KAHBHAO 14
14
Abrami Lot Yangpü
1Shinar am Amraphel ongpa, Ellasar am Ariokh ongpa, Elam am Kedorlaomer ongpa, hatü Goiim am Tidal ongpa hathülei nyih kü jomi, 2Sodom am Bera ongpa, Gomorrah am Birsha ongpa, Admah am Shinab ongpa, Zeboiim am Shemeber ongpa, hatü Bela (Zoar) amei ongpa hathü mü hokteke. 3Hapa ongthülei veshanthü sheptü Siddim (lappai, Dipü Yungching)#Dipü Yungching kü, “Hüm Yungching” sheiyao enyüke. Kahjilei thaiteke. 4Bong anpünyi thahshi jom Kedorlaomer phang kü nyu, shejao bong anpüjempabü kü jomi khüei yaongteke. 5Bong anpüalipabü kü Kedorlaomer hatü büpa mü nyupü ongthü peiyei Ashteroth-Karnaim leipü Rephaim, Ham leipü Zuzim, Shaveh-Kiriathaim leipü Emim, 6hatü phaüshang kahmük Seir leipü Hor kübü heihdaipü jahpan jung kü nyupü Elparan thahshi, 7hapheikü nyokei leiyei En-Mishpat (lappai, Kadesh) lemei heih, hatü Amalek kahdok kemei hatü Hazazon Tamar kü nyupü Amor kahdok kemei neüteke.
8Hapheikü Sodom ong, Gomorrah ong, Admah ong, Zeboiim ong, hatü Bela (Zoar) ong hathü daiyei Siddim Kahjilei, 9Elam am Kedorlaomer ong, Goiim am Tidal ong, Shinar am Amraphel ong, hatü Ellasar am Ariokh ong, hathü ongthü ali khüei ong nga-i hokhen show ling. 10Siddim Kahjilei müh kohpü kahsha longi nyupü nangkü Sodom hatü Gomorrah ong nyi nyaidai, hatü shennyak hanei halei vü, hatü hanei shangching lemei nyaidai. 11Hathü ong ali-i Sodom hatü Gomorrah amei douthü, hatü hahying kemei shetei leidai. 12Jomi Abramei chenaü Lot Sodomei nyupü nangkü büpa hatü mophimo kemei yah-ei lüdai.
13Yangei daipü shennyak hüki Hebrew am Abram touei peiyei büpa kü ha jung ejateke. Shaang Abramü Amor am Mamrelei longkham püchong yopailei nyu. Mamre hatü chenaü Eshkol hatü Aner hathüyü Abramei mongjempathü nyu. 14Mechem Abrami chenaü yepei lüdaipü jung danpa, büpai shemei bühpü veshanthü jom 318 mütü Dan thahshi changei dai. 15Yanüng Abrami büpalei veshanthü hantü Damaska kü apshaphi Hobah thahshi hathü jühen changei dai. 16Büpai douthü peü dang, hatü chenaü Lot hatü büpalei mophimo mü nyühathü hatü lebü shennyakthüao yah-ei lei.
Melkizedeki Abram kü Moihimanpü
17Mechem Abrami Kedorlaomer hatü büpa mü nyupü ongthü neütü leijapa, Sodom ongpai büpa mü pongteinüng Shaveh Kahjilei (lappai, Ongpalei Kahji) heihteke. 18Hahepak kü Salem#Salem lappai, “Jerusalem” kü epü khih. ongpa Melkizedeki Abram kü aan hatü yiü deiyei shuoh. Büpayü Jaipüba Kahvangei ngongpa nyuteke, 19hatü büpai Abram kü moihimanei e:
“Kahdok vangsho Lingbü Jaipüba Kahvangi Abram kü moihimantuh.
20Nüngei lak kü vepathü shuohpü Jaipüba Kahvangei men longtuh.”
Hahepak kü Abrami büpa kü lemphü kübü ankhong shuohteke.
21Hahepak kü Sodom ongpai Abram kü, “Ngelei nanglakthü peü ngei kü yahshih, ha jeiyei douhinang yahhahtuh” shei e. 22Shejao Abrami, “Shembüpa Jaipüba Kahvang, kahdok vangsho Lingbü kü ngei lahtüktih. 23‘Ngei homei Abram shemmei leihüpeih’ shei nüngi ne-ehen shingvaishi ngei nüngei vilah hükao nevaijü lathuh vü hükao neyahpih. 24Ngei payü meheyao neyahhahpih, shejao nethethüi mehe hah, hatü ngei mü daipü Aner, Eshkol hatü Mamre hathülei phaihan nyemyahhah” shei eteke.
လက္ရွိေရြးခ်ယ္ထားမွု
KAHBHAO 14: PHOMBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.