Cenisihs 9
9
Kishemanitoo Kii'ahshotamawaatc Noowawan
1 #
Gen 1.28. Kishemanitoo tahsh okii ishi shawenimaan Noowawan (Noah) ciminohsenitc okosihsini kaye ekii'inaatc, “Nihtaawikinaawahsok cini paahtiinoyek, misiwe ahkiink cini ayaayek. 2Kahkina hsa aya'aawihshak o'omaa ahkiink eyaawaatc, kahkina kaye pinehshiinshak pemihsewaatc ishpimink; kahkina kaye kaapimootewaatc mihtahkamik, kahkina kaye kinooshek anaamiintim eyaawaatc, ninka ishi'aak cikohtaaneniminekwaa, cikakwaanihsakeniminekwaa kaye; kahkina hsa kiinawaa kimiinikoowisim citipenimekwaa. 3Kahkina kekoon wehkawiimakahk pemaatahk kimiinininim ciomiicimimiyek kaakii ishi miininakookipan kekoonan nehtaawikinkin ciomiicimimiyek. 4Peshikwayek tahsh kekoon kika manaa miicim, mii 'iwe wiiyaahs kaamiskwiiwank, aaniihsh miskwiink onciimakan pimaatisiwin. 5Kiishpin tahsh awiya nihshiwetc, niin hsa ninka tootawaa kewiin cinihsintc, miitahsh peshikwan kewiin aya'aawihsh keshi nihsintc kiishpin nihsaatc awiyan pemaatisinitc. 6#Exo 20.13; Gen 1.26. Awenen hsa piko nihsaatc awiyan, ininiinaank hsa kewiin taonci nihsaakaniwi, aaniihsh Kishemanitoo otishinaakosiwinink okii ishi'aan ininiwan.”
7 #
Gen 1.28. “Kiinawaa tahsh wiin nihtaawikinaawahsok cini paahtiinoyek, mooshkineshkamok o'o misiwe ahki.”
8Miitahsh kaye kaa‑ani'inaatc Noowawan okosihsini kaye, 9“Inashke hsa noonkom niwii ayiitahtoon keshi ahshotamaawinakook, iki kaye kipiiwesiimiwaak keni ayaawaatc, 10kahkina hsa ko aya'aawihshak kaawiiciiwinekwaa, pinehshiinshak, awahkaanak, kahkina pikwaci aya'aawihshak, iki hsa kahkina kihci ciimaanink kaawiicikapaaminekwaa, kahkina hsa piko pemaatahk o'omaa ahkiink. 11Miitahsh o'o eonahtooyaan keshi ahshotamaawinakook; kaawiin hsa wiihkaa miinawaa kahkina awiyak pemaatisiwaatc kaashi nihkipashiwemakahk nipi taonci nihshiwanaatisihsiiwak. Kaawiin miinawaa wiihkaa tanihkipiihsinoon o'o ahki cinihshiwanaatahk.” 12Miitahsh kaa‑ani ihkitotc Kishemanitoo, “Miitahsh o'o keshi kihkinawaacihtooyaan i'i kaashi ahshotamaawinakook, iki kaye kahkina aya'aawihshak kaawiiciiwihkwaa, iki kaye kahkina keni ayaanihke pimaatisiwaatc. 13Ninka onahtoon hsa kiisihsweyaap wahkwiink, miitahsh i'i ekihkinawaacihtooyaan o'o kaashi ahshotamawakwaa o'omaa ahkiink eyaawaatc. 14Ahpii tahsh iko oshihtooyaan ahki cininkwahkwahk, kiisihsweyaap tahsh naakwahk, 15ninka maamihkaw itahsh aaniin eshi ahshotamaawinakook, i'i kaye kahkina kekoon pemaatahk. Kaawiin hsa miinawaa wiihkaa nipi tanihkipacikemakahsinoon cinihshiwanaatahk kahkina kaapimaatahk. 16Ahpii tahsh iko naakwahk kiisihsweyaap wahkwiink, waapantamaan itahsh, ninka maamihkaw nehpic iko kaashi ahshotamaawinakook kahkina kaapimaatahk o'omaa ahkiink.” 17Miihsh kaa‑ani ihkitotc, “Miitahsh i'i eshi kihkinawaacihtooyaan i'i ahshotamaakewin kaakii onahtamawakwaa kahkina kaapimaatahk o'omaa ahkiink,” okii'inaan.
Noowa, Okosihsa' Kaye Ehtashimintwaa
18Noowa (Noah) tahsh okosihsa' kihci ciimaanink kaaonci kapaanitc o'o kii‑ishinihkaasowa': Shem (Shem), Hem (Ham), Cepat (Japheth) itahsh. Hem tahsh Kenan (Canaan) kii‑ishinihkaasowan okosihsan. 19Miiwa' tahsh o'o Noowa okosihsa' kaakii nihsinitc (3), miitahsh i'imaa kaaonciinitc kahkina pemaatisinitc misiwe ahkiink eyaanitc.
20Noowa tahsh kiimaacii kihtike, ekii kihtikaanaatc shoomina'. 21Eminihkwaatank tahsh shoominaapooni, kiiani kiiwashkwepii. Opakwaanekamikonk tahsh kiihpimihshin ekiihkikihkonayehsik. 22Hem tahsh kaakii okosihsitc Kenan okii waapamaan oteten ekikihkonayehsinik. Miihsh kaaishi wiintamawaatc minciniish wiicihkiweya' akwaciink eyaanitc. 23Minciniish itahsh shaakooc wiicihkiweya' okii otaahpinaamini kashkiikiiwin otaanaank inahke otinimaakaniwaank ekii ininamowaatc. Kiiashe'ohsewa' itahsh ekii akwana'waanitc otetewaani ekikihkonayehsinik. Ninkoci tahsh kii‑inihkweniwa' ciwaapamaahsinik oteteni ekikihkonayehsinik. 24Ahpii tahsh Noowa kaa‑aahtepiitc, ekihkentank itahsh aaniin kaahtootaakotc ini maawac weshiimenshimaawinitc okosihsan, 25mii'o kaaihkitotc,
“Taka tamacakimaa Kenan (Canaan)!
Oka pamiihtawaa' hsa wiicihkiweya'.”
26Miitahsh kaye kaa‑ani ihkitotc,
“Tamiikwehciwenimaa kaaTipenciketc,
Shem kaaoKishemanitoomitc,
taka Kenan oka pamiihtawaan Sheman.
27Taka Kishemanitoon Cepat (Japheth) okani paahtiino'ikoon!
Taka Cepat opiiwesiima'
okani tipentamini eshitaanitc Shemink wenciinitc.
Cepat itahsh kaye oka pamiihtaakoon Kenanan,”
kii‑ihkito Noowa.
28Kaaishkwaa nihkipiinik tahsh nihswaahk naanimitana (350) tahso pipoon kiihpimaatisi Noowa. 29Noowa tahsh shaankahswaahk naanimitana (950) maamaw kiihtahso pipoonwe, miihsh kaakii ishkwaa pimaatisitc.
လက္ရွိေရြးခ်ယ္ထားမွု
Cenisihs 9: OJBR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ojibwe Shorter Bible (Roman Script) © 2008 Canadian Bible Society