Malɨka 13
13
ɄYesu ijova vwɨmɨla kumemʉlua ɨnyumba ɨnyɨmɨke ɨja kufunyila
(Mataayi 24:1-2; Lʉʉka 21:5-6)
1ɄYesu ye ihʉma mʉ nyumba ɨnyɨmɨke ɨja kufunyila, ʉmʼbʉlanɨsɨvua ghwake jʉmonga akamʼbʉʉla akati, “Mʼbʉlanɨsi, lola amavue na majumba agha vʉle ghalɨvuo!” 2ɄYesu akamwamʉla akati, “Nɨkʉvavʉʉla niiti, ndavʉle mʉkʉghavona amajumba amakome agha, nalɨlasighala nambe lɨvue lɨno lilighelama pa lɨvue ɨlɨngɨ, ʉlwakʉva ghooni ghilihemʉlua.”
Imhumuko sino sikwisa
(Mataayi 24:3-14; Lʉʉka 21:7-19)
3ɄYesu akalʉta pa kɨdunda ɨkya Miseituni, akikala alʉngiime kʉ nyumba ɨnyɨmɨke ɨja kufunyila. Apuo ʉPeteli, ʉYakovo, ʉYohani nʉ Ndeleeya, ye vijekiile, vakamposia ʉYesu vakati, 4“Tusʉʉma ʉtʉvʉʉle, isio sino ʉtʉvʉlile silivombeka lɨɨghi? Kɨvalɨlo kɨki ɨkya kʉtʉhʉfia kuuti, ʉnsiki ʉghwa kʉvombeka isi sooni ghʉlɨ piipi?”
5Pepano ʉYesu akavavʉʉla akati, “Mʉvisaghe maaso, ʉmuunhu naangavasyangaghe, 6ʉlwakʉva vinga vilikwisa mʉ lɨtavua lyango, nʉjʉnge itisagha, ‘Neene Kɨlɨsite.’ Avaanhu avuo vilikʉvasyanga vinga. 7Ʉmue mʉlaava mupʉlɨka ʉvʉlʉgʉ ni njovo saake, mʉlekaghe pikwoghopa. Ndalʉve ndaani isio silivoneka taasi, neke ʉnsiki ʉghwene ʉghwa vʉsililo ghuuva ghʉkyale. 8Ifighono ifio ɨɨsi jɨlalwisagha nɨ ɨɨsi ɨjɨngɨ, kange ʉvʉtwa kulua nʉ vʉtwa ʉvʉnge. Imbale ni mbale kwefiliiva ifisenyeena, kwejiliiva ɨnjala. Isio sooni vuuva vʉtengʉlɨlo, ndavʉle ʉvʉvafi ʉvwa mʉkɨjʉʉva, pano ʉnsiki ʉghwa kʉpaapa ʉmwana ghʉfikile.
9“Neke ʉmue mʉvisaghe maaso, ʉlwakʉva vilikʉvatwala pa vʉhɨghi na mʉ masinagogi, vilikʉvatova. Kange, vilikʉvatwala pa vanjagɨla na pa vatwa, ʉlwakʉva mʉkʉmbɨngɨlɨla ʉne. Ʉghuo ghuuva ghwe nsiki ʉghwa kwoleka ʉlwɨtɨko lwinu kʉ veene. 10ƗMhola ɨNofu ʉmpaka jɨpʉlɨsɨvue mʉ ɨɨsi sooni, ʉvʉsililo ye vʉkyale kufika.
11“Pano viliiva vavakolile na kʉkʉvatwala pa vʉhɨghi, namʉngasaghaghe kuuti kyamujova kɨki, ʉmue mʉjovaghe kɨno mupelua ʉnsiki ʉghuo. Ʉlwakʉva namwemue muuva mujova, looli iiva ghwe Mhepo ʉMwɨmɨke. 12Ʉmuunhu ɨkʉmwohelagha ʉnnine kuuti abudue. Ʉviise ɨkʉmwohelagha ʉmwanaake, voope avaana vikʉvagalʉkɨlagha avapaafi vaave kuuti vabudue. 13Avaanhu vooni vilikʉvakalalɨlagha ʉlwakʉva mʉkʉmbɨngɨlɨla ʉne. Neke jʉno ikuguda kuhanga kufika kʉvʉsililo, ʉjuo ghwe alakuluka.”
