Malɨka 16
16
Kusyʉka kwa Yesu
(Mataayi 28:1-8; Lʉʉka 24:1-12; Yohani 20:1-10)
1Pakɨvwilile ye jɨsilile ɨSabati, ʉMaliya ʉmhʉma mʉ lɨkaaja ɨlya Magidala, ʉSalome nʉ Maliya ʉngʼina ghwa Yakovo, vakaghʉla amafuta amanono kuuti vakaghʉpake ʉmʼbɨlɨ ghwa Yesu. 2Ɨkɨghono ɨkya kwasia mʉ mʉlʉngʉ,#16:2 Ɨkɨghono ɨkya kwasia mʉ mʉlʉngʉ: Ɨkɨ kyale kɨghono kya Nywabaaha. palwakɨlo ɨlɨjʉva ye lidibula, vakalʉta kʉ mbiipa. 3Ye valɨ mʉ sɨla, vakijovasyagha veene viiti, “Veeni jʉno kyaɨkʉtʉvʉsɨkɨsia ɨlɨvue lɨla pa mʉlyango ghwa mbiipa?” 4Ɨlɨvue lyale lɨkome kyongo. Ye vafikile, vakavona ɨlɨvue lɨbɨlʉsivue.
5Vakingila mʉ mbiipa, ʉmuo vakamwagha ʉnsoleka afwalile ʉmwenda ʉmʼbalafu, ikalile ʉlʉbale lwa kʉndio, pe vakakenyemʉka kyongo.
6Ʉmwene ʉnsoleka ʉjuo akavavʉʉla akati, “Namʉngakenyemʉkaghe. Mʉkʉmʉlonda ʉYesu ʉghwa kʉ Nasaleti jʉno akakomelilue pa kɨkovekano? Asyʉkile, napwale apa! Lola pano vakamʼbɨkile. 7Mʉlʉte mʉvavʉʉle avavʉlanɨsɨvua vaake, kyongo ʉPeteli kuuti, alongwile kʉ Galilaya. Ʉkuo mulʉta mʉkʉmʼbona ndavʉle alyavavʉlile.”
8Ye vapʉliike isio, vakadegha na kutetema, vakahʉma kʉnji, vakavʉʉka pa mbiipa vikɨmbɨla. Navakapanga kwa muunhu ʉlwakʉva vakava vikwoghopa.
ɄYesu ikuhʉfia kwa Maliya ʉmhʉma mʉ lɨkaaja ɨlya Magidala
(Mataayi 28:9-10; Yohani 20:11-18)
9ɄYesu ye asyʉkile palwakɨlo ɨkɨghono ɨkya kwasia mʉ mʉlʉngʉ, akihʉfia taasi kwa Maliya ʉmhʉma mʉ lɨkaaja ɨlya Magidala, jʉno alyamʼbʉsisie amapepo lekelalʉbale. 10ɄMaliya akalʉta kʉkʉvapangɨla vano vakamʼbɨngɨlɨlagha ʉYesu, ʉnsiki ʉghuo vakajiighe vasukuniile, vilɨla ɨfua. 11Ye vapʉliike kwa Maliya kuuti ʉYesu mwʉmi, kange amʼbwene, navakɨtɨka.
ɄYesu ikuhʉfia kʉ vavʉlanɨsɨvua vaake vavɨlɨ
(Lʉʉka 24:13-35)
12Pambele, ʉYesu akihʉfia kʉ vavʉlanɨsɨvua vavɨlɨ mʉ kɨhwani ɨkɨngɨ. Avavʉlanɨsɨvua avuo valyahʉmile kʉ Yelusalemu, vakalʉtagha kʉ kɨkaaja ɨkya pa vʉpiipi. 13Voope vakalʉta vakavapangɨla avajanave, poope navakɨtɨka.
ɄYesu isuungʼha avavʉlanɨsɨvua vaake
(Mataayi 28:16-20; Lʉʉka 24:36-49; Yohani 20:19-23; Mbombo sa Vasungʼhua 1:6-8)
14Kange, ʉYesu akihʉfia kʉ vavʉlanɨsɨvua kɨjigho na jʉmo, ʉnsiki ʉghuo vakava vilia. Akavadalɨkɨla, ʉlwakʉva valyale vasiiti kukwɨtɨka ʉvwolesi vwa vano valyamʼbwene ye asyʉkile.
15Pepano ʉYesu akavalaghɨla avavʉlanɨsɨvua vaake akati, “Mʉlʉtaghe mʉ ɨɨsi jooni mʉpʉlɨsyaghe ɨMhola ɨNofu kʉ vaanhu vooni. 16Jʉno ikwɨtɨka na kukwofughua, ʉjuo alakuluka. Neke jʉno naikwɨtɨka, alahɨghua. 17Kange, vano vɨtiike vivombagha ifidegho ifi: Mʉ lɨtavua lyango vidagagha amapepo, kange vijovagha mʉ njovele ɨmhia. 18Vangakole ɨnjoka, nambe vanganyue ɨnyambɨkɨla, navangafue. Kange, vivɨkagha amavoko ghaave pa vatamu, avatamu visokagha.”
ɄYesu itolua kulʉta kʉkyanya
(Lʉʉka 24:50-53; Mbombo sa Vasungʼhua 1:9-11)
19ɄMʉtwa ʉYesu ye ajovile navo, pe akatolua kulʉta kʉkyanya, akava nʉ vʉtavʉlɨlua palɨkɨmo nʉ Ngʉlʉve. 20Pepano avavʉlanɨsɨvua vaake vakalʉtagha kupʉlɨsia kwoni ɨMhola ɨNofu. ɄMʉtwa akavombagha ɨmbombo palɨkɨmo na veene, akavapelagha ingʉfu isa kʉvomba ifidegho fino fyale fivalɨlo kuhʉfia kuuti, ɨMhola ɨNofu jɨno vipʉlɨsia ja kyangʼhaani.#16:9-20 Amasio agha namweghale mʉ fitabu fimonga ifikʉʉlʉ.
လက္ရွိေရြးခ်ယ္ထားမွု
Malɨka 16: wbi
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.