Yohane 8
8
Ŋerep Borikine Mane Yesu Wano Ma Arikoi
1Ŋei ŋerep korop eŋe mateno ariwarekoi, ŋo Yesu eŋe Oliwa Bonagao wake. 2Kepe qaeki sakoka eŋe koso zinge ari Bakom Urumgo wake, ŋei ŋerep korop eŋe sari qeyatkakoi, pakiso, Yesu eŋe pese ket mere so kiyeke kisi maep kito edange. 3Ra rokop don kito ebo ebon so Parisi eŋe bailalaŋ ŋerep mane yau yaup geki marat kakoi, yewa Yesu wano ma ari birakau keuweno ŋei ŋerep deeno okorake. 4Pakiso, Yesu olale rakoi, “Kito ŋebo ŋebon, ŋerep iwa eŋe bailalaŋ maki kakoi, 5so ŋenze ra rokop dongo Moseŋo mo ra togole ŋebonge, ŋerep mane yaline okangi, eŋe maine wesiŋo qeu seukeyake. Paki mo goŋo daleo ramaine?” 6Eŋe don iwa rakoi yemo liwekkakoi, don mataliki dongo bira kaikei wane, ŋo siluŋ Yesu eŋe kuge ket more metineŋo kepo kibi qeke.
7Eŋe yewaka okorau paki, qeso qeson zok qesonkau eŋe kaŋ qae wiyeki paki edane rake, “Ŋinane keuwo ŋine maneŋo borikine mi ma okanmaike, oŋo maine mikep alakane more wesiŋo qeyake.” 8Eŋe koso kuge ket kepo metineŋo kibi manerop qeke. 9Eŋe yale detpi paki, korop saket weku weku ariwarekoi, ŋetne edo alakane saketpi so, ŋei natne eŋe ŋado saket ari warekoi, biraka ari wareu Yesu eŋineka okorake, ŋo ŋerep eŋe yewa eŋineka Yesu wane kaitko okorake. 10Yesu eŋe kaŋ qae wiyeki paki ŋerep qesonka rake, “Ŋerep, ŋei iwa eŋe diyao ari waremami? Maneŋo mi qeliŋkau, iwa okora dongo mi bira ganmaike?”
11Ŋerepŋo rake, “Suwaine, maneŋo iwa mi okoramaike.”
Raki so Yesuŋo olatke, “Eya maine, noŋo yale waka sot turuŋŋonane dongo mi bira ganikale. Arinom paki, borikine koso manerop misuk maikene.”
Yesu Eŋe Kepe Baŋem Eŋane Kiwa
12Yesu eŋe koso manerop ŋei ŋerep edane rake, “Na kepe baŋem eŋane kiwa qelaŋaninerop, mane eŋe naŋane ŋadeno mogatnane sariyake, eŋe gegeinane kiwa togogole marat kayake, so eŋe panamango mane mi geyake.”
13Raki so Parisi eŋe Yesu olale rakoi, “Ge goŋomka geŋone kineŋone eya ra wakone, urata so tanik manikŋone, eya ra qelaŋanmaine, yalinane ŋei eŋe geŋane don ramaine, yewa maine mi malip kaikei.”
14Yesuŋo mainge edane rake, “Mida, ŋo na noŋomka nae kinene welekatne ra wakone ramaile, yemo wele, eya wane ŋei ŋerep eŋe naŋane don dere maine malip kaikei, onoka wane, na diyao ŋine wiye sarikole, yewa detmaile, so diyao arikale, yewa weneŋ detmaile. Ŋine yemo diyao ŋine sarikole, me diyao arikale, yewa mo mi detmami. 15Ŋine yemo kepe ŋei eŋane kine tile tilek urata yewa ma okanmami, ŋo na yemo ŋei mane wane kine mi tilek okanmaile. 16Na ŋei mane wane kine tile tilek urata makaleo, ŋei eŋe naŋane don ramaile maine, eya malipkaikei, eya yemo, naŋane kine tile tilek urata yewa wele okaniyake, onoka wane, na noŋomka urata iwa mi mamaile, Magak talenangi ketkole, eŋe weneŋ narop ge more qesiŋ nanmaike. 17Ŋinŋine ra rokop dongo iwa yale qekoi pamaike, ŋei etkeŋo don wekuka dere raikeik, yewaŋo don wele. 18Na noŋomka nae kine ra wakonmaile, paki, Magak talenangi ketkole, eŋe yale waka naŋane kine ra wakon okanmaike, so ŋere etkeŋo don wele wekuka ra wakonmaite yewaŋo wele.”
19Yale raki Parisi eŋe qesonka rakoi, “Magaŋone ramaine, eyamo eŋe diyao gemaike?”
Yesuŋo mainge iwa yale edange, “Ŋine na mi detluk nanmami, wane ŋine yale waka Magak weneŋ mi detluk kamami, ŋo ŋine na detluk nanikei, yemo ŋine Magak yale waka detluk kaikei.”
20Yesu eŋe Bakom Urumgo wesi katapa metkoi, urum yewao kisi maep kito edangi paki, don iwa korop rake, pakiso eŋano ŋine maneŋo mi ma lukkake, onoka wane, eŋe ma lukkaikei wane nasoineŋo mi bomilekane yeine qeliŋ kakoi.
