Márkus 5
5
Yesu nɛŋ yigid ɓı̵́d vu̵ vud fó̧ó̧ nán tóó woolı̵́
(Matío 8:28-34; Lúg 8:26-39)
1Vu̵ ya̧ mam Gálilée dən, hág nán Gɛrazín voolı̵́.
2-5Nán tóó ká du̵u̵lı̵́, yigid ɓı̵́d ká kɔ́gɔ ú̵. Ya mbaalı̵́ woo ká dɨ sa̧a̧m bɛ́ɛ́g vu̵lı̵́. Nán vu̵ hí̧í̧ bi taga ú̵, vu̵ mban né, kóó ɗággı̵́ si̧', vu̵ mban né, moo ká vu̵ baa taga doo kan zaŋ hɨɨ, vu̵ ga"u̵ kan ɗág, a̧máa baa gəə ɗág, to̧'o̧ zaŋ hɨɨ vu̵ á̧ḿ. Nán tóó duu mbannɔ sı̵́ né. Nán pee mbaa yúú bɛ́ɛ́g vu̵lı̵́, vid kan zá̧ga̧ 'waapád, kan yúú gu̵u̵ vu̵, baa wá̧á̧ wa̧ya̧g, zúŋ́ fó̧ó̧ woo kan 'yɛgɛ.
Sey Yesu ka sí zu̵u̵ nɛ́ŋ́ŋı̵́ ná' máa, nán pee vúd ya bɛ́ɛ́gı̵́, yaa woolı̵́.
6Ho̧ la Yesu ɗiilí na'a, kɛ ɗug la kə̧ə̧du̵ la tíŋ́. 7-8Yesu o̧ddu̵: “Yigid ɓı̵́d, a̧m vúd la fó̧ó̧ nán yȩ woolı̵́.”
Nán pee moo dɔg moo yúba, o̧: “Yesu, Waa Tayɨɨ ı̵́ be"ı̵́ woo, mɔ́ hí̧í̧ ȩn kan mílá? Mí sa̧a̧m hȩn kan yɛ́g Tayɨɨ woo nɔ, a̧m si̧'i̧n sá.”
9Yesu duu vigi: “Yéé móó nɛ́nná?”
Duu hí̧i̧du̵: “Yéé míí Dúú, moo vɔ́ ɓu̵u̵ ú̵.”
10Vu̵ baa dȩn Yesu nag moo a nɛŋ bi gbɔ la hág tóólı̵́ sá.
11Hú' ŋgurya tóó ká vu̵ du̵u̵lı̵́ gbo̧o̧ ba'a yúú gu̵u̵lı̵́, vu̵ dɨ hȩn lálı̵́ wu̵lı̵́. 12Ma yigid ɓı̵́d vu̵ ɓá' Yesu, vu̵ o̧: “A̧m gbɔ vɔ́, vɔ́ la dɔ́ fó̧ó̧ ŋgurya yȩ voolı̵́.”
13Yesu ka gbɔd vu̵ hi̧naa máa, yigid ɓı̵́d vu̵ vúd la dɔ́ ŋgurya pee voolı̵́, ma hú' ŋgurya pee vu̵ zə'əy zu̵u̵ haag ɓı̵́d tóólı̵́, vu̵ ay zu̵u̵ mammé, vu̵ nɔɔ wu̵lı̵́. Ŋgurya zaa ka vu̵n ya̧ uzinɛɛre idú ú. 14Nán ŋgurya tu̵lı̵́ vu̵ lúú ɗug la pa moo yȩ kaalı̵́, kan lumnde vu̵lı̵́ á̧ḿ. Dúú vu̵ vúd laa ho̧lȩ́. 15Vu̵ yaa Yesu woolı̵́. Vu̵ ho̧ nán yigid ɓı̵́d ba dɨ kan Dúú pee, dɔ́ sa̧a̧m, mbaa kɛbná. Dú̵ú̵ kɔ́ vu̵. 16Nán ı̵́ ku̵u̵ ho̧ hȩn yȩ máa, vu̵ pá'ad daga vu̵ moo nán yigid ɓı̵́d ba ku̵u̵ vúd woolı̵́, kan moo ŋgurya voo á̧ḿ. 17Nán kaa vu̵ ki, vu̵ dȩn Yesu nag ba a lúú la hág bii yɛlı̵́.
