Luk 23
23
Ataanɛv jus vɛ ram ghu Jizɔs kɔ ishigh inagh Unom Palɛt
(Matiyo 27.1,2,11-14; Mak 15.1-15; Jon 18.28-38)
1Ne isum iyɔro ingimɔ vɛ mugh vɛ za ghu un kɔ Palɛt. 2Ne vɛ kɔr ghi iramen ghɛ ana, na, “Ɔr ungwen ava ghɛ mpav kɔ iyɔr avasɛv. Akaan ghi iyɔr na, vɛ akaa taayi ukpanɛv kɔ unom Siza gha ghɛ ukaan na un ne angwe Ɔr tsɛghan una Aonz, ghɛ Utor uwas.”
3Ne Palɛt apine Jizɔs, “Uwɛ ne ungwe utor una iyɔr Ujus?”
Jizɔs arumun, “Uwɛ ne ukaa mɔ.”
4Ne Palɛt akaa ataanɛv kɔ apɛɛnɛv anav Aonz ghɛ isum iyɔr hun, “Mɛ ɛn itiyo ikaa ingin mɛ na ɔr ungwen ibɛgh gha.”
5Kpa vɛ kpɛra, “Awan iyɔr isima itarɛn ghɛ itɛsɛn ina kɔ utar Judiya umuwem. Ahiye kɔ ahiye Galili kpem ne anɔr han Jerusalɛm.”
Palɛt atind Jizɔs kɔ utor Hɛrɔd
6Mɔ Palɛt amgban mɔ, Palɛt apine umgba ɔr hun angwe ku ɔr Galili. 7Mɔ Palɛt afɔn na Jizɔs angwe ku ɔr Galili ahiye ungwen Hɛrɔd angwe utor mɔ, atind un kɔ ghɛ Hɛrɔd, kpa ukpɛ ungumɔ Hɛrɔd aru kɔ Jerusalɛm. 8Mɔ Hɛrɔd a ɛnɛn Jizɔs, kɛ shiya un kaka, itiyo ikaa akɛrɛyi ungwen a ɛn ghɛ ana ghɛ ghu ɛnɛn akaa akondon iyɔr angan amgba ghɛ ana. Aker ɔ ɛnɛn ɛnmɔ a ɛr ukwagh ukondon iyɔr. 9Hɛrɔd apine un mpine tsɛng, Jizɔs abugh un uzɔ gha. 10Ataanɛv kɔ apɛɛnɛv anav Aonz ghɛ atɛsɛnɛv mɛnna Ujus vɛru atire, vɛ ramayi ghɛ ana ghi imo gbong. 11Ne Hɛrɔd ghɛ uwaiku anav vɛ ahoo un ghɛ usen un. Vɛ wa un ikɔnd utoro, Hɛrɔd atind un kɔ Palɛt. 12Ihɔ ingimɔ Hɛrɔd ghɛ Palɛt vɛ ya ikar, tegh-tegh ukpɛ ungwen vɛru ghi itsɔn.
Ana-uzɔ uku una Jizɔs
(Matiyo 27.15-26; Mak 15.6-15; Jon 18.39—19.16)
13Palɛt ataa urɔng ataanɛv kɔ apɛɛnɛv anav Aonz, ataanɛv Jus ghɛ iyɔr Ujus, 14akaa avo na, “Ghu van ghu ɔr ungwen kɔ umuɛ na ɔr ungwen ava ghu mpav kɔ iyɔr Ujus. Mpine un kɔ ase un kpa mɛkɔr ukwagh ungwen mɛ na un ibɛgh gha. 15Hɛrɔd kpa akɔr gha ne atind un va kan ghu ɔs; ɛnmɔ ɔ ɛnɛn a ɛr ukwagh ungwen vɛ wuwa un gha. 16Ɛn ghɛru mɔ, mɛ na un ichan mɛ de un.” 17[A ɔɔr mɔ itiyo ikaa itind iru ingiyen vɛ adu ɔr Ujus kɔ ugadi ihɔ itungnun ingin uku ukar ghu ɔs mɔ].
18Avo amem ghu uzɔ umɔm vɛ kaa na, “Wuwa un! Hin de Barabas!” 19(Vɛ wa Barabas kɔ ugadi itiyo ikaa aru ɔr unɔngun ghu uganyi ghɛ ɔr uwuwan iyɔr.)
20Palɛt aker na atuwa Jizɔs, ashi aram va ghɛ avo. 21Kpa vɛ ram ghi imo gbong, “Mand un! Mand un!” 22Ne Palɛt aram ghɛ avo ukwagh utar: “Kine ukwagh ube ɔr ungwen a ɛrɛ? Mɛ ɛn itiyo ikaa ingin mɛ na uzɔ na vɛ wuwa un gha. Ɛnmɔ ghɛru mɔ mɛ gbire un sɛ mɛ de un.” 23Kpa ghi imo gbong vɛ kong urɔng na mand un, amo avo akar avo. 24Ne Palɛt a ɛr mɔ vɛ ker, 25adu ɔr hun ungwen aru kɔ ugadi itiyo ikaa anɔngɔyi uganyi ghɛ uwuwan iyɔr, ungwen vɛ pine mɔ. Ne arumun na vɛ ɛr ghu Jizɔs ɛnmɔ vɛ ker.
