Matio 20
20
Iriniwok kitikan askik ka otamirotcik
1“Ekoni e icinakonik Kice Manito Okimawin: mitowi peikw iriniw ka tiperitak kitikan askiriw wipatc e kicepawonik orowiw e nta akacehatc iriniwa kitci otamiroritci okitikan askik. 2Orictawew kitci kicikowatc, kotc irikik ka ici kicikowakaniwiritci, peikw coriawapiskoriw tato kickwa. Minawatc ki iciticahwew kitci nta otamiroritci okitikan askik. 3Ka cakitato tipahikanearik aci minawatc orowiw anahwe ka tiperitak. Wapamew kotakihi iriniwa neta e pa tacikeritci, aka kekociciriw e itotiskeritci. 4Itew: ‘Matcakw, kaie kirawaw nta otamirokw nikitikan askik. Wewerita ki ka kicikatinawaw.’ 5Icawok aniki iriniwok. Ka apita kicikarik kiapatc minawatc orowiw anahwe ka tiperitak, kaie kiapatc nicto tipahikan e ickwa apita kicikarik. 6Nac kiapatc e niarano tipahikanearik e iti otakocinik orowiw. Kiapatc miskawew kotakihi iriniwa nta e pa tacikeritci. Kokwetcimew, e itatc: ‘Kekwan wetci pa tacikeiekw ota kape kickwa, aka kekocic e itotiskeiekw?’”
7“Itiko: ‘Nama meka awik nit akacehikowinan.’”
“Ekoni e ici itatc: ‘Matca sa tca kaie kirawaw nta otamirokw nete nikitikan askik.’”
8“Wetakocinik, aci anahwe ka tiperitak kitikan askiriw itew otarotakana ka tiperimaritci anahweriw otamiro iriniwa: ‘Wicamik otamiro iriniwok kitci pe natawapamiskik, kitci ki tca kicikowotcik irikik ka ki kanewitcik. Aniki ki ka otci kitciparin mamitenamik ka ki akacehowakaniwitcik. Aniki tca wirctamiwaw ka ki akacehowakaniwitcik, enko aniki mamitenamik ke kicikowotcik.’”
9“Aniki tca ka ki kitciparitcik e otamirotcik niarano tipahikan e otakocinik ki pe icawok. Tato neta e tacitcik ki kicikowakaniwiwok peikwo coriawapiskoriw. 10Apitc pe icatcik aniki nictam ka ki akacehwakaniwitcik, iteritamwakopan kirawe wirawaw mictahi kitci kanewitcik. Aric peikon kaie wirawaw ekoni irikik e ici mirakaniwitcik, peikwo coriawapiskoriw. 11Ani irikik e mirakaniwitcik, ki marerimewok anihi ka tiperitamiritci, 12e aitatcik: ‘Aniki iriniwok mamitenamik ka ki akacehwitcik tepirak peikwo tipahikan irikik ki otamirowok. Peikon ki ki ici kicikowawok mia ninan kape kickwa ka ki otamiroak, e micta aieskosiak acitc e ki micta kicitek!’”
13“Aric anahwe ka tiperitak ki naskamo, peikw neta e taciritci anihi iriniwa e itatc: ‘Nikwimes, nama ki ki otci wecimitin. Ki ki ici naheriten kitci otamiroin, ani kitci ici kicikakoin. 14Matca tca. Matcewota ka kicikatan. Ni nataweriten kitci kicikowak anahwe mamitenamik ka ki akacehak mia peikon kir ka ki ici kicikatan. 15Nama ia ni actew kitci irapatcitaian nicoriam tan wa totaman? Kekotc ma ki otcinawekerimin osam e miro iriniwian?’”
16Minawatc Cecoc kiapatc ki iti itew: “Iriniwok anotc ka otananickatcik, kecko kata nikanickawok. Aniki tca anotc ka nikanickatcik kata otananickawok.”
Ekoni aci nictowaw e witak Cecoc ke iciwepasitc
(Natawapata kaie Mark 10.32-34; Luc 18.31-34)
17 Jérusalem otenak icapan Cecoc. Mekwata e iti pimotetc tipan ki iciwirew anihi owitcewakana e mitato acitc niciritci, e itatc: 18“Natotamokw! Jérusalem otenak kit icanano. Ekote neta ke ici pakiterimakaniwitc anahwe Ka ki pe iriniwihitisotc,#20.18 Ka ki pe iriniwihitisotc: Arimomitiso ota Cecoc. kitci makonikotc anahweriw cota makatewokorewa ka tiperitamiritci acitc ka kiskinohamakeritci cota aiamihe irakonikewiniw. Kata anwerimiko kitci nipahakaniwitc, 19kaie kata pakiterimiko kitci makonakaniwitc, aka ka cota iriniwiritci kitci makonikotc. Kata papirotako anahweriw aka ka cota iriniwiritci, kata pasakactehiko kirika kata tcictaskowatiko tcipaiatikok. Minawatc ickwa nicto kickokarike kata apitcipaw.”
