यहून्नो 19

1दिरंङ पिलातुसे सेनिकातिंङ हुकुम रेंई कि यीशु बि रेंज़ा शिलांई दंङ दोबि कोड़ा बाएक्तिन। 2सैनिका ज़ि छ्वाक्तु ताज लचे दोऊ पुंज़ो टोईच़ी केरिरे, दंङ दोबि बेंगनी रंगो खमज़े लगातिरे, 3दंङ दोऊ कछंङ अंज़े कुट्री लेहतिर, “हे यहुदी मीहतु रज्ज़ा नमस्कार।” दंङ दोबि चटे केहरिर।

4दंङ पिलातुसे यच़ाह धह्तेका हुंच़ा मीह रंङ साते कुतोह, “खंणुई, गेह दोबि यच़ाह केहतु कछंङ धह्तेका हपातग; कि केतिंङ पता लेह्पोतो कि गिह्बी दोऊ अंद्रेग छले गलती माह तंङफा।”

5दंङ यीशु छ्वाक्तु ताज ए बेंगनी रंगो खमज़े लेहच़ा, धह्तेका हतिर; दंङ पिलातुस ए दोतंङ कुहतो, “दिह मीह बि खंणुई।” 6अपेहल यहुदी मोह्ड़े पुरोहित ए सैनिका ज़ि दुह खंणीर, ता हाऊष रंड्रा कुट्री लेहतिर, “दोबि क्रूसो टोईच़ी चढ़ाएतु, क्रूसंङ।” पिलातुस ए दोतंङ साते कुतोह, “केहच़ी ए दोबि लेन्ज़ा क्रूसो टोईच़ी चढ़ाएतेन; छना कुचे गिह्बी दिऊ अंद्रेग छले गलती माह तंङफा।” 7यहुदी सेंहणा ज़ि दोबि जुबाब रेंईर, “ञेंहतु ला कानून तोह दंङ दुह कानूनो हिसाबे दुह सच़ी केट्रिमी जोगे तोह छना कुचे दोई एनाबि परमेश्वरो योह कुहतो।”

8छना ए पिलातुसे दी गप्पा रेड्रिरी ता दुह महसे बेवा इलि। 9दंङ यच़ाह दरवारो तोंखा इलि दंङ यीशु हखा कुहतो, कांह अंऊरकि शुनाह? पर यीशु ज़ि दोबि छल्ले जुबाब माह रेंई। 10पिलातुस ए यीशु रंङ साते कुंई, “केई गेरंङ साते छिले माह कुट्रातन? छि केई माह ञेंहना कि कनिंङ रिहा लहज़िमी अधिकार गिऊ कछंङ तोह, दंङ कनिङ क्रूसो टोईच़ी चढ़ाएच़िमी अधिकार ला गिऊ कछंङ तोह।” 11यीशु ज़ि जुबाब रेंई, “अगर कनिंङ परमेश्वरो दोरच़ी रांहषी माह शुंईयां, ता कांह गिऊ टोहकठे छले अधिकार माह शुबी तोहई; दिऊ थल्जी अच़ि गिह्बी कांह हवाले लहतो, दोऊ पाप महस तोह।”

12दिरंङ पिलातुस ए दोबि रिहा लहज़िमी विचार लहरी, पर भीड़ो मीहरे हाऊषेके-हाऊषेके कुट्री लेहतिर, “अगर केई दिह्बी रिहा लोहन ता कांह महाराजाऊ मित्र माह शुनाह; अच़िला रज्ज़ा शुहबिमी दावा लोहतो दोई महाराजाऊ विरोध लहज़ा।”

13दिह गप्पा रेड्रा थल पिलातुस ए यीशु धह्तेका हति दंङ दुह ठहरि रिंङ रेंज़ा शिली अंऊर न्याय लहज़िमी ठहरि तोहई, अतिंङ इब्रानी भाषा रिंङ “गब्बता” कुट्रा तोईर, दंङ अंज़े दुह न्याय लहज़िमी ठहरि रिंङ बंङज़िरी। 14दीह फसह त्याहरो हप्तो तेयारी ओ ध्याड़ा तोहई दंङ निरा कि टेम तोहई: दोथर दोई यहुदी मीहतु हखा कुंई, “खंणुई, दिह ए शुह, केहतु रज्ज़ा!” 15पर दोरे हाऊष रंड्री लेहतिर, “दोबि सचे च़रतु! दोबि सचे च़रतु!” पिलातुस ए दोतंङ साते कुतोह, छि गेह केहतु रज्ज़ा बि क्रूसो टोईच़ी चढ़ाएपोग आ? यहुदी मोह्ड़े पुरोहितज़ि जुबाब रेंईर, “महाराजा कैसरा बि छोड़ेके ञेंहतु अरीला ऊई रज्ज़ा माह।” 16दोथर पिलातुस ए यीशु बि क्रूसो टोईच़ी चढ़ाएच़िमी थल्जी दोतु हवाले लेह च़रति।

