Matio 15
15
Weckatc cota iriniwok okiskinohamakewiniwaw
(Natawapata kaie Mark 7.1-13)
1Minawatc atita Pharisien iriniwok kirika ka kiskinohamaketcik cota aiamihe irakonikewiniw ki pe natawapamewok Cecoca, Jérusalem otenak e ki pe ototetcik. Kokwetcimewok Cecoca, e itetcik: 2“Kekwariw wetci aka sapitakik kiwitcewakanak weckatc okiskinohamakewiniwariw kitaniskotape kimocominowa? Nama meka wewerita kasitcitcewok epwamoci mitcisotcik, kotc ka ki ici kiskinohamakoikw kitci itotiskeikw!”#15.2 Itemakan cota aiamihe irakonikewin mia ke totcikatek kitci kasitcitcaniwok epwamoci mitcisonaniwok. Kecpin awik aka wewerita kasitcitcete kotc e itacterik, ‘ometcewiw’ iteritakosiw cota aiamihewinik itekera, kirika nama pakitinakaniwiw kitci icatc e mawotcihitonaniwonik kitci aiamihaniwonik kekotc e aiamihe makocaniwonik.
3Aci naskamawew Cecoc, e itatc: “Kaie kirawaw tca, kekwan wetci aka sapitamekw Kice Manito otirakonikewin, kitci tca nosanetaiekw anihe kirawaw tipirawe kikiskinohamakewiniwaw? 4Ki itew meka Kice Manito:
‘Kicterimik kotawi kaie kikawi,’ Exode 10.12; Deutéronome 5.16
kaie ohweriw:
‘Anahwe ka marerimatc otawiwa kekotc okawiwa,
acteriw kitci nipahakaniwitc.’ Exode 21.17
5Aric kirawaw ki kiskinohamakanawaw aka arimatc kitci witcihatc iriniw onikihikwa e kitimakisiritci, kecpin e itatc: ‘Nama ki ka ki witcihitinawaw, osam meka e ki ickwa nespi tapweian kitci aiamihe pakitinaman Kice Manito otci, anihe ke ki miritakokipan.’ 6Kecpin tca e nosanetatc anahwe iriniw kikiskinohamakewiniwariw, iteritam: ‘Nama aci arimatc ni ka witcihaw notawi.’#15.6 notawi: Itemakan atita masinahikanik: notawi kaie nikawi. Ekoni e ici wi pikotaiekw Kice Manito otitewin, kitci tca nosanetaiekw anihe kirawaw tipirawe kikiskinohamakewiniwaw. 7Ki micta miro iriniwikasonawaw! Tapwepan Ésaïe, anahwe weckatc ka ki nikan tipatcimospan, kirawaw e ki arimomitakw, e ki itetc:
8‘Itew Kice Manito: Ni kicterimikok iriniwok e mirwatcimitcik, otitewiniwaw e apatcitatcik,
aric otehiwak nama ni kicterimikok.
9Nama wiec irapataniw e nipiskoctawitcik.
Aniheriw meka ka ici kiskinohamaketcik,
namaieriw ni Kice Manito okiskinohamakewin,
iriniwok ni tepirak otirakonikewiniwaw.’” Ésaïe 29.13
Kekwariw ka ometcickakotc awik otcitcakocik itekera
(Natawapata kaie Mark 7.14-23)
10Minawatc Cecoc ki wicamew iriniwa ka ici mitcetiritci kitci pe natawapamikotc, e tca itatc: “Kaskina natotacikw ohwe ke iteian, kitci miro nisitotamekw: 11Nama ometcickako iriniw otcitcakocik itekera, e ki mitcik kekociciriw. Kotc e itetc aka e mirowacinik, enkweriw ka ometcickakotc.”
12Aci owitcewakana pe natcikapowictako Cecoc, e itikotc: “Ki kiskeriten ia Pharisien iriniwok e ki kiciwasitcik ka petaskik aniheriw ka ki itewotc?”
13Ki itew Cecoc: “Kaskina kitikan aka ka ki otci matce kitiketc Notawi ka taciketc wakwek kata monipitcikatew.#15.13 Pot wi itemakanotake: Kaskina irakonikewiniw aka ka ki otci itactatc Notawi ka taciketc wakwek kata monikateriw. 14Ponihakok aniki Pharisien iriniwok, mia e iteritakositcik iriniwok aka ka wapitcik kaie tca ka iterimitisotcik kitci ki keskinowiwiratcik kotakihi iriniwa aka ka wapiritci. Kecpin meka iriniw aka ka wapitc e wi keskinowewiratc kotakihi iriniwa aka ka wapiritci, tapickotc e nicitcik kata posipariwok e ici waratawokarik.”
15Aci Pien arimwew e itetc: “Wewerita witamacinan wa itemakak anihe kitatisokan.”
16Aci itew Cecoc: “Kiapatc ia kaie kirawaw nama ki kackitanawaw kitci nisitotamekw? 17Nama ani ki nisitotenawaw ohwe: kaskina kekociciriw ka ici kotak awik, minawatc orowipariniw. 18Kotc e itetc awik, otehik otcipariniw. Enkweriw ka ometcickakotc otcitcakocik itekera. 19Otehik meka otcipariniw e matci iteritak, kirika e manohotc, e pacikwatisitc, e matci pimatisitc, e kimotitc, e kiraskitc acitc e mareritciketc. 20Enkweriw ka otciparinik iriniw kitci ometciwitc otcitcakocik itekera! Aric e mitcisotc aka e kasitcitcetc, namaieriw ni aniheriw ka ometcickakotc.”
