Malɨka 15
15
ɄYesu ihɨghua kwa ntwa ʉPilato
(Mataayi 27:1-2, 11-14; Lʉʉka 23:1-5; Yohani 18:28-38)
1Palwakɨlo ye kʉkiile, avavaha va vatekesi, avavʉlanɨsi va ndaghɨlo palɨkɨmo na vagojo, vakapʉlɨngʼhana. Vakankʉnga ʉYesu, vakantwala kwa ntwa ʉPilato#15:1 Ntwa ʉPilato: Alyale ntwa ghwa Kɨlooma mʉ kɨghavo ɨkya Yudea. kuuti ahɨghue. 2ɄPilato akamposia ʉYesu akati, “Asi, ʉve veeve Ntwa ghwa Vayahudi?” ɄYesu akamwamʉla akati, “Ʉve ʉjovile.”
3Avavaha va vatekesi vakava vifikwoleka si nyinga isa kʉmpelela ʉYesu ahɨghue. 4ɄPilato pe akamposia kange akati, “Kɨki naghukwamʉla lʉmonga? Lolagha, avaanhu ava vʉle vijova si nyinga isa kʉkʉhɨgha.” 5ɄYesu naalyamwile kɨmonga. Apuo ʉPilato akadegha.
Ʉntwa ʉPilato ɨkʉvaposia kuuti avadindulile veeni
(Mataayi 27:15-21; Lʉʉka 23:18-19; Yohani 18:39-40)
6Lwale lwiho kwa ntwa pa kyɨmɨke ɨkya Pasaka, kʉkʉnʼdindulila ʉnkʉngua jʉmo jʉno avaanhu vasʉmile. 7Kwealyale ʉnkʉngua jʉmonga jʉno akatambʉlwagha Balaba. Ʉmuunhu ʉjuo alyakʉngilue palɨkɨmo na vaanhu avange, ʉlwakʉva valyavombile ʉvʉgalʉsi na kubuda. 8Avaanhu vano valyakongʼhanile vakava vilʉta kwa Pilato kusʉʉma kuuti, avavombele ndavʉle lwale lwiho lwake pa kyɨmɨke ɨkya Pasaka.
9ɄPilato akavaposia akati, “Mulonda nɨvadindulile ʉNtwa ghwa Vayahudi?” 10ɄPilato alyavaposisie ʉluo, ʉlwakʉva alyakagwile kuuti, avavaha va vatekesi valyale nɨ kɨvini nʉ Yesu, fye nambe valyantwalile kwa mwene ahɨghue. 11Neke avavaha va vatekesi valyavafundile avaanhu vooni kuuti, vansʉʉme ʉPilato avadindulile ʉBalaba.
ɄYesu ihɨghua kuuti abudue
(Mataayi 27:22-26; Lʉʉka 23:20-25; Yohani 19:1-16)
12Avaanhu vala ye vansʉmile, ʉPilato akavaposia kange akati, “Ʉmuunhu ʉjʉ jʉno mwiti ghwe Ntwa ghwa Vayahudi, nɨmʼbombe kɨki?” 13Avaanhu vooni vakoova vakati, “Ʉnkomelele pa kɨkovekano!” 14ɄPilato akavaposia kange akati, “Ʉmuunhu ʉjʉ avombile lʉviivi lʉki?” Aveene vakaghina kukwova viiti, “Ʉnkomelele pa kɨkovekano!”
15ɄPilato akanʼdindulila ʉBalaba, ʉlwakʉva akalondagha pikʉlɨhovosia ɨlɨpʉgha lya vaanhu. Pe akalaghɨla kuuti ʉYesu akopue ni mijeledi, kyande akopilue, akomelelue pa kɨkovekano.
Avasikali vikʉnnenela ʉYesu
(Mataayi 27:27-31; Yohani 19:2-3)
16Avasikali vakantwala ʉYesu mʉ lʉvɨɨka lwa nyumba ja ntwa, pe avasikali vooni vakakongʼhaana. 17Vakamfwasia ɨsopeka ɨndangali ɨja kɨtwa, vakatenda ɨngeela ɨja mifua, neke vakamfwɨka kʉ mutu. 18Vakatengʉla kʉkʉmhʉngɨla ni mbedo viiti, “Kamwene ghwe Ntwa ghwa Vayahudi!” 19Vakava vikʉntova kʉ mutu nɨ lɨlaasi na kʉkʉmfunyila amati. Kange, vakafughamagha pa Yesu na kʉkʉmwinamɨla ni mbedo. 20Ye vamʼbedile na kʉkʉnnenela, vakamfuula ɨsopeka jɨla, vakamfwasia amenda ghaake, pe vakamhʉmia kʉnji, vilʉta kʉkʉnkomelela pa kɨkovekano.