E ici nataweritamiritci okawiwawa Cak kirika Jean
(Natawapata kaie Mark 10.35-45)
20Peikw iskwew iti natcikapowictawew Cecoca, enko anihi Zébédée okoma,#20.20 enko anihi Zébédée okoma: Peikon ici nisitotakon ohwe: enkweriw okawiwawa Cak kirika Jean, Zébédée okoma. kirika e niciritci okosa e pe witcewikotc. Nipiskoctawew Cecoca anahwe iskwew, kekociciriw e nataweritamawatc. 21Itiko Cecoca: “Kekwan ka ici nataweritaman?”
Itew anahwe iskwew: “Kecko nikotin nta tacikeine kokimawinik kitci tiperitcikein, matci ni ka pakitinawok ohki nikosak e nicitcik kitci witapimiskik ke ici apiin, peikw kinihiwinik, kotak kinamatciwinik.”
22Cecoc itew: “Nama ki kiskeritenawaw anihe ka ici nataweritamekw. Tarasak minikwakanik ni ka minikwan nekaterimowin. Kirawaw tca, ki ta kackitanawaw ia kitci otci minikweiekw nekaterimowin neta minikwakanik ke minikwewakeian?”
Itewok: “Ehe, ni ka kackitanan.”
23Aci itikowok Cecoca: “Tapwe wirata ki ka minikwewakanawaw anihe minikwakan ke minikwewakeian.#20.23 Tapwe wirata ki ka minikwewakanawaw anihe minikwakan ke minikwewakeian: Wi itetake: Tapwe ki ka micta nekatcitanawaw, kaie kirawaw. Namaiew aric ni nin ke orapamak anahwe ke apitc ninihiwinik kekotc ma ninamatciwinik. Notawi ni, wir ka ki orapamatc anahweriw iriniwa kirika aci ickwa nisawitawew neta ke ici apiritci.”
24Ka petaketcik aniheriw aniki kotakihik Cecoc owitcewakana, ki kiciwasictakowok anihi okosiriw Zébédée e niciritci. 25Aci Cecoc wicamew kaskina owitcewakana, e tca itatc: “Ki kiskeritenawaw ohwe e icinakok: tawok okimawok ota askik#20.25 okimawok ota askik: Peikon kata ki ici nisitotakon: okimawok aka ka cota iriniwitcik; okimawok aka ka nosanehwatcik Kice Manitowa ka tiperimatcik iriniwa kaie wirawaw aka ka nosanehwaritci. e tiperimatcik iriniwa, mocak e witamawatcik ke aitotiskeritci. Kirika aniki okimawok tariwa kaie wirawaw ka tiperimikotcik. 26Nama aric actew kitci icinakok, kirawaw otci. Kecpin aric peikw neta e taciekw nataweritake tapwe kitci kicteritakositc, acteriw kitci atoskectatakw, mia arotakan kitci iteritakositc. 27Kaie kecpin peikw neta e taciekw wi nikanickate, acteriw kitci arotakaniwitc, tekaci kitci atoskectatakw. 28Peikon kaie anahwe Ka ki pe iriniwihitisotc, nama ki otci pe icaw kitci atoskectawakaniwitc, aric kitci atoskectaketc, kirika kitci pakitinak opimatisiwin, micta mitcet iriniwok kitci wikotcihakaniwitcik.”
Nicw iriniwok aka ka wapitcik e kikehakaniwitcik
(Natawapata kaie Mark 10.46-52; Luc 18.35-43)
29Ka orowitcik neta otenak Jéricho, micta mitcetiripana ka nosanehikotc Cecoc. 30Nicw iriniwok aka ka wapitcik taci apipanak opimeskana. Ka petaketcik Cecoca e pimoteritci, micta tepitepwewok, e itetcik: “Teperitcikein, Okimaw Tapit Okosa,#20.30 Okimaw Tapit Okosa: Wi itemakanotake: otaniskotape osima. kitimakerimicinan!”
31Marerimikowok anihi iriniwa ka micta mitcetiritci, kirika itikowok aka kitci kitotcik. Aric kirawe kiapatc kiciwewok aniki aka ka wapitcik, e tepwetcik: “Teperitcikein, Okimaw Tapit Okosa, kitimakerimicinan!”
32Nokikapowiw Cecoc. Wicamew kitci pe natcikapowictakotc, kirika kokwetcimew, e itatc: “Kekwan ka ici nataweritamekw kitci totaman kirawaw otci?”
33Itewok: “Teperitcikein, itotiske kitci wapiak.”
34Kitimakerimew Cecoc. Ekoni e ici takinamwatc ockicikowariw. Tecikotc wapiwok aniki iriniwok e nicitcik, kaie iti nosanehwewok Cecoca.
လက္ရွိေရြးခ်ယ္ထားမွု
Matio 20: ATMK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Canadian Bible Society, 2014