Na Arikale Yewao Ŋine Maine Mi Arikei
21Yesu eŋe koso manerop ŋei ŋerep edane rake, “Na biraŋune arikale, ŋo ŋine baŋ zuwaŋ nanikei paki, borikine ŋinerop ge mage baŋ seukeu paki, sora gerep wane biŋek okanikei. Na arikale, mat yewao ŋine maine mi arikei.”
22Raki so Yuda ŋei ŋetne eŋe edomka enŋene au rakoi, “Eŋe ramaike, ‘Na arikale mat yewao ŋine maine mi arikei,’ eŋe oŋomka solaine yaku seukeyakane ra ramaike me?”
23Yesuŋo mainge edange, “Ŋine qei kepe wane kutno ŋine wakongoi, ŋo na yemo weti qeli welaine qeliwo ŋine ketkole. Ŋine kepe iwa ŋine sarikoi, ŋo na yemo kepe iwa ŋine mi sarikole. 24Kine yale wane na ŋidane ramaile, ŋine baŋ borikine ŋinerop ge mage seuk warekei. So na mat yewa ŋine ra more mi dere malip kaikeiwo, yemo ŋine baŋ borikine ŋinerop ge mage seuk warekei.”
25Pakiso eŋe qesonka rakoi, “Ge ma?”
Rauso Yesuŋo edane rake, “Na ma? Yemo qei kino ŋidangole, ŋeiwa yewa yemo na iwa, 26na ŋinane sot kine kine zok loutne, eya wane don ra okanmaile, so na sot kine kine ŋine yewa dere wanok okangale, so na maine mi ra wakon warekale, Magakŋo talenangi ketkole, eŋe wekuku, eŋane don yemo wele, na eŋane piino ŋine don kine kine korop detkole, na don weku yewa kepeo ŋei ŋerep korop ra edan okanmaile.”
27Magainane don yalewa ra edangi, eŋe mi detlukkoi. 28Eya wane, Yesuŋo takotke edane rake, “Baŋ ŋado ŋine Ŋei Wawainane Gipole kibego mawa qe kaikei, naso yewao, ŋine iwa yale desikei, na noŋomka Magakŋo biranangi ketkole, na noŋomka yalewa gemaile, eya baŋ detlukkei, so na nae dereretko ŋine kine kine mi ra ma okanmaile, eya midakaka! ŋo siluŋ kine kine ra ma okanmaile, yemo Magakŋo kito ninge, yewa ra wakon okanmaile. 29So magakŋo talenangi ketkole, eŋe narop ge okanmaike, eŋe qeliŋnangi naeka mi ge okanmaile, midakaka, eŋe naso baŋem urata kine kine ma okanmaile, yewaŋo Magak wet pesek ma okanmaike.”
30Yesu eŋe don yale raki, ŋei ŋerep loutne eŋe dere malip kakoi.
Ŋei Ŋerep Mulap Midaine So Qelit Mama Mulap Korop
31Eya wane Yesu eŋe Yuda ŋei donine dere malip kakoi, yewa edane rake, “Ŋine naŋane don dere togogoleka tewekkei, yemo ŋine naŋane dokone aposolo wele okanikei. 32Paki mo ŋine don welekatne eya wane kine desikei, detpi don welekatne yewaŋo siwot ŋungi, sot wane mulap midaine gekei.”
33Raki mo, eŋe don iwa yale mainge olale rakoi, “Ŋene Abraham wane doko ŋosa ŋabokoune, ŋene ŋei mane wane qelit qeqe mane mi okane gekone, wane ge onoka wane don iwa yale ramaine, ‘Ŋine mulap midaine gekei?’ ”
34Rauso, Yesuŋo edange, “Na ŋidanbe detpi, ŋei korop eŋe borikine ma okanmami paki, eŋe borikinane qelit qeqe yauwine okan okanmami. 35Qelit qeqe ŋei yauwineŋo Magak wane mat koto naso baŋem mi geyake, midakaka, Gipole eŋine kotino ŋineŋo yemo naso baŋem yewa ge okanmaike. 36Eya wane Gipoleŋo siwot ŋungi, mulap midaine gekei, yemo ŋine mo welekatne sot wane mulap midaine gekei. 37Ŋine Abraham wane ŋosa ŋabokoune na yewa detmaile, ŋo ŋine koso siluŋ nekukei wane okanmami, onoka wane, naŋane don ŋidan okanmaile, yewaŋo ŋinane koto ŋino mi ketmaike, eya wane. 38Na maganeŋo kine kine sikannange, eya wane done ra wakon okanmaile, ŋo ŋine yemo maga ŋineŋo don so kine kine ŋidange, yewa okan okanmami.”