18Sey Yesu ka dɨ ɗáálı̵́ nɛ́ŋ́ŋı̵́ máa, nán yigid ɓı̵́d ba ku̵u̵ vúd woolı̵́ pee dȩnnɔ nag, moo bi laa kannɔ á̧ḿ. 19Ma Yesu sɛ́n né, o̧ddu̵: “A̧m fíí la kíi móólȩ́, nán móó voolı̵́, mɔ́ pá'ad vu̵ hȩn ı̵́ 'yɛ́lı̵́ Tayɨɨ ka kɔ́m, ka ho̧ gíḿ gaam yȩ nɔ.”
20Nán pee ka ki máa, daa laa hág Dekapóllı̵́, bé' hȩn Yesu ka kɔ́ddu̵ yȩ palı̵́ wu̵lı̵́.
Nán 'waapád ku̵u̵ ki moo yȩ máa, kɔ́ vu̵ la ɓá'.
Yesu za̧a̧ wakȩ́ȩ́ tóó ka za' sa̧a̧m woo máa, nim kan wakȩ́ȩ́ waa Yaýru woo nɔmmé
(Matío 9:18-26; Lúg 8:40-56)
21Yesu ka duu lúú mam dən fíí ya kan nɛ́ŋ́ ná' máa, dúú gbo̧o̧ vu̵ sú̵g ya woolı̵́ gur ya̧g mammé wu̵lı̵́.
22 Ɨ́ nii lig sú̵ggı̵́ nán Yúúda voo tóó yaa, yéé woo Yaýru. Ho̧ la Yesu ná', kə̧ə̧du̵ la tíŋ́, 23dȩnnɔ nag, o̧: “Waa kȩ́ȩ́ míí nɔɔ 'waa sú̵'ú̵. A̧m ya ha'adu̵ nag yúlí, a sə́d, a za̧a̧ ó̧.”
24Yesu dɨ laalı̵́ kannɔ.
Dúú ɓu̵u̵lı̵́ na'a vu̵ dugu, vu̵ ɓəəwu̵. 25Wakȩ́ȩ́ tóó ká du̵u̵lı̵́, hȩn kȩȩlȩ́ kɔ́gɔ há̧á̧ ve' wa̧nɓó' zu̵u̵ idú. 26Nuŋ hȩn ndɔ́gɔné ɓu̵u̵lı̵́ na'a gbaŋ gam voolı̵́ nagá, lı̵́d hȩn naa woo vu̵ 'waapád. A̧máa ho̧o̧ ka̧'a̧nɔ né, ho̧o̧ woo ɓu̵u̵ ɓu̵u̵lı̵́ mɛ́ń.
27Ka ki moo Yesu woo máa, dɔ́ ya sa̧a̧m dúú voolı̵́, Yesu woolı̵́ pigim, za' sa̧a̧m Yesu woo, 28moo taa: “A̧n za' sa̧a̧m woo nɔ si̧', ho̧o̧ míí wú̵ń ka̧'a̧nɔ́.”
29Vaŋná hȩn kȩȩlȩ́ woo pee 'wɔ́d zu̵u̵ ya̧g woolı̵́. Aga gaa ho̧o̧ ba ka̧' bi sú̵'ú̵ á̧ḿ. 30Yesu há̧á̧ gaa néélȩ́ tóó ba vúd biilí fó̧lȩ́ sú̵'ú̵, tii daa dúú voolı̵́ sa̧a̧mé, vi vu̵: “Nóo za'an sa̧a̧mɛ́lá?”