ɄYesu ikomelelua pa kɨkovekano
(Mataayi 27:32-44; Lʉʉka 23:26-43; Yohani 19:17-27)
21Ye valɨ mʉ sɨla, vakatangʼhana nʉ muunhu jʉmonga jʉno akatambʉlwagha Simoni, ʉmhʉma mʉ lɨkaaja ɨlya Kileene, ikwingila mʉ Yelusalemu. ɄSimoni ʉjuo alyale viise ghwa Alekisanda nʉ Lufo. Avasikali vakamwʉmɨlɨsia kupɨnda ɨkɨkovekano kya Yesu. 22Pe vakantwala ʉYesu pano pakatambʉlwagha Goligota, kwekʉti, Lɨngʼala lya Mutu. 23Ye vafikile, vakampeela ʉlʉhʉʉje ʉlʉhasɨngʼhanie nʉ nkota ʉghwa kʉsilisia ʉvʉvafi, ʉmwene akasiita kunyua. 24Apuo vakankomelela ʉYesu pa kɨkovekano. Pe vakaghavana amenda ghaake mʉ sɨla ja lʉsodolelo, kuuti nʉjʉnge atoole ghʉlɨku.
25Ye vikʉnkomelela ʉYesu, ghwale nsiki ghwa kavalɨlo kya vʉtatu palwakɨlo. 26Pakyanya pa kɨkovekano vakakomelela ɨkɨtapa kɨno valyalembile amasio agha, “ɄJɄ GHWE NTWA GHWA VAYAHUDI,” kuvonia ʉnkole ghʉno valyamʼbalile. 27Palɨkɨmo nʉ mwene, valyavakomeliile avaanhu avange vavɨlɨ vano valyale vahɨjivabudi, jʉmonga akava ʉlʉbale ʉlwa kʉndio, ʉjʉnge kʉngʼhɨghɨ. 28Apuo silyavoniike sino silembilue mʉ Malembe aMɨmɨke kuuti, “Alyavalilue palɨkɨmo na vahosi.”#15:28 Akadebe aka namwekale mʉ fitabu fimonga ifikʉʉlʉ. #Yesaya 53:12
29Avaanhu vano vakava vikila na kʉkʉmwagha ʉYesu pa kɨkovekano, vakasukaniagha amatu ghaave vikʉmʉligha, viiti, “Ʉve ghwe jʉno ghwatisagha ghulimemʉla ɨnyumba ɨnyɨmɨke ɨja Ngʉlʉve na kujenga mʉ fighono fitatu, 30ika lɨno pa kɨkovekano ghupoke!”
31Voope avavaha va vatekesi na vavʉlanɨsi va ndaghɨlo vakamwovelelagha vakatisagha, “Avapokagha avange, neke ikunua kukupoka mwene! 32Nave ghwe Kɨlɨsite, ʉNtwa ghwa Vaisilaeli, lɨno iike pa kɨkovekano, tʉlole neke twɨtɨke.” Voope vano vakakomelilue palɨkɨmo nʉ mwene vakava vikʉmʉligha.
ɄYesu ifua pa kɨkovekano
(Mataayi 27:45-56; Lʉʉka 23:44-49; Yohani 19:28-30)
33Ye ghʉfikile ʉnsiki ghwa kavalɨlo aka ntanda pamwisi, ɨngʼhiisi jɨkakupikila ɨɨsi jooni kuhanga kufika akavalɨlo aka budikalʉbale. 34Ʉnsiki ghwa kavalɨlo aka budikalʉbale, ʉYesu akakoola fiijo akati, “Eloi, Eloi, lama sabakitani?” Kwekʉti, “Ngʉlʉve ghwango, Ngʉlʉve ghwango, ongo ʉndekile?”#Sabuli 22:1
35Vamo nkate mʉ vano pwevalyale pala, ye vapʉliike ʉluo, vakati, “Pʉlɨkɨsia! Ɨkʉnkemeela ʉmʼbɨli ʉEliya!”#15:35 Ɨkʉnkemeela ʉmʼbɨli ʉEliya: ɄEliya ijovua apa ʉlwakʉva aVayahudi vinga valyale viiti ʉEliya naalyafwile. Ʉlwene ʉNgʉlʉve alyantolile mʉ ɨɨsi ye ajiighe mwʉmi, akalʉta naghwope kʉkyanya. Kange, valyale vihʉvɨɨla kuuti ʉEliya ilikwisa kange mʉ ɨɨsi (2 Vatwa 2:11; Malaki 4:5).