Uwaiku vɛ mand Jizɔs kɔ Itsingan ukon
(Matiyo 27.32-44; Mak 15.21-32; Jon 19.17-27)
26Mɔ uwaiku vɛ yovoyi ghu Jizɔs, vɛ kɔr Simon umar inya ahiye Sirɛn, ungwen aru ghi inɔrun kɔ Jerusalɛm, vɛ nyɛr un ghɛ Itsingan ukon hun na atɛng. 27Isum iyɔr tsɛng idonda un, Akasɛv kpa vɛru kɔ isum iyɔro hun amban vɛ vangnayi na Jizɔs ɛr a akpo. 28Jizɔs agɛma akaa ghɛ avo, “Akasɛv ghu Jerusalɛm, ka vangnan amwe gha; vangnan imɛnɛgh ikonogh ghɛ myem avonov. 29Ahɔ anga ghi ivan ungwen ukaan na, ‘Ibɛrɛn iru ghɛ akasɛv amban vɛ tsa ikem, usagh ungwen angwe mar gha ghɛ utumbagh ukun unku amb uwan gha!’ 30Ta
“ ‘Vɛ kaa kɔ ghi igo, “Gba ghu ɔs!”
Ghɛ agɛr, “Kuu ɔs!” ’
31Ɔ ɛn iyɔr vɛ ɛr akaa angan ghu ukon urɛr, ki kine vɛ ɛr ghu ukon umuwan gha?”
32Uwaiku hun vɛ yovoyi ghɛ ayiv ahar ghɛ Jizɔs, uwuwan avo. 33Kpɛ ungwen vɛ biye ahiye ungwen vɛ tayi na “Ugbend itogh,” vɛ mand Jizɔs hen, ghɛ ayiv ambumɔ, umɔm kɔ uvogh ayanɛgh ghɛ ugen kɔ uvogh amesɛgh. 34Jizɔs akaa na, “Utir, guwe ukwagh ube uvo, vɛ fɔ kwagh ungwen amba ghi ɛrɛn gha.” Ne vɛ bur ikond ina ghu udo.
35Mɔ iyɔr vɛ ruyi ɛnɛn, ataanɛv Ujus vɛru ghi iramen ana. Vɛ kaa na, “Arǝn agenɛv; ar sɛ imɛnɛgh inagh ɔ ɛn angwe Ɔr tsɛghan una Aonz, ungwen Aonz atsuwa.”
36Vɛ uwaiku kpa vɛ va ram ghɛ ana. Vɛ na un masɔrum amban mangats, 37vɛ kaa na, “Uru utor Ujus, ar imɛnɛgh ikow.”
38Vɛ angɛr kɔ Itsingan ukon isa na: Utor Ujus nan.
39Uyi umɔm kɔ ahar amban vɛ mand mɔ aram ana na: “Uwɛ ne ungwe Ɔr tsɛghan una Aonz gha? Ar imɛnɛgh ikow ghu ɔs!”
40Kpa uyi ungen mɔ avenda ghu un na, “Uchiyan Aonz gha, mɔ ungwe ghi ichan imɔm ghu unu? 41Ɔs ahar ichan iyaas ingiye jing, Ghi kor ichan ingiyen ghɛ a ɛr aas. Kpa ɔr ungwen a ɛr ukwagh ube gha.”
42Ne akaa na, “Jizɔs, umburum ghu ukpɛ ungwen uva ghɛ utorov uvov.”
43Jizɔs arumun un na, “Ukɔng mɛ ɔɔr ghu uwɛ, nyan uru ghu umwe kɔ ahiye una Aonz.”
Jizɔs akpo
(Matiyo 27.45-56; Mak 15.33-41; Jon 19.28-30)
44Ghɛru atɛ usov, imiye iwa hɔ utar ungumɔ kpem ahuwa atar ghu uso, 45ighang iki agham va gha. Ne ikond ingiyen kɔ itumbɛ Aonz ipav apav ahar. 46Jizɔs ataa ghɛ imo gbong, “Utir, mwa ajingɛjing uwam kɔ uvogh ukow.” Mɔ akaan mɔ, akpo.
47Ɔr uwaiku utaan ugen, a ɛnɛn akaa angan a ɛr mɔ, asigha Aonz akaa na, “Ukɔng ɔr ungwen aru ɔr gbɛngang.” 48Mɔ iyɔr amban vɛ gamber mɔ vɛ ɛnɛn akaa angan a ɛr, vɛ ahir ghɛ mariyam ase. 49Kpa amem amban afɔ Jizɔs ghɛ akasɛv amban vɛ donda un Tera kɔ Galili, vɛ tire marɛmb, ɔ ɛnɛn akaa hun.
Vɛ yii Jizɔs
(Matiyo 27.57-61; Mak 15.42-47; Jon 19.38-42)
50Ɔr ugen aru ungwen vɛ tayi na Josɛf, aru ɔr usɛ ghɛ ɔr gbɛngang, aru ɔr umɔm kɔ itiyo Ujus. 51Kpa avenda iyu akaa abe a ɛrɛn angan ataanɛv Ujus vɛ ker na vɛ ɛr. Aru ɔr Arimatiya, kɔ ahiye utan Judiya, un kpa akɛghɛyi utorov unav Aonz. 52Ne aza kɔ ghu Palɛt, apine ikum ina Jizɔs. 53Ne ashire ghi ikum hun, akang ghɛ akond ikong ayii kɔ uwar ungun vɛ gba ghu uvanz, ungwen amba yii ɔr ken gha. 54Ghɛru ihɔ iwan iyɔr, mɔ Ihɔ imɛmɛn Ujus ihiye kpa.
55Akasɛv amban vɛ donda Jizɔs Tera kɔ Galili vɛ donda Josɛf vɛ za ɛn uwar hun ghu mɔ vɛ gbir ikum ina. 56Ne vɛ hire kɔ achiya vɛ za ghi ɛrɛn iir ihuman ishighan. Kpa vɛ mɛm ghi Ihɔ imɛmɛn Ujus ɛnmɔ ina uzɔ ina Aonz ikaa.
Terpilih Sekarang Ini:
Luk 23: UTA
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2024 Luke Initiative for Scripture Translation