Imhumuko imbaha
(Mataayi 24:15-28; Lʉʉka 21:20-24)
14“Neke mʉlaava mʉvwene ɨkɨɨnu kɨno kipelela ʉvʉlamafu ɨnyumba ɨnyɨmɨke ɨja kufunyila,#Danieli 9:27; 11:31; 12:11 kyɨmile Pavwɨmɨke pano nakɨnoghiile kuuva, jʉno ikwɨmba amasio agha alʉtangʼhaniaghe, apuo pepano vano valɨ mʉ Yudea vakɨmbɨlɨlaghe kʉ fidunda. 15Jʉno alɨ pa kɨtʉvɨlɨ,#13:15 Jʉno alɨ pa kɨtʉvɨlɨ: Ɨkɨhwani ɨkya nyumba isa Vayahudi lola Malɨka 2:4. naangikaghe kutoola kɨmonga mʉ nyumba jaake. 16Ghwope jʉno alɨ kʉ mʉghʉnda, naangagomokaghe kʉ kaaja kutoola ʉmwenda ghwake. 17Ɨga avakɨjʉʉva vano viliiva vakunue na vano vilikwongʼhelesyagha ifighono ifio! 18-19Ifighono ifio, kwelʉliiva ʉlʉpumuko lʉno nalʉghelile kuvoneka kuhʉma ʉNgʉlʉve ipela ɨɨsi, kuhanga kufika ʉmʉsyʉghʉ. Kange, nalʉlavoneka lʉsiku. Lɨno, mufunyaghe kuuti isio sileke pikwisa amasiki agha fula nɨ mhepo. 20Nave ʉMʉtwa ʉNgʉlʉve naikepʉsia ifighono ifio, nakwale ʉghwa kʉkuluka. Neke vwɨmɨla avasalʉlua vaake, ilikepʉsia ifighono ifio.
21“Ʉnsiki ʉghuo ʉmuunhu angati, ‘Lola! ɄKɨlɨsite alɨ apa,’ nambe, ‘Alɨ kʉla,’ namʉngɨtɨkaghe. 22Ʉlwakʉva valiisa avaanhu vano vikutambʉlagha nʉjʉnge itisagha ghwe Kɨlɨsite, avange viliiva vavɨli va vʉdesi. Avuo vihʉfyagha ifivalɨlo ni fidegho kuuti vavasofie avaanhu, nambe avasalʉlua va Ngʉlʉve. 23Lɨno, ʉmue mʉvisaghe maaso, ʉlwakʉva nɨvavʉlile sooni, ye sikyale pikwisa.
Kukwisa kwa Yesu ʉMwana ghwa Muunhu
(Mataayi 24:29-31; Lʉʉka 21:25-28)
24“Neke ifighono ifio siliiva sikilile imhumuko isio,
‘ɨngʼhiisi jɨlakupikila ɨlɨjʉva,
naghʉ mwesi naghʉlavala.
25Inhondue silasangʉka kuhʉma kʉkyanya,’#Yesaya 13:10; 34:4
ni fiinu fyoni ifya kʉkyanya filasukanɨka.
26“Pepano valambona ʉne ne Mwana ghwa Muunhu nikwisa mʉ mafunde ni ngʉfu nyinga nʉ vʉvaha. 27Neke nɨlavasuungʼha avanyamhola vango, vavakongʼhanie avasalʉlua vango, kuhʉma imbale sooni isa ɨɨsi.
Ɨkɨhwanɨkɨsio ɨkya mpiki ʉntini
(Mataayi 24:32-35; Lʉʉka 21:29-33)
28“Mʉmanyɨlaghe ɨkɨhwanɨkɨsio ɨkya mpiki ʉntini. Pano inhaafi saake silemba na kuuva na matʉndʉ, mʉkagʉlaghe kuuti amasiki gha fula ghalɨ piipi. 29Fye lʉlaava, muliiva mʉkʉsivona sino noliike sivombeka, mʉkagʉlaghe kuuti nɨlɨ piipi kukwisa. 30Kyangʼhaani nɨkʉvavʉʉla niiti, ɨkɨsina ɨkɨ nakɨlakila kuhanga isi sooni sivombeke. 31Ʉvʉlanga nɨ ɨɨsi filakila, looli amasio ghango naghalakila.
Ɨkɨghono ɨkya kwisa ʉMwana ghwa Muunhu
(Mataayi 24:36-44)
32“Neke ɨkɨghono nʉ nsiki ʉghwa kwisa ʉne ne Mwana ghwa Muunhu, nakwale jʉno akagwile nambe avanyamhola kʉkyanya, nambe jʉʉne ne Mwana, looli jʉ Nhaata. 33Mulɨngʼhaniaghe, kange mʉvisaghe maaso,#13:33 Mʉvisaghe maaso: Mʉ fitabu fimonga ifikʉʉlʉ valembile, Mʉvisaghe maaso na kukufuunya. ʉlwakʉva namʉkagwile ʉnsiki ʉghuo ghuliiva lɨɨghi.
34“Lʉlaava ndavʉle ʉmuunhu jʉno ikyʉla, ɨkʉjɨleka ɨkaaja jaake mʉ mavoko gha vavombi vaake na kʉkʉvapeela nʉjʉnge ɨmbombo jaake. Kange, ɨkʉmʼbʉʉla jʉno ilolelela pa mʉlyango kuuti avisaghe maaso. 35Lɨno, ʉmue mʉvisaghe maaso, ʉlwakʉva namʉghʉkagwile ʉnsiki ʉghwa kʉgomoka ʉnya nyumba, pamo aliisa vwilile nambe kɨlo nkate, pamo pano kuhenga nambe lwakɨlo. 36Mʉvisaghe maaso kuuti alavangʼhʉlania mʉghoneliile. 37Sino nɨkʉvavʉʉla ʉmue, nɨkʉvavʉʉla vooni, ‘Mʉvisaghe maaso!’ ”
လက္ရွိေရြးခ်ယ္ထားမွု
Malɨka 13: wbi
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.