39Raki so Yuda eŋe Yesu wane don mainge olale rakoi, “Ŋenane asoze yemo Abraham,”
Yesuŋo mainge edane rake, “Ŋine welekatne Abraham wane ŋosakoune ra, yemo ŋine Abraham wane numa mogare urata make, eya wane rokop okanbi rap. 40Na Kaisale wano ŋine don welekatne detkole, don yewa ŋine ŋidan okanmaile, paki mo, ŋine nekukei wane okanmami, Abraham wane masi mane yaline mi okange, midakaka! 41Ŋine yemo magaŋinano masi tanik manik pa okanmaike, yale waka okanmami.”
Eŋe mainge rakoi, “Ŋene Magaze Kaisale eŋe weku, ŋene eŋine gipole koune wele.”
42Yesuŋo edane rake, “Kaisale eŋe welekatne ŋinane magaŋine ra, yemo ŋine naŋane simileŋungi rap, onoka wane na Kaisale wano ŋine ketkole, so ukude na iwa gemaile, na nae wetno mi ketkole, Kaisaleŋo talenangi ketkole. 43Na don ŋidan okanmaile, yewa mo onoka wane detpi koto ŋino mi ketpa okanmaike? Kine yemo iwa yale wane, ŋine naŋane don dere tewekkei wane mi ewek okanmami. 44Ŋine magaŋine Ŋei Borikine eŋane dokoine eya wane ŋine magaŋinane simile yewa dere, eŋane tanik manik yewa mogare arikei wane ŋun okanmaike. Mokaka qei kino eŋe ŋei matali matali geke, eŋe don welekatne yewa ŋadekkake, eya wane eŋane kotino don welekatne yewa mane mi pamaike, eŋe isi don ra okanmaike, yewa yemo eŋane don, eŋe isi ŋei so isi don eya wane magaine. 45Na don welekatne ŋidan okanmailane, ŋine naŋane don dere mi malipka okanmami. 46Ŋinane keuwo ŋine ŋei maneŋo naŋane sot maine marat kayake me? Ŋo na don welekatne ŋidan okanmaileo, yemo onoka wane donne yewa dere mi malipka okanmami? 47Mane eŋe Kaisale wano ŋine sarikeo, yemo ketine motki paki, Kaisale wane don desiyake, ŋo ŋine yemo Kaisale wano ŋine mi sarikoi, eya wane ŋine ket ŋine motpi paki, Kaisale wane donine eya mi detokanmami.”
Abraham Eŋe Mi Wakongi Yesu Eŋe Mokaka Geke
48Yuda ŋei eŋe don mainge Yesu olale rakoi, “Ge Samariya ŋei, Yuda ŋadino qelaŋ gemaine, asu qotkoine yewaŋo geŋane kotoŋono ket gemaike, eya welekatne me?”
49Yesuŋo mainge edane rake, “Na asu qotkoine yewaŋo kotono mi gemaike. Na Magane ewine kitomaile, ŋo ŋine yemo naŋane ewene mi nitomami. 50Na nae eŋet biŋekne ra mawa nagu kalane urataine mi mamaile, eŋet biŋekne ra mawa naniyakane ŋei gemaike, ŋei Weku, eŋe wano wanok ŋei. 51Na ŋidanbe detpi, mane eŋe naŋane don dere teweke mageyake, eŋe mane mi seukeyake, midakaka!”
52Yale raki mo, Yuda ŋei eŋe olale rakoi, “Ŋene ukude mo detlukmaine, ge asu qotkoineŋo kotoŋono gemaike! Abraham mo seukke, so propet eŋe yale waka mo seukkoi, ŋo ge iwa yale ramaine, ‘Mane eŋe naŋane don dere teweke mageyake, eŋe mane mi seukeyake.’ 53Ŋenane magaze Abraham seukke, goŋo Abraham wane rokop yuwan kakenane ramaine me? So propet eŋe yale waka seukkoi, ge daleo okangenane ramaine me?”
54Rauso, Yesuŋo mainge edane rake, “Na noŋomka eŋet biŋekne ra mawa naguwe, naŋane mawa mawaneŋo wele midaine okaniyake, Weku mawa nan okanmaike, eŋe yemo naŋane Magane, eŋe wekuku, ŋine eŋane Kaisale ra okanmami. 55Ŋine eŋe mi detkakoi, ŋo na yemo eŋe mo detka okanmaile. Ŋo na eŋe mi detkamaile, yale rawe rap, yemo na isi ŋei yale ŋinane kimaŋine okanbe rap. Ŋo na welekatne eŋe detluk kamaile paki, eŋane don dere aŋaine tewek okanmaile. 56Ŋinane ŋaboŋine Abraham eŋe naŋane nasone bomileki kayakane batne okange, wane nasone bomileki yewa kake, so wet pesek suwaine detke.”
57Yale raki Yuda ŋei eŋe rakoi. “Ge komaŋone 50 mi okange, ŋo ge Abraham mo kakone me?”
58Yesuŋo mainge rake. “Na rawe detpi, mokaka Abraham eŋe mi wakone geke, naso yewao na mo ge sari gekole.”
59Yale raki, so eŋe wesi ma more qekei wane okanbiso, siuke more Bakom Urumgo ŋine saket arike.
လက္ရွိေရြးခ်ယ္ထားမွု
Yohane 8: onsNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2012, Wycliffe Bible Translators, Inc. All rights reserved.