31 Waa duulí woo vu̵ hí̧i̧du̵: “Mɔ́ ho̧ dúú vu̵ ɓəəm mbaa ná', ma mɔ́ vi: ‘Nóo za'anáa?’ ”
32A̧máa Yesu tə́gə nɔ́ɔ́ kə̧́ə̧́ daa, moo bi ho̧ nán ka kɔ́ hȩn yȩ nɔ. 33Wakȩ́ȩ́ pee gaa hȩn ka kɔ́gɔ yȩ á̧ḿ, dú̵ú̵ kɔ́gɔ, tu̵u̵, ya kə̧ə̧d Yesu la tíŋ́, o̧ddu̵ hȩn yȩ 'waapád. 34Ma Yesu o̧ddu̵: “Waa kȩ́ȩ́ míí, káḿ 'yɛ́ zó̧ó̧ míílí̧ yɛ, mɔ́ sə́d sú̵'ú̵. A̧m laa nánne. Hȩn ndɔ́gɔné móó a 'wáa la ú̵.”
35Sey ka dɨ moo yȩ moolȩ́ máa, nán tóó vu̵ yaa kíi ı̵́ nii lig sú̵ggı̵́ nán Yúúda voo pee woolı̵́, vu̵ o̧ddu̵: “Waa móó sı̵́ pɛ́lı̵́. Moo ȩn mɔ́ duu 'máá akawwá?”
36Yesu ka ki moo yȩ ka mbaa hȩn leená máa, o̧d ı̵́ nii lig sú̵ggı̵́ pee: “A̧m kɔ́ dú̵ú̵ sá. A̧m 'yɛ́ də́ń zó̧ó̧ móó míílí̧.”
37Yesu há' nán tóó u̵u̵ dɔ́ duu bi sá, séý Piɛ́r vu̵ kan Yaakúbu, kan daa sá̧ŋ́ Yoohá̧na vu̵u̵ dugu də́ń.
38Ku̵u̵ ya̧ la kíi ı̵́ nii lig sú̵ggı̵́ nán Yúúda voo pee woolı̵́ ná' máa, Yesu ki hȩn dɔmné vu̵. Nán ɓu̵u̵lı̵́ na'a vu̵ ká̧ŋ́, vu̵ wá̧á̧ wa̧ya̧g. 39Yesu dɔ́ la o̧d vu̵: “Ví dɔb hȩn ȩná? Ví ká̧ŋ́ ȩná? Waa yȩ nɔɔ né, a̧máa nə nəmme.”
40A̧máa vu̵ hı̵́'ɨ Yesu.
Yesu ka ho̧ ná' máa, nɛŋ vu̵ vud gɔ́ŋ́ 'waapád, ɓɛ waa ba'a, kan waa na'a, kan nán ı̵́ vu̵n laa á̧ḿ pee vu̵, vu̵ dɔ́ la ya vu̵n hu̵u̵ waa peelı̵́.
41Yesu ka ma' dɔg waa pee nagá máa, o̧ddu̵: “Talíta kúm.” Moo yȩ tú' “Waa kȩ́ȩ́ míí, mí o̧m a̧m lúú dɔggú̵.”
42Wakȩ́ȩ́ waa pee lúú dɔg vaŋná, bé' 'yȩmné, moo ká dɨ kan ve' wa̧nɓó' zu̵u̵ idú.
Ku̵u̵ ho̧ hȩn sa̧ga̧ gbo̧o̧ yȩ máa, kɔ́ vu̵ la ɓá'. 43Yesu tiŋ vu̵, u̵u̵ o̧d nán tóó sá. Duu o̧d vu̵, u̵u̵ pú̵gu̵ hȩn lálı̵́ɨ.
လက္ရွိေရြးခ်ယ္ထားမွု
Márkus 5: DIINT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouveau Testament en Dii © Bible Society of Cameroon, 2001.