Mathayo 5
5
1Na ci duut ŋem, ke lɔ ne kuur nom: ela ci nyuc, ke kɔcpiocke bɔ enɔŋ en: 2go yethok kuek pioc keek, jiɛm,
3Ye kɔc ye ŋɔŋ ne tip aaye thiei: ceŋ nhial ee keden.
4Kɔc ye alɔjeth ke nɔk aaye thiei: aabike ya duut piɔth.
5Kɔc ye piɔth kuur aaye thiei: piny abi ya ya adonyden.
6Kɔc ye cɔk ku yiki yal ne luɔi lajik aaye thiei: aabike cɔk kueth.
7Kɔc ye piɔth kac aaye thiei: aabi kac de piɔu ya yok.
8Kɔc ye piɔth lɔcar aaye thiei: aabi Nhialic ya ŋem.
9Kɔc ye kɔc dɔɔr aaye thiei: aabi ya cɔɔl wɛɛt ke Nhialic.
10Kɔc ci ŋet ne luɔiden lajik aaye thiei: ceŋ nhial ee keden. 11We ye thiei te ye kɔc we laat, ku yiki we ŋet, ku yiki we lɛk rɛɛc ebɛn ne rieth, ne ɣɛn. 12Yaka piɔth lɔyum, miɛtka piɔth: ariopduɔn ee dit nhial: aake ye nebii ŋaar ne wenhiim kan ŋet yila.
13We ye awany de piny nom: ku na ci awai liɛr, ke beer ya awai yede? E kacin ke beer en dik, e kacuɛte wei ku ye dum ne kɔc cok. 14We ye ɣɛɛr de piny nom. Pan tɔ ne kuur nom acie leu ne bai. 15Kɔc aaci lamba ye dɛɛp, ku kumki ne alep, ayiki taau nhial, ku bi raan ebɛn meer ran tɔ ɣot. 16Cakka ɣɛɛrduɔn ye lɔcar ne kɔc nyin, bik luɔi piathduɔn ya ŋem, ku yiki Wuɔrduɔn tɔ nhial leec.
17Duɔka ye tak wuɔ ne ɣan bɔ ba looŋ ka nebii ben riɔk. An ee ce bɔ ba ke riɔk, ee bik ya yith. 18We ya yɔɔk neyic, Ya na ŋoot yi nhial ku piny e ke kene ke guɔ nyaai, e kacin pulthɔp tok ku koma toŋ bi nyaai ne looŋ yic, agut te bik kaŋ kedhia jal loi. 19Yen ran toŋ bi toŋ de keelooŋ thiike dhoŋ ku bi kɔc ya wɛɛt ne ye, yeneka bi ya cɔɔl kethi ne ceŋ nhialic: ku ran bi ke ya loi ku weet en ke kɔc, yeneka bi cɔɔl dit ne ceŋ nhialic. 20We ya yɔɔk, Ya na ci luɔi lajiŋduɔn cii luɔi lajiŋ de dugɛɛr ku Parithai wan, ke we ce kɔn lɔ ne ceŋ nhialic.
21We ci wel eke luel kɔc thɛɛr ke piŋ, Yi duɔne ran dɛ nɛk abi thou; ku ran bi ran dɛ nɔk abi tɔ ke tir yine luk. 22We ya yɔɔk, Ya ran ye ɣok ke manhe abi tɔ ke tir yine luk: ku ran bi manhe yɔɔk, Ye Raka, abi tɔ ke tir yine roordit; ku ran luel en, Ye yin ci yuiiu, abi tɔ ke tir yine giɛna de mac. 23Na laare miɔcdu te de kan de koc ku caathe yinom ne aterduɔn we wanmuuth, 24ke yin nyaaŋe miɔcdu ne kat lɔɔm, ku lɔɔr ba kan lɔ mat we wanmuuth, ku jɔl lɔ dhuk jɔl miɔcdu gam. 25Mate we ran nɔŋ we ater ke we ŋoot ke we cath dholic; kɛlke ran de ater bi yi yiɛn duluk, ku bi duluk yi yiɛn bɛny de rem, ku bi yi cuat ɣon de dom. 26Yin ya yɔɔk neyic, Ya yin ci bi puɔl te ken yin cut agut malim.
