Mak 15
15
Iesu i Ti na Mata Pailat
Metiu 27:1-2,11-14; Luk 23:1-5; Jon 18:28-38
1Na biingbiing saksak, foron laulaumet na pris, foron famfamu, foron tom fafausum ini nagogon turan foron laulaumet tikii ken fan Iudaia, ri ka kiis turim ke ri ka tapiek ini nenge wolwol. Ri ka kabet iun lima Iesu ke ri ka lame ufu usuf Pailat.
2Pailat ka diik u aragii, “Be, o king ken fan Iudaia?”
Iesu ka kiliis u le, “Arae tom o use u.”
3Foron laulaumet na pris ri ka tiu u ini ifuun e tier. 4Ke Pailat ka diik u sabin aragii, “Be, biil ti orek kiam una kiliis ri? Par u, ri tiu wo ini ifuun e tier.”
5Isau le Iesu biil i to kiliis u ini ti orek, pesu Pailat ka wolpane.
Pailat i Somangat isi rin Fakulkulik Iesu na Aupaket
Metiu 27:15-26; Luk 23:13-25; Jon 18:39—19:16
6Na foron bet tikii na Ngasa na Liuliu Kulef, Pailat i fasuu ufu itikii la e kaltu tina kamkabet ae fanu ri sising pes u. 7Na bet ae, nenge kaltu asa e Barabas, i e neng lon fanu ae ri fapti ta nenge tara fapaket. Ri kiis tikii na kamkabet, wara le ri siimete ta fale fanu. 8Gur na fanu ri ka la usuf Pailat, ke ri ka sising u isi in fasuu tikas ae i kiis na kamkabet, arae tom i tel u la.
9Ke Pailat ka diik ri aragii, “Arafah, gam ier le ian fasuu ufu King ken fan Iudaia usuf gam?” 10Ka diik ri arae, wara le ka usum ta le foron laulaumet na pris ri ta ufu Iesu una lima, ini wolwol laulau sau kiri. 11Isau le foron laulaumet na pris ae, ri ka siingsiing orek na balan gur na fanu ae le rin sising Pailat isi in fasuu Barabas.
12Pailat ka diik ri sabin aragii, “Sani ian tel u ini ier ae gam foteng u le King ken fan Iudaia?”
13Ke ri ka perek aragii, “Fakulkulik u na aupaket!”
14Pailat ka diik sabin aragii, “Isi sah? Sani i tel fager ta u?”
Isau le ri ka lala perek mang tom le, “Fakulkulik u na aupaket!”
15Pailat i ier isi falaes fanu, pesu ka fasuu ufu Barabas usuf ri. Ka fas foron tom fapaket isi rin fuk Iesu, nami ka ta ufu isi rin fakulkulik u na aupaket.
Foron Tom Fapaket ri Morot ini Iesu
Metiu 27:27-31; Jon 19:2-3
16Foron tom fapaket ri ka lame Iesu una tara fel ae Pailat i kiis la lo, ke ri ka tawi turim foron tom fapaket tikii. 17Ri fakilkiliis u ini dolon kaen melmelek, ke ri ka tel nenge bangbang#15:17 Kaen melmelek ke bangbang ifasi arae kilkiliis ken foron king. ini finau ae imel e si ma ri ka luun u na paklu. 18Ke ri ka faorek pes u aragii, “King ken fan Iudaia, mangiam!” 19Ke ri ka famam paket paklu ini nenge akan au, ri ka ubis u ma ri ka lemlem ilepul na mata arae ri bulat lo. 20Aunbiing ri ka morot ta ini, ri ka kasis ufu dolon kaen melmelek lo. Ri ka fakilkiliis fafis u ini kilkiliis kia tom, ke ri ka lame fasuu u isi rik fakulkulik u na aupaket.
Ri Fakulkulik Iesu na Aupaket
Metiu 27:32-44; Luk 23:26-43; Jon 19:17-27
21 #
Rom 16:13
Awii tole sal, foron tom fapaket ri ka tafe nenge kaltu tina Sairini asa e Saimon, tama Aleksenda ru e Rufus. I la tina nenge maleh isi in tatkau una Ierusalem. Ke foron tom fapaket ri ka fangongos u isi in kusep aupaket ke Iesu. 22Ri ka lame Iesu una falifu ae ri foteng u ini Golgota. Kamtinan as ae le, Salan Tuan Paklun Kaltu. 23Ri ka ta wain sing i, ae ri ikis u turan bultan mir,#15:23 Mir i nenge matngan au ae bulta ifuun e foim lo. Aunbiing ri ikis u turan wain, ka tapiek marasin una tel ufu ngungut isau le biil i to umin u. 24#BukSong 22:18Ri ka fakulkulik ta u na aupaket, ke ri ka fangfang laki isi se tom in kep ti kilkiliis kia.
