Ubwandilo 3
3
Ulukịlanịo lwa mụ̄ndu
1Lelo īnjoka jo jākindilị̄le ubukomụ mfịnyamāna fyosa ifị UNTWA Kyala āpelịle. Jilinkunndālūsya unkị̄kulu jilinkuti; ngīmba sya nalolị ukuti Kyala atịle mụngalyaga iseke sya mịpị̄kị gyosa igya mụnngūnda? 2Umwene unkị̄kulu alinkwamụla alinkuti; tubagịle ukulya iseke sya mipịkị gyosa igya mụnngūnda. 3Lolị iseke isya mpịkị ugu guli pakati na pakati pa nngūnda syo Kyala atịle mụngalyaga, nukupalamāsya mụngasipalamāsyaga, bāti linga tulị̄le twịsakufwa. 4Ijēne injoka jilinkummbūla unkị̄kulu jilinkuti, nakamo mụtịsakufwa nalolị. 5Umwene Kyala amēnye ukuti linga mụlị̄le, amāso gīnụ gịsakwịguka, mwịsakujaga bo ju Kyala ukusịmanya inụnụ ni mbị̄bị. 6Lelo bo unkị̄kulu agubwene umpị̄kị ukuja nnụnụ nukuja gwa seke inụnụ syakulya kangi gụkunkyela pakugukēta, nukuti gwabagị̄le ukumpa umụ̄ndu amahala, po papo alinkutūngula sịmo iseke alinkulya alinkumpapo sịmo na ju nndume; jōpe alinkulya. 7Lelo bo balị̄le amāso gābo bo babīli galinkwịguka, balinkwịmanya ukuti bakafwala nafịmo balinkusonania amānị ga nkuju go galinkuja sānja sya kufwala.
8Po papo balinkupilika unndị̄ndo gwa NTWA Kyala bo ịkwenda mụnngūnda nkabalilo kā majolo bo ilịsuba lipepịle; po papo Atamụ nu nkasị balinkwịbīlila mmịpịkị gya mụnngūnda ukuti Kyala angababona. 9Umwene UNTWA Kyala alinkukōlela alinkuti, Atamụ, uli kūgu? 10Umwene alinkuti, mbilị̄ke ilịsyu lyako bo kwenda mụnngūnda lelo nātị̄laga, papo nndi ịtolo; po ndinkwenda nukwịbīlila. 11Po papo UNTWA alinkunndālūsya alinkuti: Jwanị akubūlịle ukuti uli ịtolo? Kingamo ulị̄le īseke sya mpịkị isị nakukānị̄sye ukuti ungalyaga? 12Atamụ alinkwamụla alinkuti: Unkị̄kulu uju gwalīmbēle ukuti ajege mwịnāngu, jo āmbēle īseke sya mpịkị nndị̄le. 13Po papo UNTWA Kyala alinkunndālūsya unkị̄kulu alinkuti: Gwandịle bule bule ukubōmba sịsịsị? Unkị̄kulu alinkwamụla alinkuti: Īnjoka jīsyobịle, po papo nēndịle nukulya.
Kyala ịkusōsya ulufụ̄ndo
14Po papo lelo UNTWA Kyala alinkujibūla īnjoka alinkuti. Papo ubōmbịle sịsịsị, po ugụnị̄gwe ukufịkīnda ifịnyamāna fyosa ifị fịkuswiligwa ni fịnyamāna fyosa ifya nndị̄su; lilino kwendelaga ulwanda, kangi mbūmị bwako bōsa kulyaga lu lufụ̄mbi. 15Nịkubikaga ikilugu pakati pamyako nu nkị̄kulu, na pakati pa lujụ̄ngụ lwako nu lujụ̄ngụ lwake; ịsakukūtajanịaga untu ugwe kwịsakuntịpulaga ikitēnde. 16Umwene unkị̄kulu alinkummbūla alinkuti; Kwịsakutamịgwaga pakupāpa abāna, kwisakupāpilaga mbutolwe kangi ubwịgane bwako bwịsakulabilaga kunndumego, umwene jo ị̄sakukulāmbikaga. 17Jope Atamụ alinkummbūla alinkuti: Papo ukōngịle isyankasịgo, ulị̄le īseke sya mpịkị, ugu nakukānị̄sye ukuti, ungalyaga, umfụ gugụnị̄gwe pa nōngwa jāko, mbūmị bwako bōsa ifyakulya kwịsakulīlaga mmafụkụ. 18Umfụ gwịsakukumekesyaga imị̄fwa ni mịtulatula: kangi kwịsakulyaga ifị fịkumela nndị̄su. 19Kwịsakulyaga ifị̄ndu ku mafụkụ ukwịsakufịka papo kwịsakugomokelega mụmfụ mụno gwalyegịgwe namanga gwapelị̄gwe ukufụma mụmfụ, ugwe uli lufụ̄mbi. Kulufụ̄mbi ko gwịsakugomokelaga.
20Po papo Atamụ alinkumpa unkasị īngamụ ja Efa, papo umwene āli jo nna gwa bāndu bōsa abūmị. 21UNTWA Kyala alinkubatendekekesya ba Atamụ nu nkasị imyenda gya fịgubo, gyo alinkubafwika.
Atamụ na Efa bịkusōsịgwamo mụ nngūnda
22Po papo UNTWA Kyala alinkujoba alinkuti: Apa lilino umụ̄ndu afwene na nụswe, ukusịmanya inụnụ ni mbị̄bị, lumo pamo ịsakugolosya ikiboko kyake ukutūngula īseke sya mpịkị gwa būmị, ukuti alye nāpō ēnde nukuja nu būmị bwa bwịla; 23Po papo UNTWA Kyala alinkunsōsyamo umụ̄ndu mụnngūnda gwa Etenị ukuti akalimege mụmfụ ugu āfụmịlemo. 24Umụ̄ndu alinkunkagila kulubafụ lwa kubusōkelo bwa nngūnda gwa Etenị, alinkubabikako abakelubu nulūbo lwa mōto ulu lụkugalabuka kōsa kōsa ukulindilila injila ja kubūkila kumpịkị gwa būmị.
လက္ရွိေရြးခ်ယ္ထားမွု
Ubwandilo 3: NYB96
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nyakyusa Bible © Bible Society of Tanzania, 1996.