यहून्नो 20

स्ल्ज़ी कब्र

(मत्ती 28:1-7; मरकु 16:1-8; लूको 24:1-12)

1हप्ता ओ पहला ध्याड़ा रिंङ मगदल नगरो मरियम ऊई मेच़िमी रंङ साते मुंजे सरके अईता हंयार ए तोहई, कब्रङ अति, दंङ रघ कब्ररंङ इबिमी पितंङो दोरच़ी दोखा शुहचे खंणीर। 2दंङ दोई ज़रका रेंई, दंङ शमौन पतरस ए अई दुह चेलो कछंङ इलि अतंङ साते यीशु दाह लह्ज़ते, अंज़े कुतोह, “दोच़ी प्रभुऊ फुक बि कब्रङ च़ि हुंच़े लेन्ज़ा शिलोर; दंङ ञेंहच़ी माह ञेंहनी कि दोच़ी दुह अंऊर केह्चे केहतोर।”

3दंङ पतरस ए अई दुह चेला कब्रों हखा इलिर। 4दंङ झुल्ला साते-साते ज़रका रंड्री लेहकी तोईरे, पर अई दुह चेला पतरसो तुईज़ी शुहचे कब्रङ मुण्डा पिचे इलि। 5दंङ कोंङा शुहचे कफनो खमज़ेर दोर्तिंङ खंणी, पर दुह तोंखा मेहली। 6दंङ शमौन पतरस दोऊ थल-थल पिचे इलि दंङ कब्रों अंद्रेग इलि खमज़ेर ए तंङातोह। 7दंङ दुह यद अंऊ दोऊ मोद रिंङ कपषी तोहई, खमज़े रंङ साते माह तोहई, पर शत्‌ह ठहरि रिंङ दुह जिलज़े तोहई। 8दंङ अईसंङ दुह चेला अंऊ कब्रङ मुन्डा पिचे तोहई, तोंखा इलि दंङ खंड्रा विशवास लहरी कि यीशु सिमी दोरच़ी श्रींङे इलज़ा। 9पवित्र शास्त्रा रिंङ यीशु ऊ पाहठी दिह पक्‍का च़ेहसी तोहई कि दुह एनोह सिमी दोरच़ी यच़ाह श्रींङे योतो, पर दोरे अईता तचेक दिह समझेकी माह तोईर। 10दंङ दिहरे चेलारे एनोह चुंखा वापिस अच़ा इलिर।

मगदल नगरो मरियमा बि दर्शन

(मरकु 16:9-11)

11पर मरियम क्रपचा कब्रों कछंङ धह्कते ए खड़े तोहई दंङ क्रपा-क्रपा कब्रों हखा कोंङा शुहचे, 12झुह्ट स्वर्गदूता तिंङ छंङी खमज़े रंङ साते इच्च़ा बि कुमो हखा दंङ अईसंङ दोबि कोंज़ो बक्शे बंङज़ी तंङातो, खंणी अंऊर यीशु ऊ फुक पथेक्च़ी तरेर। 13दोच़ी मरियमा बि कुतोह, “हे न्वाशा, कांह छिले क्रपातन?” दोई दोतिंङ कुतोह, “दोच़ी गिऊ प्रभु ऊ फुका बि रेंज़ा शिलोर, दंङ गिह्बी पता माह कि अऊंर दोबि केहषी ततो।” 14दी कुट्रे थल दुह थलका शुई दंङ यीशु बि दोर्तिंङ खड़े तंङरी, पर दोई सेहच़ी मरति कि दुह यीशु शुह। 15यीशु ज़ि दोऊ हखा कुंई, “हे मेच़मी कांह छिले क्रपातन? दंङ अतिंङ पेट्रातन?” दोई बगीचा ओ माली चेहके दोऊ हखा कुंई, “हे श्री मान, अगर केई दोऊ फुक लेन्ज़ा शिल्दन ता गिह्बी कंड्रु कि अंऊर केहषी तातन, दंङ गेह दोऊ फुक रेंज़ा शोहग।” 16यीशु ज़ि दोबि कुतोह, “मरियम!” दोई थलका शुहचे दोऊ हखा इब्रानी भाषा रिंङ कुंई, “रब्बूनी!” मतलब “हे गुरु।”

17यीशु ज़ि दोबि कुहतो, “गिऊ कोन्ज़ा रिंङ ज़िल्ज़ाते गिह्बी था चऊ, छना कुचे अईता गेह पिता परमेश्वरो कछंङ इल्जी माह तोग, गिऊ चेला तु कछंङ इलजे दोतंङ साते कुडू, कि गेह घेंङौ पिता परमेश्वर ए केहतु पिता परमेश्वर दंङ घेंङौ परमेश्वर ए केहतु परमेश्वरो कछंङ य्वातग।” 18मगदल नगरो मरियम ए इलज़ा चेला तंङ साते कुंई, “गेह प्रभु बि तंङातग दंङ दोई गेरंङ साते गप्पा ला लहरी।”