क्रूसो टोईच़ी केट्री

(मत्ती 27:32-37; मरकु 15:21-24; लूको 23:26-31)

17दंङ सेनिक ज़ि यीशु बि दोरच़ी लेन्ज़ा शीलिरे, दंङ यीशु एनोह क्रूस उठाच़ा यरूशलेम शहरंङ च़ि धह्तेका इलि, अतिंङ खोपड़ीऊ अकारो ठ्रोह ठहरि कुट्री तोईर। दंङ इब्रानी भाषा रिंङ “गुलगुता।” 18दोर्तिंङ दोच़ी यीशु रंङ साते ऊई झुह्ट मीह ला क्रूसो टोईच़ी केरिर, इच्च़ा बि सुचंङ हासी दंङ अईसंङ फुचंङ हासी, दंङ बिचंङ यीशु बि। 19दंङ राज्यपाल पिलातुसे क्रूसो तोरिंङ बक्शे इच्च़ा तकती लगाएती, दंङ दोऊ टोईच़ी दिह च़ेहसी तोहई, “नासरत नगरो यीशु, यहुदी मीहतु रज्ज़ा।” 20दीह तकती महसे यहुदी मीहज़ी पडे़क्ति, छना कुचे दुह ठहरि अंऊर यीशु क्रूसो टोईच़ी चढ़ाएसी तोहई दुह यरूशलेम शहरो कछंङ तोहई, दंङ दुह तकतीरिंङ, इब्रानी, यूनानी, दंङ लातिनी भाषा रिंङ च़ेहसी तोहई। 21दोथर यहुदी मोह्ड़े पुरोहित ज़ि पिलातुस ओ हखा कुतोह, “यहुदी मीहतु रज्ज़ा था चेचुंई, पर दिह कि, अंऊ दोई कुहते, ‘गेह यहुदी मीहतु रज्ज़ा शुगाह।’ ” 22पिलातुस ए जुबाब रेंई, “गेह छना च़ेहसी तातग दुह लेहक्सतो माह।”

23अंऊ मुका सिपाही ज़ि यीशु बि क्रूसो टोईच़ी केह्चे च़रतिर, दंङ दोऊ खमज़े लेन्ज़ा दोऊ पी हिस्सा लहरिर, दंङ पिला सैनिकज़ि इच्च़ा-इच्च़ा हिस्सा लेहप्तिर, दंङ दोच़ी दोऊ धह्कतेकी खम ला लेन्ज़ा शिलिर पर दुह धह्कतेकी खम पेंषी माह तोहई पर तोरिंङ च़ि योंङ तचेक लहसी खमो इच्च़ा ए खन्नी रंङ बणेंके तोहई। 24झांह लेह सेनिक ज़ि एनातु बिचंङ बिचार लहरिर, “कि ञेंहच़ी दिऊ खन्नी माह लोहनी, पर चिट्ठ केओन कि दिह अतु शोतो।” दिह दिऊ थल्जी शुई कि अंऊ पवित्रशास्त्रा रिंङ च़ेहसी तोह दुह पूरा शुबी जूंस, “दोच़ी गिऊ खमज़ेर फाए केहरिर दंङ गिऊ धह्कतेकी खमो थल्जी चिट्ठ केहरिर।”

25दिऊ थल्जी सैनिका ज़ि ध्यांए लहरिर। यीशु ऊ क्रूसो कछंङ दोऊ याह, दोऊ याह ओ न्वाशा, क्लोपास ओ मेच़ा दंङ मगदल नगरो मरियम खड़े तोईरे। 26यीशु ज़ि एनोह याह ए दोऊ चेला बि अतंङ साते दोई दाह लहज़ाते एनोह कछंङ खंड्रिमी रंङ साते एनोह याह ओ हखा कुंई, “हे याह, खंणु दिह कांह योह शुह।” 27दंङ दुह चेलाओ हखा कुंई, “खंणु दिह कांह याह शुह।” दंङ दोऊ थले चेलाज़ि, दोबि एनोह चुंखा रेंज़ा शिलिर।

यीशु ऊ मौत

(मत्ती 27:45-56; मरकु 15:33-41; लूको 23:44-49)

