me Elcaná chaqañe'me loua, eetac: «'Noota qom ñe'me Jaliaĝanec am yanem ga'me adajo'vi, am yanema ga'me ac'oqo'te jada'me jadojo' yauo, jouaĝat ga'me notolec jo'ne yanem jañe'me.»
Yem da'me dojo' qama'le 'viyelaĝategue ga'me 'lachaqa't.
21Qama'le ñe'me Jaliaĝanec yanem da'me leyalaqataĝanaĝac jañe'me Ana, qama'le jañe'me male qo'uaĝae. Male chiyaqa'ña da'me, jañe'me Ana uo'oe gaa'me tres c'oqo'te nataq'aen dos gaa'me c'oqotel. Ñe'me Samuel nichiquetajeguem, ue'tajop ñe'me Jaliaĝanec.
22Qama'le ñe'me Elí 'yaĝaicachigui ca'li, nataq'aen joote noma'a yema da'me ja no'en jo'ne yauote gaa'me c'oqo'te, da'me 'yeteque gaa'me Israel laje'pi, nataq'aen da'me leua'u nale gaa'me yauo' jo'ne 'uo ga'me 'lonata'j, ye't nale ga'me qotayape'uo ga'me nemaqa'. 23Qama'le enapegalo:
«Yema gaa'me jiyaĝadipi jayem qo'yaĝatem ga'me jo'ne ja no'en auauoyitac. ¿Toqoch'e naq'aeta? 24Ami yalaqa, yataqata ja 'noota da'me dojo'. Joote jayate'n gaa'me c'oqo'tepi di'me Israel queda'me ami qo'yaĝate'tape. 25Ga'me jiyaĝaua, qom yauo'oe gaa'me loeco jo'ne nautena ga'me laqaya, ñe'me Dios yaqanatet da'me yotauan ga'me jo'ne eja ga'me enaac. Qalaĝaja, qom 'uo ga'me ya'uo jo'ne nautena ñe'me Jaliaĝanec, ¿jach'e joga'me yaqanatet ta'le de'uolegue joga'me?»
Qalaĝaja joñaa'me ja yoqochideta da'me 'laqatac ñe'me let'a', qa'a ñe'me Jaliaĝanec joote en yem da'me yapalaĝa't da'me nejiyaĝauayaĝa'j.
26Qalaĝaja ñe'me Samuel nichiquetajeguem ca'li, yataqata onaĝaic ga'me ya'uo, qama'le ñe'me Jaliaĝanec choqoga'me jiyaĝadipi yataqata qo'yamaqaten joñe'me.
27'Uo jo'me nolo' novi' ga'me Dios 'laqatanaĝanaĝanec, dejapichiya ñe'me Elí, qama'le enaac:
«Ñe'me Jaliaĝanec ya'uo ga'me 'laqatac jo'ne enaac: “Ca'li gaa'me auachiyoĝogueta ueteda'a di'me Egipto, t'onataĝatedape'uo ñe'me faraón, qama'le yataqata di'yoq ga'me jaloĝoneque jogaa'me. 28Qama'le yemeda gaa'me c'oqo'te di'me Israel jen yiquiyaqa gaa'me auachiyoĝogueta, qaedi tamenaĝaiqui lo'ol, qaedi yauote ga'me lajaqaje'j, yachedalegue ga'me c'atonaĝala' jo'ne yoĝot, nataq'aen yeguedoue ga'me nemala' jo'ne jama ga'me laetayaĝac, nataq'aen yatedañe nale ga'me efod#2:28 Efod: louo jo'ne yatañe ca'li ga'me tamenaĝaiqui lo'o nale dajo'tot ñe'me Dios. Auec'aten Éxodo 28:1-4. nale jayem nec'adeta. Qama'le nach'e ena'am janema dia'me auachiyoĝogueta yema jogaa'me najaqajec jo'ne yeguedoue gaa'me Israel laje'pi nale jayem 'nonaĝachedigui. 29Qama'le da'me ami, ¿toqoch'e da'me ja aviyamaĝachetac jogaa'me najaqajec nataq'aen jogaa'me jayem qoyanema jo'ne jamajoĝolegue qaedi nach'e eta't qoya'uo? ¿Toqoch'e aue'n p'ajodaye gaa'me ac'oqo'te qama'le ja jayem 'te a'uetec, auen 'yaĝadayaqa jouaĝat joga'me onaĝaic lajaqaje'j gaa'me Israel laje'pi jo'ne mach'e yalaqapi?” 30Jouaĝat da'me dojo', ñe'me Jaliaĝanec jo'ne Nedios di'me Israel, jo'ne 'yaĝatetac ca'li queda'me am choqoga'me ac'oqo'tepi nach'e eta't da'me a'uonataĝañiuo'o, qalaĝaja nayi male am 'yaĝatem: “Male yem da'me dojo', qa'a 'ñonaĝachiguilo jogaa'me jayem 'nonaĝachedigui, qalaĝaja jogaa'me jayem 'yota'n male 'uo da'me ne'uenague'j. Jayem jo'ne Jaliaĝanec, mach'e 'yaqatac jo'ne yataqatelegue. 31Nadi'ta da'me laloqo' qomle male japalaĝat da'me te'me jen am p'ajaye choqoga'me ac'oqo'tepi, qama'le qaya'te ta'le yovita da'me 'yaĝaicachigui. 32Auana qomle qama'le am jaqachigui qomle da'me adachoĝodec, degueja qomle da'me adep'aguenataĝanaĝac ga'me jo'ne onaĝaic je'etema gaa'me Israel laje', nataq'aen qaya'te jogaa'me ac'oqo'tepi ta'le yovita da'me 'yaĝaicachigui. 33Qalaĝaja ja'uo qomle ga'me 'noquetac gaa'me ac'oqo'te jo'ne ue'ta ga'me c'atonaĝala' jo'ne mach'e yoĝot, qaedi 'uo ga'me lep'aguenataĝanaĝac ga'me jo'ne yauana, jouaĝat da'me yataqata yepita'a joga'me, nataq'aen yema jogaa'me ac'oqo'te qomle qa'a qoyala't. 34Qama'le ga'me qoyen 'nanec qaedi yataqata auayaten ga'me 'uo qomle: gaa'me ac'oqo'te, Hofní nataq'aen Finees: naa'me naajo' yemedaye ga'me nolo' da'me yele'u. 35Yem da'me dojo' qama'le ja'uo qomle ga'me tamenaĝaiqui lo'o jo'ne yataqatelegue nataq'aen ya'uo joga'me jepaquetapega. Nach'ega janem da'me nach'e eta't uo'oe gaa'me lolelaĝayaqa nataq'aen nach'e eta't da'me t'onataĝaneuo'o ga'me jaliaĝanec jo'ne mach'e yiquiyac. 36Qama'le joga'me 'noquetac ac'oqo'te male nec'ata, naĝa'ñijop joñe'me, qama'le yiyaĝane'uo ta'le qoyanem jaga'me laicaua uotaĝa pan lae, nachoĝodenot qaedi yanem joga'me en 'lonatac yanauelo gaa'me tamenaĝaiqui lo'ol qaedi yaqanatet ta'le nach'e eta't 'uo joga'me yali'j.”»
လက္ရွိေရြးခ်ယ္ထားမွု
1 Samuel 2: TDO
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en Toba del Oeste © Sociedad Bíblica Argentina, 2014, 2019.