Genesis 9
9
Akisipanay Dios ed kinen Noe
1Si Noe tan saray anak ton lalaki et binindisionan ira na Dios ya inkuanto, “Mamparakel kayoy anak, pian nakayatan day intiron mundo. 2Ontakot ed sikayo ray amin ya ayayep, manok, tan sira. Inter ko ra yan amin ed silong na pakayari yo. 3Nayarian yo ran kanen, tan nayarian yo met a pambilay iray tantanaman; iter kon tagano yo ra yan amin. 4Say ag nayarin kanen yo et say karni a nandala, ta walad dala so bilay. 5Nadusa so siopaman a mamatey na too. Dusaen ko na patey so anggan anton ayep a mamatey na too. 6Siopamay mamatey na too pateyen met na kapara ton too, ta apalsan kaolibay na Dios so too.
7“Natan, nakaukolan a mamparakel kayoy anak, pian onkayat ed intiron mundo iray kabyangay boleg yo.”
8Inkuan na Dios ed kinen Noe tan saray anak ton lalaki, 9“Misipanan ak ed sikayo tan saray kabyangay boleg yo, 10tan diad amin a mabilay a pinalsa—saray manok, saray ayayep—amin da ray kaiba yon pinmaway ed biong. 11Diad sarayan balikas misipanan ak ed sikayo: Isipan ko ya ag lan balut deralen na delap iray amin a mabilay a pinalsa. Ag lan balut deralen na delap so dalin. 12Niay pakanengnengan na sayan andi-anggaan a pisipanan kod sikayo tan amin da ray mabilay a pinalsa: 13paletawen kod lorem so bunlalakaw. Sikato yay tanda na impisipanan kod mundo. 14Kapag sakuban koy tawen na lorem tan onletaw so bunlalakaw, 15nanunotan koy sipan kod sikayo tan diad amin ya ayayep ya ag lan balut deralen na delap iray amin a mabilay. 16Kapag onletaw so bunlalakaw ed lorem, nengnengen ko tan nanunotan koy impisipanan ko ed amin a mabilay ed tapew na dalin. 17Sikato yay tanda na impisipanan ko.”
Si Noe tan saray Anak to
18Sikara yay anak nen Noe a pinmaway irad biong: Si Sem, si Ham ya ama nen Canaan tan si Jafet. 19Sarayan taloran anak nen Noe et sikaray sengeg na amin a totoo ed tapew na dalin.
20Sakey a dumaralus si Noe tan sikatoy onaan a nantanem na ubas. 21Aminsan ya agew inminom na alak si Noe, et abuek; inekal toy amin a kawes tod laman to, insan akaogip ed dalem na tulda to. 22Nen anengneng nen Ham ya ama nen Canaan a labus-lakseb si ama to, pinmaway tan imbaga tod saray duaran agagi to. 23Angalay kolibemben si Sem tan si Jafet, inyan dan duad takeb da, insan ira nampasoner a linmoob ed tulda, ta ag da labay a nanengneng so ama ran labus-lakseb. 24Nen amawmawan lay Noe, tan naamtaan toy ginawad sikato na kayogtanan ya anak ton laki, 25inkuanto,
“Nisamba komuy Canaan!
Magmaliw ya aripen na saray agagi to.
26Nagalang komun so Katawan, say Dios nen Sem!
Magmaliw ya aripen nen Sem si Canaan.
27Say Dios parakelen to komuy Jafet!#9:27 JAFET: Say tanul na sayan ngaran kapara toy Hebreon salita a kabaliksan toy “ondakel.”
Saray kabyangay boleg to miayam ira komun ed totoo nen Sem!
Magmaliw ya aripen nen Jafet si Canaan.”
28Kasumpal na delap, nambilay niy Noe na talon lasus tan limamploy taon, 29tan inatey nen mantaoy siam a lasus tan limamplo.
လက္ရွိေရြးခ်ယ္ထားမွု
Genesis 9: MBBPAN83
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Maung a Balita Biblia © Philippine Bible Society, 1983