चेला तु बिचंङ यीशु ऊ प्रगट शुहबी

19दुह ए ध्याड़ा रिंङ अंऊ हप्ता ओ पहला ध्याड़ा तोहई, ञोंकोल कि टेम रिंङ अंऊ मुका भत्ते चेलारे ठ्रोहका शुईरे; दोच़ी पितंङ बंद लेह च़रतिर छना कुचे दोरे यहुदी सेंहणा तंङ साते बेवा तोईरे, दंङ यीशु अति दंङ दोतु विचंङ खड़े शुहचे दोतु हखा कुंई, “केतिंङ शांति खोकसी जूंस।” 20दंङ दी कुट्रे थल दोई एनोह गुहड़ ए एनोह रिस्पा ओ ज़ख्म कंड्रिरी: दंङ चेलार यीशु बि खंड्रा ते महस खुश शुहचे इलिर। 21यीशु ज़ि यच़ाह दोतंङ साते कुंई, “केतिंङ शांति खोकसी जूंस; छना ठ्रोह गिऊ पिता परमेश्वरे गिह्बी संसारारंङ च़रसी तोह, ध्वांए गेह ला केतिंङ संसारारंङ च़रच़ातोग।” 22दीह कुट्रा दोई दोतु टोईच़ी फुह लहरी दंङ दोतंङ साते कुतोह, “पवित्र आत्मा लेहप्तुंई। 23केहच़ी अतुला मीहू पाप माफ लोहन, ता दोतु पाप माफ शुहचे योतो, दंङ अंऊ मीहतु पाप केहच़ी माफ माह लोहन, दोतु पाप माफ माह शोतो।”

खंड्री ए विशवास लहज़ी

(मरकु 16:14)

24थोमा अरी सनी चेला तु बिचंङ इच्च़ा तोहई, अतिंङ दिदुमुस (जुड़वा) ला कुट्री, अपेहल यीशु अंदे दुह मुक्का दुह दोर्तिंङ माह तोहई। 25अपेहल ऊई चेलाज़ि कुट्री लेहकी तोईरे, कि ञेंहच़ी प्रभु खयांतेनि, दंङ दोई दोतंङ साते कुतोह, “अपेहल तचेक गेह दोऊ गुहड़रिंङ मेख्खा ओ ज़ख्म माह खमोग दंङ दोऊ ज़ख्मा घेंङौ ब्रेमज़ा माह केयोग, दंङ दोऊ रिस्पा रिंङ घेंङौ गुहड़ माह केयोग दोहपल तचेक गेह विशवास माह लोहग कि दुह सिमी दोरच़ी श्रींङे इलज़ा।”

26इच्च़ा हप्ता ओ थल यीशु ऊ चेलारे यच़ाह इच्च़ा घरबारंङ ठ्रोहका तोईर, दंङ थोमा ला दोतंङ साते तोहई, दंङ पेतंङ बंद तोहई, दंङ यीशु अति दंङ दोतु बिचंङ खड़े शुहचे दोतु हखा कुहतो, “केतिंङ शांति खोकसोतो।” 27दंङ यीशु ज़ि थोमा रंङ साते कुतोह, “कनु ब्रेमज़ा रंङ गिऊ गुहड़रिंङ पछ रें खंणु, दंङ केनोह गुहड़ा बि गिऊ रिस्पा ओ ज़ख्मो अंद्रेग केह्चे खंणु। दंङ शक लेह ब्याड़ा लोहू, पर विशवास लोहू कि गेह श्रींङे तोतोग।” 28दीह रेड्रा थोमा ज़ि जुबाब रेंई, “हे गिऊ प्रभु, हे गिऊ परमेश्वर!” 29यीशु ज़ि दोबि कुहतो, “केई ता गेह खंड्राते गिऊ टोहकठे विशवास लहतन? धन्य शुहरे दोरे, अरी गिह्बी माह खंड्राते गिऊ टोहकठे विशवास लहज़ातोर।”

दीह कताबो मकसद

30यीशु ज़ि ऊई ला महस चिन्ह चमत्कार चेला तु तुईज़ी लहरि, अंऊ दीह कताबंङ च़ेहसी माह। 31पर दीह दिऊ थल्जी च़ेहसी तोह कि केहच़ी विशवास लांही, कि यीशु ए परमेश्वरो योह मसीह शुह: दंङ दोऊ टोहकठे विशवास लेह दोऊ मिंदंङ अनंत जीवन खोक्पोंई।

Terpilih Sekarang Ini:

यहून्नो 20: LBFNT

Highlight

Kongsi

Salin