Jenesis 12
12
Galow Abram
1An Arloedh a leveris dhe Abram, ‘Ke jy mes a'th pow ha dhiworth dha gerens ha dhiworth chi dha das bys y'n wlas a vynnav hy diskwedhes dhis. 2Ha my a vynn dha wul kenedhel vras, ha my a'th vennik ha gul dha hanow meur y vri, ha ty a vydh bennath: 3Ha my a vennik an re a wra dha venniga jy; ha neb a'th villik#12:3 a'th villik: Ow siwya an Septuagint ha'n Vulgat. Ebrow a wra dha dhisdaynya. a wrav vy y villiga. Ynnos jy y fydh benniges oll teyluyow an nor.’ 4Ytho, Abram eth dell wrussa an Arloedh leverel dhodho, ha Lot eth ganso. Abram o pymthek bloedh ha tri-ugens pan eth yn-mes a Haran. 5Hag Abram a gemmeras Saray y wreg ha Lot, mab y vroder hag oll aga fyth re wrussens kuntelles, ha'n enevow re wrussens kavoes yn Haran, hag i eth yn-kerdh rag mos dhe bow Kanan; ha dhe bow Kanan y teuthons i. 6Hag Abram a dremenas der an tir bys y'n tyller#12:6 tyller: Yw dhe styrya tyller sans. Shekem, bys yn derwenn More. Hag yth esa an Kananysi y'n pow y'n termyn na. 7Ha'n Arloedh a omdhiskwedhas dhe Abram ha leverel dhodho, ‘My a vynn ri an tir ma dhe'th has jy.’ Ytho ev a dhrehevis alter dhe'n Arloedh neb a omdhiskwedhas dhodho. 8Ena ev eth alena bys yn menydh a'n est dhe Bethel ha settya y dylda yn-bann yntra Bethel y'n howlsedhes hag Ay y'n est, ha drehevel ena alter dhe'n Arloedh ha gelwel war hanow an Arloedh. 9Hag Abram a omdennas hag eth yn-rag troha'n Negeb.
Abram ha Saray yn Ejyp
10Mes yth esa divoetter y'n pow; ytho Abram eth yn-nans dhe Ejyp dhe driga ena, rag bos an divoetter poes y'n pow. 11Pan dheuth nes rag entra yn Ejyp, yn-medh ev dhe Saray y wreg, ‘Otta, my a woer dha vos benyn teg dhe weles. 12Ytho, pan wrello an Ejyptianys dha weles, i a lever, “Homm yw y wreg”; hag i a wra ow ladha vy, mes i a wra dha asa jy yn few. 13Lavar, my a'th pys, dha vos ow hwoer, may fo dhe well genev a-barth dhis, ha'm enev a vew a'th wovis jy.’ 14Pan dheuth Abram dhe Ejyp, an Ejyptianys a welas an venyn, hi dhe vos pur deg. 15Pennsevigyon Faro a's gwelas ynwedh ha'y gormel a-dherag Faro; ha'n venyn a veu kemmerys a-berth yn chi Faro. 16Ev a dhyghtyas Abram yn ta a'y govis hi, hag y feu dhodho deves, oghen, asenes, gwesyon, maghtethyon, kasegi-asen ha kowrvergh. 17Mes an Arloedh a blagyas Faro ha'y ji gans plagys bras drefenn Saray, gwreg Abram. 18Ha Faro a elwis Abram ha leverel, ‘Pyth yw hemma a wruss'ta gul dhymmo? Prag na wruss'ta leverel dhymm hi dhe vos dha wreg? 19Prag y hwruss'ta leverel, “Ow hwoer yw hi”, may hwrugavy hy hemmeres avel gwreg? Ytho, otta dha wreg. Kemmer hi, ha ke yn-kerdh.’ 20Ha Faro a erghis dh'y wer yn y gever hag i a'n dannvonas yn-kerdh, ha'y wreg ha pup-tra esa dhodho.
လက္ရွိေရြးခ်ယ္ထားမွု
Jenesis 12: ABK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Kesva an Taves Kernewek 2004, 2024
© Cornish Language Board 2004, 2024