27Acak piŋ ne ci luel, Ya duɔne lɔ we tiŋ de ran dɛ: 28ku we yɔɔkke, ya raan ebɛn ye tiik oi ne kɔɔr rɛɛc de guɔp ee ya thok ne lɔ ke ye ne yepiɔu. 29Na cɔk nyin cuecdu yi kɔth, ke tuk bei, ku cuate wei: aŋuan bi baŋ toŋ de yiguɔp liu, ku ci yi bi cuat guɔp ebɛn ne giɛnaic. 30Na cɔk ciɛn cuecdu yi kɔth, ke teem bei, ku cuate wei; aŋuan bi baŋ toŋ de yiguɔp liu, ku ci yi bi cuat guɔp ebɛn ne giɛnaic. 31Ee bɛɛr luel eya, Ya ran bi tiŋde puɔl, ke ne gɛɛr waragaŋ de puɔk: 32ku we yɔɔkke, Ya raan ebɛn pɛl tiŋde, ku ken kor, acɔk tiik ye abal: ku ran beer ye thiak te cen puɔk ke moc ee ya muɔny makap.
33Acak bɛɛr piŋ ne ci lɛk keek thɛɛr, Ya duɔne rɔt ye kueeŋ te jiɛi yin, ku kueeŋdu enɔŋ Bɛnydit aba ya loi: 34ku yin yɔɔk, Ya duk rɔt ye kan kueeŋ; ne nhial, yenekee thony de Nhialic; 35ne piny, yenekee dukɛn de yecok; ne Jeruthalem, yenekee pan de Meleŋ dit. 36Ku duk rɔt ye kan kueeŋ ne yinom, ne ke cin nhiɛm tok ye leu ne wel ne ɣer ku ne col. 37Yaka jam, wuɔ Oo, oo; ku, wuɔ Aa, aa: ke juɛkne ne keekake yic e ke ke de kerac.
38We ci ke ci luel piŋ, Ya nyin ne nyin, ku lec ne lec: 39ku we yɔɔkke, Ya duɔke ye teer wene rɛɛc: ku raan ebɛn ran ye gem cuecdu maŋ, ke bɛɛre wɛl gem ciɛm eya. 40Ku na nɔŋ raan piɔu lɔ te de luk ke yin, ku loom alanhdun de yikɔu, ke ne beer alanh diitdun de kɔu laar eya. 41Ku raan ebɛn bi yi cɔk ruɛc ye ne mail tok, ke yin lɔ we ye ne mail keerou. 42Ye raan yiɛn ke ye ŋal yin, ku duɔne yikɔu ye wɛl ran yuit yin.
43We ci ke ci luel piŋ, Ya ye ran rɛɛr ke yi nhiar, ku ye ran nɔŋ we ater maan: 44ku we yɔɔk keek, Ya yaka kɔc nɔŋ we ke ater nhiar, ku yaka lɔŋ ne kɔc ye we cien, ku yaka piath luɔi ka ye we maan, ku yaka lɔŋ ne kɔc ye we luɔi rɛɛc ku yiki we ŋet; 45bak ya wɛɛt ke Wuɔrduɔn tɔ nhial: yen man ye akɔl cɔk nheth ne kɔc rac ku kɔc piath, ku yee deŋ cɔk tueny ne kɔc lajik ku kɔc ce lajik. 46Na yaka kɔc ye we nhiar nhiar, ke ariɔmduɔn ye kan ŋo? Cii dujueer ye loi yila? 47Ku na yaka watmɛthkuɔn muɔth kepɛc, ke we war luɔi de kɔc kɔk ne ŋo? Cii Juurkɔk ye loi yiya? 48Yen we bi ya lajik, ci man de Wuɔrduɔn nhial len jik.
လက္ရွိေရြးခ်ယ္ထားမွု
Mathayo 5: LEKJOT
အေရာင္မွတ္ခ်က္
မၽွေဝရန္
ကူးယူ
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmy-MM.png&w=128&q=75)
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© British and Foreign Bible Society 1940, 2017
Lek Jot de Jecu Kritho 1940 အေၾကာင္းကို ပို၍ သင္ယူပါ။