Márkus 16
16
Yesu ním nɔmmé sú̵'ú̵
(Matío 28:1-8; Lúg 24:1-12; Yoohá̧na 20:1-10)
1Zá̧ga̧ asawə ka ya̧a̧ sú̵'ú̵ máa, Maaríi Magdaláa vu̵ kan Maaríi Yaakúbu na' woo, kan Salomɛ́ɛ vu̵ fȩȩ duusá̧n tóó moo bi la so̧' fó̧ó̧ Yesu woo wu̵lı̵́. 2Zá̧ga̧ aladdı̵́ vu̵ laa bɛ́ɛ́gı̵́ ya̧g ka̧'a̧m hí̧m. Zá̧ga̧ ye' dɔgɔ té'. 3Vu̵ víń ya voolı̵́: “Nóo wú̵ń la vbíid ba ví 'yɛgɛ yúú bɛ́ɛ́gı̵́ yȩlá?”
4Ku̵u̵ kuu nɔ́ɔ́ máa, vu̵ ho̧ 'yɛgɛ gbo̧o̧ pee vbíí lúú sú̵'ú̵. 5Vu̵ dɔ́ bɛ́ɛ́g tíŋ́, vu̵ ho̧ náásaa tóó mbaa nag nánné, dɔ́ sa̧a̧m heená. Dú̵ú̵ gbo̧o̧ tóó kɔ́ vu̵. 6O̧d vu̵: “I kɔ́ dú̵ú̵ sá. Ví soo Yesu nán Naazaréd ı̵́ kú̵u̵ ga"u̵ la' vbagadı̵́ má nɔ. Níḿ nɔmmé sú̵'ú̵, yɛlı̵́ pɛ́lı̵́. I ho̧ sı̵́ ya ku̵u̵ hu̵u̵wu̵ wu̵lı̵́ má nɔ. 7A̧máa i la o̧d waa duulí woo vu̵, ví o̧d Piɛ́r á̧ḿ, wú̵ń ɓə́ə́ laa ví la hág Gáliléelı̵́, víń ho̧go̧ wu̵lı̵́ kɔ́ ı̵́ ká o̧d ví máa wɔgɔ.”
8Vu̵ vúd bɛ́ɛ́gı̵́, vu̵ lúú ɗug kan dú̵ú̵, fó̧ó̧ tu̵u̵ vu̵. A̧máa vu̵ o̧n nán tóó hȩn woo né sá̧ḿ, moo dú̵ú̵ kɔ́ vu̵ ú̵.
Yesu tú'ud Maaríi Magdaláa fó̧ó̧
(Matío 28:9-10; Yoohá̧na 20:11-18)
[:b 9Yesu níḿ nɔmmé ya̧g ka̧'a̧m hí̧m aladdı̵́. Dəŋ tú'ud Maaríi Magdaláa fó̧ó̧, Maaríi ı̵́ Yesu ka nɛŋ yigid ɓı̵́d vu̵ vud fó̧ó̧ woolı̵́ gúndɛm pee nɔ. 10Wu̵ pa̧ŋ moo woo la o̧d daga ı̵́ kú̵u̵ mbaa kan Yesu á̧ḿ máa vu̵. Zó̧ó̧ ká ví̧i̧ vu̵, vu̵ dɨ ká̧née.
11A̧máa sey ku̵u̵ ki Yesu ba níḿ nɔmmé sú̵'ú̵, Maaríi ba ho̧go̧ sú̵'ú̵ máa, vu̵ fȩȩn moo woo né.
Yesu tú'ud waa duulí woo tóó vu̵ idú fó̧ó̧
(Lúg 24:13-35)
12Pig woolı̵́ máa, waa duulí woo tóó vu̵ idú, vu̵ dɨ laalı̵́ lumndelı̵́. Yesu tii fó̧ó̧ maa vu̵. 13Vu̵ á̧ḿ, vu̵ fíí ya o̧d daga vu̵, a̧máa vu̵ fȩȩn moo voo né á̧ḿ.
Yesu tú'ud waa duulí woo vu̵ wa̧nɓó' zu̵u̵ dágá fó̧ó̧
(Matío 28:16-20; Lúg 24:36-49; Yoohá̧na 20:19-23; Debtere ba'ad waa ba'ad voo nɔ 1:6-8)
14Sey tóólı̵́ waa duulí ı̵́ wa̧nɓó' zu̵u̵ dágá ku̵u̵ dɨ hȩn lálı̵́ máa, Yesu vúd maa vu̵, sée vu̵ moo moo faalı̵́ voo kan tɔ́g ŋgó̧ó̧lȩ́ voo yȩ nɔ, moo ku̵u̵ fȩȩn moo nán ku̵u̵ ho̧go̧ yȩ voo né má nɔ.
15Pig woolı̵́ máa, o̧d vu̵: “I laa ya 'waapád, ví pad nán 'waapád vu̵ moo to̧o̧ 'maŋŋɨ. 16Nán a 'yɛ́ zó̧ó̧ woo míílí̧, u̵u̵ woowu̵ mam Tayɨɨ woo tée, wú̵ń sə́ddú̵. A̧máa nán ı̵́ a 'yɛ́n zó̧ó̧ woo míílí̧ ní tée, Tayɨɨ wú̵ń sə̧'ə̧du̵ moo. 17Nán ku̵u̵ 'yɛ́ zó̧ó̧ voo míílí̧ máa, vú̵ń kɔ́ hȩn sa̧ga̧ ı̵́ tóó yȩ vu̵ ú̵. Vú̵ń nɛŋ yigid ɓı̵́d vu̵ kan yɛ́g míí, vú̵ń moo ya̧g 'maŋ vu̵. 18Vú̵ń ma' bɨɨg vu̵ kan nag. Ʉu̵ zɔ nɔŋŋɨ si̧', vú̵ń kɔ́n vu̵ hȩn tóó né. Vú̵ń ha'ad nán ho̧o̧ vu̵ nag yúlí, ho̧o̧ wú̵ń ka̧' vu̵.”
Yesu vȩ́' dɔg Tayɨɨ woolı̵́
(Lúg 24:50-53; Debtere ba'ad waa ba'ad voo nɔ 1:9-11)
19Sey ı̵́ 'yɛ́lı̵́ Yesu ka o̧d vu̵ moo yɛ 'waa máa, Tayɨɨ daa ɓɛ dɔgɔnɔ be"ı̵́, 'yɛ́gɛ nag nán woolı̵́. 20Waa duulí woo vu̵ la pa moo yȩ ya 'waapád. Ɨ́ 'yɛ́lı̵́ Yesu sú̵g kɔ́ ba'ad kan vu̵, pú̵ vu̵ néélȩ́ hȩn sa̧ga̧ vu̵ kɔ́lı̵́, moo nán u̵u̵ gaa ba moo yȩ́ńne.]
လက္ရွိေရြးခ်ယ္ထားမွု
Márkus 16: DIINT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouveau Testament en Dii © Bible Society of Cameroon, 2001.