Iskwew pitoc ka otcitc e tapwerimatc Cecoca
(Natawapata kaie Mark 7.24-30)
21Matcaw Cecoc nta ka taci kiskinohamakespan, nete itekera e icatc otenawa ka ici takoki, Tyr acitc Sidon ka icinikateki. 22Tapan neta peikw iskwew, Canaan askik itekera e otcirikopanen otaniskotape omocoma. Anahwe iskwew ki pe natcikapowictawew Cecoca, e tepwatatc: “Teperitcikein, Tapit Okosa,#15.22 Tapit Okosa: Wi itemakanotake: Otaniskotape osima, Okice osima. kitimakerimici! Nitanis mictahi nekatcihiko matci manitowa e ki pitciteheckakotc!”
23Nama aric ki otci kito Cecoc. Kek owitcewakana natcikapowictako, e itikotc: “Matceticoho anahwe iskwew. Nama ponitaw e tepitepwetc e nosanehitokw!”
24Itew Cecoc: “Ni ki pe iciticohokowin kitci witcihakik Israël iriniwok, mia maritcenicak ka onicikik e iteritakositcik.”
25Aric anahwe iskwew pe nta nipiskoctawew Cecoca, e itatc: “Teperitcikein, witcihici!”
26Itew Cecoc: “Nama mirwaciniw e maskamakaniwitcik awacak omitcimimiwaw, atimwa tca kitci iciwepinamowakaniwiritci.”
27“Tapwe anihe ka itein, Teperitcikein,” itew anahwe iskwew. “Aric peikon mitciwok atimok mitcimiriw e ickotcikaterik mitcisowakanatikok e otci pakitinik, okimamiwawa ka ki kitickinamiritci.”#15.27 Arimotamotake ota Cecoc e ki mirakaniwitc wirctam cota iriniwa kitci witcihatc.
28Aci itiko Cecoca: “Micaw kit asperimowin! Ki mirikowin anihe ka ici nataweritaman.”
Ekoni mia ka mirwatisiritci anihi otanisa.
Cecoc e kikehatc mitcet ka akosiritci
29Cecoc neta ki otci matcaw, nete e icatc rarewak Galilée sakihikanik. Ki okitamatciwew. Ki apiw. 30Micta pe mitcetiriwa e pe natawapamikotc iriniwa, e pecowaritci ka akosiritci: ka atciwockaritci, aka ka wapiritci, ka maskisiritci, aka ka nitaweritci, acitc kotakihi ka akosiritci. Neta pe nta arakaniwiriwa e icisitepitc Cecoc. Kaskina ki kikehew. 31Aniki iriniwok ki micta kockowapamowok ka wapamatcik anahweriw iriniwa aka ka nitaweritci aci e nitaweritci, ka maskisiritci aci e ki kikehakaniwiritci, ka atciwockaritci aci e miro pimoteritci kaie aka ka wapiritci aci e wapiritci. Ki tca micta mirwatcimewok Israël iriniwa Okice Manitomiwariw.
Cecoc e acamatc 4 000 iriniwa
(Natawapata kaie Mark 8.1-10)
32Cecoc wicamew owitcewakana, e itatc: “Ni kitimakerimawok aniki iriniwok. Aci meka nicto kickwa esko pe witci tacikemitcik ota, aka tca tekaci e takonik kekociciriw ke mitcikik. Nama tca ni wi kiweticohwawok e pakatetcik. Matci meka kata iti pakiciniwok meskanak e kiwetcik, aka e sapitcik, aka moci e ki otci mitcisotcik.”
33Kokwetcimiko owitcewakana: “Tante tca ke ki otinamak mitcim kitci acamawikok ni tca e tacitcik iriniwok, ota e ici cipewatawokak?”
34Kokwetcimikowok Cecoca: “Tan e tacitcik kipakwecikanimiwawok?”
Ki itewok: “Nicowaso#15.34 Nicowaso: (7) taciwok acitc atita namesicicak.”
35Aci Cecoc itew anihi iriniwa e mitcetiritci kitci aipiritci motcik. 36Minawatc ki otapinew anihi e nicowatciritci pakwecikana acitc anihi namesa. Mikwetc ki itew Kice Manitowa. Ki pakwepitew, e miratc anahweriw owitcewakana. Minawatc aniki witcewakanak ki mamiriwewok aniheriw kaskina iriniwa. 37Tato nta e taciritci ki mitcisoriwa kaie ki miro tipipaririwa aniheriw mitcimiriw. Aniki Cecoc owitcewakana ki mawotcitawok kiapatc nicowaso pakitenakaniw e mockinerik mitcimiriw e ki ickoparinik. 38Aniki ka ki mitcisotcik, newaw kice mitato mitana taciwakopan, tepirak iriniwok e akimakaniwitcik, aka e ki otci akimakaniwitcik iskwewok acitc awacak. 39Ka kiweticohwatc anihi e mitcetiritci iriniwa Cecoc, ki positcimew, nete e icitcimetc Magadan askik itekera.
လက္ရွိေရြးခ်ယ္ထားမွု
Matio 15: ATMK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Canadian Bible Society, 2014