36Ʉmuunhu jʉmonga akalʉta lʉvɨlo, akasuvika ɨkyenda mʉ lʉhʉʉje ʉlʉkali, akakɨvɨɨka mʉ lʉlaasi, akamʼbesekesia ʉYesu pa mʉlomo kuuti amiime, akati, “Leka tʉlole, nave ʉEliya ikwisa kʉkʉmwisia pa kɨkovekano!”
37ɄYesu akakoola fiijo, akakʉngʉka. 38Ʉnsiki ghʉghuo ʉmwenda#15:38 Ʉmwenda: Ʉmwenda ʉghʉ ghwe ghʉno ghʉlyaghavinie Pavwɨmɨke na Pavwɨmɨke pa Pavwɨmɨke mʉ nyumba ɨnyɨmɨke. Ʉmwenda ʉghuo ʉvʉtali ghʉlyale ni mita kɨjigho kɨmo na lekelakwoni, ʉvʉkome ghʉlyale imita budikalʉbale. Kange, ghʉlyale nʉ mʉghindi ghwa sentimita itatu. ghʉno ghʉlyaghavinie pavɨlɨ ɨnyumba ɨnyɨmɨke ɨja Ngʉlʉve, ghʉkademʉka pavɨlɨ kuhʉma kʉkyanya kufika paasi. 39Ʉmʼbaha ʉghwa vasikali jʉno alyɨmile kɨlʉnge nʉ Yesu, ye amʼbwene pano ikʉngʉka, akajova akati, “Kyangʼhaani ʉmuunhu ʉjʉ akaale Mwana ghwa Ngʉlʉve!”
40Ye sivombeka isi sooni, pwevalyale avakɨjʉʉva vano valyɨmile patali padebe vilola. Mʉ vakɨjʉʉva avuo mwealyale ʉMaliya ʉmhʉma mʉ lɨkaaja ɨlya Magidala, ʉSalome nʉ Maliya ʉngʼina ghwa Yoose nʉ Yakovo ʉnʼdebe. 41Ava vakamʼbɨngɨlɨlagha na pikʉmʼbombela ʉYesu ye alɨ kʉ Galilaya. Kwevalyale na vakɨjʉʉva avange vinga vano valyalʉtile nʉ Yesu kʉ Yelusalemu.
ɄYesu ivɨkua mʉ mbiipa
(Mataayi 27:57-61; Lʉʉka 23:50-56; Yohani 19:38-42)
42Isi sooni savombiike ɨkɨghono ɨkya kʉlɨngʼhania ɨSabati.#15:42 Ɨkɨghono ɨkya kʉlɨngʼhania ɨSabati: Ɨkio kyale kɨghono kya pa Kɨhaano, pepano aVayahudi valyale vikulɨngʼhania mʉlwa kɨghono kyave ɨkya Sabati. ƗSabati ɨjio jɨkatengʉlagha pa Kɨhaano pakɨvwilile. Ye vwilile, ɨSabati jɨkyale pitengʉla, 43akiisa ʉYosefu ʉghwa kʉ Alimataya, alyale mwoghopua mʉ kɨpʉgha ɨkya vahɨghi. Ghwope akaghulilagha kukwisa ʉVʉtwa vwa Ngʉlʉve. Ʉjuo akikangasia, akalʉta kwa Pilato, akasʉʉma ʉmʼbɨlɨ ghwa Yesu. 44ɄPilato ye apʉliike kuuti ʉYesu afwile, akadegha kyongo. Akankemeela ʉmʼbaha ʉghwa vasikali, akamposia kuuti ʉYesu ndaveele afwile kali. 45Ye apʉliike ʉluo, akantavʉlɨla ʉYosefu ʉmʼbɨlɨ ghwa Yesu.
46ɄYosefu akaghʉla ʉmwenda ʉghwa kʉnsyɨlɨla ʉYesu. Akisia ʉmʼbɨlɨ pa kɨkovekano, akaghʉniengelela nʉ mwenda ghʉla. Pe akaghʉvɨɨka mʉ mbiipa jɨno jabughulilue mʉ lɨnhalavue, akabɨlʉkɨsia ɨlɨvue ɨlɨkome pa mʉlyango ghwa mbiipa. 47ɄMaliya ʉmhʉma mʉ lɨkaaja ɨlya Magidala nʉ Maliya ʉngʼina ghwa Yoose, vakapaagha pano ghʉvɨkilue ʉmʼbɨlɨ ghwa Yesu.
လက္ရွိေရြးခ်ယ္ထားမွု
Malɨka 15: wbi
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.