Luk 24
24
Jizɔs a rɛr kɔ uku
(Matiyo 28.1-10; Mak 16.1-8; Jon 20.1-10)
1Ihɔ mahɛ ghu raadi, utur-utur, akasɛv hun vɛ teng iir ihuman ishighan ingin vɛ ɛr mɔ, uyovon kɔ uwar. 2Vɛ ɛnmɔ ingon ingin iku uwar mɔ ghiru amɛngɛr upav kɔ, 3kpa vɛ nɔr, vɛ ker ikum ina Uwun Jizɔs gha. 4Mɔ vɛru ghi yingan, Kɛsmɛ iyɔr ahar atire avo ghi ihan, akond avo a aam ɛn irimɛgh. 5Ghu uchiyagh akasɛv hun vɛ shir itogh inya, ne iyɔr hun vɛ kaa ghɛ avo na, “Aka nan sɛ umbun ikeren ɔr umuwa kɔ akponovɔ? 6Angwe han gha; a rɛr! Umburun ukwagh ɔɔrun una, mɔ aru ghu un kɔ Galili na. 7‘Ɛr vɛ ana Uwan Ɔro kɔ avo iyɔr abev, vɛ mand un ta ihɔ utar a rɛr.’ ” 8Ne vɛ umbur amuu ana.
9Mɔ vɛ hire kɔ uwar, vɛ ɔɔr ayɛghɛnɛv amban atsuwa puwɛ umɔm ghɛ agenɛv akaa amem angan a ɛr. 10Mɛri Madalin, Jowana, Mɛri ungɔ una Jɛm, ghɛ agenɛv amban vɛru urong, avo ne vɛ ɔɔr ayɛghɛnɛv amban atsuwa akaa angan. 11Kpa vɛ na akasɛv ambumɔ isima ibɛrɛn gha, ukwagh ɔɔrun uvo aru avo itiyo ikaa gha. 12Pita, amugh, ayots aza kɔ uwar hun. Mɔ ashir a ɛn ken a ɛn akond angan vɛ kang un aru agbir wayi, ne ayov, ghi iyinghan ukwagh ungwen a ɛr mɔ.
Jizɔs ava kɔ ayɛghɛnɛv anav ahar ghi ihang izan kɔ Emawas
13Ihɔ ingimɔ ayɛghɛnɛv anav ahar, vɛru ghi izan kɔ ahiye ungwen vɛ tayi na Emawas. Hiye hɔ Jerusalɛm uzend inimba itsindar tsar-umɔm tegh-tegh sɛ unɔr Emawas. 14Vɛru ghi ramen ghɛ arend akaa amem angan a ɛr mɔ. 15Mɔ vɛru ghi iramen ghɛ arend, Jizɔs ava aru ghi zenden ghɛ avo; 16Kpa vɛru imoɔr, ase avo abugh ɛn vɛ fɔ un gha.
17Apine avo, “Kine umbun ghi iramen uzenden ghɛ arend ihanga?”
Vɛ tire zungong, ghi ishon. 18Ɔr umɔm kɔ avo, ungwen vɛ tayi na, Kolopas, apine un, “Aka ɛn ku uwɛ tas ne ungwe ɔr uzend han Jerusalɛm ungwen ufɔ akaa angan a ɛr ken ahɔ angan gha?”
19Ne Jizɔs apine avo, “Kine akaa?”
Vɛ rumun, “Ukwagh una Jizɔs Ɔr Nazarɛ. Aru Ɔr uramen ɛchi Aonz, amuu ana ghɛ a ɛrɛn ana aru ghi ikɔw kɔ ase Aonz ghɛ ase iyɔr amem. 20Ataanɛv kɔ apɛɛnɛv anav Aonz ghɛ ataanɛv avasɛv vɛ na un na vɛ wuwa, ghɛ umanden un kɔ Itsingan ukon. 21Ungwen ghiru ghi isima ibɛrɛn na un ne ar Izrɛl. Ne aka nyan ihɔ ghu utar mɔ akaa angan a ɛr. 22Ghu sorun ukwagh hun, akasɛv amban kɔ atɛ uwaas vɛ va ɔɔr ɔs akaa atsɛrɛn. Vɛ za kɔ uwar nyan utur 23kpa vɛ ɛn ikɔm ina gha. Vɛ va ɔɔr ghu ɔs na va ɛn vudugɛr anav Aonz, amban vɛ kaa na angwe umuwa. 24Ne urong aas agenɛv vɛ za kɔ uwar hun vɛ ɛn ghɛru ɛnmɔ akasɛv hun vɛ kaa mɔ, kpa un vɛ ɛn ghɛ ana gha.”
25Ne Jizɔs akaa avo na, “Nan urannɛn ukwagh man, umbun fafa ghi isima ibɛrɛn ghɛ akaa amem angan aramenɛv ɛchi Aonz vɛ kaa gha! 26Kagba akan Ɔr tsɛghan una Aonz aya ichan ghɛ akaa angan sɛ anɔr kɔ utorov unav gha?” 27Akɔr ghi ɔɔrun avo akaa angan vɛ angɛr ghɛ ana kɔ ikaa Aonz amem tra Mosis kpem kɔ aramenɛv ɛchi Aonz amem.