28दिऊ थल यीशु ज़ि दीह ञेंहए कि धह दोई एनोह भत्ते कम पुरा लेह केहतो, दिऊ थल्जी कि पवित्रशास्त्रा रिंङ च़ेहसी भत्ते गप्पा हेले साबित शुबी जूंस, यीशु ज़ि कुंई, “गिह्बी तीस्कर लेहकी तोह।” 29दोर्तिंङ सिरका रंङ पिंङषी इच्च़ा राग्ज़ंन तोहई, दिऊ थल्जी अच़िया सिरका ओ बिचंङ अलेग लहसी सपन्ज बि लठी रिंङ केट्रा दोऊ आ रिंङ केहरिर। 30अपेहल यीशु ज़ि दिह सिरका लेहप्ती, ता कुंई, “पुरा शुई” दंङ पुंज़ा योंखा लेह सीए इलि।

भाला रंङ साते तिरच़ी

31दा दिह तेयारी ऊ ध्याड़ा तोहई, दंङ ऊईरग अरामो ध्याड़ा ए फसह ओ त्यार झुल्ला तोहई, दिह यहुदी मीहतु थल्जी इच्च़ा खास ध्याड़ा तोहई, दंङ दोच़ी माह जुंज़ातेर कि दिह ध्याड़ो टेमा दोतु फुक क्रूसो टोईच़ी शोतो दिऊ थल्जी दोच़ी पिलातुसो हखा कुईर, कि दोतु ठुड़ू रे थक्शे च़रतंई कि दोरे युरनाह सीए योर कि दोतु फुक योंखा तकशे च़रतेंई। 32दिऊ थल्जी सैनिका ज़ि अंज़े इदिऊ ठुड़ू तक्शे च़रति दोऊ थल अई दिऊ अरी दोरंङ साते क्रूसंङ तोईर। 33पर अपेहल यीशु कछंङ अंज़े खंईर कि दुह सीए इलजी तोह, ता दोऊ ठुड़ू मा थक्शी रे। 34पर सेनिकातु बिचंङ च़ि इदि बरछे रंङ साते दोऊ रिस्पा तिर्ज़े च़रति दंङ ध्वांए दोऊ अंद्रेग च़ि शुहई ए ती हुंच़िरी। 35अंऊ मीहे दिह भत्ते धिर खंणी, दोई गवाही रेंई, कि केहच़ी ला यीशु ऊ टोहकठे विशवास लोहन। दंङ दोऊ गवाही हेले शुह, दंङ दोई ञेंहु कि दोई सच्चाई रंङ साते कुट्रा। 36दी गप्पारे दिऊ थल्जी शुई कि पवित्रशास्त्रा रिंङ छि च़ेहसी तोह दुह पुरे शुहबी जूंस, “कि दोऊ अंऊला रुस्पा माह थक्शातोर।” 37दंङ अई इच्च़ा ठहरि रिंङ पवित्रशास्त्रा रिंङ दीह ला च़ेहसी तोह, “अंऊ दोच़ी दुह तिरज़ीर, दोरे दोऊ ए हखा खमोर।”

यीशु बि पथेक्च़ी

38दी गप्पातु थल अरीमतिया नगरो यूसुफ, अरी यीशु ऊ चेला तोहई, (पर यहुदी सेंहणा तु बेह्द चेहके दोई दिह गप्पा ब्याके तोहई), पिलातुस रंङ साते बिनती लहरी, कि गेह यीशु ऊ फुक रेंज़ा शोग आ, दंङ पिलातुस ए दोऊ बिनती रेड्रिरी, दंङ दोई अंज़े दोऊ फुक रेंज़ा शिली। 39नीकुदेमुस ला अरी तुई यीशु ऊ कछंङ रातारिंङ इल्दे, लगभग 33 किलो गंदरस ए रुठे बासंङ चीज़रे रेंज़ा हति। 40दंङ दोच़ी यीशु ऊ फुक हति, दंङ यहुदी मीहतु रीति रिवाज़ो हिसाबे दोऊ फुका रिंङ रुठे बासंङ साते चीज़ा तु लेप लहज़ी कफनो बिचंङ केहरिर। 41दुह ठहरि रिंङ अंऊर यीशु क्रूसो टोईच़ी केहतेर; दोर्तिंङ इच्च़ा बगीचा तोहई, दुह बगीचा ओ अंद्रेग इच्च़ा खरकोई कब्र तोहई, अंऊर तुई अरीला पथेक्सी माह तोहई। 42दिऊ थल्जी दोच़ी यीशु ऊ फुक दुह ए कब्रो गुफारिंङ केह्चे च़रतिर दुह कछंङ तोहई दंङ दुह यहुदी मीहतु अरामो ध्याड़ो तेयारी ऊ टेम ला तोहई।

Terpilih Sekarang Ini:

यहून्नो 19: LBFNT

Highlight

Kongsi

Salin