Joannostir 2
2
Džeļ, 2.
1Ano trito dīves isis bjav ane Kāna Galilejakīri, daij Isuskīri isis doi.
2Isis nin kherdo Iisusos te sikļaibnangīre Leskīre po bjav.
3Te sir narešča vinos, togi daij Iisuskīri rakirla Leske: viņos nāni lenge.
4Iisusos phenela lake: so Mange te tuke, džūli? oščo najavdža štunda Mīri.
5Daij Leskīri phendža slugenge: so phenela Jov tumenge, dova kēren.
6Isis doi šov barune paņingenge janibnange kučika, tardžonas vaše ponoš čistuma Judengīri, kai zadžanas po dui po trin mēri.
7Iisusos phenela lenge: pherdžakiren paņingengīre kučika paņingesa. Te pherdžakirde len žin opre.
8Te rakirla lenge: kana pheren, te janen bjaveskīre bāredīreske. Te jandle.
9Kedi bāredīr sprobidža paņing, savo kerdžapes vinoske (ne jov nadžindža, karīg da vinos; džindle feņu slugi, kon pherdle paņing): Togi bāredīr kherla mlodžikos.
10Te phenela leske: svako mānuš podela vāgo lačo vinos, ne kedi dopjenapen, togi bededīr; ne tu lačo vinos garūdžan žin kana.
11Jake čhudža Iisusos pšeršuma dživenge ane Kāna Galilejakīri te sikadža slava Peskīri; te pačandīne an Leske sikļaibnangīre Leskīre.
12Pošļi dava javdža Jov ane Kapernauma, Kokoro te daij Leskīri, te pšala Leskīre, te sikļaidnangīre Leskīre; te doi jačle nabūt dīvesa.
13Judenge Patradžiņ isis paše, te Iisusos javdža ane Ijerusaļima;
14Te lača, so ane khangīri bikindle gurven, bakren te gulubken, te bešle lovenge parubnangīre,
15Te kerdža čupni šelendir, te vitrādija khangirjatir sāren, te jake bakren te gurven; te love parubnangīrenge roztrušakirdža, te lenge skamina obthurdija.
16Te phendža gulubkenge bikibnangīrenge: len dava darīg, te Mīro Dādesko khēr nakēren targoske khēreske.
17Ke dava Leskīre sikļaibnangīre lipirde, so čhindlo isi: hačkirben vaš Tīro khēr Man hala, (David. gilli 68, 10).
18Pe dava Judi phendle: sai znakensa Tu menge dosikavesa, sir isi Tuke voļa jake kēres?
19Iisusos phendža lenge otpheniben: rozrāven da khangīri, te Me ano trin dīvesa hadava la.
20Pe dava Judi phendle: da khangīri kērdžapes štalvardeš te šov berš, te Tu ano trin dīvesa hadesa la?
21Ne Jov rakirdža Peskīri maseengīri khangirjatir.
22Kedi Jov ušča mulendir, togi sikļaibnangīre Leskīre lipirde, so Jov rakirdža dava, te pačandīne čhinibnange te laveske, savo rakirdža Iisusos.
23Te kedi Jov isis ane Ijerusaļima pe Patradžinako svenkos, togi būt, džīvi dikhindoi, saje Jov kerdža, pačandīne an Leskīro lav.
24Ne Kokoro Iisusos napačandija Pes lenge, vašo dova so džindža sāren,
25Te Leske načhebandija, sobi kon obšvatkinel vaše mānušeske; hai Jov Kokoro džindža, so ane mānušeske.
လက္ရွိေရြးခ်ယ္ထားမွု
Joannostir 2: LET1933
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© British and Foreign Bible Society 1933, 2016