25Na isiu e aunbiing na biingbiing, ri ka fakulkulik u na aupaket. 26Ri ka siit orek ae ri tiu u ini bae na olon aupaket kia, aragii:
king ken fan iudaia.
27-28 #
Aisaia 53:12
Ke ri ka fakulkulik iwu sabin e tom sisii tura na iwu e aupaket, neng na mia ke neng na kaisa.#15:27-28 Fale tom tasum na Buk na Gogoh ri wol le fale orek biitom na rina igii, i aragii: Ri tel u arae una fasuut orek ae na Buk na Gogoh, le, “Ri par u arae nenge tom lek nagogon.” 29#BukSong 22:7; 109:25; Mak 14:58; Jon 2:19Fanu ae ri liuliu ufu Iesu la, ri ka famam orek laulau ulo, ri ka famam pakpakte paklu ri ulo ke ri ka tarah, “Uui! Wo, ae o tara ta le on rabat ufu Felun Tunmapek ma ok fapti fafis u na in tuul e biing, 30pu mang tinbae na aupaket, ke ok faliu fafis wo tom!”
31Foron laulaumet na pris ke foron tom fafausum ini nagogon sabin, ri ka morot ini Iesu na fatpoto ri tom aragii, “I faliu fal, isau le biil ifasi in faliu fafis u tom! 32Male i Mesaia, King ken fan Israel, ke ik puh tinbae na aupaket isi kerek par u ma kerek unune lo.” Ke iun kaltu sabin ae ri fakulkulik ta ru na iun aupaket na iun baba, ru ka orek laulau ulo.
Iesu i Met
Metiu 27:45-56; Luk 23:44-49; Jon 19:28-30
33Na sangful ini u e aunbiing na siat, falifu tikii ka kubunor, papang na ituul e aunbiing na efef. 34#BukSong 22:1Ma na ituul e aunbiing, Iesu ka ngangeh aragii, “Eloi, Eloi, lama sabakatani?” Kamtinan orek ae i aragii, “God kiak, God kiak, isi sa o ka la koseng iau?”
35Aunbiing fanu ae ri sotsoti la na fatat ri ongen u, ri ka tarah, “Ongen u, i tawi Elaija.”
36 #
BukSong 69:21
Nenge kaltu ka filau ma ka kep nenge tier ae i duup pes dan la, ka falum u na wain ae i mingin, ka tu u na nenge au ke ka sik u una mawe isi Iesu ik duup u. Ke ka tarah, “Nene, kerek par u la bii, tarama Elaija ka la isi fapu u.”
37Iesu ka lala ngangeh, ke ka fut paket mangia.
38 #
KisimBek 26:31-33
Ke tara kaen na Felun Tunmapek ae i balo kale mua ae na palga, ka tamsih tinbae na mawe ubuif sikit na pikli. 39Aunbiing kabisit ken foron tom fapaket ae i soti ta na famu na aupaket ke Iesu, i ongen Iesu i ngangeh ma ka par matngan minet kia, ka tarah, “Tekentu kanaka, kaltu igii i e Kalalik ke God.”
40 #
Luk 8:2,3 Fale kelefin ri soti ta tina tapak ma ri ka alim foron tier ae i tapiek. Awii na fatpoto ri e Maria Makdalin, Salome ke Maria tina fabiro Jems ru e Joses. 41Tuul fifin igii, rituul mi la lo Iesu aunbiing i kiis na Galili isi lupes u. Ke ifuun e kelefin sabin ri la turim ta tura una Ierusalem, ri sabin tinaiwa.
Ri Faborong Pununfo Iesu na Matanfat
Metiu 27:57-61; Luk 23:50-56; Jon 19:38-42
42-43Biing ae, i e biingen geges wara le i biing famu na Biingen Mangeh. Josep tina Arimatia, i neng lon foron famfamu ken fan Iudaia ae ri bulat la lo, ma i nene la isi matanfuntih ke God. I kep balamas ma ka la usuf Pailat na efef aunbiing pisiih biil biitom i sup ke ka sising u isi pununfo Iesu. 44Pailat ka bitit aunbiing i ongen u le Iesu ka met tah. Ka kam pes kabisit ken foron tom fapaket ke ka diik u aragii, “Tekentu tom le Iesu ka met tah?” 45Pailat ka ongen ta orek ken kabisit ae, ke ka mangte ufu pununfo Iesu usuf Josep. 46Josep ka fiil nenge rokap na kaen, ka fapu pununfo Iesu ke ka afit u ini. Namih, ka fakau u na matanfat una luun minet ae ri tuung ta u na balan fat, ke ka fabulbulis nenge tara fat una babat kale matanfat ae. 47Maria Makdalin ru e Maria tina Joses, ru par falifu ae ri faborong ta Iesu lo.
လက္ရွိေရြးခ်ယ္ထားမွု
Mak 15: BJP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2015, 2021 Wycliffe Bible Translators, Inc. All rights reserved