28Mɔ vɛ kpember unɔrun hɔ ahiye ungwen vɛ zayi mɔ, Jizɔs a ɛr ɛn aza ghi ishi ghɛ uzend. 29Kpa vɛ kɔr uzɔ ghu un na, “Tsa ghu ɔs, imiye ingi kɔrun, ihɔ ingin ibɛ.” Ne anɔr ghɛ avo.
30Mɔ atɛma ghi iyan ghɛ avo, atɛng ubrɛd, ana isighan kɔ Aonz apav ana avo. 31Kpɛ ungumɔ ase avo abugh afɔ un, ne amugh ghɛ ahumbɛ. 32Vɛ pine arend, “Tam tsɛngha man ne ghɛru ɔs ghi shiyan kɔ asama tsɛng, mɔ aramayi ghu ɔs ghi ihang ungwen a ɔɔrɔyi ɔs akaa kɔ ghu ukaa Aonz gha?”
33Vɛ mugh vɛ hire kɔ Jerusalɛm. Ken ne vɛ atsɔ ayɛghɛnɛv puwɛ-umɔm ghɛ amban vɛru ghɛ avo vɛ zwang urong. 34Vɛru ghi ikaan na, “Ghu ukɔng! Uwun a rɛr aduwe kɔ ghu Samon.” 35Ne vɛ ayɛghɛnɛv ahar hun vɛ ɔɔr avo, ukwagh ungwen a ɛr ghɛ avo ghi ihang, ghɛ mɔ vɛ afɔ un ukpɛ ungwen apav ubrɛd mɔ.
Jizɔs aduwe kɔ ayɛghɛnɛv anav
(Matiyo 28.16-20; Mak 16.14-18; Jon 20.19-23; A ɛrɛn 1.6-8)
36Mɔ vɛru ghi ramen akaa angan, Jizɔs ava tire ghɛ avo ne akaa na, “Makun aru ghu un.” 37Ketsɛrɛ avo, vɛ ɛn na kɛ ajingɛjing ɔr ukpon. 38Jizɔs akaa ghɛ avo, “Kine asɛma ata un ukpo mana, kine umbun ghi iyingan kɔ ghɛ asɛma? 39Ɛnɛn sɛ avo aam ghɛ avor aam, ku mwe nan! Pɛrɛm sɛ hin ɛnɛn; ajingɛjing ghɛ run inyam iyɔro ghɛ akuhe gha, ɛn ghu ɛn mɛgwe ghɛ aa man.” 40Mɔ aramayi Jizɔs atɛs avo avo ana ghɛ avor ana. 41Kas mɔ vɛ na isima ibɛrɛn gha ɛchi kashiya avo tsɛng, Jizɔs apine avo, “Umbun ghu ukwagh uyana?” 42Vɛ na un isu ghi igbangnɛn, 43Ne a ɔz aya isu hun mɔ ayɛghɛnɛv vɛru ghi ɛnɛn.
44Jizɔs akaa ghɛ avo na, “Akaa angan ne mɛ ɔɔrɔyi un mɔ mɛruyi ghu un: Akaa angan amem a ɛr kpɛɛ ɛn vɛ angɛr ghɛ amwe kɔ Mɛnna una Mosis, ghɛ uka aramenɛv ɛchi Aonz ghɛ uka achama.”
45Ne Jizɔs abugh avo asɛma ɛnmɔ vɛru ghu ukwagh ufɔn ghu ikaa Aonz. 46Jizɔs akaa avo, “Ukwagh ungwen vɛ angɛr nan: Ɔr tsɛghan una Aonz aya ichan, akpo, ihɔ utar a rɛr kɔ uku. 47Ta ki itiye ina ne vɛ tire ta vɛ tsogh utar umuwem, ugɛman asɛma ɛn Aonz aguwe akaa abe avo, uhiyen kɔ Jerusalɛm. 48Un umbun ishiyada ghɛ akaa angan. 49Ɛr mɛ tind un Ajingɛjing Aonz ungwen Aonz Utir uwam atɔnd uzɔ. Kpa run kɔ Jerusalɛm kpem Aonz ana un ikɔw.”
Jizɔs akɔnd kɔ Aonz
(Mak 16.19,20; A ɛrɛn 1.9-11)
50Mɔ Jizɔs aduwe ghɛ avo vɛ nɔr kɔ Bɛtani, akond ɛvo ana kɔisa ana avo ibɛrɛn. 51Mɔ aruyi ghi nan avo ibɛrɛn, Aonz a ɔz un kɔisa avond avo. 52Ne vɛ tugh un, vɛ hire kɔ Jerusalɛm ghi isighan shisha. 53Vɛru kɔ itumbɛ Aonz kpem, usighan Aonz.
Terpilih Sekarang Ini:
Luk 24: UTA
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2024 Luke Initiative for Scripture Translation
